SAN MATEO 22

Rey banqueteta wakichin

1-2Jesús ujtawan parlarqa paykunaman rijch'anachinaswan, nispa: Janaj pacha reinoqa rijch'akun, uj rey, wawan casarakushajtin jatun mikhuyta wakichejman. 3Kamachisninta kacharqa, jatun mikhuyman wajyasqasta pusamojta, paykunataj mana jamuyta munarqankuchu. 4Ujtawan waj kamachisnintañataj kacharqa, nispa: Tukuy ima wakichisqaña, jamullachunkuña; wira uywasta, wira torosta ima ñak'achiniña. Chayrayku jamullachunkuña jatun mikhuyman. 5Paykunataj mana kasuspa, ujnin chajranman riporqa, ujnintaj qhatoj. 6Wakinkunataj, reypa kachasninta jap'ispa maqarqanku, wañucherqankutaj. 7Reytaj chayta uyarispa phiñakorqa, uj tropa soldadosnintataj kacharqa, chay runa wañuchista tukuchinankupaj; llajtankutataj ruphaykuchinankupaj. 8Chaymantataj wakin kamachisninman nerqa: Cheqamanta jatun mikhoyqa wakichisqa kashan, wajyachisqasniytaj mana jatun mikhuyniypaj jinachu kanku. 9Kunanqa riychej, ñankunapi tarisqaykichejtakama banqueteman wajyamuychej. 10Kamachistaj ñankunaman llojsispa tarisqankutakama wajyarqanku, allin mana allin kajkunata. Ajinamanta casamiento wasiman runasta junt'aykuchimorqanku mikhunankupaj.

11Reytaj wajyasqasta qhawaj yaykorqa; chaypitaj uj runata rikorqa, mana casamiento p'achayojta. 12Nerqataj: Kausaqéy, imajtintaj kayman yaykumorqanki mana casamiento p'achayojri? Paytaj ch'inlla karqa. 13Reytaj kamachisninman nerqa: Chakin makin watasqata jawa laqhaman wijch'uychej; chaypitaj waqay, kiru k'arukuytaj kanqa. 14Wajyasqasqa ashkhas, ajllasqastajrí pisis kanku.

Impuestota qonamanta

(Mr 12.13-17; Lc 20.20-26)

15Fariseostaj riytawan tantakuspa yachachinakorqanku, ima parlasqallampipis Jesusta ch'ataykunankupaj. 16Paykunataj kacharqanku partenkumanta kajkunata, herodianostawan; Jesusman nimunankupaj: Maestro, yachayku qan cheqan sonqo kasqaykita, Diospa ñanninta cheqanta yachachisqaykita; mana runaj parlasqanta kasuspa. Qanqa mana runaj rijch'aynillantachu qhawanki. 17Ima ninkitaj: Allinchu kanman impuestota Cesarman qona, manachu?

18Jesustaj, sajra yuyayninkuta yachaspa nerqa: Puraj uyas. Imaraykutaj pantachiwayta munankichej? 19Rikuchiwaychej impuesto qolqeta.

Paykunataj, uj denario qolqeta jaywarqanku. 20Jesustaj paykunata taporqa: Pejpa uyantaj kay, pejpa sutintaj kay churasqa?

21Paykunataj kuticherqanku: Cesarpata, nispa. Chaypachataj paykunaman nerqa: Cesarpata kajtaqa, Cesarman qopuychej; Diospata kajtataj, Diosman qopuychej.

22Kayta uyarispa t'ukorqanku; riporqankutaj Jesusta saqerparispa.

Wañusqas kausarimunankumanta

(Mr 12.18-27; Lc 20.27-40)

23-24Chay p'unchayllapitaj, saduceos Jesusman jamorqanku. Paykunaqa ninku, wañusqasmanta kausarimuy mana kasqanta. Jesustataj taporqanku, nispa: Maestro, Moisesqa nerqa: Pillapis, mana wawasniyoj wañunman chayqa, wauqen casarakuchun chay viudawan, wauqempa miraynin rikhurinampaj. 25Noqayku ukhupi qanchis wauqes karqanku. Ñaupaj kaj casarakorqa, warmimpi mana wawan karqachu, wañuporqataj, warmintaj cuñadonwan casarakaporqa. 26Ajinallataj karqa iskay kajwan, kinsa kajwampis. Ajinamanta qanchisnintin wañuporqanku. 27Tukuyninkoj qhepantataj, chay warmipis wañupullarqataj. 28Chantá, kausarimuypeqa, mayqenninkoj warmintaj kanqa, qanchisnintin kausarimojtinkuri? Qanchisnintinwan casarakorqaqa.

29Jesustaj paykunaman kuticherqa: Qankunaqa pantasqas kankichej, mana Escriturasta rejsisqaykichejrayku, nitaj Diospa atiynintapis. 30Wañusqasmanta kausarimuypeqa manaña casaranqankuchu; nitaj casarachenqankuchu. Janaj pachapeqa, Diospa angelesnin jina kanqanku. 31-32Wañusqakunaj kausarimuyninmantaqa, manachu leerqankichej, Dios imatachus nisorqachej, chayta? Ajinata nerqa: Noqa Abrahampata, Isaacpata, Jacobpata ima Diosnin kani. Mana Diosqa wañusqaspa Diosninchu, astawanqa kausajkunajta.

33Kay imasta uyarispataj runasqa, yachachiyninmanta t'ukorqanku.

Jatun kaj kamachiy

(Mr 12.28-34)

34Fariseostaj tantakorqanku, saduceosta Jesús ch'inyachisqanta yachaspa. 35-36Paykunamanta ujnin, leymanta yachachejtaj, pantachiyta munaspa taporqa: Maestro, leypa kamachiynimpi mayqentaj aswan jatunri?

37Jesustaj kuticherqa: Señor Diosniykita munakunki tukuy sonqoykiwan, tukuy almaykiwan, tukuy yuyayniykiwantaj. 38Kaymin leypa kamachiynimpi aswan jatun, ñaupaj kajtaj. 39Iskay kaj kamachisqaqa, ñaupaj kajman rijch'akun: Runa masiykita munakunki qan kikiykita jina. 40Kay iskay kamachiykunapi tukuy ley junt'akun, profetaspa nisqankupis.

Pejpa churintaj Cristori?

(Mr 12.35-37; Lc 20.41-44)

41-42Fariseos tantasqa kashajtinku, Jesús paykunata taporqa, nispa: Ima ninkichejtaj Cristomanta, pejpa Churintajri?

Paykunataj kuticherqanku: Davidpa Churin, nispa.

43-44Jesustaj nerqa: Imaraykutaj Davidqa, Espiritupi payta Señor nerqari?, nispa: Señorqa Señorniyman nerqa: Tiyakuy pañaynejpi, enemigosniykita chakisniyki uraman churanaykama. 45David kikinchus payta Señor nin chayqa, imaynamantataj Cristoqa Davidpa churin kanmanri?

46Mana pipis kutichiyta aterqachu; manañataj astawan taporqankuchu.

Currently Selected:

SAN MATEO 22: QCHSB

Highlight

Copy

Compare