SANTIAGO 3

Runaj siminmanta

1Hermanosníy, ama ashkhachu yachachejkuna kaychej. Yachankichej jina, astawan juchachasqas kananchej tiyan. 2Tukuyninchej ashkha kutita pantanchej. Pichus mana pantanchu parlasqampi chayqa, chaymá sumaj runaqa. Paytaj atinman tukuy cuerponwan kasuchikuyta. 3Caballospa siminman frenota churanchej chayqa, caballosqa kasukunku. Tukuy cuerpontataj maynejmampis apayta atinchej. 4Qhawariychej buquestapis. Chay jina jatuchaj kanankupaj, sinch'i wayraj apaykachasqasnin, uj juch'uy timón nisqawantaj runaqa purichin, q'ewintaj maymanchá munasqanman. 5Ajinallataj qallupis juch'uysitu kanampajqa, may jatun kasqanta yuyakun. Uj chhikan ninaqa may jatun sach'a montetapis ruphaykuyta atin. 6Qallurí uj nina, sajra imaswan junt'asqa. Qalloqa cuerpojta kaspa sajrata chimpachin, infierno kikintaj qalloqa jap'irichin, tukuy kausaynimpitaj larwachin. 7Runaqa atinman tukuy laya sajra animalesta mansuyachiyta, p'isqosta, katarista, challwasta, yakupi kausaj animalesta ima. 8Manataj pipis atinmanchu qalluta mansuyachiyta; imaraykuchus uj sajra mana mansuyachiy atina, wañuchintaj venenowan junt'asqa kaspa. 9Kay kikin qallullawantaj yupaychanchej Señorninchej Dios Tatanchejta. Chayllawantaj maldicinchej runa masisninchejta. Runasqa Diospa rijch'ayninman jina ruwasqas kanku. 10Kikin simillamantataj llojsin Diosta yupaychanas, runasta maldicinas. Hermanosníy, kayqa mana jinachu kanan tiyan. 11Uj kikin juturillamantachu llojsinman misk'i yaku, k'ara yakupis? 12Hermanosníy, atinmanchu higo sach'aqa aceitunasta poqoyta, chayrí uva sach'achu higosta poqoyta atinman? Ajinata manallataj atinmanchu uj juturillamanta llojsiyta k'ara yaku, misk'i yakuwan.

Patamanta yachaykuna

13Qankunamanta mayqellampis yachayniyoj kanman chayqa, rikuchichun sumaj kausayninta, llamp'u sonqowan yachayninman jina. 14Chayrí, jaqay qhawanakupichus, churanakupichus sonqoykichej kashan chayqa, ama jatunchakuychejchu, nitaj cheqa kajpa contranta llullakuychejchu. 15Kay yachayqa mana Diosmantachu jamun, astawanqa kay pachallamanta, aychamanta, supaymanta ima. 16Maypichá qhawanaku tiyan, churanakupis, chaypeqa tukuy imaymana pejtu tiyan, sajra ruwaykunataj. 17Diosmanta jamoj yachayqa llimphu, sonqo tiyakuyniyoj, munakuyniyoj, khuyakuywan junt'asqa, sumaj poqoyniyoj, sut'inta ruwajtaj, manataj puraj uyachu. 18Cheqan kajpa poqoynenqa, sonqo tiyakuypi tarpusqa, allin kausaypi kajkunapaj.

Currently Selected:

SANTIAGO 3: QCHSB

Highlight

Copy

Compare