GÁLATAS 1

Pabloj napaykuynin

1Noqa Pablo, apóstol kani, mana runaspa churasqanchu nitaj paykunaj kachasqanchu. Manachayqa Jesucristonejta churasqa kani, Dios Tatanejtataj; pichus Cristota wañusqakunamanta kausarichimorqa. 2Noqawan kashanku chay tukuy hermanoswan, Galaciapi kaj iglesiasman napaykamuyku. 3Qankunapaj kachun khuyakuy, sonqo tiyakuytaj, Dios Tatanchejmanta, Señor Jesucristomantawan. 4Pay kikin wañorqa juchasninchejrayku, kay sajra p'unchaykunamanta kacharichinawanchejpaj, Dios Tatanchejpa munayninman jina. 5Pay yupaychasqa kachun wiñaypa wiñaynimpaj. Amén.

Mana waj evangelio kanchu

6T'ukuni chay jina usqhayta karunchasqaykichejmanta Diosmanta, pichus Cristoj khuyakuyninrayku wajyasorqachej, waj jina evangeliota qhatisqaykichejmantapis. 7Cheqamanta mana waj evangelioqa kanchu; manachayqa wakin runakuna tiyan qankunata pantachejkuna, Cristoj evangeliontataj waj jinaman tukuchiyta munanku. 8Noqaykuchus, chayri janaj pachamanta jamoj angelchus, chay evangeliota willasqaykumantaña, waj jina evangeliotataj willasunkichejman chayqa, maldicisqa kachun. 9Ñaupajta nerqaniña, kunan nillanitaj: Pillapis chay evangeliota uyarisqaykichejmantaña waj evangeliotataj willasunkichejman chayqa, maldicisqa kachun.

10Chantá kunanqa runakunamanchu, chayrí Diosmanchu allin rijch'ayta mask'ashani? Chayrí, runastachu kusichiyta munashani? Runastarajchus kusichiyman chayqa, mana Cristoj kamachinchu kayman.

Pabloj ruwasqan

11Hermanos, yachaychej noqaj willasqay evangelioqa mana runaj nisqanman jinachu kasqanta. 12Noqaqa evangeliota mana jap'erqanichu nitaj yachakorqanichu pi runamanta, manachayqa Jesucristo sut'inchawasqanrayku yachakorqani.

13Ñapis qankunaqa uyarerqankichejña noqamanta, imaynatachus ñaupajta judiospa yachachiynimpi kashaspa, Diospa iglesianta anchatapuni qhatiykacharqani chinkachinaypaj. 14Ashkha mita masisniyta llajtaypi atiparqani, judiospa yachachiynimpi; tatasniypa yachachiyninta ancha munakuywan waqaychaspa. 15Chantá, maypachachus Dios munarqa wajyawayta, chaypacha khuyakuyninrayku mamaypa wijsanmantapacha ajllawarqa. 16Diosqa rejsichiwarqa Churinta, paymanta gentilespa chaupimpi willanaypaj; chaypachataj mana pi runatapis tapurikorqanichu. 17Manataj Jerusalenmanchu wicharerqani, noqamanta astawan ñaupajta karqanku chay apostolesman, manachayqa Arabiaman rerqani. Chaymantataj ujtawan Damascoman kutirerqani.

18Chaymantataj kinsa watamanta Jerusalenman wicharerqani Pedrowan parlanaypaj; paywantaj chunka phishqayoj p'unchayta karqani. 19Chaypitaj mana mayqen apostoltapis rikorqanichu, manachayqa Señorpa wauqen Santiagollata. 20Kay imasta escribimuykichej, Diospa ñaupaqempi mana llullakuspa.

21Chaymantataj rerqani Siria jallp'asman, Cilicia jallp'asman ima. 22Judeapi, Cristopi kaj iglesias manaraj rejsiwarqankuchu. 23Paykunaqa uyarillaj kanku: Jaqay pichus ñaupajta qhatiykachawaj kanchej tukuchiyta munaspa, chay, kunanqa femanta willashan, nispa. 24Ajinata Diosta yupaycharqanku noqarayku.

Currently Selected:

GÁLATAS 1: QCHSB

Highlight

Copy

Compare