Danielmantawan Belmantawan 14
14
Danielmantawan Belmantawan
1Rey Astiages wañupusqanmanta, ripusqanmantataj ñaupa tatasnimpaman, Persia llajtayoj Ciro reyman tukorqa. 2Danielqa chaypacha allin qhawasqa karqa, reytaj payta munakoj tukuy amigosninmanta astawan.
3Babiloniospata kaporqa uj lanti Bel nisqa. Chay ídolo lantimanqa sapa diapaj qoj kanku sojta pachaj qanchis chunkayoj kilota trigo jak'umanta. Chantaqa, tawa chunka ovejasta, sojta litro vinotawan. 4Rey Astiagesqa k'umuykukoj chay idoloman, rejtaj sapa día yupaychakoj. Danieltaj Diosnillanta yupaychakoj. 5Uj kuti rey Astiagesqa Danielqa tapusqa: Imaraykutaj mana yupaychankichu Belta?, nispa. Danieltaj kutichikusqa: Noqaqa mana k'umuykukojchu kani runa makiwan ruwasqa lantiman, manachayqa kausakoj Diosllaman. payqa janaj pachata kay pachatawan ruwarqa, tukuy runastataj kamachin.
6Reytaj nisqa: Manachu Belqa kausakoj Dios? Manachu rikunki mashkhatachus mikhun, ujyantaj sapa día?
7Chayta uyarispa Danielqa asirikusqa. Nisqataj: Ama ch'aukiyachikuychu, reyníy, nispa. Chay lantej ukhonqa t'urulla. Jawamanta bronce. Mana ni jayk'aj mikhunchu nitaj ujyanchu.
8Reytaj phiñakusqa chayta uyarispa. Chantataj wajyachimusqa Belpa sacerdotesninta, nisqataj: Niwaychej pichus chay mikhunasta mikhun. Mana chayrí, wañunkichej, nispa.
9Sichus rikuchiwankichej Belpuni chayta mikhusqanta, Daniel wañuchisqa kanqa Belpaj sajrata parlasqanrayku. Danieltaj nisqa reyman: Nisqaykiman jina ruwakuchun, nispa. 10Belpa sacerdotesnenqa qanchis chunka karqanku, mana yupaspa warmisninkuta wawasninkutapis. Reytaj rerqa Danielwan khuska Belpa templonman. 11Belpa sacerdotesnenqa nerqanku: Rikushanki. Noqaykoqa ripushaykuña, nispa. Qampuni, reyniyku, churaykullay mikhunatawan vinotawan. Chantaqa, punkuta wisq'aykunki, selloykiwantaj ch'ataykunki.
12Q'aya paqarin kutimojtiykitaj, rikunki chayqa Belqa mana tukusqanta imatachus kunan churanki chayta, chaypacha noqayku wañuyman risqayku. Mana chayrí, Daniel wañuchisqa kachun tumpawasqaykurayku.
13Mana ni ima dakuspalla kasharqanku sacerdotesqa, imaraykuchus mesa urapi ruwachisqanku uj pakasqa punkuta maynintachus sapa kuti yaykoj kasqanku temploman mikhoj. 14Sacerdotes ripusqankumantaña rey churasqa mikhunata Belpa ñaupaqenman. Chaykama Daniel kamachisqan nisqa ushphata t'akaranankuta tukuynejpi templo ukhupi. Reyqa sapallan chaypi kasharqa. Chaymanta, tukuyninku jawaman llojserqanku. Wisq'asqa punkutataj sellaykorqanku reypa sellonwan. Chayta ruwaspataj, riporqanku. 15Ch'isitaj sacerdotesqa, sapa kuti jina, yaykorqanku warmisnintin wawasnintin ima. Mikhorqankutaj ujyarqankutaj tukuy imata. 16Q'ayantin tutamanta reywan Danielwan temploman chayarqanku. 17Reytaj taporqa: Sello p'akisqachu, Daniel?, nispa. Danieltaj nisqa: Mana p'akisqachu, reyníy, nispa.
18Punkuta kichariytawantaj, rey qhawarqa mesaman. Qhawaspataj, sinch'ita qhaparerqa nispa: Bel, jatun kanki! Qanqa mana ch'aukiyankichu.
19Danieltaj asirikorqa, manataj munarqachu reyqa temploman yaykunanta. Chantaqa nerqa: Reyníy, rikuymá pampata. Niytaj pejkunajpatachus kay lastrosqa, nispa.
20Reytaj: Rikushani chaki lastrosta. Qharispata, warmispata, wawaspata sina, nispa. 21Chaymantataj reyqa may phiñasqa presochachisqa sacerdotesta, warmisnintinta, wawasnintinta ima. Paykuna reyman rikucherqanku chay pakasqa punkuta, mesa patapi kasharqa chayta, maynintachus yaykoj kasqanku temploman mikhuykoj. 22Reytaj nerqa tukuy chaykunaqa wañuchisqas kanankuta. Qorqataj idolota Danielman. Paytaj t'unarparicherqa chay idolota, templotataj urmacherqa.
Danielmantawan katarimantawan
23Kasqa nin uj jatun katari mayqentachus Babilonia llajtayoj runasqa yupaychaj kasqanku. 24Reyqa Danielman nisqa: Niwajchu kay diosqa mana kausakoj dios kasqanta?, nispa. Paytaqa yupaychanayki tiyan.
25Danieltaj kutichikusqa: Noqaqa Señor Diosniyta yupaychani, paylla kausakoj Dios kasqanrayku, nispa.
26Nisqataj: Reyniy, licenciaykiwan chay kataritaqa wañuchiyman. Mana espadawanchu wañuchisaj nitaj k'aspiwanchu. Reytaj: Licenciata qoyki, nispa nisqa.
27Chaymantataj Danielqa mask'asqa alquitranta, wirata, chujchastawan. Tukuy chaykunata t'impuchisqa. Chantaqa, tukuy chaywanqa uj qoluta ruwasqa. Chay qolutaqa katarej siminman sat'iykusqa. Katareqa mikhukapusqa. Oqoytawantaj ujta phatarparisqa. Chantaqa Daniel nisqa: Kaytaqa qankuna yupaychaj kankichej!
28Babilonia runasqa kayta yachaspa anchata phiñakusqanku, oqharikusqankutaj reypa contranta. Nisqankutaj: Reyqa judioman tukun, nispa. Nillasqankutaj: Payqa Belta t'unacherqa, katarita wañucherqa, sacerdotestapis.
29Chantaqa reypaman risqanku nisqankutaj: Danielta qowayku. Mana chayrí qanta wañuchisqayku ayllusniykitapis.
30Rikuspa reyqa munasqankutapuni imallatapis ruwayta, qollarqa Danielta paykunaman. 31Runastaj Danielta wijch'umorqanku uj pozoman. Chay pozo ukhupi leonesqa junt'ita kasqa. Chay ukhupi Danielqa sojta día junt'ata kakusqa. 32Chay pozopi qanchis leones kasqa. Chay leonesmanqa qoj kasqanku mikhunankupaj iskay runa ayasta iskay ovejastawan. Chay diataj mana ni imata jaywasqankuchu, Danielta mikhuykunankupaj.
33Chay kikin tiempollapitaj Judeapi tiyakoj uj profeta Habacuc sutiyoj. Chay Habacucqa qoqawita wakichisharqa apanampaj llank'ajkunaman. T'antastapis churasqa uj kanastaman. 34Chantaqa, Diospa angelnin rikhurimuspa nisqa: Chay qoqawitaqa Danielman apanki. Payqa Babiloniapi kashan uj pozo ukhupi, leones chaupipi, nispa.
35Habacucrí kutichikusqa: Wiraqochi, Babiloniata mana ni jayk'aj rikorqanichu. Ni yachanipischu maypichus chay pozoqa, nispa.
36Chantaqa Diospa angelnin payta chujchasninmanta jap'ispa, wayra phukuywan Babiloniakama pusasqa sayarichisqataj pozoj qayllampi. 37Chaymantataj: Daniel, Daniel, nispa Habacuc qhaparisqa. Señor apachimusorqa kay qoqawita. Jap'ikuy, nispa nisqa.
38Danieltaj nisqa: Diosníy, qanqa noqamanta yuyarikunki. Mana saqerparinkichu munakusojkunata.
39Daniel mikhushajtinraj Señorpa angelnin usqhayllata Habacucta llajtanman pusakaporqa. 40Qanchis diamantawan reyqa risqa waqaj Daniel wañupusqanmanta. Pozoman chayaspataj uraman qhawasqa, chaypitaj rikusqa Danielta tiyakushajta. 41Chantaqa rey sinch'ita qhaparisqa: Jatunmin kanki, Danielpa Diosnin. Qan sapallayki Dios kanki, nispa.
42Reytaj nerqa orqhomunankuta Danielta. Wijch'uchimorqataj pozoman pikunachus munasharqanku Danielta wañuchiyta chaykunata. Chaypachallapitaj leonesqa paykunata mikhuykorqanku rey rikushajtin.
Currently Selected:
Danielmantawan Belmantawan 14: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.