HECHOS 7

Estebampa kutichikusqan

1Chaymantataj kuraj sacerdoteqa Estebanta taporqa: Ajinachu kayqa?, nispa. 2-3Estebantaj kuticherqa: Hermanos, tatakuna ima, uyariwaychej. Jatun atiyniyoj Diosqa, tatanchej Abrahamman Mesopotamiapi kashajtin, manaraj Harán jallp'aman tiyakoj ripushajtin, nerqa: Llojsiy kay jallp'aykimanta aylluykimantawan; noqa rikuchisqayki chay jallp'amantaj ripuy. 4Ajinamanta Abrahamqa, Caldeospa jallp'anta saqespa, Harán jallp'aman tiyakoj riporqa. Tatan wañupusqanmanta qhepamantaj, Diosqa pusamorqa payta kay jallp'aman, maypichus qankuna kunan kakushankichej. 5Diosqa payman mana chayaqenta qorqachu, ni ujnin chakillantapis churaykunampaj. Chaywampis Diosqa Abrahammampuni kay jallp'ata qonanta nerqa, paypaj kanampaj, wañupojtimpis miraynimpaj qhepakunampaj. Chayta Dios nishajtenqa, manaraj Abrahampataqa wawampis karqarajchu. 6Dios payman nillarqataj: Qampa mirayniykeqa waj karu llajtapi kamachis kanqanku. Chaypi runakunataj mayta ñak'arichenqanku tawa pachaj watasta. 7Diosqa nerqa: Chay ñak'arichej llajtataqa noqa juzgasaj. Qhepamantaj chay mirayniykeqa, chay llajtamanta llojsimuspa, kay jallp'api yupaychawanqanku. 8Chaymantataj Diosqa Abrahamwan circuncisión nisqa tratota ruwarqa. Ajinamanta Abrahamqa wawan Isaacta circuncidarqa, nacikusqanmanta pusaj p'unchayninman. Isaacpis wawan Jacobta circuncidarqa, Jacobpis kikillantataj chunka iskayniyoj aylluspa tatasninta.

9Jacobpa wawasnin ñaupa tatakunaqa, wauqenku Joseta chejnispa, kamachita jina venderqanku Egipto llajtaman pusanankupaj. Diostaj Josewan karqa payta waqaychaspa. 10Diosqa, Joseta tukuy llakiyninmanta orqhorqa. Allin rijch'ayta, yachaytawan qorqa, egipcio reypa ñaupaqempi; paytaj churarqa Egiptota kamachinampaj, ajinallatataj wasimpipis kamachinampaj.

11Chaypachataj yarqhay manchay llakiywan jamorqa Egiptoman, Canaanman ima. Ñaupa tatasninchejpis mikhunata mana tarerqankuchu. 12Jacobtaj Egiptopi trigo kasqanta uyarispa, tatasninchejta kacharqa ñaupaj kutipi. 13Iskay kuti risqankupitaj, José wauqesninwan rejsichikaporqa. Ajinapi Faraonqa, Josejpa ayllusninta rejserqa. 14Chaymantataj, Joseqa tatan Jacobta wajyacherqa, tukuy ayllusninwan Egiptoman jampunanta. Tukuyninkupi qanchis chunka phishqayoj karqanku. 15Ajinamanta Jacobqa Egiptoman tiyakoj uraykorqa, chaypitaj wañuporqa. Paypa qhepantataj, wawasnin ñaupa tatasninchej wañupullarqankutaj. 16Unay watasninmantaj paykunaj tullusninkuta apamorqanku Siquem nisqa jallp'aman. Chaypitaj p'amparqanku, Hamor ayllumanta Abrahampa rantisqan jallp'api.

17-18Maypachachus Dios, Abrahamman qosqayki nerqa, chay p'unchaykunataj junt'akunampaj qayllamushajtin, Israel runakunaqa Egiptopi manchay ashkhaman mirarqanku, Egiptopi waj rey sayarinankama. Payqa Joseta mana rejserqachu pichus kasqanta. 19Chay reytaj ñaupa tatasninchejta chejnispa, manchayta ñak'aricherqa. Chayrayku kamacherqa nacisqa qhari wawitasninkuta wijch'umunankuta ama kausanankupaj. 20Chay tiempollapitaj Moisés nacikorqa. Diostaj payta munakorqa. Kinsa killankamataj tatampa wasimpi uywasqa karqa. 21Chantá saqerparisqa kashajtintaj, ama wañunampaj faraompa ususin tarikuspa, uywakaporqa wawanta jina. 22Moisesqa yachachisqa karqa Egipto runaspa tukuy yachachiyninkupi. Chayraykutaj atiyniyoj karqa parlasqampi, ruwasqampi ima.

23Moisestaj tawa chunka watayojña kashaspa, sonqonta nanachikorqa israelita ayllu masisninmanta. Chayrayku munarqa watukuyta. 24Chayaspataj rikorqa uj Egipto llajtayoj runa israelitata maqashajta. Moisestaj israelitaman kutikuspa, chay egipciota wañurparicherqa. 25Moisesqa yuyarqa israelita wauqesnin umachakunankuta, Dios paynejta chay ñak'ariykunamanta orqhonanta. Paykunataj chaytaqa mana unancharqankuchu. 26Q'ayantintaj Moisés rikorqa israelitas maqanakushajta. Allinyachiyta munaspataj paykunaman nerqa: Qhari masis, qankunaqa wauqes kankichej, imaraykutaj qankunapura maqanakushankichejri? 27Runa masinta maqajtaj, Moisesta tanqarparispa nerqa: Pitaj qanta churasunki kamachejniyku, juezniykutaj kanaykipaj? 28Kunanqa, noqatañatajchu wañuchiyta munanki, imaynatachus qayna egipciota wañucherqanki ajinata?, nispa. 29Moisestaj chayta uyarispa Egiptomanta ayqerqa Madián jallp'aman. Chaypitaj waj llajtayoj jina kakorqa; iskay qhari wawasnintaj tiyaporqa.

30Tawa chunka wata qhepamantaj, ch'impi Moisés kashajtin, Sinaí orqopi uj ángel rikhurerqa, nina larwashaj zarzapi. 31-32Moisesqa t'ukorqa chayta rikuspa. Imachus kasqanta allinta qhawanampaj qayllaykushajtintaj, Diospa parlamusqanta uyarerqa: Noqa kani tatasniykej Diosnin, Abrahampa Diosnin, Isaacpata, Jacobpata ima, nispa. Moisesqa mancharikuywan kharkatitispa, mana qhawariyllatapis munarqachu. 33Señortaj payman nerqa: Ujut'asniykita lluch'ukuy. Maypichus sayashanki chayqa, Diospa ajllakusqan jallp'a. 34Cheqamanta noqa rikuni Egiptopi, israelita wawasniy ñak'arisqankuta, sonqo nanayta waqasqankuta ima uyarini. Chayrayku uraykamuni chaymanta orqhonaypaj. Kunanqa jamuy ari, Egiptoman kachasqayki, nispa.

35Kaymin chay Moisesqa pitachus israelitakuna qhesachaspa nerqanku: Pitaj qanta churasorqa, kamachejniyku, juezniykutaj kanaykipajri? Paytataj Dios kacharqa, paykunaj kamachejnin kanampaj, kacharichejnintaj; chay larwashaj zarzapi ángel rikhurejnejta. 36Kay Moisés orqhomorqa Egiptomanta israelitakunata, milagrosta, señalesta ima ruwaspa, puka mar qochapi, ch'in pampaspi ima tawa chunka wata junt'ata. 37Kaymin chay Moisesqa pichus israelitasman nerqa: Qankuna ukhullamantataj Dios sayarichenqa uj profetata qankunapaj, noqata jina; paytataj uyarinkichej. 38Kay Moisesqa israelitaswan tatasqa ch'in pampapi karqa. Paytaj Sinaí orqopi parlarqa angelwan, tatasninchejwan ima. Kay Moisesllataj Diosmanta jap'erqa kausay palabrasta, noqanchejman qonawanchejpaj.

39Tatasninchejtaj Moisesta mana kasuyta munarqankuchu, qhesacharqankutaj sonqosninkupi Egiptoman kutiripuyta munaspa. 40Chayraykutaj Aaronman nerqanku: Dioskunata ruwapuwayku ñaupaqeykuta rinankupaj. Egiptomanta orqhomuwarqayku chay Moisesqa mana yachakunchu, imanakapunchus. 41Paykunataj ruwarqanku waka uñaj lantinta. Uywasta wañuchispataj, chay waka uña ruwasqankuman jaywarqanku. Kusikorqankutaj chay makisninkuwan ruwasqankupi. 42Chayraykutaj Dios paykunamanta t'aqakorqa, saqerqataj patapi kaj qoyllurkunata yupaychanankuta, imaynatachus profetaspa escribisqankupi nishan: Israelitas, noqamanchu uywasta wañuchispa jaywawarqankichej, tawa chunka watasta ch'in pampapi kashaspa? 43Qankunaqa Molocpa toldontaraj astawan apaykacharqankichej, Refán nisqa diosniykichejpa qoyllurnintawan. Chay lantista qankunallataj ruwakorqankichej, paykunaman k'umuykunaykichejpaj. Chayrayku llajtaykichejmanta pusachisqaykichej, Babilonia llajtamantapis aswan karumanraj.

44Tatasninchejpata toldonqa ch'in pampapi karqa, maypichus Diosmanta yachaj kanku. Diospa kamachisqanman jina ruwasqa; imaynatachus Moisesman kamacherqa, maychus rikusqanman jina ruwananta. 45Chay toldota tatasninchej jap'erqanku. Chaymantataj Josuewan aparqanku gentilesmanta qhechusqanku jallp'aman, maymantachus Dios qharqorqa gentilesta tatasninchejpa ñaupaqenkumanta, Davidpa tiemponkama. 46Davidqa Diospa yanapayninta tarerqa. Chayrayku paymanta mañakorqa templota saqenanta Jacobpa ayllumpaj. 47Salomontaj Diospaj wasita sayaricherqa. 48-49Chaywampis patapi kaj Diosqa, mana runaj makisninwan ruwasqa wasipichu tiyakun, imaynatachus profetaspis nin: Janaj pachaqa tronoy, kay pachataj chakisniyta churanay. Ima laya wasitataj ruwapuwankichejri? Chayri, maynejpitaj samarikusajri? 50Manachu kay tukuy imasta makiy ruwarqa?, nin Señorqa.

51Estebanqa nillarqataj: Qankunaqa mana yuyayniyoj rumi sonqos, mana uyarikojtaj kankichej. Chayrayku Santo Espíritoj contrampi kankichej, ñaupa tatasniykichej jina, wapuchakunkichejtaj. 52Mayqen profetatatajñaupa tatasniykichej, mana qhatiykacharqankuchu ñak'arichinankupaj? Paykuna ñaupajmantapacha, cheqan kaj jamunanta willashajtinku wañuracherqanku. Kunanrí, qankunañataj jap'ichispa payta wañucherqankichej. 53Qankunaqa leyta jap'erqankichej angelesnejta, manataj waqaycharqankichejchu.

Estebanta wañuchinku

54Jatun juntapi Kuraj kamachejkunaqa, Estebampa parlasqanta uyarispa, maytapuni phiñakorqanku sonqosninkupi, kirusninkutataj k'arurakorqanku paypa contranta. 55Estebanqa Santo Espirituwan junt'a karqa, janaj pachata qhawarispataj Diospa jatun k'anchayninta rikorqa, Jesustapis rikullarqataj Diospa pañampi kashajta. 56Estebantaj nerqa: Qhawariychej, janaj pachata kichasqata rikushani, Runaj Churintataj Diospa pañampi kashajta.

57Manchayta qhaparispataj ningrisninkuta lluphaykorqanku, tukuyninkutaj ujllata correykorqanku Estebanman. 58Llajtamantataj maqaspa jawaman orqhorqanku, rumiswantaj ch'anqaykorqanku. Chay ch'anqajkunataj p'achasninkuta qhawanampaj saqerqanku uj wayna Saulo sutiyojman.

59Chanqashajtinkutaj Estebanqa mañakuspa nerqa: Señor Jesusníy, espirituyta jap'ikapuy, nispa. 60Qonqoriykukuspataj sinch'ita qhaparispa nerqa: Señor, ama paykunata juchachaychu kay ruwasqankumanta.

Chayta niytawantaj puñukaporqa.

Currently Selected:

HECHOS 7: QCHSB

Highlight

Copy

Compare