HECHOS 6

Qanchis diaconosta ajllanku

1Chay p'unchaykunapi creejkuna ashkhayashajtinku, helenistas thutusharqanku hebreospa contranta, viudasninku mana allin yanapasqas kasqankumanta, sapa p'unchay mikhuna rak'inapi. 2Ajinamanta chunka iskayniyoj apostolesqa, tukuynin creejkunata wajyarqanku, nerqankutaj: Mana allinchu kanman noqaykupajqa, Diospa palabranta saqerparispa mikhunataraj runakunaman rak'inaykoqa. 3Chayrayku hermanos, ajllaychej ari qankuna ukhumanta qanchis qharista, allin kausayniyojta, Santo Espirituwan junt'asqasta, yachayniyojkunatataj mikhunata rak'inankupaj. 4Ajinamanta noqaykoqa Diosmanta mañakuspa palabrata willaspataj kasqaykupuni.

5Chay nisqankutaj tukuyninkuman allin rijch'arqa. Chaymantataj Estebanta ajllarqanku. Payqa sinch'i feniyoj karqa, Santo Espirituwantaj junt'asqa. Chaymantá ajllallarqankutaj Felipeta, Procorota, Timonta, Parmenasta, Nicolasta ima. Nicolasqa Antioquiamanta karqa, israelitaspa yachachiyninta qhatej. 6Chay ajllasqastataj apostolespaman pusamorqanku. Paykunaqa Diosmanta mañakuspa makisninkuta paykunaman churaykorqanku.

7Ajinamanta Diospa palabran wiñasharqa, yachachisqastaj maytapuni ashkhayarqanku Jerusalén llajtapi.

Sacerdotesmantapis ashkhas creellarqankutaj

8Estebantaj Diospa yanapayninwan, atiyninwan ima junt'a kaspa, milagrosta, señalesta ima runakuna chaupipi ruwasharqa. 9Chaymantataj Kacharisqas nisqaspa sinagogankumanta wakin oqharikorqanku. Paykuna ukhupi karqanku israelitas Cirenemanta, Alejandriamanta, Ciliciamanta, Asia jallp'amantawan. Paykunataj Estebanwan churanakuyta qallarerqanku. 10Estebanta mana atipayta aterqankuchu. Payqa yachaywan Espirituwan parlasharqa. 11Chaypacha llulla runasman qolqeta lluk'irarqanku ninankupaj uyarisqankuta Moisespa contranta, Diospa contranta ima sajrata rimashajta. 12Ajinata ruwaspa ch'ajwata oqharicherqanku runakuna ukhupi, kurajkuna ukhupi, leymanta yachachejkuna ukhupi ima. Tukuyninkutaj jamuytawan Estebanta jap'iykuspa, juntaman pusaykorqanku. 13Mask'allarqankutaj waj runasta, llullakuspa Estebanta ch'ataykunankupaj. Chaykunataj nerqanku: Kay runaqa rimallampuni temploj contranta, leypa contranta ima. 14Chantá uyarillaykutaj nejta chay Jesús nazareno templota urmachinanta; astawanqa Moisespa kamachiyninta waj jinaman tukuchinanta.

15Jatun juntapi tiyashajkunataj Estebanta qhawarispa angelpa uyanta jina rikorqanku.

Currently Selected:

HECHOS 6: QCHSB

Highlight

Copy

Compare