HECHOS 13

Bernabeta, Saulotawan ajllanku

1Chaymanta Antioquía iglesiapi karqanku profetas, yachachejkuna ima. Paykunataj karqanku: Bernabé, Yana nisqa Simón, Cirenemanta Lucio, Manaén pichus rey Herodespa ñuñoj masin karqa, Saulo ima. 2Uj p'unchay ayunaspa Señorta yupaychashajtinku, Santo Espíritu paykunaman nerqa: Bernabeta, Saulotawan t'aqapuwaychej, imapajchus ajllarqani chayta ruwanankupaj.

3Paykunataj ayunaspa Diosmanta mañakorqanku. Bernabeman Saulomanwan makisninkuta churaykuspa kacharpayarqanku.

Apóstoles Chiprepi willanku

4Chay qhepata Bernabé, Saulowan, Santo Espíritoj kamachisqanta kasuspa Seleuciaman rerqanku. Chaymantataj botepi rispa Chipre churuman chayarqanku. 5Salaminaman chayaspataj, judiospa sinagogasninkupi Diospa palabranta willarqanku. Juan Marcostataj pusarqanku paykunata yanapanampaj.

6Chay tukuynin churupi purispataj Pafoskama chayarqanku. Chaypitaj tinkukorqanku Barjesús sutiyoj layqawan. Payqa uj llulla profeta judío karqa. 7Chay layqataj kamachej Sergio Paulowan kasharqa. Payqa yachayniyoj runa karqa. Bernabeta, Saulotawan wajyacherqa, Diospa palabranta uyariyta munaspa. 8Chay layqaqa griegopi Elimas nisqa, apostoleswan churanakorqa. Chay jallp'api kamachejta jark'arqa ama creenampaj. 9Chaymantataj Saulo, Pablo sutiyoj, Santo Espirituwan junt'a kaspa, layqata sinch'ita qhawarerqa. 10Nerqataj: Ya, llullaj atipasqan, tukuy laya pantachinaswan junt'asqa, supaypa wawan! Tukuy allin kajpa enemigon! Mayk'ajkamataj Señorpa cheqan ñanninta q'ewichinkiri? 11Kunanqa Señorpa makin pataykipi kanqa, ciegoyanki, nitaj intej k'anchaynintapis unayta rikunkichu.

Kikimpachataj Elimas laqhapi, tutayajpitaj rikhurerqa. Muyuykachaspataj mask'arqa pillapis makinmanta pusanampaj. 12Sergio Paulo kamachejtaj chayta rikuspa creerqa, maytataj t'ukorqa Señorpa yachachiyninmanta.

Pablo Antioquiapi

13Pablotaj paywan kajkunawan Pafosmanta botepi Pergeman rerqanku. Pergeqa Panfiliapi karqa. Juan Marcostaj, paykunata saqerparispa kutiporqa Jerusalenman. 14Pablo, Bernabewan Pergemanta rerqanku Pisidiapi kaj Antioquiaman. Samakuna p'unchaypi sinagogaman yaykuspataj tiyarikorqanku. 15Moisespa leyninta profetaspa escribisqanta ima leespaña, sinagogapi kamachejkuna nicherqanku iskaynin apostolesman: Hermanos, sichus ima palabrallapis kapusunkichej kay runasta yanapanaykichejpaj chayqa, kunan parlayta atinkichej.

16Pablotaj sayarispa, makinwan ch'inyacherqa, nerqataj: Israel runakuna, Diosta manchachikojkuna ima, uyariychej. 17Kay aylloj Diosnin, ñaupa tatasninchejta ajllarqa. Egiptopi waj llajtayoj jina tiyashajtinku, paykunata jatunyacherqa. Diostaj atiyninwan Egiptomanta orqhomorqa. 18Tawa chunka watata jina ch'in pampapi kashajtinku, imaymana kausayniyoj kashajtinkupis, Diosqa pacienciarqa paykunata. 19-20Canaán jallp'apitaj, qanchis laya ayllusta tukuchispa, chay jallp'asta israelitasman qoporqa, tawa pachaj phishqa chunkayoj watasta jina.

Kamachejkunatataj Dios churarqa, profeta Samuelpa p'unchayninkama. 21Chaymanta israelitasqa, uj reyta mañarqanku. Diostaj Saulta, Cispa churinta qorqa, Benjamimpa ayllunmanta. Paytaj tawa chunka watata israelitasta kamacherqa. 22Rey Saulta orqhospataj, Davidta churarqa rey kanampaj. Paymantataj Dios nerqa: Isaejpa churin Davidta, sonqoypa munasqanman jina tarini, tukuy kamachisqaytataj pay ruwanqa. 23Davidpa mirayninmanta nisqanman jina Dios jataricherqa Jesusta, Israelpa Salvajnin kanampaj. 24Manaraj Jesús jamushajtin, Juan Bautista israelitasman willarqa, Diosman kutirikuy bautismomanta. 25Juantaj wañunan qayllapiña nerqa: Pi kasqaytataj qankuna yuyankichejri? Mana suyasqaykichej chaychu kani. Payqa noqaj qhepayta jamushan, manataj phaskaranaypaj jinachu kani chakisninmanta ujut'asnillantapis.

26Hermanos, Abrahampa ayllunmanta kajkuna, qankuna ukhupi Diosta manchachikojkuna ima. Qankunaman Dios apachimusunkichej kay salvaj palabrata. 27Jerusalempi tiyakojkuna, kamachejninkunapis, mana yacharqankuchu pichus Jesús kasqanta, nitaj rejserqankuchu profetaspa escribisqankuta, sapa samakuna p'unchaypi leeshaspapis. Ajinamanta Jesusta juchachaspa, profetaspa nisqanta junt'arqanku. 28Mana ni ima juchata wañuchinankupaj jina paypi tarispataj, Pilatomanta mañarqanku kamachinanta Jesusta wañuchinankuta. 29Paymanta tukuy ima escribisqa kajta junt'aspaña, cruzmanta uraykuchimuspa Jesusta p'amparqanku. 30Diostaj Jesusta wañusqakunamanta kausarichimorqa. 31Ashkha p'unchaykunataraj rikuchikorqa, Galileamanta paywan khuska Jerusalenkama wicharejkunaman. Kunan paykuna Jesusmanta willanku runakunaman.

32Ajinata noqaykoqa, evangeliomanta qankunaman willashayku, imatachus ñaupa tatasninchejman Dios qosqaykichej nisqanta. 33Israelitakunamanta kasqaykichejrayku, Diosqa palabranta junt'an Jesusta kausarichimuspa, imaynachus iskay kaj salmopipis escribisqa kashan: Qan Churiy kanki; noqa kunan qanta yumayki. 34Wañusqasmanta kausarichimuspa, manaña jayk'ajpis ismuyman kutiykunampaj, Diosqa kay jinata nerqa: Qankunaman qosqaykichej, jaqay ajllasqa cheqa kaj khuyakuyta, mayqentachus Davidman qosaj nerqani, chayta. 35Chayrayku waj salmopi nillantaj: Mana qanqa saqenkichu ajllasqayki ismunanta. 36Davidqa, kausanankama Diospa munayninman jina runa masisninta yanaparqa. Wañojtintaj, ñaupa tatasnimpa qayllampi p'amparqanku, ismorqataj. 37Diospa kausarichimusqan Jesustaj mana ismorqachu. 38Hermanos, yachaychej Jesusnejta juchas pampachasqa kasqanta. Chaytataj qankunaman willayku. 39Chay tukuy imasmanta Moisespa leynimpi, cheqan runapaj mana rejsisqas kayta aterqankichejchu; kunanqa chaykunamanta Jesuspi creejqa salvasqa kashan. 40Kunanqa, sumajta qhawarikuychej ari, ama qankunapi profetaspa nisqanku junt'akunampaj: 41Qhawakuychej qhesachajkuna, t'ukuychej, chinkariychejtaj. Noqa Diosmin uj ruwanata ruwasaj p'unchayniykichejpi. Chay ruwasqayta pillapis willasunkichejman chayqa, qankunaqa mana creewajchejchu.

42Pablo, Bernabewan judiospa sinagoganmanta llojsimushajtinkutaj, mañarqanku ujtawan kutimunankuta qhepan samakuna p'unchaypi, paykunawan astawan parlanankupaj chay imasmanta. 43Sinagogapi tantakojkuna ripojtinkutaj, Pablota Bernabetawan qhatikorqanku ashkha judíos, chantá judiospa yachachiyninta qhatejkuna ima. Apostolestaj paykunata yuyaycharqanku, ama sayk'uspa Diospa khuyakuynimpi kakunankupaj.

44Qhepan samakuna p'unchaypitaj, yaqha tukuy llajtantin tantakamorqanku Diospa palabranta uyarinankupaj. 45Judiostaj chay chhika runata rikuspa Pablowan chhoqonakorqanku; churanakuytataj qallarerqanku paypaj sajrata rimaspa. 46Pablowan Bernabewan mana manchachikuspa, paykunaman nerqanku: Diospa palabranta qankunamanraj willanayku karqa. Qankunataj qhesachankichej, nitaj wiñay kausaytapis jap'iyta munankichejchu. Chayrayku kunanqa waj llajtayoj runasman ripusqayku. 47Señorqa kay jinata kamachiwarqayku: Waj llajtayoj runaspa k'anchaynin kanaykipaj churayki, tukuy kay pachapi runasman salvacionmanta willanaykipaj.

48Chayta uyarispataj, waj llajtayoj runasqa, kusikuspa Señorpa palabranta jatuncharqanku. Wiñay kausaypaj kajkunaqa Señorpi creerqanku. 49Ajinamanta, Señorpa palabranqa tukuy chay jallp'api yachakorqa. 50Judiostaj ch'ajwata oqharerqanku Diosta yupaychaj warmiswan parlaspa, llajtapi kamachej runaswan ima. Paykunataj qallarerqanku Pablota, Bernabetawan ñak'arichiyta, jallp'ankumantataj qharqorqanku. 51Apostolestaj paykunaj contrampi, chakisninkumanta jallp'ata thalarakuspa, Iconioman riporqanku. 52Creejkunataj, kusiywan junt'asqa karqanku, Santo Espirituwantaj.

Currently Selected:

HECHOS 13: QCHSB

Highlight

Copy

Compare