HECHOS 12

Santiagota wañuchinku, Pedrotataj wisq'achinku

1Chaypachataj rey Herodesqa ñak'arichiyta qallarerqa iglesiamanta wakinkunata. 2Ajinamanta Juampa wauqen Santiagota wañucherqa espadawan. 3Chay ruwasqan, judiospaj sumaj kasqanta rikuspa, Pedrotañataj jap'icherqa wisq'achinampaj. Chaypachataj karqa mana levadurayoj t'anta mikhuna p'unchaykuna. 4Herodestaj Pedrota jap'ichispa carcelman wisq'acherqa. Chaypitaj tawa t'aqa soldados Pedrota qhawasharqanku. Sapa t'aqapitaj tawa soldados karqanku. Herodesqa munarqa Pedrota runaspa ñaupaqenman orqhomuyta fiesta pasayta. 5Ajinamanta Pedroqa carcelpi qhawasqa kasharqa, iglesiamanta kajkunataj mana sayk'uspa paypaj Diosmanta mañapusharqanku.

Dios orqhon Pedrota carcelmanta

6Herodes orqhochimunan kashajtin, chay tuta Pedro iskay soldadospa chaupimpi puñusharqa, iskay cadenaswan watasqa. Waj soldadostaj cárcel punkuta qhawasharqanku. 7Chayllaman Señorpa angelnin rikhurimorqa, chay ukhumantaj k'anchay junt'aykorqa. Angeltaj Pedrota wajtanninmanta kuyurichispa rijch'aricherqa, nerqataj: Usqhayta jatariy, nispa. Chay kikimpi cadenas makisninmanta urmararqa. 8Chaymanta ángel nillarqataj: Chumpiykita mat'iykukuy, ujut'asniykitapis churakuy, nispa. Pedrotaj ajinata ruwarqa, angeltaj payman nerqa: Kunanqa qhataykukuspa noqata qhatiway.

9Pedrotaj angelpa qhepanta carcelmanta llojsishaspa, mana yacharqachu angelpa ruwasqan cheqachus manachus kasqanta. Payqa yuyasharqa mosqoypi jina rikusqanta. 10Ajinamanta pasarqanku ñaupaj t'aqa soldadosta, jinallatataj iskay kaj t'aqatapis fierro punkuman chayanankukama. Chay punkutaj calleman llojsejqa, payllamanta kicharikorqa. Llojsispataj uj calleta rishaspa, angelqa Pedromanta t'aqakaporqa.

11Pedrotaj yuyayninman kutirispa nerqa: Kunanqa cheqamanta yachani, Señor angelninta kachamusqanta, Herodespa makinmanta qhechunawampaj; judiospa sajra imasta ruwayta munawasqankumantawan.

12Chayta yuyaspataj Marcos nisqa Juampa maman Maríaj wasinman rerqa. Chaypitaj ashkha creejkuna tantakuspa Diosmanta mañakusharqanku. 13Pedro calle punkuta takajtin, uj sipas Rode sutiyoj llojserqa, pichus kasqanta yachaj. 14Rodetaj Pedroj parlayninta rejsispa, kusiywan punkuta mana kicharispalla, kutiykuspa willarqa: Pedro punkupi kashan, nispa. 15Paykunataj nerqanku: Mana yuyayniykipichu kashanki.

Paytaj cheqapuni kasqanta nerqa. Chaywampis paykunaqa Pedroj angelninchari nerqanku.

16Chaykamataj Pedroqa punkuta takashallarqapuni. Chaymantaña punkuta kicharerqanku, payta rikuspataj mayta kusikorqanku. 17Pedrotaj makinwan ch'inyachispa, paykunaman willarqa imaynatachus Señor carcelmanta orqhomusqanta. Nerqataj: Chay tukuy imasmanta Santiagoman willamuychej, hermanosman ima, nispa. Chaymanta llojsispataj waj cheqaman riporqa.

18Q'ayantin paqarintaj, soldados manchayta ch'ajwasharqanku Pedro chinkasqanmanta. 19Herodestaj tukuynejta mask'acherqa, nitaj tarerqankuchu. Soldadostañataj allinta tapuchispa, kamacherqa paykunata wañuchinankupaj. Chaymantataj Herodesqa Judeamanta Cesareaman uraykorqa, chaypitaj qhepakorqa.

Herodes khurusqa wañun

20Kamachej Herodestaj phiñasqa kasharqa tiriospaj, sidoniospaj ima. Chayrayku paykunaqa uj yuyaylla tantaykukuspa Herodeswan parlaj rerqanku. Ñaupajtaqa Herodespa wasimpi, kamachejnin Blastoman qolqeta lluk'iykorqanku, paynejta allinyakunankupaj Herodeswan paykunaqa Herodespa llajtanmanta mikhunata jap'isqankurayku. 21Herodestaj wajyachisqan p'unchaypi, kamachinan p'achawan p'achallisqa tronompi tiyaykukuspa paykunaman parlarqa. 22Runastaj qhaparerqanku: Diospa parlasqan kayqa, mana runajtachu. 23Chay kikimpitaj Señorpa angelnin Herodesta nanaykucherqa, Diosta mana jatunchasqanmanta. Khuruspa mikhusqantaj wañorqa.

24Ajinamanta Señorpa palabran wiñaspa tukuynejpi willakorqa.

25Bernabé, Saulowan ima, ruwanankuta tukuspa, Jerusalenmanta kutiporqanku Antioquiaman, Marcos nisqa Juan pusarisqa.

Currently Selected:

HECHOS 12: QCHSB

Highlight

Copy

Compare