2 MACABEOS 5
5
Jasón wañupun
1Chaypacha Antiocoqa wakichikushasqa ujtawan soldadoswan Egiptoman yaykunampaj. 2Chantaqa, ñaqha tawa chunka día junt'ata llajtapi rikhurimusqanku ashkha runas, qori p'achasniyoj tukuynejpi purispa caballosninkupi. Chay runasqa sumaj wakichisqas kasqanku maqanakupaj. Chay soldado tropasqa ashkha kasqanku. Tukuynejman phawaspa chayasqanku, junt'ita, espadasninkuta oqharispa. 3Llajta runasqa rikusharqanku caballosta, maqanakupaj allinchasqasta. Rikullasharqankutaj soldadosta kaymanta jaqaymanta rikhurimojta. Chaymanta, mana yupay atina t'ojsinastapis, jark'achinasta, wach'inasta ima. Rikusharqankutaj lliphipej qori p'achasta, imaymana laya corazastapis. 4Tukuyninku Diosmanta mañakoj kanku chay rikusqankoqa mana llakiypaj kananta.
5Ujta Jasonqa uyarispa Antíoco wañupusqanta, waranqa runaswan llajtaman kachaykukusqa. Chaymanta, atipaspa perqa jark'ajkunata, llajtaman yaykusqa. Menelaotaj, chayta yachaytawanqa, jark'ana wasiman ayqempusqa. 6Jasontaj, mana khuyakuspalla, kikin paypa llajta masisninta sipiykuchisqa. Yuyashasqa atipasqanta paypa contrampi kajkunata. Ajinamanta, kikin llajta masisninta atipaspa, paypuni atipachikun. 7Manataj atisqachu kamachejman tukuyta. Tukuy chay ruwasqanwan, Amón llajtaman ririkapusqa p'enqayllata tarispa. 8Chaymantataj, Jasompa tukukuynin kay jina karqa: Uj árabe llajtayoj kamachejqa, Aretas sutiyoj, Jasonta carcelman yaykuchisqa. Chantaqa, ayqespa, llajtamanta llajta risqa. Tukuypuni payta chejnikoj kanku, Diospa leyninta wasanchasqanrayku, llajta masisnintapis ñak'arichisqanrayku. Ajinamanta, Egiptoman chayasqa. 9Jasonqa ashkha runasta qharqorqa llajtankumanta karu llajtasman pusachispa. Kunanqa, payñataj karu llajtaman qharqosqa karqa. Chaypitaj wañorqa. Risqa ari barcopi Lacedemoniaman, yuyaspa chaypi tiyakuyta atinanta, Lacedemonia llajtayojkuna judioswan ayllu masis kasqankurayku. 10Jasompa juchanrayku ashkha runas mana p'ampasqaschu karqanku. Kunanqa, mana ni pi waqasanchu wañupusqanmanta. Manataj ni pi panteonman rerqachu. Paytaqa manataj p'amparqankuchu kuraj tatasninwan khuska.
Templota ch'ichiyachinku
[1 Mac. 1.16-28]
11Reyqa tukuy chayta yachaytawantaj, yuyasqa Judea runas oqharikuyta munasqankuta. Chantaqa, sinch'itapuni phiñakuspa fiero animal jina, Egiptomanta llojsispa, ashkha soldadoswan kachaykukusqa Jerusalén llajtaman. 12Chaymanta, Jerusalenman chayaspa, nisqa soldadosman wajtanankuta mana khuyakuspa callespi rikonqanku chaykunata. Nillasqataj qholuspa wañuchinankuta wasisninkuman ayqejkunata. 13Chaypachapi waynastaj machu runastaj wañuchisqas karqanku. Chantapis, sipaskunatawan ñuñojkunatawan qholuykullasqankutaj. 14Kinsa diallapi pusaj chunka waranqa runas urmasqanku. Tawa chunka waranqa wañuchisqas kasqanku. Tawa chunka waranqa presochasqasta apapusqanku vendesqa kanankupaj wata runas jina. 15Chaymantataj rey Antiocoqa, mana manchachikuspalla, yaykusqa temploman, tukuy wasismanta aswan santo wasiman. Menelaotaj asirikuspa Diospa leyninmanta, kikin paypa llajtampa leyninmantawan, Antiocota yaykuchisqa temploman. 16Reyqa ch'ichi makisninwan llankhaykusqa santo vasosta. Chantaqa, suwakapusqa imatachus waj reykuna temploman qosqanku templo jatunyachisqa kanampaj, lliphipiyniyojtaj kanampaj chayta. 17Antiocoqa wapuyaspa umanta oqharishasqa. Manataj yachasqachu Diosqa pisi tiempollapaj uyanta karunchasqanta templomanta, Jerusalén llajtayojkunaj juchankurayku. 18Manachus judíos chay jina juchasta ruwankuman karqa, Diosqa chaypachalla wajtanman karqa Antiocota, jark'aspa amaña chay ruwasqanta ruwanampaj. 19Diosqa mana ajllakorqachu israelitasta templota munakusqanrayku, mana chayrí, templota ajllakorqa israelitasta munakusqanrayku. 20Chayrayku, runasqa llakiyniyoj kajtinku, templopis llakikunapaj jina kasharqa. Runasqa kusirikojtinkutaj, templopis kusirikunapaj jina kakorqa. Maypachachus Tukuy Atiyniyoj Dios phiñasqa, chaypachallataj temploqa saqerparisqa karqa. Maypachachus Señorqa allin ñawiwan qhawarqa israelitasta, chaypachallataj temploqa watejmanta mosojyachisqa karqa.
Jerusalempi runasta wañuchinku
[1 Mac. 1.29-40]
21Antiocoqa usqhayllata Antioquiaman kutimpusqa, sojta chunka waranqa kilo qolqeta apakuspa templomanta. Wapuyaspa yuyashasqa atisqanta barcosta jallp'api purichiyta, runastarí mar qochapi. 22Chaymanta, cuentanmanta saqerqa kamachejkunata sutimpi nanaykuchinankupaj judiosta. Jerusalempi saqerqa Frigia llajtayoj Filipota, aswan sajra runa Antiocomanta nisqaqa. 23Garizim orqopitaj, saqerqa Andronicota. Menelaotapis churasqa kamachimampaj. Chay runaqa llajta masisninta chejnikorqa wajkunamanta astawan. Rey Antiocoqa anchatapuni chejnikorqa judiostaqa. 24Chaymantataj, Antiocoqa kachamorqa Misiamanta Apoloniota. Apoloniotaj kachaykukusqa iskay chunka iskayniyoj waranqa runaswan. Antíoco nisqa Apoloniota qholunanta tukuy qharista, vendenantataj warmistawan wawastawan. 25Jerusalén llajtaman chayaspa, Apolonioqa ch'aukiyaspa nisqa llamp'u sonqoyoj jamusqanta. Samarina día chayamojtintaj, yachasqa judiosqa samarisqankuta, soldadosninta kamachisqa llojsinankuta desfilaj. 26Chantaqa, pikunatachus callespi rikusharqanku soldadosta, chaypachallapi wañurparichisqa. Chaymanta, soldadosqa purikusqanku llajtapi. Ajina, ashkha runasta wañuchisqanku. 27Chaypacha, Judas Macabeoqa, chunka runaswan khuska ripusqa ch'in orqosman. Chay orqospi Judas Macabeowan compañerosninwan ima, kausakorqanku monte animales jina. Chaypi q'omerkunallata mikhorqanku, mana munasqankurayku ch'ichi kajta mikhuyta.
Currently Selected:
2 MACABEOS 5: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.