2 MACABEOS 4
4
Oniasqa reyta watukun
1Chay kikin Simón, pimantachus ñaqhalla parlarqaykuña, tumpashasqa Oniasta nispa paypuni churasqanta Heliodorota wañuy patapi. Chay Simonqa ñaupajta willaramusqa templo qolqemanta, ajinamanta kikin llajtanta wasanchaspa. 2Kunantaj nishasqa Oniasqa oqharikuyta munasqanta reypa contrampi, sonqompi yachaspa tukuy imapipuni llajta masisninta yanapayta atisqanta, junt'asqantataj tukuy sonqo Diospa leyninta. 3Jina kajtintaj, uj runaqa, Simonwan khuska purisharqanku chaykunamanta ujnin, wakin runasta wañuchisqa. 4Oniastaj yuyasharqa manapuni allinchu kasqanta chay chejninakus. Chantaqa, rikusharqa Menesteoj wawan Apolonioqa tanqasqanta Simonta chaykunata ruwanampaj. Chay Apolonioqa general karqa, kamachisharqataj Celesiria provinciapitaj Fenicia provinciapitaj. 5Chayrayku Oniasqa reyta watukoj kachaykukorqa allin kajta munashaspa tukuy runa masisnimpaj. Mana munarqachu qhasimanta tumpayta ni pitapis. 6Pay sonqompi yuyasharqa reylla atisqanta allinyachiyta tukuyta, Simontataj yuyayninman kutirichiyta.
Griegosqa griego costumbresta apanku Jerusalenman
[1 Mac. 1.10-15]
7Chaypachataj rey Seleuco wañuporqa, cuentanmantataj yaykorqa Antíoco, Epífanes nisqa. Chantaqa, Oniaspa wauqen, Jasón sutiyoj, qolqeta pagaspa, kuraj sacerdoteman tukusqa. 8Nisqa ari Jasonqa rey Antiocoman, promesata ruwaspa, reyman qonanta kinsa pachaj sojta chunka talento nisqa qolqeta impuesto jina, yapanantataj payllamanta pusaj chunka talento qolqetawan. 9Chantaqa, nillasqataj qonanta pachaj phishqa chunkatawan licenciayoj kanampaj ruwachinampaj Jerusalempi uj phujllana estadiota uj griego colegiotawan. Chantá, yupanampaj Antioquía llajtayojkunata, Jerusalén llajtayojkunata jina. 10Rey Antiocoqa qollasqa imatachus Jasón mañakorqa chaykunata. Jasontaj, chay kutimantapacha griego costumbresta apachimusqa Jerusalenman. 11Chantaqa, nisqataj amaña kausanankuta chay licenciasman jina, imatachus reykuna judiosman qosqanku, chayta reykunamanta mañakusqanrayku Eupolemoj tatan Juan. Chay Eupolemoqa kachasqa karqa Roma llajtaman uj tratota judíos ruwanankupaj romanoswan. Chay tratopi judiostaj romanostaj nerqanku munanakuspa yanapanakuspataj kausanankuta. Chaymantataj Jasonqa nerqa amaña runas junt'anankuta Diospa leyninman jina churasqa costumbresta. Cuentankumantataj waj laya mosoj costumbresta churacherqa. 12Chaymantataj, uj phujllana estadiota sayaricherqa jark'ana wasi chajnejpi. Chantaqa pusacherqataj aswan sumachaj waynasta chay estadioman, chaypi phujllanasta yachanankupaj. 13Jasonqa anchatapuniña Diosmanta karunchakusharqa. Cheqamanta, manapuni sacerdotechu karqa. Payta qhatispataj, ashkha runas munasharqanku griegos jina kausakuyta. 14Sacerdotespis manaña munarqankuchu temploman riyta, rikuchikusta jaywaj Diosninchejman. Paykunapis ujta uyariytawantaj pututusta, kachaykukoj kanku estadioman. Chaypitaj phujllaj kanku wajkunawan khuska muyu fierrosta choqaspa. Ajinata, paykunapis Diospa leyninta wasanchasharqanku. 15Runasqa qhesachasharqanku ñaupa tatasninkoj costumbresninkuta, k'askakusharqankutaj griegospa costumbresninkuman, yuyaspa chay griego costumbresqa aswan allin kasqanta judío costumbresmanta. 16Jinapis, chay kikin griegos, pikunamantachus judiosqa yachaqakoj kanku, judiostaqa mayta llakicherqanku. 17Diospa leyninta p'akejkunaqa jasut'isqaspuni kananku tiyan ari. Kunanqa willamusqaykichej imaynatachus Diosninchej chay runasta jasut'iykorqa.
18Sapa phishqa wata Tiro llajtapi phujllanakus karqa reypa ñaupaqempi. 19Chay millay runa Jasón, kachamusqa Tiro llajtaman wakin Antioquía llajtayojkunata rinankupaj Jerusalén llajtaj sutimpi. Qosqataj paykunaman pachaj dracma nisqa qolqeta, chaywan rikuchikusta jaywanankupaj qhasi dios Herculesman. Paykunataj sonqonkupi nisqanku ama rikuchikuspi chay qolqeta gastananta, manachayqa wajkunapi. 20Chayrayku, ima qolqewanchus rantinanku karqa rikuchikusta Herculespaj, Jasompa munayninman jina ruwacherqanku remosniyoj barcosta.
21Chaypacha uj runa Filometor sutiyoj, Egiptomanta reyman tukusqa. Ajllasqankutaj Menesteoj wawan Apoloniota Egiptoman rinampaj chay kutipaj. Antiocotaj, yachaspa Apolonio sonqompi karunchakusqanta paymanta, nerqa runasninman allinta ñawisninkuta kicharinankuta. Chayraykullataj Jope llajtaman kachaykukorqa. Chay llajtamantataj riporqa Jerusalén llajtaman. 22Jasonqa tukuy Jerusalempi tiyakojkunapis jamusqanmanta anchatapuni kusikorqanku. Llajtaman yaykunampaj ñankunata k'ancharacherqanku. Chantataj, yaykumushajtin sinch'ita qhaparerqanku kusikuywan. Chaymanta, Antiocoqa runasninwan jarakorqa Fenicia cheqapi.
Menelao kuraj sacerdoteman tukun
23Kinsa watamantawan Jasón kacharqa Simompa wauqen Menelaota qolqeta apanampaj reyman parlanampajtaj paywan reypa sutimpi. Chay Menelaotaqa rejsinchejña. 24Menelaotaj risqa reypaman. Reytaj payta rikuspa sumaj k'achanchasqata, aswan jatun kasqanta yuyasqa. Menelaoqa mañakusqa reymanta kuraj sacerdote kananta. Chaypaj isq'on waranqa isq'on pachaj kilo qolqeta yapasqa Jasompa qosqanman. Chaynejta kuraj sacerdoteman tukusqa Menelaoqa. 25Kuraj sacerdoteman tukuytawantaj, Menelao kutimporqa Jerusalén llajtaman. Sonqontaj manapuni sacerdote sonqochu karqa, manachayqa uj phiña animalpa sonqon jina. Rumi sonqo karqa sajrataj. 26Ajinamanta, Jasón, pichus kikin wauqenta wijch'orqa, paypis kunanqa wijch'uchikushan. Jerusalenmanta llojsispataj, Amón llajtaman ayqerqa.
27Menelaotaj kuraj sacerdoteman tukuytawanqa, mana qolqeta chayachimusqachu reyman. 28Sostratesqa, pichus reypa sutimpi impuestosta mañakoj, mañakushasqapuni Menelaomanta chay qolqeta. Chaymantataj, reyqa, mana qolqeta apachimusqankurayku, iskayninkuta wajyachimusqa. 29Menelaotaj cuentanmanta Jerusalempi saqesqa wauqen Lisimacota kuraj sacerdote kanampaj. Sostratesri, cuentanmanta saqesqa uj capitanta, Crates sutiyojta. Chay capitantaj Chiprepi mandoyoj kasqa.
Oniasta wañuchinku
30Chaykamataj, Tarso llajtayojkuna, Malos llajtayojkuna ima, reypa contrampi oqharikusqanku imaraykuchus reyqa qopusqa llajtasninkuta Antioquida sutiyoj warminman. 31Reytaj, chayta yachaspa, ujta risqa chay llajtasman oqharikojkunata ch'inyachej. Saqesqataj Andronicota cuentanmanta kamachinampaj chaykama. Chay Andronicoqa jatun runa karqa, may respetasqa. 32Menelaoqa suwakusqa templomanta qori imasta. Chaykunamanta wakinta qopusqa Andronicoman, wakintataj vendeykusqa Tiro llajtapi waj llajtaspipis. 33Tukuy chaytaqa Oniasman willaykusqanku. Chayta yachaspa, ripusqa Dafneman, Antioquía chaynejman. Chay cheqaqa pakakuna llajtapuni karqa. Chay cheqamanta Oniasqa willarqa imatachus Menelao ruwasqa chayta. 34Menelaotaj nisqa Andronicoman Oniasta wañuchinanta. Andronicotaj risqa Oniasta watukoj. Chayaytawantaj, nisqa Oniasman juramentowan mana ni ima nananta. Nisqataj amapuni manchachikunanta. Oniasqa iskaychakusharqa. Jinapis, llojsillasqa pakakuna llajtamanta. Onias llojsejtin, Andronicoqa chaypachallapi wañurparichisqa, justiciamanta asirikuspa.
35Chayrayku, mana judiosllachu, manachayqa waj llajtayoj runaspis, anchatapuni phiñakusqanku wañuchisqankumanta chay jinata Oniasta, cheqan sonqoyoj runata. 36Chayamojtintaj rey Siliciamanta, judío runasqa reyta watukusqanku, willakusqankutaj Oniasta wañuchisqankumanta. Griego llajtayojkunapis phiñasqas kasharqanku chay runas wañuchisqa kasqanmanta. 37Antiocotaj, chayta yachaytawantaj, anchatapuni llakikusqa. Phutiyninwantaj waqasqa. Yuyarikusqataj sumaj yuyayniyoj kasqanmanta. 38Anchata phiñakuspa ujta qhechuykusqa Andronicomanta puka p'achasninta. Chay p'achasnintataj llik'iykusqa. Chaymantataj, Andronicota puriykuchisqa llajtantinta, maypichus pay Oniasta wañucherqa, chayman chayanankama. Chaypachapitaj Antiocoqa nisqa payta wañuchinankuta. Ajinamanta, Diosqa paywan ruwarqa juchasninman jina.
Lisimacoqa uj ch'ajwapi wañun
39Menelao yachashajtin, Lisimacoqa ashkhata suwakapusqa Jerusalén templomanta. Chayta yachaspa, Jerusalén llajtayoj runasqa Lisimacoj contranta oqharikusqanku. Chaykama, ashkha qori imasqa chinkasqaña kasqa. 40Lisimacotaj, rikuspa runas oqharikusqankuta may phiñasqas, maqanakupaj wakichisqa kinsa waranqa runasta. Chay runasqa sinch'i phiñakuywan llajta runaspa contramkupi llojsisqanku. Chay runaspa capitanku karqa uj runa Auranos sutiyoj. Chay Auranosqa ashkha watayojtaj pisi umayojtaj karqa. 41Runastaj yachasqanku Lisimacoqa paykunaj contrankupi jamusqanta. Wakinku risqanku rumista tantamoj. Wakinkutaj k'ullusta mask'asqanku. Wakinku, ushphata pampamanta oqharisqanku. Tukuy chaytataj Lisimacoj soldadosninman wijch'uykusqanku. 42Chay ch'ajwapi wakin soldadosta nanaykuchisqanku, wakinta wañuchisqanku. Wakintataj ayqerparichisqanku. Chantaqa, templomanta suwakoj Lisimacota, kikin qori waqaychana chaynejpi wañuchisqanku.
43Chaymantataj, Menelaota wajyasqanku tukuy chaykunamanta uyanchanankupaj. 44Chayamojtintaj reyqa Tiro llajtaman, judío kurajkuna paypaman kachamusqanku kinsa runasta, reypa ñaupaqempi Menelaota tumpanankupaj. 45Menelaotaj, juchachasqaña rikukuspa, parlaykusqa Dorimenoj wawan Tolomeowan. Nisqataj ashkha qolqeta qopunanta paypaj reyman parlaripunampaj. 46Chaymanta Tolomeoqa reyta pusasqa uj corredorman, wayraman, samarikunampaj jina, ukhu ruphaymanta ayqespa. Chaypitaj yuyayninta tijraykuchisqa. 47Reytaj nisqa Menelaoqa manapuni juchayoj kasqanta. Ajinamanta, pichus juchayoj karqa tukuy chay llakiymanta, llimphu sonqoyoj jina rikhurimun. Chantaqa, rey nillasqataj Menelaota tumpajkuna juchachasqas kanankuta, wañuyman pusasqas kanankutataj. Nitaj uywas jina kausakoj runaspis chayta ruwankumanchu karqa. 48Chaypachapi, qhasi mana kajmanta wañuchisqas karqanku chay runasqa pikunachus waqaychayta munarqanku templo imasta, munarqankutaj llajtatawan runastawan llakiymanta jark'ayta. 49Wakin Tiro llajtayoj runasqa sonqo nanaywan rikusqanku tukuy chay mana allinkunata. Chayraykutaj, ramakuspa, k'acha sepulturata wakichisqanku chay wañusqas p'ampasqas kanankupaj. 50Menelaotaj kakullasqapuni atiyniyoj, qhapaj runas paypa yanapasqankurayku. Sonqontaj astawan rumiyasqa. Ajinamanta, pay chejnikorqa llajta masisninta tukuy runasmanta astawan.
Currently Selected:
2 MACABEOS 4: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.