2 MACABEOS 15
15
Nicanorqa wañupun
[1 Mac. 7.39-50]
1Nicanorman willasqanku Judas runasninwan khuska Samaria cheqapi kasqanta. Unanchakuspa, yuyasqa Nicanorqa chayman kachaykukuyta, paykunata tinkoj samakuna diapi, ni imamanta manchachikuspa.
2Paywan khuska kasqanku wakin judíos. Chay judiosqa Nicanorman nisqanku: Amapuni yaykuychu chay jinamanta k'ita runa jina. Tukuy imata rikoj Diosqa chay diata tukuy diasmanta astawan santoyacherqa, nispa. 3Chay kinsa kuti sajra runaqa tapusqa sichus janaj pachapi tiyan uj Señor pichus nerqa chay diata qhawananta samakuna día jinata. 4Judiostaj nisqanku: Tiyampuni uj Señorqa. Paymin janaj pachapi kashan. Payqa atiyniyoj. Paypuni niwayku qanchis kaj diapi samakunaykuta, nispa. 5Nicanortaj nisqa: Noqataj atiyniyoj kani kay pachapi. Niykichej maqanakunasniykichejta jap'inaykichejta, reytataj kasukunaykichejta, nispa. Jinapis, mana atisqachu sajra yuyayninta junt'ayta.
6Nicanorqa, anchatapuni wapuyaspa, munashasqa oqharichiyta uj apachetata, chaypi churachinampaj Judaspa runasnimpata maqanaku armasininkuta. 7Macabeotaj, chaykama tukuy sonqo yuyashasqapuni Señorqa paykunata yanapananta. 8Runasninman nisqa Macabeoqa ama manchachikunankuta chay mana Diosniyojkunamanta. Nisqataj yuyarikunankutapuni Diosninchej ñaupajta paykunata yanapasqanta. Nisqa ari kunampis suyanankuta Tukuy Atiyniyoj Diosninchej paykunata yanapananta. 9Macabeoqa runasninta sonqochasqa parlaspa Diospa leyninmantawan profetasmantawan. Yuyarichillasqataj waj kutisña maqanakusqankumanta. Ajinamanta, may sonqochasqas kasqanku runasqa. 10Chay jinamanta runasninta sonqochasqanmantataj, allinta yachachisqa imatachus ruwanankuta. Rikuchisqataj chay mana Diosniyojkunaqa puraj uyas kasqankuta. Rikuchillasqataj imaynatachus chay runasqa p'akisqankuta chay trato ruwasqankuta. 11Ajinamanta, Macabeoqa, paykunata kallpachaykorqa, mana jark'anasllatachu chayri t'ojsinasllatachu jaywaspa, manachayqa nisqasninwan sonqochaykuspa. Chaymantataj, paykunaman willaykusqa imatachus mosqoypi jina rikusqanta. Chaymin creenapaj jina karqa.
12Kayta rikusqa Macabeoqa mosqoynimpi: Onías, pichus ñaupajta sacerdote karqa chay, k'acha sonqoyoj runa karqa, munakunapajpuni, respetachikoj. Wawa kasqanmantapacha, Diosman k'askasqa kasqa. Chay runaqa makisnin oqharisqa, mañakushasqa Diosmanta tukuy judíos runaspaj. 13Ujta chaypachallapi rikhurimusqa waj runañataj, yuraj chujchasniyoj, respetoyojtaj. Payta rikuytawan ninchejman may jatun kasqanta, atiyniyojtaj. 14Oniastaj parlarisqa kay jinata: Kaymin Jeremiasqa, Diospa profetan. Payqa hermanosninta munakun. Tuta p'unchay Diosmanta mañakun judío runaspaj ajllasqa llajtapaj ima, nispa. 15-16Jeremiastaj paña makinta oqharisqa. Chaymanta, Judasman jaywasqa uj qori espadata nispa: Kay santo espadata jap'iy, Dios jaywashasunki chayta. Kay espadawanqa enemigosniykita t'unarparichinki.
17Kay k'acha palabraswan sonqochasqas, wapuyasqas kallpachasqastaj, nisqanku aswan allin kasqanta sinch'i sonqo llojsiyta tinkukoj enemigosninkuwan, chayllapi paykunata suyanamanta nisqaqa. Nisqankutaj llakiy jamushasqantaña llajtaman, religionman, temploman ima. 18Yuyarikusharqanku warmisninkumanta, hermanosninkumanta, tukuy ayllusninkumantataj. Jinapis, aswan llakisqas kasharqanku templopi piensaspa. Temploqa qanimpalla llimphuchasqa karqa. 19Llajtapi qhepakojkunapis may llakisqasllataj kasharqanku. Tukuyninku piensasharqanku imachus kananmanta chay maqanakupi.
20Tukuyninku suyasharqanku manchachikuywan. Enemigosqa ujllapiña tantasqas kasqanku. Chakipi kajkuna wakichisqasña kasqanku maqanakupaj. Elefantespis churasqasña kasqanku cheqankupi. Cantospitaj kasqanku caballosniyojkuna. 21Macabeo rikushasqa soldados qayllashajta. Qhawaykushasqa chay jina tukuy ima laya maqanakunasniyoj kasqankuta. Qhawallashasqataj chay phiña elefantestapis. Chayta rikuytawanqa, Macabeo makisninta oqharisqa pataman. Makisninta oqharispataj, t'ukunasta ruwaj Señormanta mañakusqa. Payqa allinta yacharqa Señorqa atipachisqanta munayninman jina, mana maqanaspa atiyninkuman jinachu. 22Kay jinamanta payqa Diosmanta mañakushasqa: Qan, Señor angelniykita kachamorqanki Judamanta rey Ezequiasman. Paytaj wañucherqa yaqha pachaj pusaj chunka phishqa waranqayoj Senaqueribpa soldadosninta. 23Kunampis, qan, janaj pachapi kamachej, kachamuy uj sumaj angelta ñaupaqeykupi, enemigosniykuta manchachinampaj kharkatitichinampajtaj. 24Sinch'i makiykiwan nanaykuchiy kay paganosta pikunachus qampaj rimanku, santo aylluykitapis wajtanku chaykunata. Chay jinata nispa nisqa Macabeoqa.
25Nicanorpa runasnin jamushasqanku pututusninkuta waqachispa, maqanaku takiykunatapis takispa. 26Judaspa runasnintaj maqanakuman risqanku Diosmanta mañakuspa. 27Makisnillankuwan maqanakuspa, pampapi sirisqas saqesqanku kinsa chunka phishqa waranqayoj runasmanta astawan. Dios paykunata yanapasqanmantataj, may kusisqas qhepakusqanku. 28Maqanakuyta tukusqankumantataj, kusisqas ripushajtinku, ujta rikusqanku Nicanorta, armasniyojta. Maqanakupi wañuchisqa kasqa. 29Chantaqa, sinch'ita qhaparispa, Diosta alabasqanku paykunaj parlayninkupi.
30Macabeotaj, pichus tukuy imapi ñaupakusqa tukuy sonqo mask'aspa ayllumpa allin kayninta, pichus wayna kasqanmantapacha munasqapuni ayllunta, nisqa Nicanorpa umanta qholurparimunankuta, makintapis khuchumunankuta. Chantaqa Jerusalenman chayta apanankuta. 31Paypis Jerusalenman risqa. Chaypi tantachimusqa llajta masisnintapis sacerdotestapis. Chaymanta, sayasqa altarpa ñaupaqempi. Chantaqa wajyachimusqa jark'anaspi kasharqanku chaykunata. 32Tukuyninku chaypiña kashajtinku, rumi sonqo Nicanorpa umanta rikuchisqa. Rikuchillasqataj Nicanorpa makinta, mayqentachus oqharisqa templo cheqaman may rabiawan, Diospa contranta. 33Chaymanta khuchusqa rumi sonqo Nicanorpa qallunta. Nisqataj t'unuyachinankuta, jaywanankutataj suwintusman. Nillasqataj Nicanorpa makinta churanankuta templo punkupi, chay jinamanta paganampaj sajra ruwasqasninmanta. 34Chaymantataj tukuyninku ñawisninkuta oqharisqanku pataman, alabasqankutaj Señorta pichus paykunaman qayllaykusqa. Nisqankutaj: Alabasqa kachun Señor, pichus llimphuchasqata waqaycharqa templonta. 35Judastaj warkhuchisqa Nicanorpa umanta jark'ana perqas patapi. Chayta rikuspa tukuy yuyarikonqanku Señorqa paykunata yanapasqanmanta. 36Chaymanta, tukuyninta uj sonqolla nisqanku chay kutimantapacha chaymanta yuyarikunankutapuni fiestata ruwaspa sapa chunka iskayniyoj kaj killapi, chunka kinsayoj kaj diapi. Chay killaqa arameo simipi nikun Adar. Chay killa tukukojtin qallarin Purim nisqa fiesta.
Kaypi tukukun
37Chaykuna pasarqa Nicanorpa tiempompi. Chay kutimantapacha llajtapi hebreoslla kamachinku. Kaypi noqaqa tukusaj willakusqasniyta. 38K'achalla kajtenqa, sumaj ruwasqataj, niychej noqa chayta ruwayta munasqayta. Mana allinchu millaytaj kajtenqa, niychej chayllata ruwayta atisqayta. 39Mana tomanachu vinollatachus yakullatachus. Aswan sumaj vinoqa yakuwan chajrusqa. Ajinallataj, uj libropi, ashkha layamanta escribisqa kajtin, uyarejkuna astawan kusikunku. Willakusqasniy kaypi tukukun.
Currently Selected:
2 MACABEOS 15: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.