2 MACABEOS 14
14
Judaswan Nicanorwan uj tratota ruwanku
[1 Mac. 7.1-38]
1Kinsa watasmantawan, Judasman runasninmantaj willaykusqanku Seleucoj wawan Demetrio, Trípoli puertoman chayamusqanta ashkha soldadoswan barcoswan ima. 2Willallasqankutaj wañuchisqanta Antiocota, paypa qhawajnin Lisiastapis. Paykunata wañuchiytawan, Demetrioqa llajtata jap'ikapusqa.
3Kasqa nin chaypi uj runa Alcimo sutiyoj. Chay runaqa ñaupajta kuraj sacerdote kasqa. Oqharikuypi paypuni munayninwan ch'ichichakusqa. Kunanqa, pay yuyashasqa manaña paypaj salvación kasqanta nitaj atisqanta watejmanta santo altarman qayllayta. 4Chay Alcimoqa risqa watukoj rey Demetriota. Chaymin pasasqa pachaj phishqa chunka ujniyoj watapi. Qayllaspataj, jaywasqa Alcimoqa Demetrioman uj qori pilluta uj palmatawan. Chantá qosqa Demetrioman olivo ramosta, imaynatachus templopi jaywaj kanku, ajinata. Chay kutipeqa mana astawan ruwasqachu. 5-6Chantaqa, uj kuti Demetrio wajyasqa Alcimota uj tantakuyman, yachayta munaspa imatachus judiosqa yuyasqankuta, ima sonqowanchus kasqankuta ima. Alcimoqa chaypacha sajra sonqonta kicharisqa. Nisqataj kay jinata: Judíos ukhupi tiyan uj laya runas pikunatachus beatos ninku. Paykunaj umanqa chay Judas Macabeo. Chay runasqa waj runasta pusanku oqharikuyman, ch'ajwastataj rikhurichimunku kaypi jaqaypi, manataj saqenkuchu allin kay kananta reinopi. 7Qhechuwanku kuraj sacerdote kayniyta, mayqenchus ñaupa tatasniymantapacha jamuwan. Kunan noqaqa jamushani qanwan parlaj. 8Ñaupajtaraj niyman k'askakusqayta tukuy sonqo reypa munayninman. Qhepanta, nishaykichej noqaqa munasqayta llajta masisniyta yanapayta. Judaspa runasnin yuyayninkuta chinkachisqankurayku, tukuy judío runas llakiyniyoj kashanku. 9Tukuy chaykunataqa allinta tapuy, reyníy. Tukuy imata sumajta yachaspataj, ruway imatachus allin kanqa aylluykupaj. Aylluykoqa tukuynejmanta llakiyllata jap'ikushan. Qanqa k'acha ñawiwan tukuyta qhawankipuni ari. 10Judasqa, qayllallapipuni kanqa chayqa, manapuni allin kay kanqachu kay lugarpi. 11Chayta Alcimo niytawantaj, waj reypa amigosninkupis qhajpacha astawan t'impurichisqanku Demetrioj sonqonta, mana paykunapis Judasta munakusqankurayku.
12Reytaj chay kikimpachalla ajllasqa Nicanorta, pichus kamachishasqa elefantesniyoj soldadosta. Chantaqa nisqa Judeapi kamachej kananta. 13Reyqa ordenta qosqa Nicanorman Judasta wañuchinampaj, chantaqa payta qhatejkunata ch'eqerachinampaj. Chaymanta, nisqataj watejmanta Alcimota churachinanta kuraj sacerdotepaj may jatun temploman. 14Waj religionniyojkunataj, pikunachus ayqesqanku Judasmanta manchachikuspa. Nicanorman k'askaykukusqanku. Yuyashasqanku kusikuyta judiospa llakiyninkunejta.
15Judiosqa yachaspa Nicanor jamushasqanta, yachaspataj mana judío runas reyta munakusqankuta, jallp'ata churakusqanku umasninkuman, mañakusqankutaj Diosmanta. Yuyarikushasqanku Diosqa ayllunta sayarichisqanta wiñaypaj. Yuyarikullasqankutaj Diosqa tuta p'unchay paypa kapuyninta qhawaykusqanta yanapasqantataj t'ukuna imasta ruwaspa. 16Kamachejninku ordenta qosqanrayku, llojsisqanku. Hadasa llajta chaynejpitaj Nicanorpa runasninwan tinkunakusqanku. 17Judaspa wauqen Simón churanakusqa Nicanorwan. Chaypacha, ujta enemigosqa chayamusqanku. Chayrayku Simonqa maqanakupi atipachikusqa. 18Nicanortaj yachaspa Judasqa runasnintin sinch'i sonqos kasqankuta, yachaspataj paykunaj llajtankuta munakusqankurayku maqanakusqankuta, mana munashasqachu paykunata tukurparichiyta. 19Chayta unanchaspa kachamusqa Posidoniotawan, Teodototawan, Matatiastawan, paypa sutimpi Judaswan allinyakamunankupaj.
20Allinta parlasqankumantawan tukuy imamanta, Nicanortaj Judastaj chay trato ruwanamanta parlasqanku runasninman. Nicanorpa runasninman Judaspa runasninman ima, allin rijch'asqa chay tratoqa. 21Chaymanta nisqanku jayk'ajchus iskaynin kamachejkuna tantakunankuta. Chay día chayamojtintaj sapa ladomanta uj carro llojsisqa. Iskayninkupajtaj uj cheqapi wakichisqanku tiyanasta. 22Judastaj chaynejllapi churachisqa maqanasniyoj runasta. Nicanor ch'aukiyayta munajtin chayqa, Judasqa chay casopaj wakichikusharqaña. Nicanortaj mana ni ima allin kajta ruwasqachu. Iskayninkutaj uj yuyaylla uj tratota ruwasqanku. 23Chaymanta Nicanorqa risqa Jerusalenman. Chaypi allillan kakusqa maychus kajta ruwaspa. Payta qhatisharqanku soldadostapis kacharparisqa. 24Munasqataj Nicanorqa Judas paywan khuskapuni kananta. Nicanorqa chay runata mayta munakusqa. 25Nicanorqa nisqa Judasman casarakunanta wawasniyojtaj kananta. Judastaj casarakusqa. Judasqa allinta kausakusqa.
Alcimo chay tratomanta willan rey Demetrioman
26Alcimotaj kachaykukusqa rey Demetriota watukoj. Apasqa chay tratota papelpi rey Demetrio rikunampaj. Alcimoqa rey Demetrioman nisqa Nicanorqa munashasqanta oqharikuyta. Nisqataj Nicanorqa wakichishasqanta Judasta paypa cuentanmanta kakunampaj Jerusalempi kamachej jina. Nisqa ari reyman Judasqa paypa enemigon kasqanta. 27Reytaj, chayta uyarispa, mayta phiñakusqa. Chantaqa, phiñakuywan t'impuspa chay sajra sonqoj tumpasqanwan, Nicanorman uj cartata apachimusqa nispa mana allin ñawiwanchu qhawasqanta chay trato ruwasqanta Judaswan. Nisqataj usqhayllata Macabeota presochasqata pusachimunanta Antioquiaman. 28Reypa cartanta leeytawantaj Nicanorqa mayta phiñakusqa. Mana munashasqachu ari chay trato ruwasqanta p'akiyta Judasqa mana ni ima juchayoj kasqanrayku. 29Reypa nisqanta ruwanampuni kasqanrayku, unanchashasqa ima ratotachus chayta ruwayta atinman pakayllamanta.
30Judastaj rikusqa mana allintañachu payta qhawasqanta Nicanorqa. Rikusqataj manaña k'acha sonqochu payman parlarikusqanta sapa tinkojtinku. Chayqa mana sumajchu kasqanta yuyarispa, ashkha runasninta tantaykuspa ayqesqa Nicanormanta, pakakoj.
31Nicanorqa rikuspa libreta atipachikusqanta Judaswan, risqa temploman. Chayasqa sacerdotes rikuchikusninkuta jaywashajtinku. Ordenta qomusqa Nicanorqa nispa payman entreganankuta Judasta. 32Paykunataj juraspa nisqanku manapuni yachasqankuta maypichus chay runa kasqanta. 33Chantaqa, Nicanorqa paña makinta temploman oqharispa, juramentota ruwaspa nisqa: Manachus pusampuwankichej Judasta watasqata, noqaqa kay Diospa wasinta q'alata urmarparichisaj, altartapis t'unarparichisaj. Cheqampitaj oqharichisaj uj k'acha templota Bacopaj, nispa. 34-35Chayta niytawantaj ripusqa. Sacerdotestaj makisninkuta pataman oqharispa, ayllunchejta qhawaj Diosmanta kay jinata mañakusqanku. Qan, Señor, mana ni imata qampaj munankichu. Noqaykupaj ajllarqanki kay cheqata, noqaykuwan khuska kayta munasqaykirayku. 36Kunanqa, Santo Señor, qhaway kay santo wasita, amataj saqeychu ch'ichichasqa kananta. Qanimpalla llimphuchasqa karqa ari, nispa.
Razispa wañupuynin
37Kasqa nin uj runa, judío kurajkunamanta ujnin kaj, Razis sutiyoj. Chay runamantaqa mana allintachu parlasqanku Nicanorman, payta tumpaspa. Chay runaqa llajta masisninta munakoj kasqa. Paypis may rejsisqa munasqataj kasqa. Tukuy judiostaj paytaqa tatankuta jina rejsisqanku, judiosta anchatapuni munakusqanrayku. 38Ñaupajta, judiospa oqharikuynin qallarikushajtin, sut'ita yachakusqaña judaismoman sumaj k'askasqa kasqanta. Yaqha wañuchisqankupis judío religionta qhatisqanmanta. 39Nicanortaj, rikuchiyta munaspa judiosta chejnikusqanta, kachasqa phishqa pachaj soldadosmanta astawan, Razista jap'imunankupaj. 40Nicanorqa yuyashasqa chay runata jap'ispa may jatun llakiyta apachimusqanta judiospa patankuman. 41Soldadosqa chay yachashasqankuña chay torreman maypichus Razis kasharqa chayman. Jawamanta munasharqanku punkuta urmachiyta. Nisqankutaj chay soldadosman punkuta larwachimunankuta. Razistaj, mana ni mayman ayqeyta atispa, espadanta jap'ispa, pay kikinta t'ojsikusqa. 42Razisqa munasqa mana p'enqaywanchu wañupuyta. Mana munasqachu urmayta sajra runaspa makisninkuman nitaj p'enqayta ñak'arichinankuta. 43Soldados yaykushajtinkutaj, chay ch'ajwapi, t'ojsikusqanwanqa mana wañusqachu. Soldadosqa yaykushasqankuña. Razistaj mana manchachikuspa wicharisqa torre pataman. Chay patamantataj ujta uraman kachaykukusqa runas pataman. 44Soldadostaj ithirikusqanku, Razistaj q'ara pampaman urmasqa. 45Manataj wañusqachu. Wapu wapulla sayarisqa sinch'ita nanachikushajtimpis. Corresqa q'ala yawarchasqa runas chaupipi. Chayasqa uj pata qaqaman. 46Manaña kallpan kasqañachu. Ch'unchulasninta orqhokusqa. Iskay makisninwantaj, soldadosman ch'unchulasninta wijch'uykusqa. Chantaqa, kausayta qoj Señormanta mañakusqa jayk'ajllapis watejmanta kausayninta kutipunanta. Ajina wañorqa Razisqa.
Currently Selected:
2 MACABEOS 14: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.