2 CORINTIOS 1

Pabloj napaykuynin

1Noqa Pablo, Jesucristoj apostolnin kani Diospa munayninrayku. Kay cartata escribimuni hermano Timoteowan khuska, Corinto llajtapi kaj Diospa iglesianman, tukuy Acayapi creejkuna kajkunaman ima. 2Khuyakuy, sonqo tiyakuytaj qankunawan kachun Dios Tatanchejmanta, Señor Jesucristomantawan.

Pabloj llakiykunasnin

3Yupaychasqa kachun Dios Señorninchej Jesucristoj Tatan; imaraykuchus payqa khuyakoj Tata, tukuy imapi sonqochakoj Diostaj. 4Paytaj sonqochawayku tukuy ima llakiyniykupi, noqaykupis sonqochanayku, llakiypi, ñak'ariypi kajkunata, imaraykuchus noqaykupis sonqochasqas karqayku Diosmanta. 5Cristoj ñak'ariyninwan anchata llakikuyku, ajinallatataj kikin Cristonejta may sonqochasqas kayku. 6Noqaykuchus ñak'ariyku chayqa, qankuna sonqochasqas, salvasqastaj kanaykichejpaj. Sonqochasqaschus kayku chayrí, qankuna sonqochasqasllataj, salvasqastaj kanaykichejpaj. Chaykunaqa ruwakun kikin llakiykunata aguantasqapi, noqaykupis aguantayku chay llakiykunata. 7Qankunapi suyayniykoqa sinch'i; yachaspa ñak'arej masisniyku kasqaykichejta, llakiypi, ajinallataj sonqochakuypipis.

8Hermanos, noqayku munayku yachanaykichejta ima llakiykunachus karqa Asiapi noqaykuwan. Anchatapuni ñak'arerqayku; manaña kallpaykupis kaj jinachu karqa astawan ñak'arinaykupaj; manañataj yuyarqaykuchu kausaytapis. 9Noqaykutaj wañuytapuni yuyarqayku; chayqa kasqa suyayta yachanaykupaj. Mana noqallaykupichu, mana chayqa Diospi, pichus atiyniyoj wañusqasta kausarichimunampaj. 10Dios jark'awarqayku chay jina jatun wañuymanta. Kunampis jark'awayku; suyaykutaj qhepamampis jark'anawaykuta. 11Qankunapis yanapawayku Diosmanta mañakuspa; ashkhastaj Diosman graciasta qonqanku wañuymanta jark'awasqaykurayku.

Pabloqa mana Corintoman rinchu

12Noqaykoj kusikuyniykoqa kay jina kashan: Sonqoyku niwayku allinta, llamp'u sonqos, maychus kajta purisqaykuta. Manataj runaj yachayninman jinachu, astawanqa Diospa khuyakuyninman jina allinta kausakorqayku kay pacha runaswan, astawanqa qankunawan. 13Kay cartas escribimusqaykupeqa, mana kanchu astawan waj imas kay leesqaykichejmanta, chayrí imatachus unanchasqaykichejmanta, astawanqa suyashani tukukuykama unanchanaykichejta. 14Ñapis qankuna uj chhikanta yachankichejña, noqayku qankunajta kusikuyniykichej kasqaykuta, ajinallataj qankunapis noqaykojta kusikuyniyku kasqaykichejta, Señor Jesuspa p'unchaynimpi.

15Chayrayku, chay confianzawan ñaupajta jamuyta munarqani qankunaman, uj kutitawan kusikunaykichejpaj. 16Munarqani qankunanejta Macedoniaman riyta, ujtawantaj Macedoniamanta jamuyta qankunajman; chaymantataj Judeaman qankunawan pusachikuyta. 17Noqa ajinata suyashaspaqa, manachu allinta yuyaspa nimuykichej imatachus ruwayta yuyaspa? Aychaman jinachu yuyarqani noqapi kanampaj chay “arí”, chayrí “mana” ninaypis? 18Astawanqa Dios yachan palabraykoqa qankunapaj mana “arí” nisqachu, nitaj “mana” nisqachu kasqanta. 19Jesucristoqa Diospa Churin. Noqayku paymanta willarqayku qankuna ukhupi, noqa, Silvano, Timoteo ima. Manataj Jesucristopi karqachu “arí” niywan “mana” niywan khuska, astawanqa “arí” paypi karqa. 20Tukuy imata Dios qoyta munawasqanchejrí, Cristo Jesuspi “arí” kashan, payllapitaj “amén”, Dios yupaychasqa kanampaj noqanchejnejta. 21Diostaj noqaykuta qankunatawan sinch'ita Cristopi sayachiwanchej, jinataj llimphuchawanchej. 22Payllataj sellaykuwanchej, qowanchejtaj Santo Espirituta uj señata jina sonqonchejpi.

23Astawanqa Diosta wajyakuni almaymanta testigo kanampaj; qankunata allinta khuyayta munaspataj, manaraj Corintoman jamunichu. 24Mana noqaykoqa, feniykichejrayku kamachejkuna jinachu kayta munayku; astawanqa kusikuyniykichejta yanapayku, imaraykuchus feniykichejrayku sinch'ita sayashankichej.

Currently Selected:

2 CORINTIOS 1: QCHSB

Highlight

Copy

Compare