1 TESALONICENSES 5
5
1Chay p'unchaymanta, chay horamantawanqa anchaña kanman, hermanos, escribimunayqa. 2Qankunaqa allinta yachankichej suwaqa tuta jamusqanta; ajinallatataj Señorpa p'unchaynimpis jamonqa. 3Maypachachus runakuna nenqanku: Sonqo tiyasqa, waqaychasqataj kayku, nispa; chaypacha ujllata paykunaman wañuy jamonqa, imaynatachus onqoj warmiman nanay jamun, ajinata; paykunataj mana ayqeyta atenqankuchu. 4Qankuna, hermanos, mana laqhayajpichu kashankichej, jaqay p'unchay suwa jina jap'isunaykichejpaj. 5Tukuyniykichej k'anchaypa wawasnin, p'unchaypa wawasnintaj kankichej; manataj tutayajpatachu, nitaj laqhayajpatachu. 6Chayrayku, ama chay ujkuna jinaqa puñunachu, astawanqa ama puñuspa qhawana, ch'aki sonqostaj kana. 7Puñojkunaqa, tuta puñunku; machajkunapis tuta machanku. 8Noqanchejrí p'unchaypata kaspa, ch'aki sonqos kana, fewan, munakuywantaj p'achallisqas, fierro pechoquerawan jina; salvación suyakuywantaj, monterawan jina. 9Diosqa mana phiñakuypajchu churawarqanchej, astawanqa salvacionta tarinanchejpaj Señorninchej Jesucristonejta. 10Payqa noqanchejrayku wañorqa; chayrayku ña rijch'arishaspa, ñataj puñushaspa, paywan khuska kausananchej. 11Chayrayku, qankuna ukhu sonqochanakuychej, qankunapurataj sayachinakuychej; imaynatachus ruwashankichej ajinata.
Pablo hermanosta yuyaychan
12Hermanos, mañakuyku qankuna ukhupi llank'ajkunata, Señorpi kamachisojkunata, yuyaychasojkunata ima allimpaj qhawanaykichejta. 13Ruwasqasninkuraykutaj may munakuywan, paykunata allimpaj qhawaychej. Sonqo tiyakuywantaj qankunapura kausakuychej.
14Ajinallatataj mañakuyku, hermanos, mana kasukojkunataqa k'amiychej, manchalistapis yanapaychej, pisi kallpayojkunatapis kallpachaychej, tukuypajtaj khuyakoj sonqoyoj kaychej.
15Ama pipis sajrata ruwajman, sajrallatataj kutichichunchu; astawanqa, allin kajllatapuni qhatiychej, qankuna ukhupi, wajkuna ukhupipis.
16Kusisqallapuni kakuychej. 17Mana samaspa Diosmanta mañakuychej. 18Tukuy imamanta graciasta qoychej. Kaymin qankunapaj, Jesucristopi Diospa munaynenqa.
19Ama thasnuychejchu Espirituta. 20Ama qhesachaychejchu Diospa yuyaychasqasninmanta parlajkunata. 21Sumajta tukuy imata qhawaychej, allin kaywantaj kakuychej. 22Tukuy laya sajra kajmanta t'aqakuychej.
23Sonqo tiyachej Diosqa allintapuni qankunata llimphuchachun. Tukuy kayniykichej, espirituykichej, almaykichej, ukhuykichejpis mana k'aminayoj waqaychasqas kachunku Señorninchej Jesucristo jamunankama. 24Tukuy imapi junt'ajmin qankunata wajyajqa, chayta tukuychanqa.
Cartaj tukukuynin
25Hermanos, noqaykupajpis Diosmanta mañapuwayku.
26Tukuy hermanosta napaykuychej llimphu much'aykuywan.
27Señorpa sutimpi kamachiykichej kay cartata leenaykichejta tukuy hermanosman.
28Señorninchej Jesucristoj khuyakuynin qankunawan kachun.
Currently Selected:
1 TESALONICENSES 5: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
