1 MACABEOS 9
9
Judas Macabeo wañupun
1Demetrio yachaytawan judiosqa wañuchisqankuta Nicanorta soldadosnintinta maqanakupi, watejmanta kachamorqa Judeaman Baquidestawan Alcimotawan. Paykunaqa apasqanku paña lado nisqa regimientosta. 2Paykunaqa jap'isqanku Galileaman pusaj ñanta, yaykusqankutaj Arbela provinciamanta Mesalot llajtaman. Chay llajtataqa jap'ikapusqanku. Chaypitaj ashkha runasta wañuchisqanku. 3Pachaj phishqa chunka iskayniyoj kaj watapi, ñaupaj kaj killapi, paykunaqa jarakorqanku Jerusalempa chimpampi. 4Chaymanta Beerotman kachaykukorqanku iskay chunka waranqa chakipi rej soldadoswan, iskay waranqa caballopi rej soldadoswantaj. 5Judastaj chaykama jarakushasqa Elasapi kinsa waranqa ajllasqa soldadoswan. 6Judaspa runasnintaj rikuspa enemigosninku jina ashkha kasqankuta, anchatapuni mancharikorqanku. Ashkhastaj paykunamanta jaramanta ayqekaporqanku. Jinamanta, chaypi pusaj pachaj runaslla qhepakorqanku. 7Rikorqataj Judasqa runasnin ayqesqankuta. Yachaspataj yaykunampuni kasqanta maqanakuman, sonqon llauch'iyarqa mana atisqanrayku watejmanta runasta tantaytaqa. 8Jinapis, qhepakojkunaman parlarqa kay jinata: Rina enemigosninchejwan tinkoj. Ichapis atillasunchej atipayta, nispa.
9Soldadosnintaj payman nerqanku: Mana atisunchejchu. Ayqenalla, manachayqa, wañusunchejpuni. Chaymanta kutimullasunchej masisninchejwan khuska enemigosninchejwan maqanakoj. Kunan ancha pisillaj kanchejqa, nispa. 10Judastaj nerqa: Maymanta noqaqa ayqeymanri enemigosniymanta! Qhepan hora chayamuwanchej chayqa, sinch'i sonqo wañuna hermanosninchejrayku. Mana saqenachu glorianchej ch'ichichakunanta.
11Baquidespa soldadosnintaj jarankumanta llojsispa wakichikorqanku maqanakupaj. Caballopi rejkuna iskaymin t'aqakorqanku. Ñaupajta risharqanku warak'asniyojkuna, wach'inasniyojkunataj. Aswan wapu kajkunataj ñaupasharqanku. 12Baquidesqa pañanejpi risharqa. Iskayman t'aqasqa ejercitoqa chayamusharqaña pututusta waqachispa. 13Sonachisqanku pampata kuyurichej. Tinkuytawantaj maqanakorqanku paqarinmantapacha inti yaykunankama. 14Rikusqataj Judasqa Baquides ajllasqa runasninwan khuska paña ladopi kasqanta. Judasman qayllaykusqanku aswan wapu kaj runasnin. 15Judasqa runasninwan khuska kachaykukusqa paña kaj ladoman. Chantaqa Baquidespa runasninta qhatiykachasqa Azoto orqoskama. 16Lloq'e ladopi kajkunataj, rikuspa paña ladopi kajkuna atipachikusqankuta, kutirisqanku Judaspa qhepanman, runasnintataj wasankumanta qhatiykusqanku. 17Ch'ajwaqa may sinch'i kasqa. Sapa t'aqamanta kajkunapis urmachisqas kasqanku kaypi jaqaypi. 18Judaspis urmallasqataj. Wajkunataj ayqerparikapusqanku. 19Jonatán, Simontaj ima pusakapusqanku Judas wauqenkuta, p'ampaykusqankutaj Modimpi, maypichus tatasninkoj sepulturanku kasqa chaypi. 20-21Tukuy israelitastaj waqaykusqanku paymanta. Ashkha diastaj lutota waqaychasqanku paymanta, nisqankutaj: Imaynatataj urmanri kallpayoj kaj, pichus Israelta salvarqa chaymin? 22Wakin Judaspa ruwasqasnenqa, waj maqanakunasnimpis, t'ukuna imasta ruwasqasnimpis, mayqenkunapichus gloriayoj rikhurerqa chaykuna, mana churasqarajchu kanku libropi, may chhika kasqankurayku.
Jonatanqa jatun kamachejman tukun
23Chantaqa, Judas wañupusqanmantapacha, tukuy Israel cheqaspi rikhurimunku mana leyniyojkuna. Sajrata ruwajkunaqa tukuynejpi kasqanku. 24Chay tiempopi may jatun yarqhay rikhurimusqa tukuynejpi, tukuy runastaj pasakapushasqanku chay sajra runasman. 25Baquidestaj Diosta wasanchaj runasta ajllarqa, paykunatataj kamachejkunaman tukucherqa tukuynejpi. 26Chay runasqa tukuynejman risqanku mask'aj Judaspa amigosninkuta, tarispataj apasqanku Baquidespaman. Paytaj paykunata ñak'arichisqa, sinch'itataj trataykusqa. 27Tukuy Israelpaj may sinch'i llakiy karqa. Chay jina llakiy mana karqachu profetaspa tiemponkumantapacha. 28-29Chantaqa, tukuy Judaspa amigosnin, ujllapi tantaykuspa, nisqanku Jonatanman: Judas hermanoyki wañupusqanmantapacha mana ni uj qharillapis rikhurimunchoqa mask'aj rinampaj enemigosninchejta, Baquidesta runasninta ima, pikunachus chejniwanchej chaykunata. 30Kunanqa, noqayku qantaqa ajllakuyku paypa cuentanmanta kamachejniyku kanaykipaj, pusanawaykupajtaj maqanakuspi, nispa. 31Kikimpacha Jonatanqa jatun kamachejman tukun, Judas wauqempa cuentanmanta.
32Chayta yachaspa Baquidesqa munashasqa Jonatanta wañuchiyta. 33Chayta willasqanku Jonatanman, paypa wauqen Simonman ima. Paykuna, runasninkuwan khuska ayqesqanku uj ch'in pampaman, Tecoa nisqa chayman, tiyakusqankutaj Asfar qocha chaynejpi. 34Baquidestaj, chayta yachaspa, uj samarina diapi, tukuy soldadosninwan pasasqa Jordán mayu chimpaman.
35Jonatanqa chantá kachamusqa ujnin wauqenta runasnintinta amigosninku nabateospaman, paykunamanta licenciata mañakunankupaj, paykunaj jallp'asninkupi q'episninkuta saqenankupaj. 36Chaymantataj, Medaba llajtamanta llojsisqanku Jambrí aylluyojkuna. Chayaspataj maypichus kasharqa Juan chayman, payta jap'iykusqanku q'episnintinta. Chantaqa, ayqesqanku.
37Uj kuti Jonatantaj wauqen Simontaj yachasqanku Jambrí aylluyojkuna jatun casamiento fiestata ruwasqankuta. Paykunaman willasqanku imaynatachus ashkha runaswan khuska noviata Nabadotmanta pusamusqankuta. Chay noviajta tatanqa qhapaj runa karqa Canaampi. 38Jonatantaj Simontaj yuyarikusqanku chay runaspuni wañuchisqankuta wauqenku Juanta. Kachaykukusqanku, pakakusqankutaj orqospi. 39Ujta rikusqanku ashkha runasta, ch'ajwaspa q'episniyojta. Waj ladomantañataj chayamushasqa novio amigosninwan, wauqesninwan khuska. Chay runasqa tocanasninkuta waqachisharqanku. Maqanaku armasniyojtaj kasqanku. 40Judiostaj ujta rikhurimusqanku. Ashkha runasta wañuchisqanku, wakintataj nanaykuchisqanku. Tukuy imanakutataj jap'ikapusqanku. Puchojkunataj ayqesqanku orqosman. 41Ajinamanta, casamientoqa waqayman tukun, takiytaj llakiyman. 42Ajina ari Jonatantaj Simontaj pagachikunku wauqenku Juan wañuchisqa kasqanmanta. Chantaqa ripusqanku Jordán mayu chimpaman, t'uru t'urulla kashan chayman.
43Chayta yachasqa Baquidesqa. Yachaytawantaj, uj samakuna diapi risqa Jordán mayu chimpaman ashkha runaswan. 44Jonatantaj nisqa paywan rejkunaman: Kunanqa sayarina. Rina maqanakoj kausayninchejrayku. Kunan diaqa mana qayna jinachu nitaj qanimpa jinachu. 45Ñaupaqenchejpij maqanaku kashan, jinallataj wasanchejpipis. Jordán yakustaj kaypipis jaqaypipis t'uru t'urulla, ch'ampa ch'ampalla kashan. Mana ni maymampis ayqeyta atisunchejmanchu. 46Kunanqa, janaj pachaman qhapariychej salvasqas kanaykichejpaj enemigosninchejpa makisninkumanta.
47Ch'ajwataj qallarisqaña. Jonatanqa makinta oqharisqa Baquidesta wajtayta munaspa. Manataj qosqachu. Baquidestaj ayqekapusqa. 48Chaymanta, Jonatanwan runasninwan Jordán mayuman kachaykukusqanku, wayt'aspataj chimpaman chayasqanku. Enemigosninkutaj mana qhatiykusqankuchu Jordán mayunta. 49Chay diapeqa Baquidespa runasninmanta waranqa runas wañusqanku.
50Chaymantataj, Baquidesqa Jerusalén llajtaman kutimpusqa. Judea jallp'api perqachasqa llajtasta oqharichisqa. Rumi jark'anasta ruwachimusqa Jericopi, Emauspi, Bet-Orompi, Betelpi, Timnapi, Piratompi, Tapuapi ima. Tukuynejpi oqharichisqa jatuchaj perqasta punkusniyojta aldabasniyojta ima. 51Tukuy chay cheqaspi soldadosta saqesqa, israelitasta toreyamunankupaj. 52Chantapis, sinch'iyachisqa Bet-Surta, Gezerta, Jerusalentapis. Chaypi saqesqa soldadosta. Chaypitaj waqaychachisqa mikhunasta. 53Baquidesqa presochachisqa kurajkunaj wawasninkuta, wisq'achimusqataj Jerusalén jark'ana wasipi. 54Pachaj phishqa chunka kinsayoj kaj watapi, iskay kaj killapi, Alcimoqa ordenta qosqa urmachinankupaj perqasta templomanta, chaupi patiopi kasharqanku chaykunata. Ajinamanta tukuchiyta munasharqa profetaspa ruwasqasninkuta. Chay perqasta t'unarparichiyta qallarishasqankuña. 55Perqasta t'unarparichiyta qallarishajtinkutaj, ujta Alcimoqa onqoykusqa, yuyayninta chinkachikuspa. Chay jawa, manaña perqasta urmachinkuñachu. Alcimoj simenqa opayaykusqa. Manataj testamentontapis ruwayta atisqañachu, manataj ni uj simillatapis parlarisqañachu. 56Alcimoqa chaypacha wañupun sinch'i nanaywan. 57Yachaspataj Baquides Alcimoqa wañusqaña kasqanta, reypaman kutimpusqa. Judá jallp'apitaj allin kay karqa iskay watata.
58Chantaqa, tukuy Diosta wasanchaj judiostaj tantaykusqanku. Nisqankutaj: Kunanqa chay Jonatán, paywan khuska rejkunataj allin kaypi kausakushanku, mana ni imamanta manchachikuspalla. Kunampacha kutirichimuna Baquidesta. Chantá rina tukuy paykunata jap'iykoj uj ch'isillapi. 59Risqankutaj Baquideswan tinkukoj. 60Baquidestaj jamusqa ashkha soldadoswan. Chantapis pakayllamanta cartasta kachachimusqa Judapi tiyakoj masisninman, nichimuspa Jonatanta runasninta ima presochanankuta. Manataj atisqankuchu paykunata jap'iyta, yuyayninkuta yachasqankurayku. 61Jonatantaj, chay oqharikojkunamantaqa, phishqa chunka jinata jap'ichisqa, wañuykuchisqataj. 62Chaymanta, Jonatantaj, Simontaj, paykunawan rejkuna ima, ripusqanku ch'in pampaman, Bet-Basiman. Chaypi oqharisqanku perqa jark'anasta, urmachisqas karqanku chaykunata.
63Baquidestaj chayta yachaytawankama, tantamusqa tukuy soldadosninta, willachimusqataj Judeapi qhatejkunasninman. 64Bet-Basi qayllapi jarananta sayachisqa, Chantá, maqanaku maquinasta ruwachisqa. Chantá, ashkha día junt'ata maqanakusqanku Bet-Basipi kajkunawan.
65Jonatán saqesqa wauqen Simonta llajtapi. Pisi runasllata tantaykuspataj, jawaman llojsisqa. 66Atipasqataj Jonatanqa odomerasta fasironkunatawan jarasninkupi. Kayman jaqayman wajtaspataj, wicharisqanku astawan ashkha soldadoswan. 67Chaykama, Simonwan runasninwan llojsisqanku maquinasta enqhaykoj. 68Risqankutaj Baquideswan tinkunakoj. Atipachikusqataj Baquidesqa paykunawan. Mayta llakikusqa, ruwayta munasqantaqa mana ruwayta atisqanmanta. 69Baquidesqa mayta phiñakusqa chay Diosta wasanchaj runaspaj, pikunachus payta mask'arqanku chay jallp'aman rinampaj. Paykunamantaqa ashkhata wañucherqa. Chaymanta, piensasharqa llajtanman kutimpuyta.
70Jonatanqa Baquidespaman kachamusqa kurajkunata, Baquideswan allinyakamunankupaj, mañakunankupajtaj presochasqasta kutichipunankuta. 71Baquidestaj, uyarispa nisqankuta, ruwarqa Jonatampa nisqanman jina. Chaymanta, juramentota ruwaspa, nisqa ni jayk'ajpis kausaynimpi ni ima sajratapis ruwananta payman. 72Chantaqa, qopusqa presochasqa runasta mayqenkunatachus Judá jallp'amanta pusachimusqa chaykunata. Chaymantataj, Baquidesqa llajtanman kutimpusqa, manañataj judiospa jallp'ankuman kutisqañachu. 73Israel llajtapitaj chay kutimantapacha espada karunchakorqa. Jonatantaj Micmaspi tiyakorqa. Jonatanqa kamachiyta qallarerqa Israelpi. Chinkachisqataj Israelpi Diosta wasanchajkunata.
Currently Selected:
1 MACABEOS 9: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.