1 MACABEOS 12
12
Jonatanqa uj tratota ruwan Roma llajtayojkunawan, Esparta llajtayojkunawampis
1Jonatanqa rikusqa chay kuteqa allin kasqanta paypaj, ajllaspataj wakin runasta, paykunata kachasqa Roma llajtaman, chaypi watejmanta yanapanaku tratota romanoswan ruwanankupaj. 2Chantaqa, kikillantataj mask'aspa cartasta kachachimusqa Esparta llajtamampis, waj cheqasmampis. 3Chay kachasqa Romaman chayasqanku. Chayaytawantaj, risqanku maypichus kurajkuna tantakunku chayman. Chaypitaj nisqanku: Noqaykuta kayman kachamuwayku kuraj sacerdote Jonatán, judío ayllumanta kajkuna runaspis, ñaupajta jina watejmanta qankunawan ruwanankupaj uj tratota amigos kanankupaj, yanapanakunankupajtaj maqanakuspi. 4Roma llajtamanta kurajkunataj paykunaman cartasta qosqanku rikuchinankupaj, maynejpichus purinanku karqa chay cheqasmanta kamachejkunaman. Chay cartaspi nisqanku kamachejkunaman chay runasta yanapanankuta, allimpi Judeaman kutirimunankupaj.
5-6Kaymin Jonatampa cartan Esparta llajtayoj runasman: Noqayku, Jonatán kuraj sacerdote, Judeamanta kurajkunataj, sacerdotestaj, tukuy judío runastaj, napaykuyku wauqeyku Esparta llajtayojkunata. 7Unaytaña reyniykichej Ario uj cartata apachimorqa kuraj sacerdote Oniasman, nispa qankunaqa noqaykoj wauqesniyku kasqaykichejta. Chaymin qelqasqa kashan uj cartapi, kunan qankunaman apachimushayku chaypi. 8Oniasqa may kusikuywan reciberqa rey Arioj kachanta, cartantataj jap'ikorqa. Chay cartapi sut'ita parlakun yanapanakuymantawan aynimantawan. 9Noqaykoqa, mana necesitaykuchu chaykunata, imaraykuchus sonqochasqas kayku santo librosniykunejta, makisniykupi kashanku, chaykunanejta. 10Jinapis, munaykupuni qankunaman kachayta kachasniykuta, sutiykupi watejmanta qankunawan ruwanankupaj uj tratota, yachakunampaj wauqestaj amigostaj kasqanchejta. Mana munaykuchu ari karunchakunasqas kananchejta, unayña chay cartaykichejta apachimuwasqaykichejrayku. 11Noqaykoqa qankunamanta yuyarikuykupuni fiestasniykupi waj diaspipis, rikuchikusniykuta jaywashaspa, Diosmanta mañakushaspapis. Chayta ruwanapuni ari wauqes ukhupi. 12Noqaykoqa kusikuykupuni jatunyasqas kasqaykichejmanta. 13Llakiywantaj ch'ajwaswantaj karqayku noqaykoqa. Chantapis, muyuyniykupi kaj reykunapis contraykupi jamuwayku. 14Kay maqanakuspeqa mana munarqaykuchu sat'iyta qankunata nitaj waj wauqesniykutapis, waj amigosniykutapis. 15Janaj pachamanta jamuwayku ari yanapayqa. Chaynejta kacharichisqas karqayku enemigosniykumanta. Aterqaykutaj enemigosniykuta pampaman k'umuykuchiyta. 16Chaymanta, ajllarqayku Antíocoj wawan Numeniota, Jasompa wawan Antipatrotawan. Kacharqaykutaj paykunata romanospaman, sutiykupi watejmanta ruwanankupaj uj tratota paykunawan yanapanakunaykupaj ayninakunaykupajpis. 17Chantaqa, chay kachasniykuman nerqayku qankunamampis chayanankuta, napaykunasunkupaj, jaywasunankupajtaj kay cartasniykuta, qankuna watejmanta wauqesniyku kanaykichejpaj. 18Kusichiwayku allinta kutichinawaykuta.
19Kaymin chay carta imatachus Esparta llajtayojkunaqa Oniasman apachimusqanku chaymin: 20Espartamanta rey Ario napaykun kuraj sacerdote Oniasta. 21Uj qelqata tariyku maypichus willakushan espartanoswan judioswan wauqes kasqankuta. Iskaynin ayllus jamusqanku ari Abrahammanta. 22Chayta yachasqaykuwantaj, allin kanman qankuna willanawaykuta qankunamanta, imaynatachus kausakushankichej chaymanta. 23Noqaykutaj niyku uywasniykichej tukuy imasniykichejtaj noqaykojpata kasqankuta. Ajinallatataj, uywasniykupis tukuy imasniykupis qankunajpata kasqankuta. Ordenta qoykuña, tukuy kaymanta qankunaman willanasunkuta.
Rey Demetrio watejmanta jamun judioswan maqanakoj
24Chaymantataj, Jonatanman willaykusqanku rey Demetrioj generalesnin kutimusqankuta ashkha soldadoswan. Chay waj kutimantaqa aswan ashkha kasqanku nin. Jamusqankutaj judioswan tinkunakuyta munaspa. 25Jonatantaj llojsisqa Jerusalenmanta, kachaykukusqataj Hamat cheqaman paykunata taripaj. Mana saqesqachu ari paypa jallp'anman yaykunankuta. 26Jonatanqa wakin runasta kachasqa paykunaj jarankuta qhawarej. Chay runastaj kutimuspa willaykusqanku Jonatanman, enemigosqa wakichisqasña kasqankuta chay kikin ch'isipi judiospa contrampi kachaykukunankupaj. 27Inti yaykuyta Jonatanqa nisqa runasninman ñawis kicharisqa kanankuta, wakichisqaspis kanankuta tutantinta maqanaku armasninkuwan, ima ratollapipis maqanakoj llojsinankupaj. Chantaqa, jarakusqampa muyuynintimpi qhawajkunata churaykusqa. 28Enemigosqa yachasqanku Jonatanwan runasninwan ima wakichisqasña kasqankuta maqanakupaj. Chayta yachaytawantaj sonqonku kharkatitisqa manchachikuywan. Chantaqa, kanaykusqanku jarankupi. 29Jonatantaj runasnintaj, nina larwajta rikuspapis, mana cuentata qokusqankuchu paqarinkama. 30Chaymantataj, Jonatanqa llojsisqa paykunata qhatiykoj, manataj jap'iykusqachu, imaraykuchus paykuna Eleutero mayuta pasasqankuña. 31Chantaqa, Jonatán muyuykamusqa arabespaman, sabadeos nisqa chaykunajpaman. Paykunata atipaspataj, imasninkuta apakapusqa. 32Chaymantataj, Jonatanqa risqa Damascoman, tukuy chay jallp'asnintataj purisqa.
33Chaykama, Simonqa risqa Ascalonkama, qayllampi kaj cheqasmampis. Chaymanta risqa Jope llajtaman, chay llajtatataj jap'ikapusqa. 34Uyarisqa ari Simonqa chay llajtayojkuna jark'ana wasinkuta qoyta munasqankuta Demetriowan khuska rejkunaman. Chayrayku, chaypi saqesqa wakin runasta qhawanankupaj.
35Chaymanta Jonatanqa kutimpullasqataj. Chantaqa, tantaykuchisqa ayllumanta kurajkunata. Tukuyninku tantaykojtinkutaj, nisqanku allinman kasqanta Judea jallp'api oqhariyta jark'ana wasista. 36Nisqankutaj astawan pataman oqharina kasqanta Jerusalén perqasta. Nisqankutaj oqharina kasqanta uj jatun perqata iskayman t'aqaspa Jerusalén llajtata, jark'ana wasitataj, llajta uj ladopi kanampaj, ujnin ladopitaj jark'ana wasi. Ajinamanta, jark'ana wasipi kaj soldadosqa ama atinankupaj llajtaman riyta imallatapis rantikoj. 37Chaymanta, tukuyninku tantakusqanku llajta perqasta oqharinankupaj. Inti llojsimuy ladopi chay perqasqa urmasqa kasqa, wayq'onejpi kasharqa chaymin. Chaymantataj, Jonatanqa allinyachisqa Cafenata nisqa chay cheqata. 38Simontaj watejmanta sayarichisqa Hadid llajtata, jatun qocha chimpapi kashan chayta. Jark'anastapis chaypi oqharichisqa, churachisqataj aldabasniyoj punkusta.
Jonatanta jap'iykunku
39Chaykama, Trifonqa munashasqa Asiamanta rey kayta. Munapayashasqa ari umanman churakuyta rey pilluta. Munallashasqataj rey Antiocota wañuchiyta. 40Jinapis sonqompi manchachikuspa nisharqa ichapis Jonatanqa, mana saqenanta, astawampis maqanakuyta munanman. Umacharqa imaynatachus Jonatanta jap'ikapuyta wañuchinampaj. Chaymanta llojserqa chayarqataj Bet-Seanman. 41Jonatantaj llojserqa paywan maqanakupaj tawa chunka waranqa soldados, ajllasqas sumaj wakichisqas; rillarqataj Bet-Seanmampis. 42Trifonqa rikorqa Jonatan jatun ejercitowan chayamusqanta, q'ewakusqa, manataj munasqañachu payta jap'iykuyta. 43Manachayqa, fiestata ruwaspa payta recibisqa, presentamusqataj Jonatanta amigosninman. Chantapis, regalostapis jaywasqa. Chantaqa, amigosninmantaj nisqa Jonatanqa kasunankuta pay kikinta jina. 44Nisqataj Jonatanman: Imaraykutaj chay runasta sayk'ucherqankiri, mana ch'ajwa kaspapis noqanchej ukhupi? 45Kunanqa, kachapuy wasisninkuman. Pisi runasllata ajllakuy qanwan kanankupaj. Chantaqa, jamuy noqawan Tolemaidaman. Noqaqa chay llajtata qosqayki. Chantapis qopullasqaykita jark'ana wasistawan, soldadostawan, kamachejkunasninkutawan. Chaymantataj, noqa kutimpullasaj. Chayllapaj jamuni ari.
46Jonatantaj uyarikuspa Trifompa nisqanta, paypa nisqanman jina ruwallasqa. Kacharichisqa runasninta. Paykunataj Judea jallp'aman ripusqanku. 47Qhepachisqa kinsa waranqa runasllata. Chaykunamantaqa, iskay waranqata kachamusqa Galileaman. Waranqataj Jonatanwan kakusqanku. 48Yaykuytawantaj Jonatanqa Tolemaidaman, chay llajtayojkuna llajta punkusta wisq'aykusqanku, jap'irasqankutaj Jonatanta. Chantaqa, espadawan wañuykuchisqanku tukuy paywan khuska yaykojkunata.
49Chaymantataj, Trifonqa kachamusqa soldadosta, chakipi rejkunatawan, caballospi rejkunatawan, Galileamantaj, jatun pampamantaj, wañuchiyta munaspa tukuy Jonatanta qhatejkunata. 50Chaykunataj yachasqankuña Jonatanqa jap'isqa kasqanta. Yachallarqankutaj paypis, paywan khuska rejkunawampis chinkachisqasña kasqankuta. Chayta yachaytawantaj, Jonatampa runasnin ujnin ujninkuta sonqochakuspa, sinch'i sonqowan wakichikusqanku maqanakupaj. 51Rikuspataj Trifompa runasnin judiosqa sumaj wakichisqas kasqankuta maqanakupaj mana wañuchisqas kanankurayku, qhajpacha ripullasqanku. 52Ajinamanta, tukuyninku allimpi chayamusqanku Judea jallp'aman. Jonatanmanta compañerosninmantataj waqaykusqanku, anchatataj manchachikusqanku. Tukuyninku Israel ayllupi mayta phutikusqanku. 53Tukuynin muyuyninkupi tiyakoj aylluspis munapayashasqanku judiosta chinkachiyta. Sonqosninkupi nishasqankutaj: Manaña kamachejniyojchu kanku. Mana ni pi paykunata yanapanqachu, nispa. Nisqankutaj: Rina ujllapi paykunawan tinkunakoj. Paykunata sik'irparimuna runasmanta, mana ni pi paykunamanta yuyarikunampaj, nispa.
Currently Selected:
1 MACABEOS 12: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.