Lu̍o̍ma᷅ŋnda̍ 16
16
Pɔ̍ɔ̍l yɔ̍ŋ yīlɔ̄ɔ̍ o̍ wānāā lāāla᷄ŋnda̍ lo̍
1I̍ hɛ̍na̍ŋ mī chɔ̍m nya̍ a̍ Fo̍ōbī o̍kɔ̄ɔ̄, yēmā na̍a̍ o̍ Ki̍li̍tī ni̍ŋ o̍ cho̍ sāāŋgīa̍a̍ o̍ ku̍ndā wānāā lāāla᷄ŋnda̍ tɛ̄ɛ̄ŋ Sɛ̍ŋkīlīāā chi̍e̍e̍ wo̍. Chūa̍a̍ ho̍ō chō wānā kɛ̍ndɛ̄. 2Tē ō kōma̍l nya̍ pɛ̍, lā chāa̍ ndu̍ bīyɔ̄ɔ̄ māā chāa̍ŋ nyā wa̍nā la̍a̍la᷄ŋ, mɛ̄ɛ̍ wānāa̍ Māsānɔ̄ɔ̍ Mɛ̄lɛ̄ka̍a̍ nɔ̄ mā tōsa̍ yɛ̍. Nyɛ̄ o̍ nyɛ̄ o̍ ha̍u̍ bā le̍ ndu̍ mbō nyūna̍ pɛ̍, lā ke̍ ndu̍. Kāni̍ fu̍u̍le̍, chūa̍a̍ ho̍ō ō māla̍ ni᷅ŋ wānāā fāŋgā a̍ ya̍ Pɔ̍ɔ̍l bɛ̍ɛ̍ fa̍ū.
3I̍ yi̍l chāāŋāā nāa̍ Pīlīsi̍lā nda̍ Āku̍i̍lā lāpi̍, ā na̍a̍ ŋ̄ wa̍ wa̍llo̍ na̍a̍ nda̍ā le̍ Chi̍i̍sū Ki̍li̍tī wa̍. 4Mi̍ wāŋnda̍ ha̍ā ā pīsī yōōmūlā ndāla̍ŋ chi̍ le̍ ya̍. I̍ nɔ̍ mī yi̍l nda̍ ba̍li̍ka̍ ta̍u̍ ta̍u̍. Ō fūla̍ wɔ̍ bɛ̍ɛ̍ o̍ ya̍ kɔ̍ɔ̍lī, kɛ̍ ku̍ndālā wānāā lāāla᷄ŋnda̍ a̍ cho̍ a̍ Chu̍ū le̍ wa̍ bɛ̍ɛ̍, ā nɔ̄ mā yi᷄l Pīlīsi̍lā nda̍ Āku̍i̍lā ba̍li̍ka̍ ta̍u̍. 5Lā yi᷄l la̍ vɛ̄lɛ̄ ku̍ndā wānāā lāāla᷄ŋnda̍ a̍ chu̍ūŋgi̍āŋ o̍ wānāā ŋīɔ̍ɔ̍ŋnda̍ ha̍ā lo̍ chi̍ɛ̍ī ni̍ŋ nda̍. Lā yi᷄l la̍ chāa̍ŋ nī kɛ̍ndɔ̄ɔ̍ Īpe̍nɛ̍tɔ̄ɔ̄ o̍ wa̍ wāna̍ tāso̍o̍ o̍ lɛ̄ŋndē E̍e̍sīāle̍ŋ ni᷄ŋ le̍ tīīnda᷄ŋndo̍ dɔ̄wɔ̄ɔ̍ o̍ Ki̍li̍tī ni̍ŋ ndo̍. 6Lā yi᷄l Me̍ēle̍ o̍ to̍sa̍ wa̍llo̍ tōsā bɛ̄ndōo̍ le̍ nya̍ wo̍. 7Lā yi᷄l la̍ chāāŋāā nīāā Chu̍ūwa̍ Āndūlɔ̄na̍i̍kɔ̄ɔ̄ ni̍ a̍ Chu̍ni̍yā ā na̍a̍ ŋ̄ wa̍ o̍ chīɛ̄ī mānyūmndo̍ ni᷄ŋ na̍a̍ nda̍ā wa̍. Ā chō wānāā tɔ̍ɔ̍ wa̍nāā Chi̍i̍sū ve᷅m hɔ̄ltē ndɔ̄ wa̍ tɛ̄ɛ̄ŋ. Nda̍ fɛ̍ɛ̍ŋ bɛ̍ɛ̍ si̍mnu᷄ŋ wa̍nāā lāāla᷄ŋ a̍ ya̍.
8Lā yi᷄l la̍ chāa̍ŋ nī kɛ̍ndɔ̄ɔ̍ Āmīpīli̍a̍tɔ̄ɔ̄ o̍ cho̍ o̍ dīōm pīlɔ̍ɔ̍ ni᷄ŋ a̍ Māsānɔ̄ɔ̍ Mɛ̄lɛ̄ka̍ wo̍. 9Lā yi᷄l Ɔ̍ba̍nɔ̄ɔ̄ ō na̍a̍ ŋ̄ chō wa̍llo̍ na̍a̍ nda̍ā le̍ Chi̍i̍sū Ki̍li̍tī wo̍. Mī lā yi᷄l chāa̍ŋ nī kɛ̍ndɔ̄ɔ̍ Sīta̍kīī. 10Lā yi᷄l A̍pɛ̍lɛ̄ɛ̄, o̍ chɔ̍m ho̍ō kpe̍nde̍ke̍le̍ māā ō chō bu̍ɛ̍ī sa̍kpō le̍ Ki̍li̍tī wo̍. Lā yi᷄l yu̍ŋgu̍ Ālūītɔ̄bu̍lɔ̄ɔ̄ wo̍. 11Lā yi᷄l chāa̍ŋ nī Chu̍ūnɔ̄ɔ̍ Hɛ̄lo̍dīɔ̄ŋ. Lā yi᷄l wa̍nāā lāāla᷄ŋnda̍ o̍ yu̍ŋgu̍ Nāāsi̍sɔ̍sī wo̍ chōo̍.
12Lā yi᷄l Ti̍li̍fa̍i̍nā nda̍ Tīlīfo̍sā a̍ cho̍ wa̍llo̍ le̍ Māsānɔ̄ɔ̍ Mɛ̄lɛ̄ka̍ wa̍. Mī lā yi᷄l chāa̍ŋ nī kɛ̍ndɔ̄ɔ̍ Pa̍a̍sī o̍ to̍sa̍ ho̍ō wa̍llo̍ ō kālā ka̍lā le̍ Māsānɔ̄ɔ̍ Mɛ̄lɛ̄ka̍ wo̍. 13Lā yi᷄l Lu̍fɔ̄ɔ̄, Māsānɔ̄ɔ̍ Mɛ̄lɛ̄ka̍ wāna̍ ndɔ̍ wa̍li̍ kɛ̍ndɛ̄ kɛ̍ndɔ̄ɔ̍. Lā yi᷄l la̍ ka̍la̍ ndɔ̄, o̍ bi̍ī ya̍ ō kɛ̄ndɛ̄ kɛ̍ndɛ̄ nu̍a̍ā ŋ̄ yɔ̄ŋ āā, po̍ ndɔ̍ ŋ̄pūlu̍ kpe̍e̍kpe̍i̍yo̍ ni̍ wo̍. 14Lā yi᷄l la̍ Āsīŋgi̍li̍tɔ̄ɔ̄, a̍ Fi̍li̍kɔ̄ŋ, a̍ Hɛ̍mɛ̍sī, a̍ Pātīlo̍ba̍sī, a̍ Hɛ̍mɛ̍sī, a̍ wānāā lāāla᷄ŋa̍a̍ nda̍ chō lātūlu̍ wa̍. 15Lā yi᷄l la̍ Fīlɔ̄lɔ̍kɔ̍ɔ̍sī nda̍ Chu̍līāā. Lā yi᷄l la̍ Nɛ̍lu̍ɛ̍ɛ̍sī nda̍ yēma̍ ndɔ̄. Mī lā yi᷄l Ōli̍mpāā a̍ wānāa̍ Mɛ̄lɛ̄ka̍a̍ kpo̍u̍, ā nda̍ chō lātūlu̍ wa̍. 16Lā wa̍ yi᷅la᷅ŋndo̍ o̍ kāālāa̍ ni᷄ŋ, māā wānāā lāāla᷄ŋ o̍ Chi̍i̍sū ni̍ŋ. Ku̍ndālā wānāā lāāla᷄ŋnda̍ kpo̍u̍ o̍ Ki̍li̍tī ni̍ŋ, ā yɔ᷄ŋ yīlɔ̄ɔ̍ nāa̍ nya̍ chūā.
Sīlā Pɔ̍ɔ̍l mɛ̍ɛ̍lu̍ yɔ̄ŋgū wo̍
17Chāa̍ŋāā nīa̍a̍, I̍ nyɔ̍ɔ̍lu̍ nya̍, lā wa̍ mɛ̄ŋgɛ̄lāa̍ le̍ wānāa̍ hu᷅ŋ a̍ pīɔ̄ūwa᷅ŋndo̍ wāŋnda̍ tɛ̄ɛ̄ŋ, ndu̍yɛ̍ mā tōsā mī wāŋnda̍ fāŋāŋ o̍ nɛ̄i̍ tōnya̍a̍ chōo̍ wa̍. Ā bīī pɛ̍, ā pɛ̄ɛ̄sa̍ pɛ̄ɛ̄kū nya̍ sɔ̄la̍ wo̍. Lā chi̍ɛ̍ɛ̄li̍āŋ a̍ wānāā wāā le̍nde̍ le̍. 18Kāni̍ fu̍u̍le̍, wānāa̍ to̍sā sɔ̍ɔ̍ŋ wa̍ā le̍ndo̍ŋ nda̍, ā būūla̍ŋ le̍ wa̍li̍ Māsānɔ̍ nāa̍ Ki̍li̍tīo̍o̍ le̍. Le̍ yēēmɛ̍i̍ ndɛ̍i̍ nda̍ pi̍lɛ̍i̍ ko̍ni̍ nda̍ būūla̍ŋ ni̍. Mā hūi̍ wānāa̍ nɔ̍ si̍nā pɛ̄ŋgu̍ bɔ̍ɔ̍ le̍ wa̍ a̍ dīōmndā yēēlɛ̍i̍la̍ŋ nda̍ dīmūllo̍, ndu̍yɛ̍ mā hēēlū nda̍ a̍ sōndō. 19Chāāŋāā nīa̍a̍, wānā o̍ wānā fe̍e̍ tu̍e̍ī nya̍ ni᷅ŋ tɔ̍ɔ̍ a̍ mɛ̄ɛ̍ nya̍ tōsā nyɛ᷅ Yōōŋgū Kɛ̄ndɛ̍ Mɛ̄lɛ̄ka̍a̍ ō dīmi̍ wo̍ yɛ̍. Le̍ he̍ī I̍ na̍ŋ kɔ̄l a̍ nya̍ bu̍tē. Kɛ̍, I̍ hɛ̍na̍ŋ nya̍ ni̍ko̍ mī lā nɔ̄ kɔ̄l kālo̍o̍ mɛ̄ɛ̍ nya̍ lōōkū mī lā sīna̍ sūɛ̍i̍ kɛ̍ndɛ̄i̍ pɛ̍ŋgu̍ yɛ̍. Ndu̍yɛ̍ īsɔ̄ɔ̍ o̍ īsɔ̄ɔ̍ cho̍ sūɛ̍i̍ dɛ̍nɛ̍ wɔ̍ɔ̍ŋ bālā nyāla̍ la̍ wa᷅ lēni᷄ŋ te̍. 20O̍ ko̍ŋ kɔ̍ɔ̍lī, Mɛ̄lɛ̄ka̍ o̍ to̍sā mī ŋ̄ sɔ̄la̍ kɔ̄l nyūlōo̍ wo̍, ō chō Sēta̍nā su̍ŋ su̍ŋ chi̍ī, māsa̍ nyi̍nāā wɔ̄ɔ̍ŋnda̍, mbō tōsa̍ mī ŋ̄ nɔ̄ ndu̍ kpāāyāa̍ chōo̍.
Mbɔ̄ Māsānɔ̍ nāa̍ Chi̍i̍sū ō yīya̍ŋ nya̍ chōo̍ fɔ̍.
21Chāa̍ŋ nī wa᷅na̍ wa̍llo̍ Ti̍mo̍tī ō yi᷄l nya̍. Chāa̍ŋāā nīāā Chu̍ūwa̍ Lu̍sīɔ̄ɔ̄ ni̍, a̍ Cha̍sɔ̄ŋ, a̍ Sōsīpa̍tɔ̄, ā yi᷄l nya̍.
22Ya̍ Tɛ̍tīɔ̄ɔ̄ ya̍ cho̍ nyɛ̄ Pɔ̍ɔ̍l cho̍ ho̍ō dīmīo̍o̍ wo̍ pōōnyīa̍a̍ wo̍, ya̍ bɛ̍ɛ̍ I̍ yɔ̄ŋgu̍ yīlɔ̄ɔ̍ nāa̍ nya̍ chūā kpo̍u̍ māā chāa̍ŋ nyā wa̍nā la̍a̍la᷄ŋ o̍ Māsānɔ̄ɔ̍ Mɛ̄lɛ̄ka̍ ni᷄ŋ.
23Ka̍yɔ̄ɔ̄ ō ya̍ Pɔ̍ɔ̍l cho̍ o̍ bɛ̄ŋgu̍ cho̍o̍, ndu̍yɛ̍, mī ku̍ndā wānāā lāāla᷄ŋnda̍ na̍ŋ a̍ bi̍ī bɔ᷅ŋa᷅ŋnda̍ŋ o̍ ndu̍ lo̍ chi̍ɛ̍ī ni̍ŋ ndo̍, ō yɔ̄ŋgu̍ yīlɔ̄ɔ̍ nāa̍ nya̍ chūā. Ɛ̄lu̍a̍tɔ̄ɔ̄ o̍ ma̍ndā nyɛ̍ sɔ̄lāā chi̍o̍o̍ wo̍, a̍ chāa̍ŋ nāā wa̍nā la̍a̍la᷄ŋndo̍ Ku̍a̍a̍tɔ̄ɔ̄, nda̍ bɛ̍ɛ̍ ā yi᷄l nya̍. [24I̍ cho̍ Mɛ̄lɛ̄ka̍ pīɛ̄īle̍ŋ māā Ma̍sānɔ̄ nāa̍ Chi̍i̍sū Ki̍li̍tī ō hīo̍u̍ la̍chi̍ a̍ nya̍ kɛ̄ndɛ̄i̍ ndūɛ̍i̍ tōsāllo̍ fɔ̍. Āmi̍i̍nā.]
Pɔ̍ɔ̍l mɛ̍ɛ̍lu̍ yāu̍ ndɔ̄ɔ̍ a̍ Mɛ̄lɛ̄ka̍ sāŋgālāa̍
25Lā ŋ̄ yɔ̄ŋgu᷅ŋ sāŋgālāa̍ o̍ Mɛ̄lɛ̄ka̍ lo̍. Ndu̍ ndu̍ nɔ̍lā mbō tōsa̍ mī lā si᷄m a̍ dīāllūŋ kālā o̍ tīīnda᷄ŋ nya̍ nɔ̄ o̍ ndu̍ ni᷄ŋ ndo̍. Le̍nde̍ Yōōŋgū Kɛ̄ndɛ̍ Mɛ̄lɛ̄ka̍ ya̍ di̍mu̍l wāŋnda̍ wo̍ dīmi̍ ni̍, ndu̍ yɔ̍nūŋ ni̍ māā sūɛ̍i̍ Mɛ̄lɛ̄kɛ̍i̍ a̍ Chi̍i̍sū Ki̍li̍tī o̍kɔ̄ɔ̄. Ndu̍yɛ̍, sɔ̄ɔ̍ŋ wa̍ ŋ̄ vīāŋna᷄ŋ kāni̍ ma̍si̍ndɛ̄ a̍ tōnya̍ cho̍ a̍ Mɛ̄lɛ̄ka̍ o̍kɔ̄ɔ̄ wo̍ŋ, kɛ̍ mi̍ ŋ̄ wā ni᷅ŋ ŋ̄ chɔ̄ɔ̄māā wo̍ŋ nyɛ̄ ŋ̍ di̍mi̍ wo̍ cho̍ ko̍ŋ ni̍. 26Pɛ̄ŋgo̍o̍ ho̍ō ni᷅ŋ dīōmndā wānāa̍ su̍a̍ā le̍ Mɛ̄lɛ̄ka̍ wa̍ ā pōōnyi̍a̍a̍ la̍ŋ lā chɔ̄ɔ̄mu̍u̍ tōnya̍a̍ ho̍ō. Ndu̍yɛ̍, Mɛ̄lɛ̄ka̍ o̍ cho̍ ho̍ō le̍ fɛ̍ɛ̍ŋ a̍ fɛ̍ɛ̍ŋ ndo̍, ō dīmu̍l ŋ̄wāŋ māā ā dīmu̍l wa᷅ŋndā chīe̍e̍ya̍ kāa̍la̍ŋ kpo̍u̍, māā ā sīna̍ to᷅nya̍a̍ ho̍ō le̍ mā lo̍ o̍ ko̍ŋ mā dɔ̄ū tīīnda᷄ŋndo̍ o̍ Mɛ̄lɛ̄ka̍ ni᷄ŋ, ndu̍yɛ̍ mā tōsa̍ nyɛ̄ o̍ di̍mi̍ wo̍. 27Mɛ̄lɛ̄ka̍ ō ndu̍ pīlɛ̍ kpe̍e̍le̍ nɔ̍ ho̍ō kɔ̄l kālo̍o̍ kpo̍u̍ wo̍, sāŋgālāa̍ wa̍ o̍ yɔ̍ŋga᷄ŋ o̍ ndu̍ lo̍ sa̍na̍a̍ o̍ Chi̍i̍sū Ki̍li̍tī ni̍ŋ le̍ fɛ̍ɛ̍ŋ a̍ fɛ̍ɛ̍ŋ. Āmi̍i̍nā.
Kisi Bible © Bible Society in Liberia, 2015.