Lu̍o̍ma᷅ŋnda̍ 15
15
Ŋ̄ tōsa᷅ŋ nyɛ̍ ma̍lā cha̍a̍ŋāā nāā wa̍nāā lāāla᷄ŋnda̍ wo̍
1Na̍a̍ ŋ̍ cho̍ a̍ dīāllūŋ kāla᷄ŋ nda̍ ŋ̄ nɔ̄ mī ŋ̄ bi̍u̍ŋ wa̍nāa̍ nɔ̍ di̍a̍llūŋ kālā le̍ wa̍, ā yīya᷄ŋnda̍ ndāla̍ŋ lā chō te̍ŋge̍ŋ a̍ sɔ̄ɔ̍ŋ mu᷅ŋ o̍kɔ̄ɔ̄ wa̍. Ō cho̍ ko̍ nyɛ̍ nɛ̍ŋī na̍a̍ pi̍la̍ kɔ̄lta̍ŋ ndo̍ le̍ na̍a̍ ŋ̄ nɔ̄ mī ŋ̄ tōsa̍ le̍. 2Na̍a̍ pi̍lɛ̍ŋ pi̍lɛ̍ŋ nda̍ kpo̍u̍ ŋ̄ nɔ̄ mī ŋ̄ tōsa̍l chāāŋāā nāa̍ nyɛ̍ wa᷅ ma̍lāa̍ le̍ nda̍, ndu̍yɛ̍ mbō hīni̍ nda̍ kɔ̄l lo̍ le̍ mā sɔ̄la̍ dīāllūŋ kāla᷄ŋ o̍ tīīnda᷄ŋ nda̍ nɔ̄ o̍ Mɛ̄lɛ̄ka̍ ni᷄ŋ ndo̍. 3Kāni̍ fo̍ndōle̍, nyɛ̄ Ki̍li̍tī to̍sa̍ wo̍ ō tōsa̍ ndu̍ le̍ ndu̍ pi̍la̍ kɔ̄l nɛ̄ŋī su̍e̍e̍ le̍. Mɛ̄ɛ̍ Yāu̍ Mɛ̄lɛ̄ka̍a̍ dīmi̍ yɛ̍ āā, “Yīōūlā nda̍ yīo̍o̍ nu̍m nda̍ŋ ya̍ bɛ̍ɛ̍ I̍ sɔ̍la̍ yīōūlā lāŋ.” 4Nyɛ̄ o̍ nyɛ̍ po̍o̍nyi̍a̍ŋ si̍ndɛ̄ o̍ Yāu̍ Mɛ̄lɛ̄ka̍a̍ ni᷄ŋ, ā pōōnyi̍a̍a̍ ndu̍ le̍ na̍a̍ pɛ̄ɛ̄kōo̍. Ndu̍yɛ̍, lā tōsā mī ŋ̄ sɔ̄la̍ kɔ̄l bīūwɔ᷄ŋndo̍, ndu̍yɛ̍ mī lā dɛ̄ɛ̄nīāā na̍a̍ kɔ̄lta̍ŋ, o̍ ko̍ŋ, mī lā tōsa̍ mī ŋ̄ wa̍ lēhɔ̄l o̍ nɛ̄ī. 5Le̍la̍ŋ, I̍ cho̍ pīɛ̄īle̍ŋ māā Mɛ̄lɛ̄ka̍, o̍ ke᷅ wa̍nā kɔ᷅l bīūwɔ᷄ŋndo̍ wo̍, ndu̍yɛ̍ mbō dɛ̄ɛ̄nīāā wa᷅ŋnda̍ kɔ̄lta̍ŋ ndo̍, ō tōsa̍ mī lā chu̍a̍ ka̍a̍ Chi̍i̍sū Ki̍li̍tīo̍o̍, o̍ ko̍ŋ, mī dīōm pīlɔ̍ɔ̍ wa̍ nya̍ tɛ̄ɛ̄ŋ vēllāa̍ vēllē fɔ̍. 6Mbɔ̄ he̍ī ī yɔ̄nu̍ŋ le̍nde̍ le̍ mī nya̍ kpo̍u̍, mī lā yɔ̄ŋgu̍ sāŋgālāa̍ o̍ Mɛ̄lɛ̄ka̍ lo̍, o̍ cho̍ Fi̍nyāa̍ le̍ Ma̍sānɔ̄ nāa̍ Chi̍i̍sū Ki̍li̍tī wo̍ a̍ kɔ̄llo̍ ō pīlɛ̍ kpe̍.
Wānāa̍ cho̍ a̍ Chu̍ū le̍ wa̍ bɛ̍ɛ̍ ā sɔ̄la̍ Yōōŋgū Kɛ̄ndɛ̍ Mɛ̄lɛ̄ka̍a̍
7Le̍la̍ŋ, mɛ̄ɛ̍ Chi̍i̍sū Ki̍li̍tī chu̍a̍ nya̍ māā nya̍ nda̍ wānāā pi᷄lla̍ nya̍ chō ni̍ yɛ̍, nya̍ bɛ̍ɛ̍ lā chūāna᷅ŋ ni̍ko̍ māā wānāā pi᷄lla̍ nya̍ chō vēllāa̍ vēllē ni̍, le̍ mī wāŋnda̍ yɔ̄ŋgu̍ sāŋgālāa̍ o̍ Mɛ̄lɛ̄ka̍ lo̍. 8Kāni̍ fu̍u̍le̍, mī di̍mu̍l nya̍ māā mi̍ Ki̍li̍tī si̍mnu᷄ŋ bu̍ɛ̍īyo̍ le̍ Chu̍ūwa̍, le̍ chɔ̄mndo̍ māā nyɛ̄ o̍ nyɛ̄ Mɛ̄lɛ̄ka̍ dīmi̍ le̍ tōsāa̍ pɛ̍, tōsāa̍ o̍ to̍sā ndu̍ ni̍. Mi̍ Ki̍li̍tī to̍sā mi̍ sɔ̄ɔ̍ŋ Mɛ̄lɛ̄ka̍ chūe̍l fi̍nyāā nāā ma̍māā lēbɛ̄ɛ̄ya̍ būŋgɛ̄i̍ yo̍ŋ ŋ̄ yɔ̄nu᷄ŋ mɛ̄ɛ̍ i̍ di̍mi̍ŋ yɛ̍. 9Ndu̍yɛ̍, mi̍ sīmnɔ᷄ŋ o̍ si̍mnu᷄ŋ bu̍ɛ̍ī le̍ Chu̍ūwa̍ wo̍ tōsā mi̍ wānāa̍ cho̍ a̍ Chu̍ū le̍ wa̍ bɛ̍ɛ̍ a̍ sa̍ŋgālā Mɛ̄lɛ̄ka̍ le̍ mɛ̄ɛ̍ o̍ tūīīnu̍ŋ nda̍ īnyīɛ̍ɛ̍ yɛ̍. Yāu̍ Mɛ̄lɛ̄ka̍a̍ dīmi̍ āā,
“Le̍la̍ŋ, nūm Mɛ̄lɛ̄ka̍, I̍ cho̍ nu̍m sāŋgālā wānāa̍ cho̍ a̍ Chu̍ū le̍ wa̍ tɛ̄ɛ̄ŋ
ndu̍yɛ̍, I̍ cho̍ nu̍m chūūndūū o̍ chōnde̍i̍ ni᷄ŋ.”
10Mbo̍ dīmī vɛ̄lɛ̄ āā,
“Nya̍ wānāa̍ cho̍ a̍ Chu̍ū le̍ wa̍, lā sɔ̄ɔ̄ŋgu̍u̍ wa̍nāa̍ Mɛ̄lɛ̄ka̍a̍ chōo̍ mī lā tōsa̍ kɔ̄l kɛ̄ndɔ̄ɔ̍.”
11Mbo̍ dīmī vɛ̄lɛ̄ āā,
“Nya̍ wānāa̍ cho̍ a̍ Chu̍ū le̍ wa̍ kpo̍u̍, lā yɔ̄ŋgu̍ sa̍ŋgālāa̍ o̍ Mɛ̄lɛ̄ka̍ lo̍.
Nya̍ wāŋnda̍ kāa̍la̍ yɛ̍ yɛ̍la̍ŋ kpo̍u̍, lā sāŋga̍la̍ ndu̍.”
12Ī chō vɛ̄lɛ̄ ī dīmīa̍ŋ o̍ Yāu̍ Āīsa̍yā wo̍ ni᷄ŋ āā,
“Wānā cho̍ hūnɔ̄ɔ̄ fūlā o̍ pūlāle̍ Chɛ̄ɛ̍se̍le̍ŋ chōo̍,
Mɛ̄lɛ̄ka̍ chō ndu̍ hēēlū mbō wa̍ wānāa̍ cho̍ a̍ Chu̍ū le̍ wa̍ chōo̍.
Ndu̍yɛ̍, wānāa̍ cho̍ a̍ Chu̍ū le̍ wa̍ chō hūnɔ̄ɔ̄ tīīnda᷄ŋ ndāa̍ dɔ̄wɔ̄ɔ̄ o̍ ndu̍ ni᷄ŋ.”
13Ndu̍yɛ̍, mɛ̄ɛ̍ nya̍ dɔ̄ū nu̍a̍ā tīīnda᷄ŋ nyāa̍ o̍ Mɛ̄lɛ̄ka̍ ni᷄ŋ o̍ to̍sā ho̍ō mī wāŋnda̍ ā wa̍ lēhɔ̄l o̍ nɛ̄ī le̍ ndu̍ wo̍ yɛ̍, I̍ cho̍ ni̍ko̍ pi̍ɛ̍īle̍ŋ māā ō tōsa̍ mī lā wa̍ a̍ kɔ̄l kɛ̄ndɛ̄ bu̍tē, ndu̍yɛ̍, mī lā sɔ̄la̍ kɔ̄l nyūlōo̍ fɔ̍. Mbɔ̄ ī yɔ̄nu̍ŋ le̍nde̍ mī Nyi̍na̍ Kāsi̍ Mɛ̄lɛ̄ka̍a̍ tōsa̍ o̍ kpāāya̍ ndɔ̄ɔ̍ ni᷄ŋ, mī lā wa̍ hɔ̄lte̍ŋ o̍ nɛ̄ī le̍ te̍le̍ŋ o̍ te̍le̍ŋ.
Pɔ̍ɔ̍l chɔ̍m le̍ sa̍bū o̍ so̍ō ō kālā ka̍lā a̍ sɔ̄ɔ̍ŋ pūm o̍kɔ̄ɔ̄ wo̍ŋ
14Chāa̍ŋāā nīāā wa̍nāā lāāla᷄ŋnda̍, ya̍ pi̍la̍ bɛ̍ɛ̍ I̍ si̍nā ndi̍ wa̍la̍ŋ māā lā chō wānāā kɛ̄ndɛ̄ bɛ̄ndū. Ndu̍yɛ̍, I̍ si̍nā māā lā sīnā wa̍la̍ŋ nyɛ᷅ nya̍ nɔ̄ le̍ tōsāa̍ wo̍. I̍ si̍nā māā lā nɔ̄lā mī lā sīīli̍āŋ ve̍llāa̍ vēllē. 15Kɛ̍ ndu̍yɛ̍ o̍ ko̍ŋ ni̍ŋ kpo̍u̍, mi̍ po̍o̍nyīāā a̍ sɔ̄ɔ̍ŋ pūm o̍kɔ̄ɔ̄ ō kālā ka̍lā o̍ yāu̍wo̍ ho̍ō ni᷄ŋ le̍ nya̍ yīyāla᷄ŋndo̍. Le̍ sa̍bū ya̍ I̍ so̍ō le̍nde̍ o̍ ka̍lā kpo᷅ke̍ a̍ mu̍ŋ o̍kɔ̄ɔ̄ wo̍ cho̍ ni̍ māā, le̍ kɛ̄ndɛ̄i̍ Mɛ̄lɛ̄ka̍ tōsa̍l la̍ 16mbo̍ sīīŋgu̍u̍ ya̍ bu̍ɛ̍i̍ Chi̍i̍sū Ki̍li̍tī le̍ mī to̍sa̍ wa̍llo̍ wānāa̍ cho̍ a̍ Chu̍ū le̍ wa̍ tɛ̄ɛ̄ŋ ndo̍. Le̍ he̍ī, I̍ cho̍ māchūāā wānā so̍līāā lāsa̍lāa̍ le̍ wāŋnda̍, mi̍ wa᷅ wāŋnda̍ Yōōŋgū Kɛ̄ndɛ̍ Mɛ̄lɛ̄ka̍a̍ dīmūllo̍. I̍ cho̍ he̍ī tōsāa̍ le̍ mbō lo̍ o̍ ko̍ŋ mī wānāa̍ cho̍ a̍ Chu̍ū le̍ wa̍ ā wa̍ ā yɔ̄ŋga᷄ŋ o̍ Mɛ̄lɛ̄ka̍ lo̍ māā sa̍lāa̍ ō Mɛ̄lɛ̄ka̍ hīni̍ kɔ̄l lo̍, sa̍lāa̍ ō Nyi̍na̍ Kāsi̍ Mɛ̄lɛ̄ka̍a̍ ō tōsa̍ mbo̍ wa̍ ō yɔ̄ŋga᷄ŋ o̍ ndu̍ Mɛ̄lɛ̄ka̍ lo̍ wo̍. 17Le̍la̍ŋ, ha̍a̍a̍ mi̍ wa᷅ dīōm pīlɛ̍ a̍ Chi̍i̍sū Ki̍li̍tī, I̍ nɔ̍lā mī ke̍lū yōŋgā a̍ wa̍li̍ ya̍ I̍ cho̍ tōsāa̍ le̍ Mɛ̄lɛ̄ka̍ wo̍. 18Wa̍lta̍ Ki̍li̍tī to̍sa̍l wānāa̍ cho̍ a̍ Chu̍ū le̍ wa̍ sa̍na̍a̍ o̍ ya̍ ni̍ŋ nda̍ŋ, a̍ la̍ŋ o̍kɔ̄ɔ̄ ya̍ I̍ su̍a̍ā o̍ ka̍lā ka̍lā ni̍. Mi̍ Ki̍li̍tī to̍sā a̍ sa̍bū mi̍ chɔ᷅m wānāa̍ cho̍ a̍ Chu̍ū le̍ wa̍ nɛ̄īyo̍, le̍ mā tōsa̍ nyɛ̄ Mɛ̄lɛ̄ka̍ dīmi̍ wo̍ sa̍na̍a̍ a̍ dīōmndā ya̍ I̍ wa̍ wāŋnda̍ dīmūllo̍ la̍ŋ, a̍ sɔ̄ɔ̍ŋ ya̍ wa̍ tōsāa̍ wo̍ŋ. 19Mi̍ chɔ᷅m nda̍ nɛ̄īyo̍ ho̍ō a̍ sɔ̄ɔ̍ŋ lākpālūŋ bɛ̄ndo᷄ŋ tōsāa̍ a̍ sɔ̄ɔ̍ŋ kɔ̄ndɔ̄fi̍li̍ŋ bɛ̄ndo᷄ŋ, o̍ ko̍ŋ kɔ̍ɔ̍lī, a̍ kpāāya̍ Nyi̍na̍ Kāsi̍ Mɛ̄lɛ̄ka̍a̍. Ndu̍yɛ̍, a̍ te̍le̍ŋnda̍ ya̍ I̍ wa̍ bālɔ̄ɔ̍ la̍ŋ, mi̍ cha̍ŋ Chūlu̍sɛ̄lɛ̄m chi̍e̍e̍ mi̍ ku̍ā o̍ būŋgɛ̄ī Īle̍lu̍i̍kūmnde̍ ni᷄ŋ, mi̍ di̍mūl wāŋnda̍ Yōōŋgū Kɛ̄ndɛ̍ Mɛ̄lɛ̄ka̍a̍ a̍ Ki̍li̍tī o̍kɔ̄ɔ̄ ba̍ o̍ bā fe̍e̍ lo̍ŋ. 20Ndu̍yɛ̍, le̍ te̍le̍ŋ o̍ te̍le̍ŋ yēēmɛ̍i̍ nīi̍ ī hēēlu̍ ī tūūsu̍ ndi̍ wa̍ he̍ī ni̍, wāŋnda̍ Yōōŋgū Kɛ̄ndɛ̍ Mɛ̄lɛ̄ka̍a̍ dīmūllo̍ o̍ fo̍ndāŋndā nda̍ a̍a̍ tu̍i̍i̍ yɔ̍ bɛ̍ɛ̍ a̍ Ki̍li̍tī o̍kɔ̄ɔ̄ le̍ la̍ŋ. Kāni̍ fu̍u̍le̍, yɔ̄ŋi̍ ya̍ I̍ mi̍i̍ŋgu̍ wa̍llo̍ o̍ fo̍ndāŋ wāŋndo̍ ndu̍ kāndu̍ ni᷅ŋ wa̍llo̍ wo̍ chōo̍. 21Yāu̍ Mɛ̄lɛ̄ka̍a̍ dīmi̍ āā,
“Wānāā nda̍ dīmu̍l lɔ̍ a̍ ndu̍ o̍kɔ̄ɔ̄ le̍ wa̍, ā chō ndu̍ chɔ̄.
Ndu̍yɛ̍, wānāa̍ tu̍i̍i̍ yɔ̍ bɛ̍ɛ̍ su̍ɛ̍i̍ ka̍lɛ̄i̍ le̍ wa̍, ā chō ndi̍ pɛ̄ŋgu̍ si̍nā.”
Pɔ̍ɔ̍l kɛ̍ɛ̍si̍a̍a̍ le̍ kɔ̄la̍ŋ Lu̍o̍m chi̍e̍e̍
22Sa̍bū kōŋ bɛ̍ɛ̍ kɛ̍ɛ̍lu̍ ya̍ hūnɔ̄ɔ̍ te̍le̍ŋnda̍ ka̍ ka̍ le̍ nya̍ yīlɔ̄ɔ̍ ni̍. 23Le̍ wɔ̄sīlā fāŋgā yēēmɛ̍i̍ ī wa̍ ya̍ le̍ nya̍ hūnɔ̄ɔ̄ yīlɔ̄ɔ̍. Le̍la̍ŋ, mɛ̄ɛ̍ ya̍ chi̍i̍ ni᷅ŋ wa̍li̍ wa̍ ya̍ le̍ tōsāa̍ o̍ būŋgɛ̄i̍ he̍ī ni᷄ŋ ndo̍ yɛ̍, 24I̍ nɔ̍ o̍ kɔ̄l le̍ kēī nya̍ yīlɔ̄ɔ̍ bōōndi̍i̍ ya̍ wa᷅ ni̍ŋ kɔ᷅la̍ŋ lɛ̄ŋndē Sīpe᷅ŋnde̍ŋ ndo̍. Ndu̍yɛ̍, tē ŋ̄ lɔ᷄l pɛ̍ wa̍a̍lī na̍a̍ nya̍ā, I̍ nɔ̍ o̍ kɔ̄l mī lā māla̍ ya̍ a̍ nyɛ̄ le̍ kɔ̄lā nīla̍ŋ lo̍ŋ. 25Kɛ̍, o̍ su̍ŋ su̍ŋndo̍ ho̍ō ni᷄ŋ, I̍ cho̍ wɔ̄ lākɔ̄ fɛ̍ɛ̍ŋ Chūlu̍sɛ̄lɛ̄m a̍ māla̍ sɔ̍la̍ŋ le̍ wānāa̍ Mɛ̄lɛ̄ka̍a̍ lo̍ŋ ndo̍. 26Kāni̍ fo̍ndōle̍, ku̍ndā wānāā lāāla᷄ŋnda̍ o̍ lɛ̄ŋndē Māsīdo̍o̍nīāāle̍ŋ ni᷄ŋ a̍ lɛ̄ŋndē Āke̍yāle̍ŋ, nda̍ pi̍la̍ kɛ̄ɛ̄si̍a̍a̍ a̍ kɔ̄l kɛ̄ndɛ̄ ni̍ le̍ nyɛ̄ sɔ̄lāa̍ yɔ̄ŋgōo̍ le̍ wānāa̍ Mɛ̄lɛ̄ka̍a̍ a̍ cho̍ Chūlu̍sɛ̄lɛ̄m ma̍ wā ā tāmbɛ̍i̍ ya̍ mālāa̍. 27Nda̍ pi̍la̍ kɛ̍ɛ̍si̍a̍a̍ le̍ mālā kōŋ yɔ̄ŋgōo̍ ni̍. Kɛ̍ ndu̍yɛ̍ o̍ nɛ̄īyo̍ ō pīlɔ̍ɔ̍ ni᷄ŋ, ā nɔ̄ kūēē mā yɔ̄ŋgu̍ mālā kōŋ le̍ nda̍. Kāni̍ fu̍u̍le̍, tē ō wa̍ pɛ̍ mī Chu̍ūwa̍ pīɔ̄ūvi̍āŋ nyɛ᷅m kɛ̄ndɛ᷄ŋ chɛ̍ŋ o̍ Mɛ̄lɛ̄ka̍ lo̍ wo̍ŋ nda̍ wānāa̍ cho̍ a̍ Chu̍ū le̍ wa̍ pɛ̍, mɛ̄ɛ̍ wānāa̍ cho̍ a̍ Chu̍ū le̍ wa̍ bɛ̍ɛ̍ ā nɔ̄ mā pīɔ̄ūvi̍āŋ nyɛ᷅m Mɛ̄lɛ̄ka̍ ke̍ nda̍ wo̍ŋ nda̍ Chu̍ūwa̍. 28Le̍la̍ŋ, tē I̍ chi̍i̍ wa̍li̍ ya̍ I̍ cho̍ ho̍ō wo̍ pɛ̍, ndu̍yɛ̍ nyɛ̄ sɔ̄lāa̍ chu̍u̍ŋgi̍a̍ŋ ki̍nɛ̍i̍ yo̍ mī kɔ̍ do̍u̍nu᷄ŋ nda̍ ndu̍ ko̍na̍ pɛ̍, I̍ chɛ̍ŋ ni᷅ŋ I̍ ku̍ɛ̄ o̍ lɛ̄ŋndē Sīpe᷅ŋnde̍ŋ ni᷄ŋ. Mɛ̄ɛ̍ tē I̍ wa̍ kɔ̄la̍ŋ pɛ̍, I̍ ke̍i̍ nya̍ yīlɔ̄ɔ̄. 29Ndu̍yɛ̍, I̍ si̍nā māā hūnɔ̄ɔ̄ ya̍ I̍ hu᷅ŋ ni̍ŋ nya̍ yīlɔ̄ɔ̍ wo̍, ō wā ni̍ŋ su̍ɛ̍i̍ sa̍lɛ̄ī bɛ̄ndū le̍ nya̍ chɔ̄nɔ᷄ŋndo̍ o̍ Ki̍li̍tī lo̍.
30Chāa̍ŋāā nīāā wa̍nāā lāāla᷄ŋnda̍, le̍ yīya᷄ŋ nya̍ nɔ̄ le̍ Māsānɔ̍ nāa̍ Chi̍i̍sū Ki̍li̍tī wo̍, a̍ kāālā Nyi̍na̍ Kāsi̍ Mɛ̄lɛ̄ka̍a̍ tōsa̍ mi̍ ŋ̄ nɔ̄ ndu̍ o̍ lākɔ̄l lo̍, I̍ cho̍ nya̍ nyɔ̄ɔ̄lōo̍ a̍ yāndi̍i̍, lā māla̍ ya̍ o̍ Mɛ̄lɛ̄ka̍ pīɛ̄īyo̍ ni᷄ŋ kpe̍e̍kpe̍i̍. 31Lā pīɛ̍i̍ Mɛ̍lɛ̄ka̍ le̍ ya̍ le̍ mbō mānda̍ ya̍ yɔ̄ŋi̍ wāŋnda̍ o̍ lɛ̄ŋndē Chūdi̍a̍āle̍ŋ ni᷄ŋ a̍ la̍a̍la̍ŋ a̍ Chi̍i̍sū le̍ wa̍ ā yɔ᷄ŋ ya̍ nyɛ̄. Ndu̍yɛ̍ vɛ̍lɛ̄, mī wānāa̍ Mɛ̄lɛ̄ka̍a̍ Chūlu̍sɛ̄lɛ̄m ā bīī nyɛ̄ ya̍ I̍ to̍sa̍ le̍ nda̍ mālāa̍ wo̍ a̍ kɔ̄l kɛ̄ndɛ̄. 32Ndu̍yɛ̍ o̍ ko̍ŋ kɔ̍ɔ̍lī, tē ō wa̍ pɛ̍ hɛ̍na᷄ŋ Mɛ̄lɛ̄ka̍ māā I̍ hu̍ŋ nya̍ yīlɔ̄ɔ̄, mɛ̄ɛ̍ I̍ hu᷅ŋ ni̍ŋ a̍ kɔ̄l kɛ̄ndɛ̄ bu̍tē, ndu̍yɛ̍ mī sɔ̍la̍ pɛ̄ŋgīo̍o̍ nya̍ tɛ̄ɛ̄ŋ. 33I̍ cho̍ pīɛ̄īle̍ŋ māā Mɛ̍lɛ̄ka̍ o̍ to̍sā mī ŋ̄ wa̍ a̍ kɔ̄l nyūlū wo̍ ō wa̍ la̍tu̍lu̍ a̍ nya̍ fɔ̍. Āmi̍i̍nā.
Kisi Bible © Bible Society in Liberia, 2015.