Māa̍ti̍u̍ 1
1
Pūlālē Chi̍i̍sū fu̍la̍ chōo̍ le̍ŋ
(Lu̍kū 3:23-38)
1Chi̍i̍sū Ki̍li̍tī, o̍ ya̍ I̍ cho̍ hūnɔ̄ɔ̄ īsɔ̄ɔ̍ chɔ᷅m a̍ ndu̍ o̍kɔ̄ɔ̄ wo̍, fi̍nyā ndɔ̄ ma̍ma̍ wa̍ Māsāa̍ Dēēve̍ ni̍. Māsāa̍ Dēēve̍ yɛ̍, ndu̍ fi̍nyā ndɔ̄ ma̍ma̍ wa̍ E̍bīlāha᷅m ni̍. Mɛ̄ɛ̍ pūlālē Chi̍i̍sū fu̍la̍ chōo̍ le̍ŋ, le̍ cho̍ le̍ŋ ni̍.
2Chɔ̍ŋ a̍ bōōndi̍i̍ E̍bīlāha᷅mnde̍ mbo̍ fūūlūū a̍ bōōndi̍i̍ Dēēve̍ ve̍, yu̍ŋgu̍la̍ la̍ŋ la̍ cho̍ la᷅ŋ ni̍. E̍bīlāha᷅m ve̍lū Āa̍se̍ ni̍. Āa̍se̍ ve̍lū Che̍kɔ̍pū ni̍. Che̍kɔ̍pū ve̍lū Chu̍dā a̍ pɔ̄mbūāā ndūa̍a̍ ni̍. 3Chu̍dā ve̍lū Pɛ̍lu̍ɛ̍sī nda̍ Sɛ̍lūāā ni̍. Kālā nda̍ wa̍ Ta̍māā ni̍. Pɛ̍lu̍ɛ̍sī ve̍lū Hɛ̍si̍lɔ̄ŋ ni̍. Hɛ̍si̍lɔ̄ŋ ve̍lū Lu̍ām ni̍. 4Lu̍ām ve̍lū Āmi̍na̍da̍bī ni̍. Āmi̍na̍da̍bī ve̍lū Na̍a̍sīɔ̄ŋ ni̍. Na̍a̍sīɔ̄ŋ ve̍lū Sa̍li̍mɔ̄ŋ ni̍. 5Sa̍li̍mɔ̄ŋ ve̍lū Bo̍wāā ni̍. Ndu̍ kāla̍ ndɔ̍ wa̍ Lu̍e̍ha̍bī ni̍. Bo̍wa̍a̍ ve̍lū Ōbɛ̄ɛ̄ ni̍. Ndu̍ kāla̍ ndɔ̍ wa̍ Lu̍fū ni̍.
6Ōbɛ̄ɛ̄ ve̍lū Chɛ̄ɛ̍se̍ ni̍. Chɛ̄ɛ̍se̍ ve̍lū Māsāa̍ Dēēve̍ ni̍, o̍ wa̍ māsāa̍ le̍ lɛ̄ŋndē I̍sɔ̄lūɛ̄īle̍ŋ ndo̍.
Chɔ̍ŋ a̍ Dēēve̍ mbo̍ fūūlūū a̍ bōōndi̍i̍ nda̍ kūɛ̄ a̍ wāŋnda̍ I̍sɔ̄lūɛ̄ī o̍ chɛ̄le̍ŋ ni᷄ŋ Ba̍bi̍lɔ̄ŋ nde̍, yu̍ŋgu̍la̍ la̍ŋ la̍ cho̍ la᷅ŋ ni̍. Dēēve̍ ve̍lū Sɔ̍lɔ̍mɔ̄ŋ ni̍. Kāla̍ ndɔ̍ wa̍ la̍nɔ̍ wa̍ Yūlu̍a̍yā o̍ bā wo̍ ni̍. 7Sɔ̍lɔ̍mɔ̄ŋ ve̍lū Lūēhōbo̍wām ni̍. Lūēhōbo̍wām ve̍lū Ābi̍chā ni̍. Ābi̍chā ve̍lū A̍sā ni̍. 8A̍sā ve̍lū Chɛ̄hōsi̍a̍fa̍tī ni̍. Chɛ̄hōsi̍a̍fa̍tī ve̍lū Chɛ̄ho̍lūām ni̍. Cho̍lūām ve̍lū Āsi̍ya̍ ni̍. 9Āsi̍ya̍ ve̍lū Cho̍tām ni̍. Cho̍tām ve̍lū E̍ha̍a̍sī ni̍. E̍ha̍a̍sī ve̍lū Hɛ̄sɛ̄ki̍yā ni̍. 10Hɛ̄sɛ̄ki̍yā ve̍lū Māna̍sɛ̄ ni̍. Māna̍sɛ̍ ve̍lū E̍mɔ̍ɔ̄ ni̍. E̍mɔ̍ɔ̄ ve̍lū Chōōsa̍yā ni̍. 11Chōōsa̍yā ve̍lū Chɛ̄hōwa̍chīŋ nda̍ pɔ̄mbūāā ndūa̍a̍ ni̍. Bōōndi̍i̍ ke̍ŋ nda̍ a̍a̍ ku̍ɛ̄ a̍ wāŋnda̍ I̍sɔ̄lūɛ̄ī o̍ chɛ̄le̍ŋ ni᷄ŋ lɛ᷅ŋndē Ba̍bi̍lɔ̄ŋnde̍ŋ ni̍.
12Chɔ̍ŋ a̍ bōōndi̍i̍ nda̍ kūɛ̄ a̍ wāŋnda̍ I̍sɔ̄lūɛ̄ī o̍ chɛ̄le̍ŋ ni᷄ŋ Ba̍bi̍lɔ̄ŋ nde̍ mbo̍ fūūlūū a̍ vīōlɔ᷄ŋ Chi̍i̍sōo̍, yu̍ŋgu̍la̍ la̍ŋ la̍ cho̍ la᷅ŋ ni̍. Chɛ̄hōwa̍chīŋ ve̍lū Si̍ɛ̍ɛ̍tīɛ̄l ni̍. Si̍ɛ̍ɛ̍tīɛ̄l ve̍lū Sɛ̄lūba̍bɛ̄l ni̍. 13Sɛ̄lūba̍bɛ̄l ve̍lū Ābi̍yu̍dī ni̍. Ābi̍yu̍dī ve̍lū Īlīa̍a̍kīm ni̍. Īlīa̍a̍kīm ve̍lū A̍sɔ̄ɔ̄ ni̍. 14A̍sɔ̄ɔ̄ ve̍lū Sa̍dɔ̍kī ni̍. Sa̍dɔ̍kī ve̍lū A̍chīm ni̍. A̍chi᷄m ve̍lū Ɛ̄li̍yu̍dī ni̍. 15Ɛ̄li̍yu̍dī ve̍lū Ɛ̄li̍a̍a̍sā ni̍. Ɛ̄li̍a̍a̍sā ve̍lū Ma̍tāŋ ni̍. Ma̍tāŋ ve̍lū Che̍kɔ̍pū ni̍. 16Che̍kɔ̍pū ve̍lū Chōo̍sɛ̍, o̍ wa̍ pɔ̍nɔ̍ɔ̍ Mēēle̍ wo̍ ni̍. Mēēle̍ ko̍ŋ ndu̍ ve̍lū Chi̍i̍sū ni̍, ō nda̍ a̍a̍ vēēlū āā, Ki̍li̍tī wo̍, ko̍ŋ cho̍ ni̍ wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍.
17Mɛ̄ɛ̍ chɔ̍ŋ a̍ bōōndi̍i̍ E̍bīlāha᷅mnde̍ mbo̍ fūūlūū a̍ bōōndi̍i̍ Dēēve̍ ve̍, yu̍ŋgu̍la̍ŋ tɔ̍ a̍ lā hīɔ̍ɔ̍lu̍ la̍ cho̍ la̍ŋ ni̍. Chɔ̍ŋ vɛ̍lɛ̄ a̍ bōōndi̍i̍ Dēēve̍ ve̍ mbo̍ fūūlūū a̍ bōōndi̍i̍ nda̍ kūɛ̄ a̍ wāŋnda̍ I̍sɔ̍lūɛ̄ī o̍ chɛ̄le̍ŋ ni᷄ŋ Ba̍bi̍lɔ̄ŋ nde̍, yu̍ŋgu̍la̍ŋ tɔ̍ a̍ lā hīɔ̍ɔ̍lu̍ la̍ cho̍ la̍ŋ ni̍. Chɔ̍ŋ vɛ̍lɛ̄ a̍ bōōndi̍i̍ ke̍ŋ mbo̍ fūūlūū a̍ vīōlɔ᷄ŋ wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍, ō chō yu̍ŋgu̍la̍ŋ tɔ̍ a̍ lā hīɔ̍ɔ̍lu̍.
A̍ vīōlɔ᷄ŋ Chi̍i̍sū Ki̍li̍tīo̍o̍ o̍kɔ̄ɔ̄
(Lu̍kū 2:1-7)
18Nyɛ̍ yɔ̍nu̍ŋ a̍ Chi̍i̍sū Ki̍li̍tī vīōlɔ᷄ŋ ndɔ̄ɔ̍ wo̍, ndu̍ cho̍ ho̍ō ni̍. Mēēle̍, o̍ ve̍lū Chi̍i̍su̍ wo̍, nda̍ a̍a̍ chɛ̍la᷅ŋ ni᷅ŋ nda̍ Chōo̍sɛ̍ le̍ mī Chōo̍sɛ̍ ndu̍ o̍o̍ dɔ̍ū ndu̍ fu̍lu̍. Kɛ̍ lɔ̍ɔ̍pa̍ Chōo̍sɛ̍ du̍a̍ū ndu̍ fu̍lu̍, mi̍ ī yɔ̄nu᷄ŋ mi̍ Mēēle̍ chūā yo᷄llo̍. Ndu̍yɛ̍ Nyi̍na̍ Mɛ̄lɛ̄ka̍a̍ ndu̍ o̍o̍ to̍sa̍ a̍ sa̍bū ni̍ mbo̍ chūā yo᷄llo̍ ho̍ō. 19Mi̍ Chōo̍sɛ̍ kɛ̍ɛ̍sīāā le̍ Mēēle̍ kīɔ̍ɔ̍, kāni̍ ō wa̍ wāna̍ si̍m ō kālā ka̍lā o̍ nyɛ̄ sāwāla̍ Mɛ̄lɛ̄ka̍la̍ŋ lā dīmi̍ wo̍ tōsāa̍ ni᷄ŋ. Kɛ̍ ndu̍ o̍o̍ hɛ̍na̍ŋ mī ndu̍ o̍o̍ tu̍si̍ Mēēle̍ lāsi̍ɔ̍mbu̍ fa̍ŋgā tɛ̍ɛ̄ŋ te̍. Le̍ he̍ī, mbo̍ kɛ̄ɛ̄sīāā le̍ bāla̍ŋ sōlīo̍o̍ o̍ sūɛ̍i̍ ndūɛ̍i̍ ni᷄ŋ yɛ̍lɛ̍ŋ, wānāā ŋīɔ̍ɔ̍ŋ ā yāa̍ bɛ̍ɛ̍, nda̍ a̍a̍ si̍nā le̍. 20Mɛ̄ɛ̍ Chōo̍sɛ̍ wa̍ kɛ̄ɛ̄sīa̍a̍ le̍ he̍ī tōsāa̍, mi̍ ki̍i̍la̍nɔ̍ Māsānɔ̄ɔ̍ Mɛ̄lɛ̄ka̍a̍ lō o̍ ko̍ŋ mbo̍ hūŋ nāa̍ ndu̍ chu̍a̍ o̍ lɔ̄mā sɔ̄lāā. Mbo̍ di̍mūl ndu̍ āā, “Chōo̍sɛ̍, nu᷄m fu̍la̍ ho̍ō o̍ pūlāle̍ De̍e̍ve̍le̍ŋ chōo̍ wo̍, ki̍i̍sa᷄ŋ le̍ Mēēle̍ chūa̍a̍ o̍ nɔ̄ ni̍ŋ te̍. Kāni̍ fo̍ndōle̍ o̍ sa̍bu̍ Nyi̍na̍ Mɛ̄lɛ̄ka̍a̍ ni᷄ŋ o̍ chu̍a̍ yo᷄l o̍ nɔ̍ ko̍ŋ ndo̍ ni̍. 21Ndu̍yɛ̍ ō chō hūnɔ̄ɔ̄ pōo̍ vīōlɔ̄ɔ̄. Ō vēlū pɛ̍, ke̍ ndu̍ dīōla̍ŋ āā, Chi̍i̍sū. Kāni̍ fo̍ndōle̍, ndu̍ cho̍ wānāā ndūa̍a̍ hūnɔ̄ɔ̄ bāŋā mbō sōli̍ nda̍ o̍ yɔ̄ŋndā ndāla̍ wɔ̍ɔ̍ŋnda̍ŋ ni᷄ŋ ni̍.”
22Ndu̍yɛ̍ sɔ̄ɔ̍ŋ mu̍ŋ kpo̍u̍ ŋ̄ yɔ̄nu̍ŋ le̍ mī nyɛ̄ Māsānɔ̄ɔ̍ Mɛ̄lɛ̄ka̍ dɔ̄ū sīndɛ̄ wāna̍ ndɔ̍ su̍a̍ā le̍ ndu̍ wo̍ o̍ sōndō mbo̍ dīmī wo̍ ō yɔ̄nu̍ŋ. 23Mbo̍ dīmī āā, “Lā sīna̍ pɛ̍ŋgu̍ māā yūfu̍a̍a̍nɔ̍ɔ̍ o̍ si̍nā su̍ɛ̍i̍ wānā pɔ̍nɔ̍ le̍ wo̍ ō chō hūnɔ̄ɔ̄ yo᷄llo̍ chūā mbō vēlū pōo̍. Ndu̍yɛ̍ po̍ o̍ cho̍ ko̍ŋ vīōlɔ̄ɔ̄ wo̍, ā kē ndu̍ ni̍ŋ di̍ōla̍ŋ āā, Īma̍a̍nūɛ̄l.” Īma̍a̍nūɛ̄la̍ŋ la̍ cho̍ ni̍ āā, Mɛ̄lɛ̄ka̍ chō lātūlu̍ a̍ na̍a̍.
24O̍ ko̍ŋ kɔ̍ɔ̍lī, mɛ̄ɛ̍ Chōo̍sɛ̍ te̍ndū, mbo̍ tōsā mbo̍ chūā ni̍ko̍ Me̍e̍le̍ o̍ īla̍nɔ̍ya̍ ni᷄ŋ mɛ̄ɛ̍ ki̍i̍la̍nɔ̍ Māsānɔ̄ɔ̍ Mɛ̄lɛ̄ka̍a̍ dīmu̍l ndu̍ yɛ̍. 25Kɛ̍ dɛ̍nɛ̍ o̍ dɛ̍nɛ̍ ke̍e̍ku̍ nda̍ tɛ̄ɛ̄ŋ te̍ mbo̍ lō o̍ ko̍ŋ ha̍a̍a̍ mi̍ Mēēle̍ vīālū po̍ ndɔ̄ɔ̍. Mɛ̄ɛ̍ o̍ ve̍lū, mi̍ Chōo̍sɛ̍ kē ndu̍ dīōla̍ŋ āā, Chi̍i̍sū.
Currently Selected:
Māa̍ti̍u̍ 1: YM
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.