Ɛ̍sɔ̍dɔ̍ɔ̄ 40

A̍ mɛ̄ɛ̍ nda̍ sīmi̍ tɛ̍ndīi̍ Mɛ̄lɛ̄ka̍ Ya̍a̍wɛ̄ɛ̄ wo̍ ma̍ māl ndu̍ Mɛ̄lɛ̄ka̍ o̍ bā yɛ̍ o̍kɔ̄ɔ̄

1O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā, 2“Lā nɔ̄ mī lā sīmi̍ ni̍ko̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍. Pāŋgi̍i̍ tāse̍i̍ o̍ wɔ̄sīo̍o̍ ni᷄ŋ, lɔ̄mā lēpīlɛ̍, pāa̍le̍ le̍ŋ nya̍ nɔ̄ ni̍ mī lā sīmi̍ tɛ̍ndīi̍yo̍ ho̍ō. 3Tē lā sīmi̍ ndu̍ pɛ̍, lā chu̍a̍ kɔ̍fū kpe̍ma̍a̍, lā lūe̍i̍ ndu̍ o̍ tɛ̍ndīi̍yo̍ ho̍ō ni᷄ŋ, lā bāa̍ kōlā wa̍a̍ŋga̍a̍wo̍ kɔ̍fū kōŋ lāchī. 4O̍ ko̍ŋ kɔ̍ɔ̍lī, mī lā lūe̍i̍ ti̍bīi̍yo̍, ndu̍yɛ̍ mī lā chu̍a̍ wōlɔ̄ɔ̄lā nɔ̍ le̍ wāa̍ o̍ ti̍bi̍i̍ ko̍ŋ chōo̍ la̍ŋ kpo̍u̍, mī lā kɛ̄si̍ la̍ŋ lēcho̍ō, mɛ̄ɛ̍ la̍ nɔ̍ le̍ wāa̍ yɛ̍. Mī lā chūa̍ vɛ̄lɛ̄ nyɛ̄ kɛ̄sīāā lāla̍mbūi̍yo̍, mī lā lūe̍i̍ ndu̍ o̍ tɛ̍ndīi̍yo̍ ho̍ō ni᷄ŋ. Ndu̍yɛ̍, mī lā kɛ̄si̍ la̍mbūi̍la̍ nɔ̍ le̍ wāa̍ o̍ nyɛ̄ kɛ̄sīāā lāla̍mbūi̍yo̍ chōo̍ la̍ŋ, nāa̍ la̍ nɔ̍ wāa̍ wa̍. 5O̍ ko̍ŋ kɔ̍ɔ̍lī, mī lā kūɛ̄ a̍ ma̍āŋ ŋ̄ko̍o̍līi̍ nya̍ tōōsi̍a̍a̍ le̍ nyɛ̄m chūŋ kɛ̄ndɔ᷄ŋ lōmɔ̄ɔ̍ lēchōo̍ wo̍, mī lā kɛ̄si̍ ndu̍ o̍ kōla̍ nɔ̍ mbō wa̍ ō bāā o̍ kɔ̍fū kpe̍ma̍a̍ lāchī wo̍ lāchī. Ndu̍yɛ̍, mī lā bāa̍ kōlāa̍ o̍ tɛ̍ndīi̍yo̍ ho̍ō dīō. 6Mī lā chūa̍ ma̍āŋ nya̍ tōōsi̍a̍a̍ le̍ sa̍lālā lūāmāāla̍ŋ sōlīo̍o̍ lēchōo̍ wo̍, mī lā kɛ̄si̍ ndu̍ o̍ tɛ̍ndīi̍yo̍ sōndōo̍. 7O̍ ko̍ŋ kɔ̍ɔ̍lī, mī lā chu̍a̍ hɛ̄ŋgɛ̍i̍ īchīli̍ŋ nya̍ tōōsi̍a̍a̍ le̍ mɛ̄ŋnda̍ŋ dɔ̄wɔ̄ɔ̍ lēni᷄ŋ ndo̍, mī lā kɛ̄si̍ ndu̍ tɛ̍ndīi̍yo̍ tɛ̄ɛ̄ŋ a̍ ma̍āŋndo̍. Mī lā dɔ̄ū mɛ̄ŋnda̍ŋ lēni᷄ŋ. 8Tē lā chīi̍ tɛ̍ndīi̍yo̍ ho̍ō sīmī pɛ̍, lā bālu̍ la̍ū ndɔ̄ɔ̍ a̍ kpākīo̍o̍ kpɔ̍kɔ̍su̍, lā lāndu̍ kōlāa̍ o̍ dīo̍o̍ le̍ lūɛ̄īyɔ̄ɔ̍ o̍ la̍ūwo̍ kōŋ ni᷄ŋ.

9“Te̍ lā chīi̍ nyɛ̄ o̍ nyɛ̄ tōsā pɛ̍ mɛ̄ɛ̍ ya̍ I̍ di̍mu̍l nya̍ yɛ̍, lā chūa̍ chūɛ̄īmā cho̍ le̍ hɛ̄līo̍o̍ wa̍ŋ, lā fāsa̍ŋi̍a̍a̍ ma̍ŋ o̍ tɛ̍ndīi̍yo̍ ho̍ō, a̍ o̍ nyɛ̄ o̍ nyɛ̄ cho̍ o̍ tɛ̍ndīi̍yo̍ ho̍ō ni᷄ŋ, le̍ mī ŋ̄ sīmnu᷄ŋ nyɛ᷅m kāsī. Mɛ̄ɛ̍ o̍ he̍ī ni᷄ŋ, tɛ̍ndīi̍yo̍ ho̍ō ni̍, a̍ nyɛ̄ o̍ nyɛ̄ cho̍ o̍ tɛ̍ndīi̍yo̍ ho̍ō ni᷄ŋ, mī ŋ̄ wa̍ nyɛ̄m kāsī. 10O̍ ko̍ŋ kɔ̍ɔ̍lī, mī lā fāsa̍ŋi̍a̍a̍ vɛ̄lɛ̄ chūɛ̄īmā māŋ o̍ ma̍āŋ cho̍ le̍ sa̍lālā lūāmāāla̍ŋ sōlīo̍o̍ lēchōo̍ wo̍, a̍ wōlɔ̄ɔ̄lā ndɔ̄la̍ wa̍lta̍ŋ kpo̍u̍, le̍ mī ŋ̄ sīmnu᷄ŋ nyɛ᷅m kāsi᷄ŋ hi̍o̍ū kpo̍u̍ wo̍ŋ. 11Ndu̍yɛ̍, mī lā fāsa̍ŋi̍a̍a̍ vɛ̄lɛ̄ ma̍ŋ o̍ hɛ̄ŋgɛ̍i̍ bɛ̍ndū māmɛ̄ŋndo̍, ndu̍yɛ̍ a̍ nyɛ̄ hɛ̄ŋgɛ̍i̍ ko̍ŋ ō cha᷄l chōo̍ wo̍, le̍ mī la̍ŋ bɛ̍ɛ̍ la̍ si̍mnu᷄ŋ nyɛ̍lā ka̍sī.

12“Tē lā chīi̍ pɛ̍ kpo̍u̍, lā hīŋ a̍ E̍lɔ̄ŋ nda̍ pūa̍a̍ ndūa̍a̍ o̍ tɛ̍ndīi̍ nūu̍ sōndōo̍, mā sɔ̄la̍ pūlɔ̄ɔ̍, le̍ mā sīmnu᷄ŋ wa̍nāā kāsī. 13O̍ ko̍ŋ kɔ̍ɔ̍lī, mī lā chu̍a̍ dōmāla̍ kāsīlā nya̍ tōōsi̍a̍a̍ la̍ŋ, mī lā wōu̍ E̍lɔ̄ŋ. Ndu̍yɛ̍, mī lā tāla̍ ndu̍ chūɛ̄īya̍ŋ o̍ lēbōl le̍ mbō sīmnu᷄ŋ wa᷅na̍ kāsī, mbō wa̍ wāna̍ ni̍ so̍līāā lāsa̍lā. 14Ndu̍yɛ̍, mī lā chūa̍ dōmāla̍ wānāā sōlīāā lāsa̍lāa̍ lā pīlɛ̍ la̍ŋ, mī lā wōu̍ vɛ̄lɛ̄ pūa̍a̍ ndūa̍a̍. 15Ndu̍yɛ̍, nda̍ bɛ̍ɛ̍ mī lā tāla̍ nda̍ chūɛ̄īya̍ŋ o̍ lēbōl, mɛ̄ɛ̍ nya̍ tāla̍ fi̍nyā nda̍ chūɛ̄īya̍ŋ o̍ lēbōl lɛ̍, le̍ mā sīmnu᷄ŋ wānāā nīāā so̍līāā lāsa̍lā. Mɛ̄ɛ̍ o̍ he̍ī ni᷄ŋ, lā chō māchūāā tōsāa̍ mī yu̍ŋgu̍ E̍lɔ̄ŋndo̍, ō sīmnu᷄ŋ wa̍nāā nīāā so̍līāā lāsa̍lā le̍ fɛ̍ɛ̍ŋ a̍ fɛ̍ɛ̍ŋ.”

16Mi̍ Mūu̍sē o̍ to̍sā nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ le̍ tōsāa̍. 17Pāŋgi̍i̍ tāse̍i̍ o̍ wɔ̄sīo̍o̍ ni᷄ŋ, lɔ̄mā lēpīlɛ̍, pāa̍le̍ le̍ŋ nda̍ sīmi̍ tɛ̍ndīi̍ Mɛ̄lɛ̄ka̍ Ya̍a̍wɛ̄ɛ̄ wo̍ ni̍. Mɛ̄ɛ̍ I̍sɔ̄lūɛ̍i̍ya̍ ā fūla̍ o̍ chɛ̄le̍ŋ ni᷄ŋ, ā chīi̍ wɔ̄sīo̍o̍ ō pīlɛ̍, o̍ dīi̍ŋ ndɔ̄ɔ̍, nda̍ sīmī tɛ̍ndīi̍yo̍ ho̍ō ni̍. 18Mi̍ Mūu̍sē nda̍ wāŋnda̍ I̍sɔ̄lūɛ̄ī a̍ bɔ̍ɔ̍ŋīāā tɛ̍ndīi̍yo̍ ho̍ō nāa̍ pi᷅lɛ̍, ma̍ bɛ̄ɛ̄ndīāā ndu̍ kpɛ̍ kpɛ̍ mɛ̄ɛ̍ ndu̍ o̍o̍ nɔ̍ le̍ wāa̍ yɛ̍. Mɛ̄ɛ̍ nda̍ sīmi̍ da̍kpe̍ŋnda̍ ndɔ̄la̍ŋ, ma̍ sīmī la̍ŋ o̍ nyɛ̄lā la̍ si᷅m le̍ni̍ŋ nda̍ŋ, ma̍ wōū kpɔ̄lɔ̄ŋndā ndɔ̄la̍ŋ, ma̍ sīmī sūŋgbu̍ma̍ ndūa̍a̍ŋ. 19Mɛ̄ɛ̍ nda̍ chīi̍ ndu̍ sīmī kpo̍u̍, ma̍ wūū ndu̍ lēchōo̍ a̍ kōlāla̍ŋ, mɛ̄ɛ̍ nda̍ hāndu̍ kōla̍ tāso̍o̍, ma̍ hāndū vɛ̄lɛ̄ kōlāa̍ ō pīlɔ̄ɔ̍ lēchōo̍, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Mūu̍sē yɛ̍. 20O̍ ko̍ŋ kɔ̍ɔ̍lī, mi̍ Mūu̍sē chu̍ā pōūtā yɛ̍ndɛ̍la̍ ti̍ɔ̍ɔ̍ŋndā sāwāla̍ŋ lā wa̍ lā pōōnyīāā lēchōo̍ la̍ŋ, mbo̍ dūāū o̍ kɔ̍fū kpe̍ma̍a̍ ni᷄ŋ, mbo̍ chūā kūmbū kɔ̍fū kpe̍ŋgbe̍i̍ īnyīɛ̍ɛ̍yo̍, mbo̍ hāndū ndu̍ o̍ kɔ̍fōo̍ chōo̍. Mbo̍ chūā yɔ̄mīī vīlɛ̄ī nda̍ tōōsi̍a̍a̍ le̍ kɔ̄la̍ŋ a̍ kɔ̍fōo̍ ho̍ō ve̍, mbo̍ wōū o̍ kēla᷄ŋ ŋ̄ko̍o̍līi̍ wa̍ o̍ kɔ̍fōo̍ wo̍ŋ. 21Mbo̍ chūā kɔ̍fōo̍ ho̍ō mbo̍ kɔ̍ kɛ̍sī ndu̍ o̍ tɛ̍ndīi̍ Mɛ̄lɛ̄ka̍a̍ ni᷄ŋ. O̍ ko̍ŋ kɔ̍ɔ̍lī, mbo̍ bāā kōlā bɛ̍ndōo̍ kɔ̍fōo̍ ho̍ō lāchī, le̍ ndu̍ vīōŋɔ̄ɔ̍. Ndu̍yɛ̍ le̍nde̍ Mɛ̄lɛ̄ka̍ Ya̍a̍wɛ̄ɛ̄, ndu̍ o̍o̍ di̍mu̍l ndu̍ Mūu̍sē ni̍.

22Ndu̍yɛ̍, mi̍ Mūu̍sē lu̍e̍ī ti̍bīi̍yo̍ o̍ tɛ̍ndīi̍yo̍ ho̍ō ni᷄ŋ, mbo̍ kɛ̄sī ndu̍ bā lūāŋndo̍ o̍ kōla̍ wa̍ ō lāndāā o̍ tɛ̍ndīi̍yo̍ ni᷄ŋ ndo̍ lāchī. 23O̍ ko̍ŋ kɔ̍ɔ̍lī, mbō chūā bēe̍dīi̍ wa̍ ō yɔ̄ŋga᷄ŋ o̍ Mɛ̄lɛ̄ka̍ lo̍ wo̍, mbo̍ kɛ̄sī ndu̍ o̍ ti̍bīi̍ ko̍ŋ chōo̍ Mɛ̄lɛ̄ka̍ Ya̍a̍wɛ̄ɛ̄ lāchī, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ Mūu̍sē yɛ̍. 24Mbo̍ chūā vɛ̄lɛ̄ nyɛ̄ kɛ̄sīāā lāla̍mbūi̍yo̍, mbo̍ lūēī ndu̍ o̍ tɛ̍ndīi̍yo̍ ho̍ō ni᷄ŋ, mbo̍ kɔ̍ kɛ̍sī ndu̍ bā tōūwo̍, mbo̍ sīmī ndu̍ ti̍bīi̍yo̍ lāchī kpēŋgēi̍ ī pīlɛ̍i̍. 25Mbo̍ chūā la̍mbūi̍la̍ŋ mbo̍ kɛ̄sī la̍ŋ o̍ nyɛ̄lā kɛ̄sīāā lāla̍mbūi̍yo̍ chōo̍, mbo̍ mɛ̄ndūl la̍ŋ Mɛ̄lɛ̄ka̍ Ya̍a̍wɛ̄ɛ̍ lāchī, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ yɛ̍. 26Ndu̍yɛ̍, mbo̍ chūā vɛ̄lɛ̄ ma̍āŋ ŋ̄ko̍o̍līi̍ nda̍ lūām nyɛ᷅m chūŋ kɛ̄ndɔ᷄ŋ lēchōo̍ wo̍, mbo̍ lūēī ndu̍ o̍ tɛ̍ndīi̍yo̍ ho̍ō ni᷄ŋ, mbo̍ kɛ̄sī ndu̍ kōla̍ bɛ̍ndu̍ wa̍ ō lāndāā wo̍ lāchī. 27O̍ ko̍ŋ, mbo̍ lūām nyɛ̄m chūŋ kɛ̄ndɔ᷄ŋ o̍ ma̍āŋ kōŋ chōo̍, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ yɛ̍. 28Mbo̍ chūā kōlā wa̍a̍ŋga̍a̍ nda̍ bɛ̄ɛ̄ndi̍a̍a̍ le̍ lāndɔ̄ɔ̍ o̍ tɛ̍ndīi̍yo̍ ho̍ō dīō wo̍, mbo̍ lāndū o̍ tɛ̍ndīi̍yo̍ dīō. 29O̍ ko̍ŋ kɔ̍ɔ̍lī, mbo̍ chūā ma̍āŋ nda̍ tōōsi̍a̍a̍ le̍ sa̍lāla̍ŋ lōmɔ̄ɔ̍ lēchōo̍ wo̍, mbo̍ kɛ̄sī ndu̍ o̍ tɛ̍ndīi̍yo̍ dīō, bā bi̍ɔ̍ɔ̍ ti᷄ŋ. Ndu̍yɛ̍, mbo̍ sōlī sa̍lālā lūāmāāla̍ŋ, a̍ sa̍lālā tɔ̄lɔ̄ɔ̄ lāku̍llo̍ o̍ ma̍āŋndo̍ ho̍ō chōo̍, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ yɛ̍. 30Ndu̍yɛ̍, mbo̍ chūā hɛ̄ŋgɛ̍i̍ bɛ̍ndū īchīli̍ŋ nda̍ tōōsi̍a̍a̍ le̍ mɛ̄ŋnda̍ŋ dɔ̄wɔ̄ɔ̍ lēni᷄ŋ ndo̍, mbo̍ kɛ̄sī ndu̍ tɛ̍ndīi̍yo̍ tɛ̍ɛ̄ŋ a̍ ma̍āŋndo̍. Mbo̍ dūāū mɛ̄ŋnda̍ŋ lēni᷄ŋ. 31Mūu̍sē ni̍, E̍lɔ̄ŋ ni̍, a̍ pūa̍a̍ E̍lɔ̄ŋnda̍, tē nda̍ a̍a̍ wa̍ lūɛ̄īyɔ̄ɔ̍ o̍ tɛ̍ndīi̍ Mɛ̄lɛ̄ka̍a̍ ni᷄ŋ pɛ̍, lo̍ŋ nda̍ a̍a̍ ke̍ī bāla̍ŋ pūlɔ̄ɔ̄ ni̍, a̍ pēlo̍ŋ. 32Le̍ te̍le̍ŋ o̍ te̍le̍ŋ, tē nda̍ a̍a̍ wa̍ lūɛ̄īyɔ̄ɔ̍ o̍ tɛ̍ndīi̍ Mɛ̄lɛ̄ka̍a̍ ni᷄ŋ pɛ̍, kɛ̄lɛ̄ŋgāā mī nda̍ a̍a̍ wa̍ kɔ̄la̍ŋ o̍ ma̍āŋndo̍ le̍ sa̍lāla̍ŋ sōlīo̍o̍, mɛ̄ɛ̍ mī nda̍ a̍a̍ ke̍i̍ fɛ̍lɛ̍ŋ bāla̍ŋ pūlɔ̄ɔ̍ lo̍ŋ, a̍ pēlo᷄ŋ, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Mūu̍sē yɛ̍. 33O̍ ko̍ŋ kɔ̍ɔ̍lī, la̍ū ba̍lu̍ tɛ̍ndīi̍yo̍ ho̍ō wo̍, a̍ ma̍āŋndo̍, mi̍ Mūu̍sē du̍a̍ū la̍ŋ o̍ kpākīo̍o̍ ni᷄ŋ. Ndu̍yɛ̍, mbo̍ chūā kōlāa̍, mbo̍ lāndū ndu̍ o̍ tɛ̍ndīi̍yo̍ ho̍ō dīō. O̍ ko̍ŋ, nyɛ̄ o̍ nyɛ̄ Mɛ̄lɛ̄ka̍ dīmu̍l Mūu̍sē le̍ tōsāa̍, mi̍ Mūu̍sē chīi̍ ndu̍ tōsā.

Yu̍mbu̍ yu̍mbu̍ i̍kpu̍ŋgbāa̍ ō tōl o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ wāŋnda̍ lātūlu̍ wo̍ chōo̍

(Nɔ̍mbāā 9:15-23)

34O̍ ko̍ŋ kɔ̍ɔ̍lī, mi̍ yu̍mbu̍ yu̍mbu̍ i̍kpu̍ŋgbāa̍ ō tūāl tɛ̍ndīi̍yo̍ ho̍ō chōo̍. O̍ ko̍ŋ, mi̍ pa̍ŋgēle̍ bɛ̄ndu̍ chɔ᷅m na̍ŋɔ̄ɔ̍ bɛ̄ndu̍ Mɛ̄lɛ̄ka̍ Ya̍a̍wɛ̄ɛ̄ wo̍ wo̍ ō tīū o̍ tɛ̍ndīi̍yo̍ ho̍ō ni᷄ŋ si̍lɔ̍. 35Mūu̍sē nɔ̍la̍ mbō lūɛ̄ī o̍ tɛ̍ndīi̍yo̍ ho̍ō ni᷄ŋ te̍, kāni̍ fo̍ndōle̍, yu̍mbu̍ yu̍mbo̍o̍ o̍ wa̍ ō tūālāā o̍ tɛ̍ndīi̍yo̍ ho̍ō chōo̍, mī pa̍ŋgēle̍ bɛ̄ndu̍ chɔ᷅m na̍ŋɔ̄ɔ̄ Mɛ̄lɛ̄ka̍ Ya̍a̍wɛ̄ɛ̄ wo̍ wo̍, ō wā ō tīūwāā lēni᷄ŋ si̍lɔ̍. 36Ndu̍yɛ̍, o̍ kɔ̄lā ndāla̍ŋ nda᷅ŋ ni᷄ŋ ki̍nɛ̍i̍, yu̍mbu̍ yu̍mbu̍ ho̍ō, ndu̍ wa̍ bālɔ̄ɔ̍ a̍ wāŋnda̍ I̍sɔ̄lūɛ̄ī ni̍. Te̍le̍ŋ o̍ te̍le̍ŋ, tē yu̍mbu̍ yu̍mbo̍o̍ ho̍ō ndu̍ o̍o̍ fa̍ŋa̍ŋ dɔ̍ɔ̍ o̍ tɛ̍ndīi̍yo̍ chōo̍ pɛ̍, mbō kāndu̍ kɔ̄la̍ŋ, wāŋnda̍ I̍sɔ̄lūɛ̄ī a̍ to᷅l ndu̍ kɔ̄ɔ̄lī. 37Ndu̍yɛ̍ bā o̍ bā yu̍mbu̍ yu̍mbu̍ kōŋ ndu̍ o̍o̍ si̍m pɛ̍, lo̍ŋ nda̍ lō ni̍ ha̍a̍a̍, mɛ̄ɛ̍ mbō kāndu̍ kɔ̄la̍ŋ, ma̍lāŋ nda̍ hīāū lāchī a̍ kɔ̄la̍ŋ. 38Bā o̍ bā I̍sɔ̄lūɛ̍i̍ya̍ nda̍ hi̍o̍u̍ o̍ kɔ̄lā ndāla̍ŋ nda᷅ŋ ni᷄ŋ, Mɛ̄lɛ̄ka̍ Ya̍a̍wɛ̄ɛ̄ o̍ wa̍ nda̍ tɛ̄ɛ̄ŋ. Īpāla̍ ki̍nɛ̍i̍, yu̍mbu̍ yu̍mbo̍o̍ nda̍ a̍a̍ cha᷅ o̍ tɛ̍ndīi̍ Mɛ̄lɛ̄ka̍ Ya̍a̍wɛ̄ɛ̄ wo̍ chōo̍ ni̍, īchɔ̄l ki̍nɛ̍i̍, yīŋnde̍ŋ nda̍ a̍a̍ cha᷅ le̍ni᷄ŋ ni̍.

Currently Selected:

Ɛ̍sɔ̍dɔ̍ɔ̄ 40: YM

Highlight

Copy