Ɛ̍sɔ̍dɔ̍ɔ̄ 35

Sāwāla̍ŋ a̍ pāa̍le̍ pɛ̍ŋgīāāle̍ŋ o̍kɔ̄ɔ̄

1O̍ ko̍ŋ kɔ̍ɔ̍lī, mi̍ Mūu̍sē ve̍e̍lū wāŋnda̍ I̍sɔ̄lūɛ̄ī kpo̍u̍ nāa̍ pi᷅lɛ̍, mbo̍ dīmūl nda̍ āā, “Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l nya̍ le̍ tōsāa̍ wo̍ cho̍ ho̍ō ni̍. 2Ō dīmi̍ āā, ‘Lā nɔ̄ pālɛ̍i̍ ī ŋɔ᷄mpu᷅m o̍ lɔ̍ɔ̍ bɛ̄ŋgu̍ le̍ wa̍lta̍ nyāla̍ŋ tōsāa̍. Kɛ̍ o̍ pāa̍le̍ŋ ŋɔ̍mmɛ̍ūle̍ŋ chōo̍, lā nɔ̍ mī lā tōsa̍ wa̍li̍ o̍ wa̍li̍ le̍, lā nɔ̄ mī lā pɛ̄ŋgi̍ pāa̍le̍ le̍ŋ. Kāni̍ fo̍ndōle̍, pāa̍le̍ kāsīle̍ŋ le̍ cho̍ le̍ ya̍ Mɛ̍lɛ̄ka̍ Ya̍a̍wɛ̄ɛ̄ ni̍. Wānā o̍ wāna̍ to̍sa̍ wa̍llo̍ pāa̍le̍ le̍ŋ pɛ̍, wānā ko̍ŋ ō nɔ̄ mbō sɔ̄la̍ pīɔ̍mndo̍. 3Pāa̍le̍ le̍ŋ, yīŋnde̍ŋ bɛ̍ɛ̍ wānā o̍ wānā nɔ̍ mbō kīīsu̍u̍ le̍ŋ o̍ ndu̍lo̍ chi̍ɛ̍ī ni̍ŋ te̍.’ ”

Kēlā wāŋnda̍ nɔ̄ mā yɔ̄ŋgu̍ le̍ Tɛ̍ndīi̍ Kāsi̍ Mɛ̄lɛ̄ka̍a̍ la̍ŋ

(Ɛ̍sɔ̍dɔ̍ɔ̄ 25:1-9)

4O̍ ko̍ŋ kɔ̍ɔ̍lī, mi̍ Mūu̍sē di̍mūl wāŋnda̍ I̍sɔ̄lūɛ̄ī kpo̍u̍ āā, “Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ ndu̍ cho̍ ho̍ō ni̍. 5Ō dīmi̍ āā, ‘Lā hu᷄ŋ a̍ kēlā nyāla̍ŋ nāa̍ ya̍ Mɛ̍lɛ̄ka̍ Ya̍a̍wɛ̄ɛ̄ chu̍a̍. Ndu̍yɛ̍ tē lā wa᷄ hūnɔ̄ɔ̍ a̍ la̍ŋ pɛ̍, lā hu᷄ŋ a̍ la̍ŋ a̍ kɔ̄ltā chɛ̄lāā la̍ŋ. Ndu̍yɛ̍ nyɛ̄m nya̍ nɔ̄ mī lā hīŋ ndo̍ŋ mu̍ŋ cho̍ mu᷅ŋ ni̍, ko̍o̍līi̍yo̍ŋ, a̍ ka̍ni̍ŋ hu̍mbo᷄ŋ, a̍ būlɔ̍ŋsīi̍yo̍ŋ, 6a̍ kōlāla̍ fūŋi̍i̍ bu᷅li̍īye̍, a̍ kōlāla̍ fūŋi̍i̍ bɔ̍ɔ̄lɛ̍i̍, a̍ kōlāla̍ fūŋi̍i̍ si̍a̍ŋɛ̄i̍, a̍ kōlāla̍ kɛ̍ndɛ̄ kɛ̍ndɛ̄ la̍ŋ, a̍ kōlāla̍ nda̍ tōōsīāā a̍ yīīŋīī chūīŋnda̍ la̍ŋ, 7a̍ yāu̍la̍ sāā nda̍ bɛ̄ɛ̄ndīāā nɛ̍ŋgbɛ̄lɛ̍ la̍ŋ, a̍ yāu̍la̍ vīsīlā kɛ̄ndɛ̄ kɛ̍ndɛ̄la̍ŋ, a̍ yɔ̄mīī āke̍e̍sīāā ve̍, 8a̍ chūɛ̄īya̍ŋ le̍ dɔ̄wɔ̄ɔ̍ o̍ la̍mbūi̍la̍ŋ ni᷄ŋ, a̍ nyɛ̄m chūŋ kɛ̄ndɛ̄ŋ nda̍ dūāū o̍ chūɛ̄īma̍ cho̍ le̍ hɛ̄līo̍o̍ wa̍ŋ ni᷄ŋ ndo̍ŋ, mā mūūli̍āŋ vɛ̍lɛ̄ nyɛ᷅m mu᷅ŋ a̍ nyɛ̄m chūŋ kɛ̄ndɔ᷄ŋ, 9a̍ pōū ɔ̍nɛ̍sī wo̍, a̍ pōūta̍ŋ lā pīlɛ̍ la̍ŋ le̍ dōmā bi̍ŋgī Māsa̍ wānāā so̍līāā lāsa̍lāa̍, a̍ nyɛ̄ wa᷅ ndu̍ o̍ tākpāa̍ le̍ Mɛ̄lɛ̄ka̍ dīōmndo̍ nyūnāa̍ wo̍ bɛ̄ɛ̄ndīa̍a̍.’ ”

A̍ wōlɔ̄ɔ̄la̍ŋ le̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ wāŋnda̍ lātūlu̍ wo̍ o̍kɔ̄ɔ̄

(Ɛ̍sɔ̍dɔ̍ɔ̄ 39:32-43)

10O̍ ko̍ŋ kɔ̍ɔ̍lī, mi̍ Mūu̍sē hi̍a̍ū lāchī a̍ sūɛ̍i̍ nāa̍ wāŋnda̍ I̍sɔ̄lūɛ̄ī chu̍a̍ kpo̍u̍, mbo̍ dīmī āā, “Wānā o̍ wānā cho̍ wānā cha̍ā nyɛ̄ a̍ lābā, lā hu᷄ŋ mī lā hu᷄ŋ to̍o̍sīāā nyɛ̄m Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l na̍a̍ le̍ tōōsi̍a̍a̍ wo̍ŋ. 11Nyɛ̄m mu̍ŋ yɔ̍nūŋ ni̍ māā, tɛ̍ndīi̍yo̍, a̍ kōlāla̍ŋ le̍ kūmbɔ̄ɔ̍ o̍ tɛ̍ndīi̍ ko̍ŋ chōo̍, a̍ do̍lu̍ŋu̍ŋ ndɔ̄ɔ̍ŋ, a̍ da̍kpe̍ŋnda̍ ndɔ̄la̍ŋ, a̍ yɔ̄mīī ndūɛ̄ī vi̍lɛ̄īye̍, a̍ sūŋgbu̍ma̍ ndūa̍a̍ŋ, a̍ nyɛ̄lā sūŋgbu̍a̍ŋ mā sīm le̍ni̍ŋ nda̍ŋ, a̍ kōlā wa̍a̍ŋga̍a̍wo̍ le̍ bāa̍ o̍ dīō, 12a̍ Kɔ̍fū Kpe̍ma̍a̍, a̍ yɔ̄mīī vīlɛ̄īye̍ le̍ kɔ̄la̍ŋ a̍ Kɔ̍fū kōŋ, a̍ kūmbū Kɔ̍fū kōŋ, o̍ cho̍ kpe̍ŋgbe̍i̍ īnyīɛ̍ɛ̍yo̍ wo̍, a̍ kōla̍ nɔ̍ mbō wa̍ ō lāndāā o̍ tɛ̍ndīi̍yo̍ ni᷄ŋ ndo̍, 13a̍ ti̍bīi̍yo̍, a̍ yɔ̄mīī ti̍bīi̍ ko̍ŋ, ndu̍yɛ̍ a̍ wōlɔ̄ɔ̄lā ndɔ̄la̍ŋ, a̍ bēe̍dīi̍ nɔ̍ mbō wa᷄ ō yɔ̄ŋga᷄ŋ o̍ Mɛ̄lɛ̄ka̍ lo̍ wo̍, 14a̍ nyɛ̄ kɛ̄sīāā lāla̍mbūi̍yo̍ le̍ nyɛ̄ wa̍wo̍ŋndo̍ yɔ̄ŋgōo̍, a̍ nyɛ̄ kɛ̄sīāā lāla̍mbūi̍ ko̍ŋ wōlɔ̄ɔ̄lā ndɔ̄la̍ŋ, a̍ la̍mbūi̍la̍ ndɔ̄la̍ŋ, ndu̍yɛ̍, a̍ chūɛ̄īya̍ŋ le̍ dɔ̄wɔ̄ɔ̍ o̍ la̍mbūi̍la̍ la̍ŋ ni᷄ŋ, 15a̍ ma̍āŋ cho̍ le̍ nyɛ̄m chūŋ kɛ̄ndɔ᷄ŋ lōmɔ̄ɔ̍ lēchōo̍ wo̍, a̍ yɔ̄mīī vīlɛ̄īye̍ le̍ kɔ̄la̍ŋ a̍ ma̍āŋ ko̍ŋ, a̍ chūɛ̄īya̍ŋ le̍ hɛ̄līo̍o̍, a̍ nyɛ̄m chūŋ kɛ̄ndɔ᷄ŋ, a̍ kōla̍ nɔ̍ mbō wa̍ ō lāndāā o̍ tɛ̍ndīi̍yo̍ sōndōo̍ wo̍, 16a̍ ma̍āŋ cho̍ le̍ sa̍lālā lūāmāāla̍ŋ sōlīo̍o̍ wo̍, a̍ kāndu̍ nɔ̍ mbō wa᷄ ma̍āŋ kōŋ ō bālāā chɛ̍ chɛ̍ ō tōōsīāā a̍ būlɔ̍ŋsīi̍ye̍ wo̍, a̍ yɔ̄mīī vīlɛ̄īye̍ le̍ kɔ̄la̍ŋ a̍ ma̍āŋ ko̍ŋ, a̍ ma̍āŋ kōŋ wōlɔ̄ɔ̄lā ndɔ̄la̍ŋ, a̍ hɛ̄ŋgɛ̍i̍ māmɛ̄ŋndo̍ le̍ bāla̍ŋ pūlɔ̄ɔ̍ a̍ pēlo᷄ŋ, a̍ nyɛ̄ hɛ̄ŋgɛ̍i̍ ko̍ŋ ō chāl cho̍o̍ wo̍, 17a̍ kōlāla̍ nɔ̍ mī lā wa᷄ la̍ūwo̍ lābālāā la̍ŋ, a̍ sūŋgbu̍a̍ŋ le̍ kōlāla̍ la̍ŋ bāa̍, a̍ nyɛ̄lā sūŋgbu̍ma̍ ma̍ŋ mā sīm le̍ni̍ŋ nda̍ŋ, a̍ kōla̍ nɔ̍ mbo̍ wa᷄ ō lāndāā o̍ dīo̍o̍ le̍ lūɛ̄īyɔ̄ɔ̍ o̍ la̍ūwo̍ wo̍, 18a̍ pɛ̍ɛ̍kīi̍ye̍ le̍ tɛ̍ndīi̍yo̍, a̍ pɛ̍ɛ̍kīi̍ye̍ le̍ kōlāla̍ la̍ūwo̍, ndu̍yɛ̍ a̍ yūe̍i̍ le̍ kōlāla̍ŋ kīndɔ̄ɔ̍, 19a̍ dōmāla̍ lēbɛ̄ɛ̄lā bɛ̄ndūla̍ŋ, lā wānāā sōlīāā lāsa̍lāa̍ ā nɔ̄ mā wōōnu̍ŋ le̍ wa̍llo̍ tōsāa̍ o̍ fo̍ndā kāsīo̍o̍ la̍ŋ, la̍ŋ la̍ yɔ̍nūŋ ni̍ māā dōmāla̍ kāsīla̍ E̍lɔ̄ŋ nda̍ŋ, a̍ dōmāla̍ pūa̍a̍ ndūa̍a̍.”

A̍ kēlā wāŋnda̍ I̍sɔ̄lūɛ̄ī a̍ yɔ̍ŋgu̍ le̍ kpe̍ku̍ Mɛ̄lɛ̄ka̍a̍ la̍ŋ o̍kɔ̄ɔ̄

20Mɛ̄ɛ̍ Mūu̍sē chi̍i̍ sūɛ̍i̍ nāa̍ wāŋnda̍ chūā, nda̍ kpo̍u̍ ma̍ mīīŋgū o̍ fo̍ndāŋndā ndāla̍ŋ. 21Mɛ̄ɛ̍ nda̍ mīīŋgu̍, wānā o̍ wānā mi̍ kɔ̄llo̍ yūsā ndu̍, ma̍ hūŋ a̍ nyɛ̄m nda̍ nɔ̄ wo̍ŋ Mɛ̄lɛ̄ka̍ Ya̍a̍wɛ̄ɛ̍ lāchī a̍ kɔ̄l chɛ̄lāa̍, le̍ tɛ̍ndīi̍ chɔ᷅m māā Mɛ̄lɛ̄ka̍ chō a̍ wāŋnda̍ lātūlu̍ wo̍ tāŋgūllo̍, ndu̍yɛ̍ a̍ nyɛ̄m nda̍ a̍a̍ so̍līŋ kpe̍ku̍ o̍ Mɛ̄lɛ̄ka̍ sōōlūūwo̍ ni᷄ŋ ndo̍ŋ, a̍ dōmāla̍ kāsīlā wānāā sōlīāā lāsa̍lāa̍ tōōsīa̍a̍. 22Nda̍ kpo̍u̍, wānā pɔ̍nɔ̍ ni̍, wānā la̍nɔ̍ ni̍, mi̍ wānā o̍ wānā hu᷅ŋ a̍ nyɛ̄m o̍ kɛ̍ɛ̍si̍a̍a̍ a̍ kɔ̄l ndɔ̄ɔ̍ le̍ yɔ̄ŋgōo̍ wo̍ŋ. Ma̍ hūŋ a̍ nyɛ̄m yɛ̍ yi̍ɔ̍ɔ̍ŋ, mu̍ŋ yɔ̍nūŋ ni̍ māā pe̍nīi̍yo̍ŋ le̍ nyɔ̄ɔ̍ŋ hōlīo̍o̍, a̍ kēla᷄ŋ lānīo̍ŋ, a̍ kēla᷄ŋ ŋ̄sōo̍ŋ, a̍ kēla᷄ŋ lābāa̍ŋ, a̍ nyɛ̄m ŋ̄ko̍o̍līi̍ŋ yɛ̍ yɛ̍ŋ chēle̍ŋndo̍ŋ, ma̍ yɔ̄ŋgū mu̍ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍. 23Wānāā nda̍ a̍a̍ nɔ̍ kōlāla̍ bu᷅li̍īla̍ŋ, a̍ kōlāla̍ bɔ̍ɔ̄la̍āla̍ŋ, a̍ kōlāla̍ si̍a̍ŋāla̍ŋ, a̍ kōlāla̍ kɛ̍ndɛ̄ kɛ̍ndɛ̄la̍ŋ, a̍ kōlāla̍ wa̍ lā tōōsīāā a̍ yīīŋīī chūīŋnda̍ la̍ŋ, a̍ yāu̍la̍ sāā, ɔ̄ɔ̄ yāu̍la̍ chūīŋndā nda̍ bɛ̄ɛ̄ndi̍a̍a̍ nɛ̍ŋgbɛ̄lɛ̍la̍ŋ, ma̍ hūŋ a̍ la̍ŋ. 24O̍ ko̍ŋ kɔ̍ɔ̍lī, wānāā nda̍ a̍a̍ nɔ̍ ka̍ni̍ŋ hu̍mbo᷄ŋ nda̍ ni̍, a̍ wānāā nda̍ a̍a̍ nɔ̍ būlɔ̍ŋsīi̍yo̍ŋ nda̍, ma̍ hu᷄ŋ yɔ̍ŋgū mu̍ŋ le̍ kpe̍ku̍ Mɛ̄lɛ̄ka̍ Ya̍a̍wɛ̄ɛ̄ wo̍ sōlīo̍o̍. Ndu̍yɛ̍ wānāā nda̍ a̍a̍ nɔ̍ yɔ̄mīī āke̍e̍sīāā ve̍ le̍ wa̍lta̍ yɛ̍ yɛ̍la̍ŋ tōsāa̍ wa̍ bɛ̍ɛ̍ ma̍ hūŋ a̍ ndi̍. 25Ndu̍yɛ̍ wāŋ lāāndūāā nda̍ a̍a̍ cha̍ā wo̍mūllo̍ chāā bɛ̄ndōo̍ wa̍ ma̍ wōmūl, ma̍ hūŋ a̍ fūŋi̍i̍ bu᷅li̍īye̍, a̍ fūŋi̍i̍ bɔ̍ɔ̄lɛ̍i̍, a̍ fūŋi̍i̍ si̍a̍ŋɛ̄i̍, a̍ fūŋi̍i̍ kɛ̍ndɛ̄ kɛ̍ndɛ̄ī chēle̍ŋnde̍. 26Wāŋ lāāndūa̍a̍ nda̍ a̍a̍ cha̍ā yi̍i̍ŋīī chūīŋnda̍ wōmūllo̍ wa̍ bɛ̍ɛ̍, ma̍ wōmūl ma̍ hūŋ a̍ ndi̍. 27O̍ ko̍ŋ kɔ̍ɔ̍lī, wānāā bɛ̄ndūa̍a̍ I̍sɔ̄lūɛ̄ī ki̍nɛ̍i̍, ma̍ hūŋ a̍ pōūtā ɔ̍nɛ̍sīla̍ŋ, a̍ pōūta̍ŋ lā pīlɛ̍ la̍ŋ le̍ dōmā bi̍ŋgī Māsa̍ wānāā sōlīāā lāsa̍lāa̍, a̍ nyɛ̄ wa᷅ ndu̍ o̍ tākpāa̍ le̍ Mɛ̄lɛ̄ka̍ dīōmndo̍ nyūnāa̍ wo̍ bɛ̄ɛ̄ndīa̍a̍. 28Ma̍ hūŋ vɛ̄lɛ̄ a̍ chūɛ̄īmā ɔ̄li̍fīi̍ya̍ŋ le̍ la̍mbūi̍la̍ŋ, a̍ nyɛ̄m chūŋ kɛ̄ndɔ᷄ŋ le̍ mūūli̍āŋndo̍ a̍ nyɛ̄m chūŋ kɛ̄ndɛ̄ŋ nda̍ lūām ndo̍ŋ, ndu̍yɛ̍ a̍ chūɛ̄īma̍ cho̍ le̍ hɛ̄līo̍o̍ wa̍ŋ. 29Wāŋnda̍ I̍sɔ̄lūɛ̄ī kpo̍u̍, wānā pɔ̍nɔ̍ ni̍, wānā la̍nɔ̍ ni̍, mi̍ wānā o̍ wānā hu᷅ŋ a̍ nyɛ̄ o̍ kɛ̍ɛ̍si̍a̍a̍ a̍ kɔ̄l ndɔ̄ɔ̍ wo̍, ma̍ yɔ̄ŋgū mu̍ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍, le̍ kpe̍ku̍ o̍ di̍mu̍l Mūu̍sē wo̍ tōsāa̍.

A̍ wānāā wa̍li̍a̍a̍ nda̍ chūa̍ le̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ wāŋnda̍ lātūlu̍ wo̍ tāŋgūllo̍ wa̍ o̍kɔ̄ɔ̄

(Ɛ̍sɔ̍dɔ̍ɔ̄ 31:1-11)

30O̍ ko̍ŋ kɔ̍ɔ̍lī, mi̍ Mūu̍sē di̍mūl wāŋnda̍ I̍sɔ̄lūɛ̄ī āā, “I̍sɔ̄lūɛ̍i̍ya̍ tɛ̍ɛ̄ŋ ki̍nɛ̍i̍, Bɛ̄sa̍lɛ̄ɛ̄, po̍ Yu̍lūī yo̍, ndu̍ yɔ̍nūŋ ni̍ māā, po̍ ma̍ma̍ Hɔ̍ɔ̄ wo̍, fūlāa̍ o̍ yu̍ŋgu̍ Chu̍dā wo̍ chōo̍, ndu̍ Mɛ̄lɛ̄ka̍ Ya̍a̍wɛ̄ɛ̄ o̍ hɛ̍li̍ le̍ kpe̍ku̍ ndɔ̄ɔ̍ ni̍. 31Mɛ̄lɛ̄ka̍ tōsa̍ mi̍ Nyi̍nā Mɛ̄lɛ̄ka̍a̍ tūāl ndu̍ kɔ̄ɔ̄lī. Ndu̍yɛ̍, mi̍ Mɛ̄lɛ̄ka̍ kē ndu̍ tāāsi̍o̍o̍ a̍ kɔ̄l kālo̍o̍, a̍ sīnā pɛ̄ŋgo̍o̍, le̍ wa̍li̍ o̍ wa̍li̍ cho̍ wa̍li̍ cha̍ā nyɛ̄ a̍ lābā tōsāa̍. 32Ō nɔ̄lā mbō tūūli̍a̍a̍ nyɛ̄m kɛ̄ndɛ̄ kɛ̍ndɔ᷄ŋ a̍ ko̍o̍līi̍ye̍, a̍ ka̍ni̍ hu̍mbūe̍i̍, ndu̍yɛ̍ a̍ būlɔ̍ŋsīi̍ye̍. 33Ō nɔ̄ tāāsi̍o̍o̍ le̍ pōūtā ba̍ā kālāla̍ŋ bɛ̄ɛ̄ndīa̍a̍ mɛ̄ɛ̍ la̍ nɔ̍ le̍ wāa̍ yɛ̍, ndu̍yɛ̍, mbō wōu̍ la̍ŋ o̍ nyɛ̄lā la̍ nɔ̍ mī lā wa᷄ lēni᷄ŋ nda̍ŋ, mī lā bīī nyɛ̄ kɛ̄ndɛ̄ kpi̍ŋ. O̍ ko̍ŋ kɔ̍ɔ̍lī, mbo̍ nɔ̄ vɛ̄lɛ̄ tāāsi̍o̍o̍ le̍ nyɔ̄ɔ̍ŋ tūūlīa̍a̍ a̍ yɔ̄mnde̍. Ō nɔ̄ tāāsi̍o̍o̍ le̍ wa̍li̍ cha̍ā nyɛ̄ a̍ lābā wo̍ tōsāa̍. 34Bɛ̄sa̍lɛ̄ɛ̄ wo̍ ho̍ō ni̍, Ōhōli̍a̍bī, po̍ Āhīsa̍ma̍kī wo̍, fūlāa̍ o̍ yu̍ŋgu̍ Da᷅ŋndo̍ chōo̍ ni̍, mi̍ Mɛ̄lɛ̄ka̍ kē nda̍ tāāsi̍o̍o̍, le̍ mā pɛ̄ɛ̄ku̍ wānāā chēle̍ŋ nyɛ̄ nda̍ sīnā wo̍. 35Mɛ̄lɛ̄ka̍ ke̍ nda̍ tāāsi̍o̍o̍ le̍ wa̍li̍ cha̍ā nyɛ̄ a̍ lābā wo̍ tōsāa̍. Ā nɔ̄ tāāsi̍o̍o̍ le̍ nyɛ̄m yɛ̍ yi̍ɔ̍ɔ̍ŋ tūūlīa̍a̍ māā wānāā chāā nyɛ̄ a̍ lābā. Ndu̍yɛ̍, ma̍ nɔ̄ tāāsi̍o̍o̍ le̍ nyɔ̄ɔ̍ŋ hɔ̄ūwɔ̄ɔ̍ a̍ fūŋi̍i̍ yɛ̍ yɛ̍i̍, fūŋi̍i̍ bu᷅li̍īye̍, a̍ fūŋi̍i̍ bɔ̍ɔ̄lɛ̍ī, a̍ yīīŋīī si̍a̍ŋɛ̄i̍, ndu̍yɛ̍ a̍ kōlāla̍ kɛ̍ndɛ̄ kɛ̍ndɛ̄lā chēle̍ŋnda̍ŋ.

Currently Selected:

Ɛ̍sɔ̍dɔ̍ɔ̄ 35: YM

Highlight

Copy