Ɛ̍sɔ̍dɔ̍ɔ̄ 34

Mūu̍sē bɛ̍ɛ̍ndi̍a̍a̍ pōūtā yɛ̍ndɛ̍la̍ che̍le̍ŋ

(Dītɔ̍nɔ̍mi̍ī 10:1-5)

1O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl Mūu̍sē āā, “Mūu̍sē, bɛ̍ɛ̍ndi̍a̍a̍ pōūtā yɛ̍ndɛ̍la̍ŋ la̍ tīɔ̍ɔ̍ŋ mɛ̄ɛ̍ lā tāse̍la̍ŋ lā wa᷄ yɛ̍. Mā hīŋ a̍ la̍ŋ mī po̍o̍nyi̍a̍a̍ dīōmnda̍ wa̍ o̍ lā tāse̍la̍ ŋ̄ pēsi̍ la̍ŋ chōo̍ la̍ŋ. 2Bɛ̍ɛ̍ndīa̍ŋ si̍ɔ̍dīi̍ īdīi̍, mā he̍l Pēmbīī Sa̍a̍nāīve̍, mā hīŋ ya̍ Mɛ̄lɛ̄ka̍ lāchī o̍ pēmbēi̍ bōlle̍ŋ. 3Ndu̍yɛ̍, tē ā wa̍ hūnɔ̄ɔ̍ pɛ̍, nu᷄m pi᷅lɛ̍ kpe̍ nɔ̍ ni̍ mā hīŋ. Ō fūla̍ o̍ nūm kɔ̍ɔ̍lī, wāŋndo̍ ō pīlɛ̍ bɛ̍ɛ̍ I̍ ye̍e̍ma̍ mī I̍ che᷅ ndu̍ o̍ pēmbīī kēŋ te̍. Ndu̍yɛ̍, nāū ni̍, sāa̍ ni̍, chūīŋ ni̍, I̍ ye̍e̍ma̍ mī che᷅ nda̍ dīo̍la̍ŋ o̍ pēmbīī kēŋ bɛ̄ŋgu̍ le̍.” 4O̍ ko̍ŋ kɔ̍ɔ̍lī, mi̍ Mūu̍sē bɛ̄ɛ̄ndīāā pōūtā yɛ̍ndɛ̍la̍ŋ lā tīɔ̍ɔ̍ŋ mɛ̄ɛ̍ lā tāse̍la̍ŋ lā wa᷄ yɛ̍. Mbo̍ pēnā chɔ̄nɔ᷄ŋ īdīi̍yo̍ pu̍u̍ŋ, mbo̍ hēl a̍ la̍ŋ o̍ bā, o̍ Pēmbīī Sa̍a̍nāīve̍ chōo̍, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ yɛ̍.

5O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ tu̍āl o̍ ha̍la̍ īkpūŋgbāa̍ ni᷄ŋ mbo̍ hu᷄ŋ si᷅m Mūu̍sē īkɛ̄i̍, mbo̍ chɔ̄m ndu̍ dīōlā ndɔ̄la̍ŋ, “Mɛ̄lɛ̄ka̍ Ya̍a̍wɛ̄ɛ̄” la̍ŋ. 6O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ ke̍e̍kū Mūu̍sē o̍ hɔ̄l, mbo̍ hīāū. Mbo̍ dīmī āā, “Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍, ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍. Ya̍ cho̍ Mɛ̄lɛ̄ka̍ nɔ̍ nyīɛ̍ɛ̍ye̍, ndu̍yɛ̍ mī ma̍lā wa̍nāā nīa̍a̍ wo̍ ni̍. I̍ cho̍ wa᷅na̍ dɔ̍ɔ̍nu᷄ŋ tu̍mbe̍ chɔ̍ chɔ̍ le̍. Le̍ te̍le̍ŋ o̍ te̍le̍ŋ kāālāa̍ ya̍ I̍ ka̍a̍lā wa̍nāā nīa̍a̍ a̍ kɔ̄llo̍ kpo̍u̍ ni̍, ndu̍yɛ̍, mī wa̍ sa̍kpō a̍ nda̍. 7Wāŋnda̍ wāa̍la̍ŋ o̍ wāa̍la̍ŋ ni᷄ŋ, nda̍ ya̍ I̍ hi̍a̍ū la̍chi̍ a̍ kāālā ni̍ cho̍ le̍ te̍le̍ŋ o̍ te̍le̍ŋ ndo̍ chɔ̄mndo̍ ni̍. Ndu̍yɛ̍, mī I̍ ma᷅l nda̍ le̍ dɛ̍nɛ̍ wɔ̍ɔ̍ŋ o̍ dɛ̍nɛ̍ wɔ̄ɔ̍ŋ nda̍ tōsa̍, a̍ sɔ̄ɔ̍ŋ wɔ̄ɔ̍ŋ nda̍ tōsā wo̍ŋ. Kɛ̍, wānāā yɔ̄ŋ wɔ̄ɔ̍ŋnda̍ nda̍, I̍ me᷅l nda̍ le̍, dɛ̍nɛ̍ pālāa̍ ya̍ I̍ tu̍sī nda̍ chōo̍ ni̍. Ndu̍yɛ̍, chūāūwāā ndāa̍ ni̍, chūāūwāā ndāā ma̍māa̍ ni̍, a̍ chūāūwāā ndāā ma̍māā kāŋ chūāūwāā ndāā ma̍māa̍, nda̍ bɛ̍ɛ̍ dɛ̍nɛ̍ pa̍lāa̍ ya̍ I̍ tu̍sī nda̍ chōo̍ ni̍, le̍ yɔ̄ŋ ndā wɔ̍ɔ̍ŋ kōŋ ni̍.”

8O̍ ko̍ŋ, mi̍ Mūu̍sē ba᷅ŋ wūla̍ŋ chɔ̍ chɔ̍, mbo̍ fūūlūū hɔ̄lla̍ lɛ̄ŋ mɛ̍ɛ̄, mbo̍ sōōlūū Mɛ̄lɛ̄ka̍. 9Mbo̍ dīmī āā, “O̍o̍ Māsānɔ̄ɔ̍ Mɛ̄lɛ̄ka̍, tē ā hi̍ni̍ kɔ̄l a̍ ya̍ pɛ̍ le̍kɛ̍ndɛ̍ī, mɛ̄ɛ̍ yāndi̍i̍, kɔ̍ a̍ na̍a̍ la̍tu̍lu̍. I̍ si̍nā cha̍la̍ŋ māā wāŋnda̍ I̍sɔ̄lūɛ̄ī, wānāā bōlīī kālāa̍ nda̍ chō ni̍. Kɛ̍ yāndi̍i̍ Mɛ̄lɛ̄ka̍, ma̍l na̍a̍ le̍ yɔ̄ŋndā nāāla̍ wɔ̄ɔ̍ŋnda̍ŋ ndu̍yɛ̍, mā chu̍a̍ na̍a̍ māā wānāā nūm.”

Mɛ̄lɛ̄ka̍ mīŋgi̍ kpe̍ma̍a̍ yīī nda̍ wāŋnda̍ I̍sɔ̄lūɛ̄ī

(Ɛ̍sɔ̍dɔ̍ɔ̄ 23:14-19; Dītɔ̍nɔ̍mi̍ī 7:1-5; 16:1-17)

10O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl Mūu̍sē āā, “I̍ cho̍ kpe̍ma̍a̍ yīī a̍ nya̍ wāŋnda̍ I̍sɔ̄lūɛ̄ī. Ndu̍yɛ̍, I̍ cho̍ sɔ̄ɔ̍ŋ kɔ̄ndɔ̄fi̍li̍ŋ bɛ̄ndo᷄ŋ tōsā wāŋnda̍ I̍sɔ̄lūɛ̄ī kpo̍u̍ o̍ hɔ̄l, mā chē. Sɔ̄ɔ̍ŋ ya̍ I̍ to̍sā ni̍ŋ ndo̍ŋ, kāni̍ bɛ̍ɛ̍, o̍ chi̍e̍ēŋndo̍ ni᷄ŋ kpo̍u̍, ɔ̄ɔ̄ o̍ lēlɛ̄ŋ o̍ lēlɛ̄ŋ ni᷄ŋ, sɔ̄ɔ̍ŋ wa̍ā le̍nde̍ ŋ̍ yɔ̍nu̍ŋ ndɔ̍ le̍. Wānāa̍ ba̍lu̍ nya̍ wa̍ kpo̍u̍ ā chā ni̍ŋ sɔ̍ɔ̍ŋ kɔ̄ndɔ̄fi̍li̍ŋ ya̍ Mɛ̄lɛ̄ka̍ Ya̍a̍wɛ̄ɛ̄ to̍sā ni̍ŋ ndo̍ŋ, kāni̍ fo̍ndōle̍, ŋ̄ wā ni̍ŋ sɔ̍ɔ̍ŋ ŋ̄sīōōŋ bɛ̄ndū. 11Le̍la̍ŋ, nyɛ̄ o̍ nyɛ̄ ya̍ I̍ cho̍ nya̍ dīmūllo̍ pāa̍le̍ hāūle̍ŋ nde᷅ŋ le̍ tōsāa̍, lā ya̍ŋ ndu̍ nīla̍ŋ, mī lā tōsa̍ ndu̍ kpo̍u̍. Kāa̍la̍ cho̍ nya̍ lāchī la̍ŋ ki̍nɛ̍i̍, la̍ŋ la̍ yɔ̍nūŋ ni̍ māā A̍mɔ̍lu̍a̍i̍tīi̍ya̍, a̍ Ke̍na̍na̍i̍tīi̍ya̍, a̍ Hi̍ta̍i̍tīi̍ya̍, a̍ Pɛ̍lu̍i̍sa̍i̍tīi̍ya̍, a̍ Hi̍va̍i̍tīi̍ya̍, a̍ Chɛ̄bu̍sa̍i̍tīi̍ya̍, nda̍ kpo̍u̍ I̍ cho̍ nda̍ sōlī nya̍ lāchī. 12Ndu̍yɛ̍, tē lā fūūlu̍u̍ o̍ lɛ̄ŋndē ya̍ I̍ cho̍ nya̍ kīo̍o̍ le̍ŋ ni᷄ŋ pɛ̍, lā mānda̍ŋ a̍ wānāā nya̍ chō kōmāl lo̍ŋ nda̍. Lā yi̍ī kpe̍ma̍ o̍ kpe̍ma̍ a̍ nda̍ le̍. Tē lā kɔ᷄ yi̍ī kpe̍ma̍ o̍ kpe̍ma̍ a̍ nda̍ pɛ̍, mɛ̄ɛ̍ nya̍ pi̍la̍ lā yēŋnu̍ŋ ya̍ŋɔ̄ɔ̄lē wɔ̄ɔ̍ŋnde̍ŋ. 13Le̍la̍ŋ tē lā kūɛ̄ pɛ̍, lā pēsi̍ pe̍si̍ ma̍āŋndā ndāla̍ŋ, ndu̍yɛ̍ mī lā yīmi̍ yi̍mi̍ sūŋgbu̍ma̍ nda̍ sōōlūū mɛ̍lɛ̄ka̍ā ndāa̍ o̍ ma̍ŋ nda̍ŋ. O̍ ko̍ŋ kɔ̍ɔ̍lī, mī lā tɛ̄ɛ̄mbu̍u̍ nyɛ̄lā nda̍ sīmi̍ vēla̍ŋ A̍si̍ɛ̍lūā, mɛ̄lɛ̄ka̍ā ndāa̍ la̍ŋ.

14“Lā so̍o̍lūū mɛ̄lɛ̄ka̍ o̍ mɛ̄lɛ̄ka̍ chēle̍ŋ o̍ ya̍ kɔ̍ɔ̍lī le̍, kāni̍ fo̍ndōle̍, ya̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ pāŋa̍lɛ̍i̍yo̍ ya̍ I̍ cho̍ ni̍. 15Wānāā nya̍ chō kōmāl o̍ lɛ̄ŋndē nya̍ chō kɔ̄la̍ŋ nde̍ŋ ni᷄ŋ nda̍, lā yi̍ī kpe̍ma̍ o̍ kpe̍ma̍ a̍ nda̍ le̍, kāni̍ fo̍ndōle̍, tē lā yīi̍ kpe̍ma̍a̍ a̍ nda̍ pɛ̍, bōōndi̍i̍ nda̍ wā ni̍ŋ mɛ̍lɛ̄ka̍ā ndāa̍ sōōlūūwo̍, ndu̍yɛ̍ mā sōlī sa̍lāla̍ŋ o̍ nda̍ lo̍ ve̍, ā chō nya̍ vēēlū, mī lā kūɛ̄. O̍ ko̍ŋ, mī lā tōl nda̍ kɔ̄ɔ̄lī, nya̍ bɛ̍ɛ̍ mī lā kɔ̍ di̍ō nyɛ̄ dīāā lāsa̍lā kōŋ. 16Tē lā yīi̍ kpe̍ma̍a̍ a̍ nda̍ pɛ̍, lā chō chūāūwāā ndāā la̍a̍ndūa̍a̍ pūwɔ̄ɔ̍, le̍ mā cha᷄l nda̍ pūa̍a̍ nyāa̍ o̍ nɔ̄la̍ŋ ni᷄ŋ. O̍ ko̍ŋ, mī chūāūwāā ndāā la̍a̍ndūāā kāŋ ā tōsa̍ mī pūa̍a̍ nyāa̍ bɛ̍ɛ̍ a̍ kɛ̍ɛ̍ wāa̍ sa̍kpō a̍ ya̍, ma̍ mūli᷄ŋ nyɛ᷅m chēle̍ŋndo̍ŋ sōōlūūwo̍ māā mɛ̄lɛ̄ka̍ā nda̍.

17“Ndu̍yɛ̍, lā to̍o̍sīāā nyɛ̄ o̍ nyɛ̄ a̍ īchīli̍ŋ mī lā sōōlu̍u̍ ndu̍ māā mɛ̄lɛ̄ka̍ nyā le̍.

18“Ndu̍yɛ̍, lā nɔ̄ mī lā bīī bɔ̄ŋa᷅ŋ nya̍ dīā be̍e̍dīi̍ nda̍ do̍ū yi̍i̍sīi̍ le̍ wo̍. Īwɔ̄sī o̍ īwɔ̄sī o̍ pāŋgi̍i̍ A̍bīve̍ ni᷄ŋ, lā nɔ̄ mī lā dē bēe̍dīi̍ nda̍ do̍ū yi̍i̍sīi̍ le̍ wo̍ le̍ pālɛ̍i̍ ī ŋɔ᷄mmɛ̍ū, mɛ̄ɛ̍ ya̍ I̍ di̍mu̍l nya̍ yɛ̍, kāni̍ fo̍ndōle̍, o̍ pāŋgi̍i̍ ke̍ŋ ni᷄ŋ nya̍ fūla̍ o̍ lɛ̄ŋndē I̍chi̍pīle̍ŋ ni᷄ŋ ni̍.

19“Ndu̍yɛ̍, pūa̍a̍ nyāa̍ tāsi̍a̍a̍ nya̍ vīālū wa̍ ki̍nɛ̍i̍, ā nɔ̄ mā wa᷄ ā yɔ̄ŋa᷄ŋ o̍ ya̍ Mɛ̄lɛ̄ka̍ lo̍. Ndu̍yɛ̍, chɔ̄lūāā nyāa̍ bɛ̍ɛ̍, tē ā kōm pɛ̍, ā pīāāndūāā tāsi̍a̍a̍ ka̍ŋ ki̍nɛ̍i̍, ā nɔ̄ mā wa᷄ le̍ ya̍ Mɛ̄lɛ̄ka̍. 20Kɛ̍ sōfɛ̍lɔ̍ɔ̍ ndu̍ ndu̍, lā bāŋā ndu̍ a̍ sāā fɔ̍ŋndɔ̍ɔ̍. Kɛ̍ tē lā ve᷄ ndu̍ bāŋā le̍, lā yēm ndu̍ kɛ̄se̍i̍. Pūa̍a̍ nyāa̍ tāsi̍a̍a̍ bɛ̍ɛ̍, lā nɔ̄ mī lā bāŋa̍ nda̍.

“Ndu̍yɛ̍ wānā o̍ wānā a̍ nɔ̍ mā hīŋ ya̍ Mɛ̄lɛ̄ka̍ lāchī bālā fo̍ndō le̍, ā nɔ̄ mā hīŋ a̍ kīo̍o̍.

21“Lā nɔ̄ pālɛ̍i̍ ī ŋɔ᷄mpu᷅m o̍ lɔ̍ɔ̍ bɛ̄ŋgu̍ le̍ wa̍lta̍ nyāla̍ŋ tōsāa̍, kɛ̍ o̍ pāa̍le̍ ŋɔ᷄mmɛ̍ūle̍ŋ chōo̍ le̍ŋ nde̍ŋ, lā nɔ̍ mī lā tōsa̍ wa̍li̍ o̍ wa̍li̍ le̍. Ō wa᷄ a̍ te̍le̍ŋ lāwāīyīāā, ō wa̍ a̍ te̍le̍ŋ ku̍a̍u̍wāa̍ ŋ̄chīɛ̄ɛ̄, lā nɔ̄ mī lā pɛ̄ŋgi̍ pāa̍le̍ le̍ŋ.

22“Īwɔ̄sī o̍ īwɔ̄sī, tē lā kāndu̍ wi̍tīi̍ŋ nyāŋ tāso̍ŋ kōūwɔ̄ɔ̍ pɛ̍, lā nɔ̄ mī lā bīī bɔ̄ŋa᷅ŋ kūāūwāa̍ ŋ̄chīɔ̍ɔ̍. Ndu̍yɛ̍, tē lā chīi̍ vɛ̄lɛ̄ tɔ̄lɔ̄ɔ̄lā nyāla̍ hēēlū chi̍e̍e̍ pɛ̍, lā nɔ̄ mī lā bīi̍ vɛ̄lɛ̄ bɔ̄ŋa᷅ŋ chēle̍ŋ o̍ wɔ̄sīo̍o̍ mɛ̄ɛ̄lu̍la̍ŋ.

23“Ndu̍yɛ̍, o̍ īwɔ̄sī o̍ īwɔ̄sī ni᷄ŋ, pūa̍a̍ ki̍nɛ̍i̍, ā nɔ̄ mā hīŋ le̍ yāa̍ ya̍ Mɛ̍lɛ̄ka̍ Ya̍a̍wɛ̄ɛ̄ lāchī, Mɛ̄lɛ̄ka̍ I̍sɔ̄lūɛ̍i̍ya̍, le̍ ya̍ sōōlūūwo̍. 24Ya̍a̍mɔ̍ɔ̍wa̍a̍ nyāa̍ cho̍ nya̍ lāchī wa̍ ki̍nɛ̍i̍, I̍ cho̍ nda̍ tōūwɔ̄ɔ̄ mī I̍ so̍li̍ nda̍ nya̍ lāchī, ndu̍yɛ̍ mī I̍ chɔ̍ɔ̍lu̍ lɛ̄ŋndē nyāle̍ŋ. Bōōndi̍i̍ nya̍ chō o̍ bɔ̄ŋa᷅ŋndā nya̍ nɔ̄ la᷅ŋ mī lā bīī lēyāa̍ o̍ wɔ̄sīo̍o̍ ni᷄ŋ nda̍ŋ chōo̍ ve̍, ā yɔ᷄ŋ bɛ̍ɛ̍ mī ya̍a̍mɔ̍ɔ̍wa̍ hu᷄ŋ de᷅l lɛ̄ŋndē nyāle̍ŋ chōo̍ a̍ sɔ̍ŋgɔ̄ɔ̍, ā nɔ̍lā mā yēm nya̍ mā pōōnda̍ nya̍ lɛ̄ŋndē nyāle̍ŋ o̍ bā le̍.

25“Tē lā dīī chɔ̄lōo̍ pɛ̍, mī lā wa᷄ kōo̍ma̍ ndūa̍ŋ sa̍lāa̍ sōlīo̍o̍ o̍ ya̍ Mɛ̄lɛ̄ka̍ lo̍ pɛ̍, lā mɔ̍sɔ̄ŋā ma̍ŋ sa̍lāa̍ sōlī a̍ bēe̍dīi̍ nda̍ dūāū yi̍i̍sīi̍yo̍ lēni᷄ŋ ndo̍ le̍. Ndu̍yɛ̍ tē lā bīī bɔ̄ŋa᷅ŋndo̍ a̍ hīōūwɔ̄ɔ̄ chōo̍ wo̍ o̍kɔ̄ɔ̄ pɛ̍, sa̍lā nya̍ chō sōlī pāa̍le̍ le̍ŋ ndo̍, ō nɔ̍ mbō lɔ᷄l ku̍ya̍ le̍.

26“O̍ ko̍ŋ kɔ̄ɔ̄lī, īwɔ̄sī o̍ īwɔ̄sī, tɔ̄lɔ̄ɔ̄ tāse̍ nya̍ chō kōūwɔ̄ɔ̄ ɔ̄ɔ̄ kēndī o̍ chīɔ̄ɔ̄ŋ nyāa̍ŋ ni᷄ŋ ndo̍, lā nɔ̄ mī lā hīŋ a̍ ndu̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ, Mɛ̄lɛ̄ka̍ nyāa̍.

“Lā di̍ī chūīŋ lēndōo̍ ɔ̄ɔ̄ sāā le̍ndōo̍ mī lā yāu̍ ndu̍ a̍ mɛ̄ɛ̄ma̍ kālā ndɔ̍ wa̍ŋ te̍.”

27O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl Mūu̍sē āā, “Po̍o̍nyi̍a̍a̍ di̍ōmnda̍ŋ nda᷅ŋ ki̍nɛ̍i̍, kāni̍ fo̍ndōle̍, nūm ni̍, wāŋnda̍ I̍sɔ̄lūɛ̄ī ni̍, a̍ dīōmnda̍ŋ nda᷅ŋ ya̍ I̍ cho̍ kpe̍ma̍a̍ ho̍ō yīī a̍ nya̍ ni̍.” 28Mi̍ Mūu̍sē chi̍ī pālɛ̍i̍ be̍le̍-hi̍ɔ̍ɔ̍lu̍ a̍ nyūmnda̍ŋ be̍le̍-hi̍ɔ̍ɔ̍lu̍ o̍ pēmbīī kēŋ chōo̍, nda̍ Mɛ̄lɛ̄ka̍ Ya̍a̍wɛ̄ɛ̄ la̍tu̍lu̍, ō di᷅ nyɛ̍ dīāā le̍, ō ko᷅l te̍. Dīōmndā Mɛ̄lɛ̄ka̍ dīmi̍ a̍ kpe̍ma̍ o̍ yi̍i̍ a̍ wāŋnda̍ I̍sɔ̄lūɛ̄ī yo̍ o̍kɔ̄ɔ̄ la̍ŋ, mi̍ Mūu̍sē po̍o̍nyīāā la̍ŋ kpo̍u̍ o̍ pōūtā yɛ̍ndɛ̍la̍ŋ chōo̍. Dīōmndā la̍ŋ la̍ cho̍ yɛ̄ sāwāla̍ tɔ̍la̍ŋ ni̍.

Mūu̍sē to᷅l Pēmbīī Sa̍a̍nāīve̍

29O̍ ko̍ŋ kɔ̍ɔ̍lī, mi̍ Mūu̍sē tu̍āl Pēmbīī Sa̍a̍nāīve̍ a̍ sāwāla̍ tɔ̍la̍ Mɛ̄lɛ̄ka̍ ke̍ ndu̍ o̍ pōūtā yɛ̍ndɛ̍la̍ tīɔ̍ɔ̍ŋ nda̍ŋ chōo̍ la̍ŋ o̍ bā. Hɔ̄lla̍ ā wa̍ ndu̍ dīōndɔ̄ɔ̍ ŋɛ̍lɛ̄ŋgi̍ ŋɛ̍lɛ̄ŋgi̍ bɛ̍ndū, kāni̍ fo̍ndōle̍, ō wa᷄ sūūki̍āŋndo̍ a̍ Mɛ̄lɛ̄ka̍, kɛ̍ ō sīna̍ māā le̍nde̍ le̍ hɔ̄lla̍ ā wa᷄ ndu̍ le̍. 30Mɛ̄ɛ̍ E̍lɔ̄ŋ nda̍ wāŋnda̍ I̍sɔ̄lūɛ̄ī a̍ che᷅ Mūu̍sē, mi̍ sīōōŋnde̍ bīī nda̍ le̍ ndu̍ sɔ̄ɔ̄ŋgūūwo̍ īkɛ̄i̍, kāni̍ fo̍ndōle̍, hɔ̄lla̍ ā wa᷄ ndu̍ dīōndɔ̄ɔ̍ ŋɛ̍lɛ̄ŋgi̍ ŋɛ̍lɛ̄ŋgi̍ bɛ̍ndū. 31Kɛ̍ mi̍ Mūu̍sē ve̍e̍lu̍ nda̍. Mi̍ E̍lɔ̄ŋ nda̍ wānāā bɛ̄ndūa̍a̍ I̍sɔ̄lūɛ̍i̍ya̍ kpo̍u̍ a̍ ku̍ā nāa̍ Mūu̍sē chu̍a̍, ndu̍yɛ̍ mi̍ Mūu̍sē su̍a̍ā nāa̍ nda̍ chūā. 32O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī ko̍ōndi̍āŋ kpo̍u̍ ma̍ hūŋ nāa̍ Mūu̍sē chu̍a̍. Mɛ̄ɛ̍ nda̍ hīŋ, mi̍ Mūu̍sē di̍mūl nda̍ nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ o̍ Pēmbīī Sa̍a̍nāīve̍ chōo̍ le̍ mā tōsa̍. 33Mɛ̄ɛ̍ Mūu̍sē chi̍i̍ sūɛ̍i̍ nāa̍ nda̍ chūā, mbo̍ hāndu᷄ŋ ko̍lā wa̍a̍ŋga̍a̍ wo̍ o̍ hɔ̄l, le̍ mbō kūmbū hɔ̄lla̍. 34Kɛ̍ tē Mūu̍sē ndu̍ o̍o̍ lu̍ɛ̍ī o̍ tɛ̍ndīi̍ chɔ᷅m māā Mɛ̄lɛ̄ka̍ chō a̍ nya̍ lātūlu̍ wo̍ ni᷄ŋ pɛ̍, le̍ sūūki̍āŋndo̍ nda̍ Mɛ̄lɛ̄ka̍, ō fāŋa̍ŋ kōlā wa̍a̍ŋga̍a̍ ko̍ŋ o̍ hɔ̄l ha̍a̍a̍ mɛ̄ɛ̍ mbō fūla̍. Tē ō chīi̍ sūūki̍āŋndo̍ a̍ Mɛ̄lɛ̄ka̍ pɛ̍, ō fūla̍ ō kɔ̍ do̍o̍nu᷄ŋ wa᷅ŋnda̍ ko̍na̍ nyɛ̄ o̍ nyɛ̄ Mɛ̄lɛ̄ka̍ dīmu̍l nda̍ le̍ tōsāa̍. 35Kɛ̍ wāŋnda̍ nɔ̍lā mā tōfa̍ ndu̍ hɔ̄lla̍ le̍, a̍ īŋɛ̄lɛ̄ŋgi̍ ŋɛ̍lɛ̄ŋgi̍i̍ hɔ̄lla̍ ā wā ndu̍ ve̍. O̍ ko̍ŋ, mbō mīŋgi̍ŋ kōlā wa̍a̍ŋga̍a̍ ko̍ŋ hāndɔ᷄ŋ o̍ hɔ̄l, ha̍a̍a̍ mɛ̄ɛ̍ mbō lūɛ̄ī vɛ̄lɛ̄ o̍ tɛ̍ndīi̍yo̍ ni᷄ŋ le̍ sūūki̍āŋndo̍ nda̍ Mɛ̄lɛ̄ka̍.

Currently Selected:

Ɛ̍sɔ̍dɔ̍ɔ̄ 34: YM

Highlight

Copy