Ɛ̍sɔ̍dɔ̍ɔ̄ 32

A̍ nāū īko̍o̍līi̍ nda̍ tūūla̍ le̍ ndu̍ sōōlūūwo̍ wo̍ o̍kɔ̄ɔ̄

(Dītɔ̍nɔ̍mi̍ī 9:6-29)

1O̍ ko̍ŋ kɔ̍ɔ̍lī, mɛ̄ɛ̍ wāŋnda̍ I̍sɔ̄lūɛ̄ī a̍ che᷅ māā Mūu̍sē o̍ cho̍ vīōūwɔ̄ɔ̍ o̍ pēmbēi̍ chōo̍, ma̍ kōōndi̍āŋ kpo̍u̍ ma̍ hūŋ nāa̍ E̍lɔ̄ŋ chu̍a̍, ma̍ hu᷄ŋ bɔ̍ŋā ndu̍ si̍lɔ̍, ma̍ di̍mūl ndu̍ āā, “E̍lɔ̄ŋ, fi̍nyāa̍ ho̍ō, ndu̍ yɔ̍nūŋ māā Mūu̍sē ni̍, o̍ so̍li̍ na̍a̍ I̍chi̍pī mbo̍ hūŋ a̍ na̍a̍ na̍nu᷄ŋ ndo̍, ŋ̄ si̍nā nyɛ̍ yɔ̍nu̍ŋ a̍ ndu̍ wo̍ le̍, le̍la̍ŋ to̍o̍si̍a̍l na̍a̍ mɛ̄lɛ̄ka̍a̍ mbō si᷄m na̍a̍ lāchī le̍ mbō kūɛ̄ a̍ na̍a̍.”

2Mi̍ E̍lɔ̄ŋ lo᷅ o̍ ko̍ŋ mbo̍ dīmūl nda̍ āā, “Lā kɔ̍ mī lā kɔ̍ so̍o̍lūū kēla᷄ŋ ŋ̄ko̍o̍līi̍yo̍ŋ lāāndāā nyāa̍, a̍ pūa̍a̍ nyāa̍, a̍ chūāūwāā nyāā la̍a̍ndūa̍a̍ o̍ lānī mī lā hīŋ a̍ mu̍ŋ.” 3O̍ ko̍ŋ, mi̍ wānā o̍ wānā kɔ̍ so̍lī kēla᷄ŋ wa̍ nda̍ o̍ lānī wo̍ŋ ma̍ hūŋ a̍ mu̍ŋ nāa̍ ndu̍ chu̍a̍. 4Mi̍ E̍lɔ̄ŋ bi̍ī kēlāŋ mu̍ŋ nda̍ o̍ lābā mbo̍ tēēŋgīāā mu̍ŋ mbo̍ chūāū nāū fɔ̍ŋndɔ̍ɔ̍ a̍ mu̍ŋ, mbo̍ bɛ̄ɛ̄ndīāā ndu̍ nyɛ̄ kɛ̄ndɛ̄ kɛ̍ndɛ̄ a̍ wōlɔ̄ɔ̄lā wa̍lta̍ nda̍ bɛ̄ɛ̄ndīāā nyɛ᷅m wāā le̍ndo̍ŋ nda̍ŋ.

Mɛ̄ɛ̍ wāŋnda̍ chē nyɔ̄ɔ̍ ho̍ō, ma̍ dīmī āā, “Wāŋnda̍ I̍sɔ̄lūɛ̄ī, mɛ̄lɛ̄ka̍ na̍a̍ cho̍ ho̍ō ni̍, mɛ̄lɛ̄ka̍ so̍li̍ na̍a̍ I̍chi̍pī wo̍.”

5Mɛ̄ɛ̍ E̍lɔ̄ŋ che᷅ nyɛ̍ yɔ̍nu̍ŋ ndo̍, mbo̍ tāŋgūl ma̍āŋndo̍ nāū īko̍o̍līi̍ o̍ to̍o̍si̍a̍a̍ ko̍ŋ ndo̍ lāchī. Mbo̍ yōndā āā, “Pāa̍le̍ sīɔ̄dīi̍le̍ŋ, ŋ̄ nɔ̄ mī ŋ̄ bīī bɔ̄ŋa᷅ŋ bɛ̄ndōo̍ le̍ Mɛ̄lɛ̄ka̍ Ya̍a̍wɛ̄ɛ̄ bɛ̄ɛ̄le̍ŋ kīo̍o̍.” 6Mɛ̄ɛ̍ pāa̍le̍ŋ lē sɛ̄ dīi̍mā ndɔ̄ɔ̍ pu̍u̍ŋ, mi̍ wāŋnda̍ hūŋ a̍ chɔ̄lūa̍a̍ ma̍ sōlī nda̍ sa̍lālā lūāmāāla̍ŋ, a̍ sa̍lālā kɔ̄l nyūlūla̍ŋ. Mɛ̄ɛ̍ nda̍ chīi̍ sa̍lāla̍ŋ sōlī, ma̍ tōsā bɔ̄ŋa᷅ŋ dīāā nyɛ̄ dīāā bɛ̄ndōo̍. Mɛ̄ɛ̍ nda̍ dē nyɛ̄ dīa̍a̍ te̍i̍, ma̍ kōl mūɛ̄īmā kālā ka̍la᷄ŋ, ma̍ sa̍āŋ sɔ̍ɔ̍ŋ lāsi̍ɔ̍mbo̍ŋ tōsāa̍.

7O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl Mūu̍sē āā, “Ke̍le̍ŋa̍ Pēmbēi̍ to̍lɔ̄ɔ̄ chɔ̍ chɔ̍ mā mi̍i̍ŋgu̍. Wānāā nūm a̍ ŋ̄ si᷄m ha̍ā lāchī ma̍ fūlā I̍chi̍pī wa̍, ā tōsa̍ yɔ̄ŋ wɔ̄ɔ̍ŋndo̍, ma̍ sīmnu᷄ŋ wa̍nāā dɛ̍nɛ̍ wɔ̍ɔ̍ŋ ya̍ Mɛ̍lɛ̄ka̍ o̍ hɔ̄l. 8Nyɛ̄ ya̍ I̍ di̍mu̍l nda̍ wo̍, ā kēle̍ŋa̍ bɔ̄ɔ̍ fa̍ŋa᷄ŋndo̍ lēchōo̍. Ā tēēŋgi̍a̍a̍ ko̍o̍līi̍ye̍, ma̍ tūūlā nāūwo̍ ma̍ sōōlūū ndu̍, ndu̍yɛ̍ ma̍ sōlī sa̍lāla̍ŋ o̍ ndu̍ lo̍. O̍ ko̍ŋ kɔ̍ɔ̍lī, ma̍ dīmī āā, ‘Wāŋnda̍ I̍sɔ̄lūɛ̄ī, mɛ̄lɛ̄ka̍ na̍a̍ so̍li̍ na̍a̍ o̍ chɛ̄le̍ŋ ni᷄ŋ I̍chi̍pī wo̍, ndu̍ cho̍ ho̍ō ni̍.’ 9I̍ che᷅ ni᷅ŋ kpe̍nde̍ke̍le̍ māā wāŋnda̍ ha̍ā ā chō wānāā bōllīī kālā. 10Le̍la̍ŋ, lu̍ɛ̍ī na̍a̍ tɛ̄ɛ̄ŋ na̍a̍ nda̍ le̍. I̍ dɔ̍ɔ̍nu᷄ŋ tu̍mbe̍ a̍ nda̍ o̍ ka̍lā ka̍lā, ndu̍yɛ̍ I̍ cho̍ nda̍ dīū kpo̍u̍, ō pīlɛ̍ bɛ̍ɛ̍ I̍ cho̍ mɛ̍ī le̍. Kɛ̍ nūm nūm, I̍ cho̍ tōsā mī wānāa̍ fu̍lā ni̍ŋ o̍ yu̍ŋgu̍ nūmndo̍ chōo̍ wa̍ mā hu᷄ŋ si̍mnu᷄ŋ lɛ᷅ŋndē bɛ̄ndū bɛ̍ndū.”

11Kɛ̍ mi̍ Mūu̍sē nyɔ̍ɔ̍lū Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ ndɔ̄ɔ̍ mbo̍ dīmī āā, “O̍o̍ Mɛ̄lɛ̄ka̍ Ya̍a̍wɛ̄ɛ̄, yāndi̍i̍ du̍a̍u̍nu᷄ŋ tu̍mbe̍ nu̍a̍ā ō ka̍lā ka̍lā a̍ wāŋnda̍ ha̍ā le̍, fo̍ndōle̍ wānāā nūmnda̍ nda̍ chō ni̍. Nu᷄m so̍li̍ nda̍ o̍ chɛ̄le̍ŋ ni᷄ŋ I̍chi̍pī a̍ kpāāyā nu̍m bɛ̄ndōo̍ ni̍, ma̍ hūŋ a̍ nda̍. 12Tē ā to̍sa̍ le̍nde̍ pɛ̍, wāŋnda̍ I̍chi̍pī a̍ cho̍ dīmī māā sōlī ŋ̄ sōli̍ wāŋnda̍ I̍sɔ̄lūɛ̄ī I̍chi̍pī ma̍ hūŋ a̍ nda̍ wo̍, māā kɛ̄ɛ̄sīa̍a̍ ŋ̄ kɛ̄ɛ̄si̍a̍a̍ ni̍ le̍ nda̍ hūnɔ̄ɔ̍ dīūwo̍ o̍ pēmbo᷄ŋ mu᷅ŋ tɛ̄ɛ̄ŋ, ndu̍yɛ̍, mā chi̍i̍ a̍ nda̍ kpo̍u̍, nyɛ̄ kōŋ ŋ̄ hīŋ a̍ nda̍ ni̍. Le̍la̍ŋ yāndi̍i̍ Mɛ̄lɛ̄ka̍, pɔ̍lu̍l kɔ᷅llo̍, tu̍sī nda̍ nyɛ̄ pālāa̍ chōo̍ mɛ̄ɛ̍ ŋ̄ tūu̍ yɛ̍ le̍. 13Lo̍o̍nu̍ŋ a̍ bu̍ɛ̍i̍yāā nūmnda̍, nda̍ yɔ̍nūŋ māā E̍bīlāha᷅m, a̍ Āa̍se̍, a̍ Che̍kɔ̍pū ni̍. Ma̍ chūēl nda̍ būŋgɛ̄i̍ ma̍ mēna᷄ŋ, māā ā chō tōsā mī wānāa̍ fu̍la̍ o̍ pūlālē ndāle̍ŋ chōo̍ wa̍ ā kūi̍, mā sīmnu᷄ŋ sɛ̍lɛ̍ bɛ̍ndōo̍ mɛ̄ɛ̍ lōo̍ŋ ŋ̄ chō nu̍a̍ā o̍ ha̍la̍ yɛ̍, ndu̍yɛ̍ māā lɛ̄ŋndē ŋ̄ chūe̍l nda̍ būŋgɛ̄i̍ le̍ŋ, māā ā chō wānāa̍ fu̍la̍ o̍ pūlālē ndāle̍ŋ chōo̍ wa̍ le̍ŋ kē kpo̍u̍, mī lē wa᷄ nyɛ̄m nda̍ ŋ̄kɛ᷅ le̍ fɛ̍ɛ̍ŋ a̍ fɛ̍ɛ̍ŋ.” 14O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ma̍ŋgālā kɔ̄llo̍, ō tūsi̍ lɛ̍ wāŋnda̍ I̍sɔ̄lūɛ̄ī nyɛ̄ pālāā ndu̍ o̍o̍ tu̍u̍ le̍ nda̍ tūsīo̍o̍ chōo̍ wo̍ chōo̍ le̍.

15O̍ ko̍ŋ kɔ̍ɔ̍lī, mi̍ Mūu̍sē tu̍āl pēmbēi̍. Pōūtā yɛ̍ndɛ̍la̍ ti̍ɔ̍ɔ̍ŋndā pōōnyīa̍a̍ wa᷄ le̍chōo̍, lāchī a̍ o̍ kɔ̄ɔ̍ la̍ŋ, lā wa̍ ndu̍ o̍ bā. 16Ndu̍yɛ̍, pōūtā yɛ̍ndɛ̍la̍ ti̍ɔ̍ɔ̍ŋnda̍ŋ nda᷅ŋ, Mɛ̄lɛ̄ka̍ pi̍la̍ to̍o̍si̍a̍a̍ la̍ŋ ni̍, pōōnyīa̍a̍ wa̍ bɛ̍ɛ̍ le̍cho̍o̍ wo̍, Mɛ̄lɛ̄ka̍ pīla̍ po̍o̍nyi̍a̍a̍ ni̍.

17Mɛ̄ɛ̍ Chɔ̄ɔ̍sūāā, o̍ tu̍e̍ī bɔ̄ɔ̄lūū bɛ̄ndōo̍ o̍ dɔ̍ɔ̍ŋgɔ̍ɔ̍ ni᷄ŋ, mbo̍ dīmūl Mūu̍sē āā, “I̍ cho̍ bɔ̄ɔ̄lūū bɛ̄ndōo̍ tūēīyɔ̄ɔ̍ o̍ dɔ̍ɔ̍ŋgɔ̍ɔ̍ ni᷄ŋ, māā bɔ̄ɔ̄lūū chɔ̄ū.”

18Kɛ̍ mi̍ Mūu̍sē mu̍lūl ndu̍ āā, “Bɔ̄ɔ̄lūū kōŋ, ō cho̍ māā bɔ̍ɔ̍lūū kɔ̄l kɛ̄ndɛ̄ mɛ̄ɛ̍ wāŋnda̍ yām nu̍a̍ā chɔ̄ūwo̍ mā wa̍ kɔ̄l kɛ̄ndɛ̄ kōŋ yɛ̍ le̍. Ndu̍yɛ̍, ō cho̍ vɛ̄lɛ̄ bɔ̄ɔ̄lūū ya̍a̍mɔ̍ɔ̍wa̍ ā yām wa᷅ŋnda̍, mī wānāā kāŋ ā wa᷄ bɔ̄ɔ̄lūū kōŋ te̍. Bɔ̄ɔ̄lūū ŋ̄chōndo̍o̍ ya̍ I̍ cho̍ tūēīnɔ᷄ŋndo̍ o̍ lānī ni̍.”

19O̍ ko̍ŋ kɔ̍ɔ̍lī, mɛ̄ɛ̍ Mūu̍sē sɔ̍ɔ̍ŋgu̍u̍ o̍ dɔ̍ɔ̍ŋgɔ̍ɔ̍ īkɛ̄i̍, mbo̍ chā nāū īko̍o̍līi̍ nda̍ tūūla̍ ko̍ŋ ndo̍, ndu̍yɛ̍, mbo̍ chā wāŋnda̍ ā chō nāū kōŋ bālɔ̄ɔ̍ a̍ yōla̍ŋ, mi̍ kɔ̄l ndɔ̄ɔ̍ tāmbū. O̍ ko̍ŋ, mbo̍ māl pōūtā yɛ̍ndɛ̍la̍ ti̍ɔ̍ɔ̍ŋnda̍ wa̍ ndu̍ o̍ bā la̍ŋ, o̍ pēmbēi̍ bɛ̄ŋgu̍ lo̍ŋ, a̍ kɔ̄l tūū kōŋ, mi̍ lā pēsī. 20O̍ ko̍ŋ kɔ̍ɔ̍lī, mbo̍ chūā nāū nda̍ tūūla̍ ko̍ŋ ndo̍, mbo̍ māl ndu̍ o̍ yīŋ, mbo̍ ŋūā. Ndu̍yɛ̍ mbo̍ chūī ndu̍ māā pɔ̄u̍, mbo̍ dūāū pɔ̄u̍ ko̍ŋ o̍ mɛ̄ŋnda̍ŋ ni̍ŋ, ndu̍yɛ̍ mbo̍ tōsā mi̍ wāŋnda̍ I̍sɔ̄lūɛ̄ī a̍ ko᷅l mɛ̄ŋmā māŋ. 21Mi̍ Mūu̍sē lo᷅ o̍ ko̍ŋ mbō nyūnā E̍lɔ̄ŋ āā, “Yɛ̄ɛ̍nɛ̍ kpe̍e̍kpe̍i̍ wāŋnda̍ ha̍ā ā yɔ᷄ŋ yɛ̍ nu̍m, ma̍ tōsā mi̍ wāŋnda̍ ha̍ā ā tōsā dɛ̍nɛ̍ wɔ̄ɔ̍ŋ wāā nu̍a̍ā?”

22Mi̍ E̍lɔ̄ŋ mu̍lūl ndu̍ āā, “Du̍a̍u̍nu᷄ŋ tu̍mbe̍ a̍ ya̍ le̍ māsānɔ̄ɔ̍, nūm pīla̍ bɛ̍ɛ̍ ā sīnā mɛ̄ɛ̍ wāŋnda̍ ha̍ā ā kāāla̍ dɛ̍nɛ̍ wɔ̄ɔ̍ŋndo̍ yɛ̍. 23Kōmāllo̍ nda̍ kōma̍l la̍ ni̍ ma̍ dīmūl la̍ āā, ‘To̍o̍si̍a̍l na̍a̍ mɛ̄lɛ̄ka̍a̍ mbō si᷄m na̍a̍ lāchī, mbō kūɛ̄ a̍ na̍a̍, kāni̍ fo̍ndōle̍, fi̍nyā so̍li̍ na̍a̍ ho̍ō I̍chi̍pī mbo̍ hūŋ a̍ na̍a̍ wo̍, ndu̍ yɔ̍nūŋ māā Mūu̍sē ni̍, ŋ̄ si̍nā nyɛ̍ yɔ̍nu̍ŋ a̍ ndu̍ wo̍ le̍.’ 24Mɛ̄ɛ̍ nda̍ dīmu̍l la̍ le̍nde̍, ya̍ bɛ̍ɛ̍ mi̍ I̍ di̍mūl nda̍ māā wānā o̍ wānā kɔ̍ hu᷅ŋ ā kēla̍ŋ ndɔ̄ɔ̍ŋ ŋ̄ko̍o̍līi̍yo̍ŋ. Mɛ̄ɛ̍ nda̍ hīŋ a̍ mu̍ŋ, mi̍ wōū mu̍ŋ o̍ yīŋ. Dīmīo̍o̍ nu̍a̍ā mi̍ wo̍ū mu̍ŋ o̍ yīŋ, mi̍ nāūwo̍ ho̍ō fūlā.”

25Mi̍ Mūu̍sē o̍ cha᷅ māā wāŋnda̍ ha̍ā, ā cho̍ lɛ̍ o̍ bā wānā o̍ wānā bɛ̍ŋgu̍ le̍, ndu̍yɛ̍ māā E̍lɔ̄ŋ ku̍u̍na̍ nda̍ le̍, ndu̍yɛ̍, mbo̍ chā māā ā sīīŋgu̍u̍ nda̍ pi̍la̍ nyɛ̄ māmāā ya̍a̍mɔ̍ɔ̍wa̍a̍ ndāa̍ o̍ hɔ̄l. 26O̍ ko̍ŋ, mi̍ Mūu̍sē si᷅m o̍ dīō kpākīo̍o̍ le̍ lūɛ̄īyɔ̄ɔ̍ o̍ dɔ̍ɔ̍ŋgɔ̍ɔ̍ ni᷄ŋ mbo̍ dīmī chōo̍ cho̍o̍ kpe̍le̍ŋ āā, “Wānā o̍ wānā cho̍ kūmbu̍ Mɛ̄lɛ̄ka̍ Ya̍a̍wɛ̄ɛ̄ wo̍, lā hu᷄ŋ nāa̍ ya̍ chu̍a̍.” O̍ ko̍ŋ, mi̍ wānāa̍ fu̍la̍ o̍ yu̍ŋgu̍ Līva̍īya̍ chōo̍ wa̍ ā hūŋ kpo̍u̍ nāa̍ Mūu̍sē chu̍a̍. 27O̍ ko̍ŋ, mi̍ Mūu̍sē di̍mūl yu̍ŋgu̍ Līva̍īyo̍ āā, “Nyɛ̄ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ ō dīmi̍ wo̍, ndu̍ cho̍ ho̍ō ni̍. Ō dīmi̍ māā wānā o̍ wānā lā sāāyi̍a̍ŋ mɔ̍ɔ̄ŋ nya̍ŋ fāŋndo̍ŋ mī lā kāndu̍ pɔ̄mbūāā nyāa̍, a̍ bɛ̄ndāā nyāa̍, a̍ chāa̍ŋāā nyāa̍, a̍ wānāā nya̍ chīɛ̄ɛ̄li̍āŋnda̍ dīūwo̍, kāndɔ᷄ŋndo̍ o̍ dɔ̍ɔ̍ŋgɔ̍ɔ̍ kpēŋgēi̍ ī pīlɛ̍i̍, mbō fūūlu̍u̍ o̍ kpēŋgēi̍ ī pīlɛ̍i̍ di̍.” 28Ndu̍yɛ̍ mi̍ Līva̍īya̍ tōsā mɛ̄ɛ̍ Mūu̍sē di̍mu̍l nda̍ yɛ̍. Pāa̍le̍ le̍ŋ, ma̍ dīī wāŋnda̍ wāa̍la̍ŋ lā yāa̍ (3,000) 29O̍ ko̍ŋ kɔ̍ɔ̍lī, mi̍ Mūu̍sē di̍mūl nda̍ āā, “Pāa̍le̍ hāūle̍ŋ nde᷅ŋ, lā sɔ̄la̍ hɛ̄li᷄ŋndo̍ kpe̍e̍kpe̍i̍ le̍ wa̍li̍ Mɛ̄lɛ̄ka̍ Ya̍a̍wɛ̄ɛ̄ wo̍ tōsāa̍, fo̍ndōle̍, le̍ mɛ̄ɛ̍ nya̍ tūsi᷄ŋ o̍ dīōm ndɔ̄ɔ̍ bɛ̄ŋgu̍, pūa̍a̍ nyāa̍ nya̍ vēlū kɛ̍sɛ̍ kɛ̍sɛ̍ wa̍, a̍ pɔ̄mbūāā nyāa̍, ndu̍yɛ̍ a̍ bɛ̄ndāā nyāa̍, mi̍ lā chɛ̄l mi̍ lā dīū nda̍ yɛ̍. Ndu̍yɛ̍ Mɛ̄lɛ̄ka̍ dɔ̄ū nya̍ hāū sa̍lā.”

30Dīi̍mā ndɔ̄ɔ̍, mi̍ Mūu̍sē di̍mūl wāŋnda̍ I̍sɔ̄lūɛ̄ī a̍ lo̍ yōōmū wa̍ āā, “Dɛ̍nɛ̍ wɔ̍ɔ̍ŋ bɛ̄ndū bɛ̍ndōo̍ pi̍la̍ nya̍ tōsa̍ ho̍ō ni̍. Kɛ̍ I̍ cho̍ mīīŋgū pēmbēi̍ chōo̍ nāa̍ Mɛ̄lɛ̄ka̍ Ya̍a̍wɛ̄ɛ̄ chūā, mī I̍ kɔ̍ so̍ō nāa̍ ndu̍ chu̍a̍. Kɛ̄lɛ̄ŋgāā dɔ̍ɔ̍ mbō ma᷄l nya̍ le̍ yɔ̄ŋndā nyāla̍ wɔ̄ɔ̍ŋnda̍ŋ.” 31O̍ ko̍ŋ kɔ̍ɔ̍lī, mi̍ Mūu̍sē mi̍i̍ŋgū nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍ mbo̍ dīmūl ndu̍ āā, “O̍o̍ Mɛ̄lɛ̄ka̍, wāŋnda̍ ha̍ā ā tōsa̍ yɔ̄ŋ wɔ̄ɔ̍ŋ bɛ̄ndū. Ā tūūla̍ nāūwo̍ a̍ ko̍o̍līi̍ye̍, ma̍ sīīŋgūū ndu̍ māā mɛ̄lɛ̄ka̍ nda̍. 32Kɛ̍ yāndi̍i̍ Mɛ̄lɛ̄ka̍, ma̍l nda̍ le̍ yɔ̄ŋndā wɔ̄ɔ̍ŋndo̍. Kɛ̍ tē a̍ kɛ̍ɛ̍ pɛ̍ māā a̍ me᷅l nda̍ le̍, mɛ̄ɛ̍ ō bɛ̄ndā mā so̍li̍ dīōlā nīla̍ŋ o̍ yāu̍ nu̍mndo̍ ni᷄ŋ, yāu̍ ŋ̄ pōōnyi̍a̍a̍ dīōlā wānāā nu̍mnda̍ wo̍.”

33Mi̍ Mɛ̄lɛ̄ka̍ dīmūl Mūu̍sē āā, “Sāko̍, wāna̍ to̍sa̍ yɔ̄ŋ wɔ̄ɔ̍ŋndo̍ wo̍, dīōlā wānā ko̍ŋ ya̍ I̍ so̍lī o̍ yāu̍ nūu̍ ni᷄ŋ ni̍. 34Le̍la̍ŋ kɔ̍ a̍ wāŋnda̍ o̍ fo̍ndāŋ ya̍ I̍ di̍mu̍l nya̍ a̍ ndu̍ o̍kɔ̄ɔ̄ wo̍. Ki̍i̍la̍nɔ̍ nu̍u̍ cho̍ nya̍ īsīsi̍ la̍chi̍ mbō kūɛ̄ a̍ nya̍. Tē te̍le̍ŋ ya̍ I̍ nɔ̍ le̍ nda̍ nyɛ̄ pālāa̍ tūsīo̍o̍ chōo̍ wo̍ ō fūūlu̍u̍ pɛ̍, I̍ cho̍ nda̍ nyɛ̄ pālāa̍ tūsī chōo̍ le̍ yɔ̄ŋ ndā wɔ̍ɔ̍ŋndo̍.”

35O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ tu̍sī nda̍ nāā wɔ̄ɔ̍ŋ pūm chōo̍ le̍ tōsā nda̍ tōsa̍ mi̍ E̍lɔ̄ŋ o̍ tu̍u̍lā nāūwo̍ wo̍.

Currently Selected:

Ɛ̍sɔ̍dɔ̍ɔ̄ 32: YM

Highlight

Copy