Ɛ̍sɔ̍dɔ̍ɔ̄ 33

Mɛ̄lɛ̄ka̍ Ya̍a̍wɛ̄ɛ̄ di̍mu̍l wāŋnda̍ I̍sɔ̄lūɛ̄ī le̍ mā fāŋa̍ŋ o̍ Pēmbēi̍ Sa̍a̍nāī

1O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl Mūu̍sē āā, “Lā ma᷄l fo̍ndāa̍ ho̍ō nya̍ wānāā ŋ̄ sōli̍ ha̍ā I̍chi̍pī wa̍, mī lā kūɛ̄ o̍ lɛ̄ŋndē ya̍ I̍ chu̍e̍l E̍bīlāha᷅m, a̍ Āa̍se̍, a̍ Che̍kɔ̍pū būŋgɛ̄i̍, mi̍ I̍ me̍na̍ŋ māā I̍ cho̍ chūāūwāā ndāā ma̍māa̍ le̍ŋ kē le̍ŋ ni᷄ŋ. 2I̍ cho̍ ki̍i̍la̍nɔ̍ nu̍u̍ yɔ̄ŋ mbō si᷄m nya̍ lāchī, mbō kūɛ̄ a̍ nya̍. Ndu̍yɛ̍ Ke̍na̍na̍i̍tīi̍ya̍ a̍ cho̍ nya̍ lāchī wa̍ ni̍, a̍ A̍mɔ̍lu̍a̍i̍tīi̍ya̍, a̍ Hi̍ta̍i̍tīi̍ya̍, a̍ Pɛ̍lu̍i̍sa̍i̍tīi̍ya̍, a̍ Hi̍va̍i̍tīi̍ya̍, a̍ Chɛ̄būsa̍i̍tīi̍ya̍, I̍ cho̍ nda̍ tōūwɔ̄ɔ̄ nya̍ lāchī, mī I̍ so̍li̍ nda̍. 3Lɛ̄ŋndē nya̍ cho̍ kɔ̄la̍ŋ ni᷄ŋ nde̍ŋ, lɛ̄ŋnde̍ cho̍ lē sūlāā a̍ nyɛ̄m kɛ̄ndɔ᷄ŋ, ndu̍yɛ̍ mi̍ lē nɔ̄ fo̍ndāŋndā kɛ̄ndɛ̄lā tɔ̄lɔ̄ɔ̄la̍ŋ lā nāŋ nda̍ŋ nde̍ŋ le̍ cho̍ ni̍. Kɛ̍ ndu̍yɛ̍, ya̍ pi̍la̍ I̍ ku̍ē ni̍ŋ a̍ nya̍ le̍, yɔ̄ŋi̍ ya̍ I̍ ke̍i̍ nya̍ dīū dīū nɛ̄ī tɛ̍ɛ̄ŋ mī I̍ chi̍i̍ nya̍, kāni̍ fo̍ndōle̍, lā chō wānāā bōlīī kālāā bɛ̄ndū bɔ̄ɔ̍.”

4Mɛ̄ɛ̍ wāŋnda̍ tūēī dīōmndā kpūndɛ̍lā Mɛ̄lɛ̄ka̍ Ya̍a̍wɛ̄ɛ̄ di̍mi̍ la᷅ŋ a̍ nda̍ o̍kɔ̄ɔ̄ la̍ŋ, mi̍ mɔ̍nɛ̍i̍ bīī nda̍ ta̍u̍. O̍ ko̍ŋ, ma̍ tāmbū lākɔ̄l ta̍u̍, ndu̍yɛ̍ chɔ̍ŋ ni᷅ŋ a̍ te̍le̍ŋ ko̍ŋ, wānā o̍ wānā wo̍u̍nu̍ŋ ndɛ̍ ŋ̄kēlā ɔ̄ɔ̄ ŋ̄yɔ̄lɔ̄ le̍. 5Kāni̍ fo̍ndōle̍, mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl Mūu̍sē māā, ō dīmu̍l nda̍ āā, “Lā chō wānāā bōlīī kālāā bɛ̄ndū. Tē I̍ ku̍ɛ̄ a̍ nya̍ lātūlu̍ pɛ̍, I̍ ke̍i̍ nya̍ dīū nɛ̄ī tɛ̍ɛ̄ŋ kpo̍u̍. Le̍la̍ŋ wānā o̍ wānā, lā sōōlu̍u̍ ke̍la᷄ŋ cho̍ nya̍ lēkɔ̄ɔ̍ wo̍ŋ, a̍ yɔ̄lɔ̍ŋ, o̍ ko̍ŋ, mī kɛ̍ɛ̍si̍a̍a̍ nyɛ̄ ya̍ I̍ nɔ̍ le̍ tōsāa̍ a̍ nya̍ wo̍.” 6Le̍ he̍ī, chɔ̍ŋ a̍ te̍le̍ŋ wāŋnda̍ I̍sɔ̄lūɛ̄ī a̍ ma̍l pēmbēi̍ Sa̍a̍nāī wo̍, ā wōōnu̍ŋ ndɛ̍ ŋ̄kēlā ɔ̄ɔ̄ ŋ̄yɔ̄lɔ̄ le̍.

A̍ Tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ wāŋnda̍ lātūlu̍ wo̍ o̍kɔ̄ɔ̄

7Kɔ̄lā wāŋnda̍ I̍sɔ̄lūɛ̄ī a̍ wa̍ la̍ŋ, bā o̍ bā nda̍ a̍a̍ fu̍u̍lu̍u̍ pɛ̍ mā kēlū dɔ̍ɔ̍ŋgɔ̍ɔ̍, Mūu̍sē o̍ ta̍ŋgu̍l tɛ̍ndīi̍yo̍ la̍nda̍ŋ ti̍ŋ a̍ dɔ̍ɔ̍ŋgɔ̍ɔ̍. Tɛ̍ndīi̍ ko̍ŋ nda̍ a̍a̍ ve̍e̍lū ni̍ āā Tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍. Wānā o̍ wānā ndu̍ o̍o̍ ye̍e̍ma̍ le̍ Mɛ̄lɛ̄ka̍ Ya̍a̍wɛ̄ɛ̄ dīōmndo̍ nyūnāa̍ pɛ̍, lo̍ŋ ndu̍ o̍o̍ ku̍ā ni̍. 8Ndu̍yɛ̍ te̍le̍ŋ o̍ te̍le̍ŋ Mūu̍sē ndu̍ o̍o̍ ku̍ɛ̄ le̍ lūɛ̄īyɔ̄ɔ̍ o̍ tɛ̍ndīi̍yo̍ ho̍ō ni᷄ŋ pɛ̍, wāŋnda̍ kpo̍u̍ chɔ̄nɔ᷄ŋndo̍ mā si᷄m o̍ tɛ̍ndīi̍la̍ ndāla̍ŋ dīōla̍ŋ mā nūā kɔ̄ɔ̄lī kɔ̄ɔ̄lī. Ā lo̍ ndu̍ tōfāa̍ ha̍a̍a̍, mbō kɔ̍ lūɛ̄ī o̍ tɛ̍ndīi̍yo̍ ni᷄ŋ. 9Ndu̍yɛ̍ tē Mūu̍sē ndu̍ o̍o̍ lūɛ̄ī dɔ̍ɔ̍ o̍ tɛ̍ndīi̍yo̍ ni᷄ŋ pɛ̍, ha̍la̍ īkpūŋgbāa̍ tōl o̍ tɛ̍ndīi̍yo̍ sōndōo̍. O̍ ko̍ŋ, mī Mɛ̄lɛ̄ka̍ Ya̍a̍wɛ̄ɛ̄ o̍ so̍ō nāa̍ Mūu̍sē chu̍a̍. 10Ndu̍yɛ̍ dīmīo̍o̍ nu̍a̍ā mī wāŋnda̍ chē mī ha̍la̍ īkpūŋgbāa̍ kōŋ ō tōl o̍ tɛ̍ndīi̍yo̍ sōndōo̍, nda̍ kpo̍u̍ mī wānā o̍ wānā ba᷄ŋ wūla̍ŋ o̍ tɛ̍ndīi̍ ndɔ̄ɔ̍ dīō mbō pīɛ̍i̍ Mɛ̄lɛ̄ka̍. 11Ndu̍yɛ̍ tē Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ wa̍ sūɛ̍i̍ nāa̍ Mūu̍sē chu̍a̍ pɛ̍, sūɛ̍i̍ nāa̍ ndu̍ chu̍a̍ mɛ̄ɛ̍ wāŋndo̍ sūāā nu̍a̍ā nāa̍ chāa̍ŋndɔ̍ chu̍a̍, mā wa̍ chāna᷅ŋndo̍ hɔ̄lla̍ a̍ hɔ̄lla̍ yɛ̍. Ndu̍yɛ̍ tē nda̍ a̍a̍ chi̍i̍ sūūki̍āŋndo̍ pɛ̍, Mūu̍sē fu̍la̍ ō mīīŋgū o̍ dɔ̍ɔ̍ŋgɔ̍ɔ̍ ni᷄ŋ. Kɛ̍ Chɔ̄ɔ̍sūāā, po̍ Nu᷄ŋ ndo̍, o̍ wa̍ wānā ndɔ̄ ma̍lāa̍ wo̍, ndu̍ ndu̍ o̍o̍ fe̍ŋāŋ o̍ tɛ̍ndīi̍yo̍ le̍.

Mɛ̄lɛ̄ka̍ Ya̍a̍wɛ̄ɛ̄ chu̍a̍ būŋgɛ̄i̍ le̍ wāa̍ a̍ wānāā ndūa̍a̍ lātūlu̍

12O̍ ko̍ŋ kɔ̍ɔ̍lī, mi̍ Mūu̍sē di̍mūl Mɛ̄lɛ̄ka̍ Ya̍a̍wɛ̄ɛ̄ āā, “Mɛ̄lɛ̄ka̍, a̍ di̍mu̍l la̍ māā ya̍ I̍ si̍m wa᷅ŋnda̍ ha̍ā lāchī mī I̍ kūɛ̄ a̍ nda̍ o̍ lɛ̄ŋndē lēŋ ni᷄ŋ, kɛ̍ a̍ chɔ̍m ndɔ̍ ya̍ wāna̍ ŋ̄ chō vīōmɔ̄ɔ̄ mī ŋ̄ kūɛ̄ na̍a̍ ndu̍ la̍tu̍lu̍ wo̍ le̍. Dīmīo̍o̍ ko̍ni̍ ŋ̄ dīmi̍ ni̍ māā ā sīnā wa᷅na̍ ya̍ I̍ cho̍ wo̍, ndu̍yɛ̍ māā a̍ hi̍ni̍ kɔ̄l a̍ ya̍. 13Le̍la̍ŋ yāndi̍i̍, tē ā hi̍ni̍ kɔ̄l a̍ ya̍ le̍ kɛ̍ndɛ̍ī pɛ̍, mɛ̄ɛ̍ chɔ̍m ya̍ nyɛ̄ ŋ̄ kɛ̄ɛ̄si̍a̍a̍ le̍ tōsāa̍ wo̍, le̍ mī sa̍a̍ŋgi̍a̍l nu̍m. Ko̍ŋ to̍sā ni̍ mā hīōū lāchī a̍ kɔ̄llo̍ hīni̍la̍ŋ a̍ ya̍. Ndu̍yɛ̍ lo̍o̍nu̍ŋ māā wāŋnda̍ ha̍ā, wānāā nūm nda̍ nda̍ cho̍ ni̍.”

14Mi̍ Mɛ̄lɛ̄ka̍ Ya̍a̍wɛ̄ɛ̄ lo᷅ o̍ ko̍ŋ mbo̍ dīmūl Mūu̍sē āā, “I̍ cho̍ lākɔ̄ a̍ nūm la̍tu̍lu̍. Ndu̍yɛ̍, I̍ cho̍ tōsā mā wa̍ a̍ kɔ̄l nyūlū.”

15Mi̍ Mūu̍sē lo᷅ o̍ ko̍ŋ mbo̍ dīmūl Mɛ̄lɛ̄ka̍ āā, “Tē ā chɛ᷅l ni̍ŋ mā kūɛ̄ a̍ ya̍ la̍tu̍lu̍ le̍, mɛ̄ɛ̍ yāndi̍i̍ to̍sā mī ŋ̄ fāŋa̍ŋ o̍ fo̍ndāa̍ ho̍ō le̍. 16Kāni̍ fu̍u̍le̍, tē a̍ ku̍e̍ a̍ na̍a̍ lātūlu̍ le̍, mɛ̄ɛ̍ vɛ̄ɛ̍nɛ̍ wāŋnda̍ chō yɛ̄ lōōkū sīnā māā a̍ hi̍ni̍ kɔ̄l a̍ ya̍, ndu̍yɛ̍ ma̍ hīnī kɔ̄l a̍ wānāā nūmnda̍? Tē a̍ wa̍ hɔ̄lāā tūlu̍ a̍ na̍a̍ pɛ̍, ko̍ŋ chɔ᷅m ni̍ māā na̍a̍ ŋ̄ chō yɛ̍, a̍ wāŋnda̍ ā pīli̍a̍a̍ o̍ chi̍e̍ēŋndo̍ chōo̍ kpo̍u̍.”

17O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl Mūu̍sē āā, “Bālā tīɔ̍ɔ̍ŋ, I̍ cho̍ tōsā mɛ̄ɛ̍ ŋ̄ dīmi̍ yɛ̍, kāni̍ fu̍u̍le̍, I̍ si̍nā wa᷅na̍ ŋ̄ chō wo̍ wa̍la̍ŋ, ndu̍yɛ̍ I̍ hi̍ni̍ kɔ̄l a̍ nūm.”

18O̍ ko̍ŋ kɔ̍ɔ̍lī, mi̍ Mūu̍sē di̍mūl ndu̍ āā, “Mɛ̄ɛ̍ yāndi̍i̍, to̍sa̍ mī I̍ che᷅ pa̍ŋgēle̍ chɔ᷅m na̍ŋɔ̄ɔ̄ nūm bɛ̍ndōo̍ wo̍.”

19Mi̍ Mɛ̄lɛ̄ka̍ Ya̍a̍wɛ̄ɛ̄ mu̍lī āā, “I̍ cho̍ nu̍m kēēkū o̍ hɔ̄l, mā chē nāŋɔ̄ɔ̄ nī bɛ̍ndōo̍ kpo̍u̍, ndu̍yɛ̍ mī ve̍e̍lu̍ dīōlā nīla̍ŋ nu̍m o̍ hɔ̄l, ‘Mɛ̄lɛ̄ka̍ Ya̍a̍wɛ̄ɛ̄ la̍ŋ.’ Wāna̍ ya̍ I̍ ye̍e̍mā le̍ nyīɛ̍ɛ̍ye̍ tūīīnɔ᷄ŋndo̍ wo̍, ndu̍ ya̍ I̍ tu̍i̍i̍nūŋ īnyīɛ̍ɛ̍ ni̍. Wāna̍ ya̍ I̍ ye̍e̍mā le̍ mālāa̍ wo̍, ndu̍ ya̍ I̍ ma̍lā ni̍. 20Kɛ̍ ndu̍yɛ̍, I̍ cho̍ to̍sā mā chē ya̍ hɔ̄lla̍ le̍, kāni̍ fu̍u̍le̍, wānā o̍ wānā, a̍ chi᷅ ya̍ hɔ̄lla̍ mā lo̍ yōōmū le̍. 21Kɛ̍, fo̍ndāŋ pūm chō ya̍ īkɛ̄i̍ na̍ŋnu᷄ŋ, nāā ŋ̄ nɔ̄ mā hu̍ŋ si᷅m o̍ pōūwo̍ chōo̍ wa̍. 22Tē pa̍ŋgēle̍ chɔ᷅m na̍ŋɔ̄ɔ̄ nūu̍ wo̍ ō wa̍ hīōūwɔ̄ɔ̍ nu̍m o̍ hɔ̄l pɛ̍, I̍ cho̍ nu̍m wōū o̍ pōū tɛ̄ndɛ̍i̍yo̍ tɛ̄ɛ̄ŋ, mī ku̍mbū nu̍m bāa̍ chōo̍ ha̍a̍a̍ mbo̍ lo̍ o̍ ko̍ŋ mī I̍ hi̍o̍ū. 23Tē I̍ hi̍o̍ū pɛ̍, I̍ fa̍ŋa̍ nu̍m bāa̍ chōo̍, ā chē ya̍ kɔ̄ɔ̍. Kɛ̍ hɔ̄lāā nīa̍a̍ nda̍, a̍ cho̍ ka̍ŋ chɔ᷅ le̍.”

Currently Selected:

Ɛ̍sɔ̍dɔ̍ɔ̄ 33: YM

Highlight

Copy