Ɛ̍sɔ̍dɔ̍ɔ̄ 27

A̍ mɛ̄ɛ̍ nda̍ nɔ̄ mā tōōsi̍a̍a̍ ma̍āŋ nda̍ lūām sa̍lāla̍ŋ lēchōo̍ wo̍ yɛ̄ o̍kɔ̄ɔ̄

(Ɛ̍sɔ̍dɔ̍ɔ̄ 38:1-7)

1O̍ ko̍ŋ kɔ̍ɔ̍lī mi̍ Mɛ̄lɛ̄ka̍ hīāū lāchī a̍ sūɛ̍i̍ mbo̍ dīmī āā, “Lā nɔ̄ mī lā tāŋgu̍l ma̍āŋndo̍ a̍ yɔ̄m āke̍e̍sīāā wo̍. Ma̍āŋndo̍ ho̍ō, ō nɔ̄ mbō wa̍ bāndēi̍ nɛ̄īyo̍ lē ŋɔ᷄mmɛ̍ū a̍ i̍ŋchi̍sīi̍la̍ŋ lā ŋɔ᷄mpu᷅m, bu̍o̍o̍ nɛ̄īyo̍ lē ŋɔ᷄mmɛ̍ū a̍ i̍ŋchi̍sīi̍la̍ŋ lā ŋɔ᷄mpu᷅m, hēlɔ̄ɔ̍ nɛ̄īyo̍ lē hi̍ɔ̍ɔ̍lu̍ a̍ i̍ŋchi̍sīi̍la̍ŋ lā ŋɔ᷄mpu᷅m. 2Ma̍āŋndo̍ ho̍ō sɔ̍ŋgi̍la̍ ndɔ̄la̍ hi̍ɔ̍ɔ̍lu̍la̍ŋ lēchōo̍, o̍ sɔ̍ŋgi̍ o̍ sɔ̍ŋgi̍ lā nɔ̄ mī lā sōli̍ nyɔ̄ɔ̍ lo̍ŋ māā lēē. Ma̍āŋndo̍ ho̍ō ni̍, nyɛ̄lā nya̍ chō la̍ŋ si̍mī o̍ sɔ̍ŋgi̍la̍ ndɔ̄la̍ŋ nda̍ŋ ni̍, lā nɔ̄ mī ā wa᷄ lā bīīla᷅ŋ. Ndu̍yɛ̍, mī lā kūmbū ndu̍ kpo̍u̍ a̍ būlɔ̍ŋsīi̍ye̍. 3O̍ ko̍ŋ kɔ̍ɔ̍lī, mī lā tōōsi̍a̍a̍ wōlɔ̄ɔ̄lā nya̍ nɔ̄ le̍ wa̍llo̍ tōsāa̍ o̍ ma̍āŋndo̍ ho̍ō la̍ŋ a̍ būlɔ̍ŋsīi̍ye̍, kpɛ̍ɛ̍nɔ̍ŋ le̍ pūlta̍ŋ kɔ̄ndɔ̄ɔ̍ lēni᷄ŋ, a̍ si̍ɔ̍būi̍la̍ŋ, a̍ hɛ̄ŋgɛ̍i̍la̍ŋ le̍ kōo̍wa̍ŋ bīyɔ̄ɔ̍ lēni᷄ŋ le̍ fāsāŋīa̍a̍ o̍ ma̍āŋndo̍, a̍ chūlā sa̍ŋgi̍la̍ŋ le̍ vīsīŋ lāsa̍la᷄ŋ, a̍ hɛ̄ŋgɛ̍i̍la̍ŋ le̍ yīŋnde̍ŋ chūa̍a̍ lēni᷄ŋ. 4O̍ ko̍ŋ kɔ̍ɔ̍lī, mī lā tōōsi̍a̍a̍ būlɔ̍ŋsīi̍ye̍ kpāsāa̍ le̍ ndu̍ kɛ̄sīo̍o̍ o̍ ma̍āŋndo̍ chōo̍ nāa̍ nya̍ nɔ̄ mī lā dɔ̄ū yīŋnde̍ŋ o̍ ma̍āŋndo̍ chōo̍ wa̍. Kpāsa̍ ko̍ŋ, lā nɔ̄ mī lā wōu̍ kēla᷄ŋ būlɔ̍ŋsīi̍yo̍ŋ ŋ̄ hīɔ̍ɔ̍lu̍ o̍ sɔ̍ŋgi̍la̍ŋ ndɔ̄la̍ŋ vēllāa̍ vēllē. 5Tē lā tōōsi̍a̍a̍ ndu̍ pɛ̍, lā kɛ̄si̍ ndu̍ o̍ ma̍āŋndo̍ chōo̍, mī tūm ndɔ̄ɔ̍ tōl ti᷄ŋ lēni᷄ŋ. 6Ndu̍yɛ̍, mī lā tōōsi̍a̍a̍ yɔ̄mīī vīlɛ̄īye̍ a̍ yɔ̄m āke̍e̍sīāā wo̍ le̍ ma̍āŋndo̍ ho̍ō, mī lā kūmbū ndi̍ kpo̍u̍ a̍ būlɔ̍ŋsīi̍ye̍. 7O̍ ko̍ŋ kɔ̍ɔ̍lī, mī lā wōu̍ yɔ̄mīī vīlɛ̄ī kēŋ o̍ kēla᷄ŋ nya̍ chō tōōsīāā o̍ ma̍āŋndo̍ vēllāa̍ vēllē wo̍ŋ, mī yɔ̄mīī kēŋ ī wa᷄ lo̍ŋ le̍ kɔ̄la̍ŋ a̍ ma̍āŋndo̍ ho̍ō. 8Ma̍āŋndo̍ ho̍ō, tē lā wa̍ ndu̍ tōōsi̍a̍a̍ pɛ̍, a̍ pɛ̍ŋgɔ̍ŋ nya̍ nɔ̄ ni̍ mī lā tōōsi̍a̍a̍ ndu̍, mbō ō wa᷄ ō kūmbīa̍ŋ le̍ni̍ŋ. Mɛ̄ɛ̍ ya̍ I̍ chɔ̍m nu̍m o̍ pēmbēi̍ chōo̍ le̍ ma̍āŋndo̍ ho̍ō tāŋgūllo̍ yɛ̍, le̍nde̍ nya̍ nɔ̄ ni̍ mī lā tāŋgu̍l ndu̍.”

A̍ mɛ̄ɛ̍ nda̍ nɔ̄ mā tōōsi̍a̍a̍ la̍ū ba̍lu̍ tɛ̍ndīi̍ Mɛ̄lɛ̄ka̍ Ya̍a̍wɛ̄ɛ̄ wo̍ wo̍ yɛ̍

(Ɛ̍sɔ̍dɔ̍ɔ̄ 38:9-20)

9Mi̍ Mɛ̄lɛ̄ka̍ hīāū lāchī a̍ sūɛ̍i̍, mbo̍ dīmī āā, “Tɛ̍ndīi̍ nya̍ chō ho̍ō tāŋgūl le̍ ya̍ wo̍, ō nɔ̄ mbō nɔ̄ la̍ūwo̍ ō bālāā ndu̍ chɛ̍ chɛ̍. La̍ūwo̍ ho̍ō, ō nɔ̄ mbō wa̍ ō bɔ̄ŋāā kpɔ̍kɔ̍su̍ a̍ kōlāla̍ nda̍ tōōsīāā a̍ fūŋi̍i̍ kɛ̍ndɛ̄ kɛ̍ndɛ̄ī kpēēndɛ̄i̍ la̍ŋ. Kōla̍ nɔ̍ mbō wa᷄ bā tōūwo̍ wo̍, ō nɔ̄ mbō wa̍ bāndēi̍ nɛ̄īyo̍ kɛ̄mɛ̄ a̍ be̍le̍-ŋu̍ɛ̍ɛ̍nu̍. 10Ndu̍yɛ̍ mī lā tōōsi̍a̍a̍ sūŋgbu̍a̍ŋ bi̍dīi̍ŋ a̍ būlɔ̍ŋsīi̍ye̍, mī lā sīmi̍ ma̍ŋ bā tōūwo̍ le̍ kōlāa̍ ho̍ō lāndɔ̄ɔ̍. Mī lā tōōsi̍a̍a̍ vɛ̄lɛ̄ nyɛ̄la̍ŋ bi̍dīi̍ŋ a̍ būlɔ̍ŋsīi̍ye̍, le̍ ma̍ŋ sīmīo̍o̍ lēni᷄ŋ. O̍ ko̍ŋ kɔ̍ɔ̍lī, mī lā tōōsi̍a̍a̍ ka̍ni̍i̍ hu̍mbūe̍i̍ do̍li̍ŋndo̍ŋ, a̍ chīli̍ŋu̍ŋ vi̍lɛ̄īyo̍ŋ le̍ kōlāa̍ ho̍ō bāa̍. 11La̍ūwo̍ ho̍ō bā lūāŋndo̍ bɛ̍ɛ̍, kōla̍ nɔ̍ mbō wa᷄ ō lāndāā lo̍ŋ ndo̍ ō nɔ̄ mbō wa̍ nɛ̄īyo̍ kɛ̄mɛ̄ a̍ be̍le̍-ŋu̍ɛ̍ɛ̍nu̍, sūŋgbu̍a̍ŋ bɛ̍ɛ̍ bi̍dīi̍ŋ, a̍ nyɛ̄lā ma̍ si᷅m le̍ni̍ŋ nda̍ŋ bi̍dīi̍ŋ, kpo̍u̍ lā nɔ̄ mī lā wa᷄ lā tōōsīāā a̍ būlɔ̍ŋsīi̍ye̍. Ndu̍yɛ̍ do̍lu̍ŋu̍ŋ nɔ̍ mī ŋ̄ wa᷄ lo̍ŋ ndo̍ŋ ni̍, a̍ chīli̍ŋu̍ŋ vi̍lɛ̄īyo̍ŋ, ŋ̄ nɔ̄ mī ŋ̄ wa᷄ ŋ̄ tōōsīāā a̍ ka̍ni̍i̍ hu̍mbūe̍i̍. 12La̍ūwo̍ ho̍ō bā pāa̍le̍ŋ lē dēllo̍, kōla̍ nɔ̍ mbō wa᷄ ō lāndāā lo̍ŋ ndo̍, ō nɔ̄ mbō wa̍ bāndēi̍ nɛ̄īyo̍ be̍le̍-ŋɔ̍mmɛ̍ū a̍ lē ŋu̍ɛ̍ɛ̍nu̍. Ndu̍yɛ̍, sūŋgbu̍a̍ŋ mā nɔ̄ mī mā wa᷄ lo̍ŋ tɔ̍, a̍ nyɛ̄lā ma̍ si᷅m le̍ni̍ŋ nda̍ŋ vɛ̄lɛ̄ tɔ̍. 13La̍ūwo̍ ho̍ō nāa̍ lu̍ɛ̍i̍yāa̍, bā pāa̍le̍ŋ lē chāŋndo̍, kōla̍ nɔ̍ mbō wa᷄ ō lāndāā lo̍ŋ ndo̍, ō nɔ̄ mbō wa̍ bānde̍i̍ nɛ̄īyo̍ be̍le̍-ŋɔ̍mmɛ̍ū a̍ lē ŋu̍ɛ̍ɛ̍nu̍. 14-15Nāa̍ lu̍ɛ̍i̍yāa̍ ha̍ā, o̍ īkpēŋgū o̍ īkpēŋgū, lā nɔ̄ mī lā sīmi̍ sūŋgbu̍a̍ŋ mā yāa̍, a̍ nyɛ̄lā ma̍ si᷅m le̍ni̍ŋ nda̍ŋ lā yāa̍. Ndu̍yɛ̍ kōlāla̍ nɔ̍ mī wa᷄ lā lāndāā o̍ kpēŋgo᷄ŋ mu᷅ŋ vēllāa̍ vēllē la̍ŋ, ō kɛ᷅ kɛ᷅, ō nɔ̄ mbō wa̍ bāndēi̍ nɛ̄īyo̍ bi̍dīi̍ŋ, a̍ lē dīi̍ŋ a̍ i̍ŋchi̍sīi̍la̍ŋ lā ŋɔ᷄mpu᷅m. 16Nāa̍ lu̍ɛ̍i̍yāa̍ ha̍ā, kōlāa̍ nɔ̄ mbō wa᷄ ō lāndāā o̍ dīō, bānde̍i̍ nɛ̄īyo̍ be̍le̍-ya̍a̍. Kōlāa̍ ho̍ō, ō nɔ̄ mbō wa̍ ō tōōsīāā a̍ fūŋi̍i̍ kpe̍e̍ndɛ̄i̍, ndu̍yɛ̍ mā kēēlu̍ fūŋi̍i̍ yɛ̍ yɛ̍i̍ lēni᷄ŋ, fūŋi̍i̍ bu᷅li̍īye̍, a̍ fūŋi̍i̍ bɔ̍ɔ̄lɛ̍i̍, a̍ fūŋi̍i̍ si̍a̍ŋɛ̄i̍. Ndu̍yɛ̍, mī lā hɔ̄ū ndu̍ nyɛ̄ kɛ̄ndɛ̄ kɛ̍ndɛ̄. Kōlāa̍ ho̍ō, ō nɔ̄ mbō wa᷄ ō lāndāā o̍ sūŋgbu̍a̍ŋ mā hi̍ɔ̍ɔ̍lu̍, mā sīmīāā o̍ nyɛ̄lā ma̍ si᷅m nda̍ŋ ni᷄ŋ lā hīɔ̍ɔ̍lu̍. 17Sūŋgbu̍ma̍ nɔ̍ mī mā bālu̍ la̍ūwo̍ ho̍ō wa̍ŋ kpo̍u̍, chīli̍ŋi̍i̍ vi̍lɛ̄īye̍ ī nɔ̄ mī ī wa᷄ ī hōlāā o̍ ma̍ŋ chɛ̍ chɛ̍, ī tōōsīāā a̍ ka̍ni̍i̍ hu̍mbūe̍i̍. Do̍lu̍ŋu̍ŋ nɔ̍ mī ŋ̄ wa᷄ o̍ sūŋgbu̍a̍ŋ ndo̍ŋ, ŋ̄ nɔ̄ mī ŋ̄ wa᷄ ŋ̄ tōōsīāā a̍ ka̍ni̍i̍ hu̍mbūe̍i̍. Ndu̍yɛ̍ nyɛ̄lā mā nɔ̍ mī mā si᷄m lēni᷄ŋ nda̍ŋ, lā nɔ̄ mī lā wa᷄ lā tōōsīāā a̍ būlɔ̍ŋsīi̍ye̍. 18La̍ūwo̍ ho̍ō, ō nɔ̄ mbō wa᷄ bāndēi̍ nɛ̄īyo̍ kɛ̄mɛ̄ a̍ be̍le̍-ŋu̍ɛ̍ɛ̍nu̍, bu̍o̍o̍, nɛ̄īyo̍ be̍le̍-ŋɔ̍mmɛ̍ū a̍ lē ŋu̍ɛ̍ɛ̍nu̍. Kōla̍ nɔ̍ mbō wa᷄ la̍ūwo̍ ho̍ō ō bālāā wo̍, ō nɔ̄ mbō wa᷄ hēlɔ̄ɔ̍ nɛ̄īyo̍ lē ŋɔ᷄mmɛ̍ū a̍ tɛ̄ndāa̍ tɛ̍ɛ̄ŋ. Ndu̍yɛ̍ kōlāa̍ ho̍ō, ō nɔ̄ mbō wa᷄ ō tōōsīāā a̍ fūŋi̍i̍ kɛ̍ndɛ̄ kɛ̍ndɛ̄ī kpēēndɛ̄i̍. Sūŋgbu̍ma̍ kōlāa̍ ho̍ō ō nɔ̄ mbō wa̍ ō lāndāā wa̍ŋ, lē kɛ᷅ kɛ᷅, lē nɔ̄ mī lē nɔ̄ nyɛ̄ le̍ si᷅m le̍ni᷄ŋ ndo̍, ō tōōsīāā a̍ būlɔ̍ŋsīi̍ye̍. 19Wōlɔ̄ɔ̄ o̍ wōlɔ̄ɔ̄ wa̍li̍ cho̍ le̍ kpe̍ku̍ so̍li᷄ŋ o̍ tɛ̍ndīi̍yo̍ ho̍ō ni᷄ŋ, a̍ pɛ̍ɛ̍kīi̍ŋ nya̍ nɔ̄ le̍ tɛ̍ndīi̍yo̍ ho̍ō kīndɔ̄ɔ̍ ve̍, a̍ pɛ̍ɛ̍kīi̍ŋ nya̍ nɔ̄ le̍ kōla̍ ba̍lu̍ tɛ̍ndīi̍yo̍ ho̍ō wo̍ kīndɔ̄ɔ̍ ve̍, kpo̍u̍ lā nɔ̄ mī lā wa᷄ lā tōōsīāā a̍ būlɔ̍ŋsīi̍ye̍.”

A̍ mɛ̄ɛ̍ nda̍ nɔ̄ mā bīī la̍mbūi̍yo̍ yɛ̍ o̍kɔ̄ɔ̄

(Lɛ̄vi̍ti̍kɔ̍ɔ̄ 24:1-4)

20Mi̍ Mɛ̄lɛ̄ka̍ hīāū lāchī a̍ sūɛ̍i̍, mbo̍ dīmūl Mūu̍sē āā, “Di̍mu̍l wa᷅ŋnda̍ I̍sɔ̄lūɛ̄ī mā hīŋ a̍ chūɛ̄īmā ɔ̄li̍fīi̍mā kɛ̍ndɛ̄ kɛ̍ndīa̍ŋ nāa̍ nūm chu̍a̍, le̍ dɔ̄wɔ̄ɔ̍ o̍ la̍mbūi̍yo̍ ni᷄ŋ, mbō wa̍ sānde̍i̍ īchɔ̄l o̍ īchɔ̄l. 21La̍mbūi̍yo̍ ho̍ō, ō nɔ̄ mbō wa᷄ ō kɛ̄sīāā o̍ kōla̍ cho̍ ō lāndāā o̍ tɛ̍ndīi̍yo̍ ho̍ō ni᷄ŋ o̍ kɔ̍fū kpe̍ma̍a̍ lāchī wo̍ kɔ̄ɔ̄lī. Ndu̍yɛ̍, E̍lɔ̄ŋ nda̍ pūa̍a̍ ndūa̍a̍ nda̍ nɔ̍ ni̍ mā wa᷄ la̍mbūi̍yo̍ ho̍ō mɛ̄ndūllo̍ ya̍ Mɛ̄lɛ̄ka̍ lāchī mbō lɔ᷄l sānde̍i̍ ha̍a̍a̍ mī pāa̍le̍ŋ lē sɛ̄. Ndu̍yɛ̍, chɔ̍ŋ a̍ hāū mbō kūɛ̄ a̍ lāchī kɛ᷅, he̍ī ī nɔ̄ mī ī wa᷄ māā sāwā le̍ wāŋnda̍ I̍sɔ̄lūɛ̄ī a̍ yu̍ŋgu̍la̍ fu̍lā ni᷄ŋ o̍ nda̍ ni᷄ŋ nda̍ŋ kpo̍u̍.”

Currently Selected:

Ɛ̍sɔ̍dɔ̍ɔ̄ 27: YM

Highlight

Copy