Ɛ̍sɔ̍dɔ̍ɔ̄ 23

Sīlāla̍ŋ a̍ mɛ̄ɛ̍ wānā wa᷅ sa̍kpō o̍ sɔ̄ɔ̍ŋ tōsāa̍ ni᷄ŋ yɛ̍ o̍kɔ̄ɔ̄

1Mi̍ Mɛ̄lɛ̄ka̍ dīmī āā, “Lā ba̍lū a̍ sūɛ̍i̍ lāchōōwɛ̄i̍ le̍. Lā hi̍a̍ū wānā wɔ̍ɔ̍ŋndo̍ kɔ̄ɔ̄lī, mī lā tɛ̄nda̍ se̍īlē lāka̍fāle̍ŋ le̍ ndu̍ mālāa̍ le̍. 2Ā yɔ᷄ŋ bɛ̍ɛ̍ mī wāŋnda̍ wa̍ fāŋgā bɛ̍ndōo̍, tē ā wa̍ o̍ ka̍fāla̍ŋ chōo̍ pɛ̍, lā tu̍āl nda̍ kɔ̄ɔ̄lī le̍ mɛ̄ɛ̍ nda̍ chō fāŋgā bɛ̍ndōo̍ yɛ̍ le̍. Ā yɔ᷄ŋ bɛ̍ɛ̍ o̍ tōŋgōla̍ ko̍tīi̍la̍ŋ ni᷄ŋ ni̍, lā si᷅m wāŋndo̍ ō pīlɔ̄ɔ̍ kɔ̄ɔ̄lī le̍ mɛ̄ɛ̍ fāŋgāa̍ chō ndu̍ kɔ̄ɔ̄lī yɛ̍, mī lā tɛ̄nda̍l wāŋndo̍ ō pīlɔ̄ɔ̍ se̍īlē lāka̍fāle̍ŋ te̍. 3Ndu̍yɛ̍, lā hi̍a̍ū wānā ta̍mbɛ̍i̍yo̍ kɔ̄ɔ̄lī o̍ tōŋgo̍ ko̍tīi̍yo̍ ni᷄ŋ le̍ mɛ̄ɛ̍ ō cho̍ wānā tāmbɛ̍i̍yo̍ yɛ̍ le̍.

4“Ā yɔ᷄ŋ bɛ̍ɛ̍ mī wāŋndo̍ wa̍ ya̍a̍mɔ̍ɔ̍nɔ̍ nu̍m, tē nāū ndɔ̄ɔ̍ ɔ̄ɔ̄ sōfɛ̍lɛ̍ ndɔ̄ɔ̍ ō lāāsi̍a̍ŋ pɛ̍, ma̍ sāālu̍ŋ ndu̍, bi̍i̍ ndu̍ mā yo̍u̍ ndu̍. 5Tē ā ko̍ma̍l sōfɛ̍lɛ̍ ya̍a̍mɔ̍ɔ̍nɔ̍ nūmndo̍ mbo̍ bɛ̄wa̍ o̍ wōlɔ̄ɔ̄la̍ŋ bɛ̄ŋgu̍ pɛ̍, ma̍la̍ ndu̍ mā si̍mi̍ ndu̍, mɛ̍ī ndu̍ lo̍ŋ te̍.

6“Tē wānā ta̍mbɛ̍i̍yo̍ ō nɔ̄ di̍ ndɔ̄ɔ̍ o̍ sūɛ̍i̍ ni᷄ŋ pɛ̍, lā pu̍u̍lu᷄ŋ le̍ mɛ̄ɛ̄ o̍ cho̍ wānā ta̍mbɛ̍i̍ yɛ̍ mī lā yāāla̍ ndu̍ le̍. 7Lā ho᷅l wāŋndo̍ sūɛ̍i̍ o̍ fo̍ndō fu̍u̍wo̍ chōo̍ le̍. Lā di̍ī wāna̍ cho̍ sa̍kpō ya̍ Mɛ̄lɛ̄ka̍ o̍ hɔ̄l lo̍, ɔ̄ɔ̄ wāna̍ tɛ̍ɛ̍mbu̍u̍ i̍sɔ̄ɔ̍ o̍ i̍sɔ̄ɔ̍ le̍ wo̍ le̍. Wānā o̍ wāna̍ to̍sa̍ ī wāā le̍nde̍ pɛ̍, ya̍ Mɛ̄lɛ̄ka̍, I̍ me᷅l wa̍nā ko̍ŋ le̍ nyɛ̄ o̍ to̍sa̍ wo̍ le̍. 8Lā bi̍ī lūɛ̄īyɔ̄ɔ̄ ni᷄ŋndo̍ le̍, kāni̍ fo̍ndōle̍, lūɛ̄īyɔ̄ɔ̄ ni᷄ŋndo̍ sūūmīa̍a̍ o̍ su̍u̍mīāā māsāa̍ wa̍ā ni̍, ā nɔ̍lā mā dīmi̍ tōnya̍ cho̍ o̍ sūɛ̍i̍ ni᷄ŋ ndo̍ le̍. Ā chɔ̍ bɛ̍ɛ̍ to᷅nya̍a̍ kpe̍nde̍ke̍le̍ mūlīo̍o̍ nda̍ mūlī ndu̍ bāla̍ŋ a̍ mākɔ̄ɔ̄ ni̍ mā dīmi̍ ka̍fāla̍ŋ.

9“Lā bi̍ī wānāā lēkāa̍wa̍, a̍ cho̍ nya̍ tɛ̄ɛ̄ŋ nda̍ bīyɔ̄ɔ̄ wɔ̄ɔ̍ŋndo̍ le̍, kāni̍ fu̍u̍le̍, nya̍ bɛ̍ɛ̍ wānāā lēkāa̍wa̍ nya̍ wa̍ o̍ lɛ̄ŋndē I̍chi̍pīle̍ŋ ni᷄ŋ ni̍. Nya̍ pi̍la̍ lā sīnā nyɛ̍ cho̍ wāa̍ wāna̍ lēkāa̍ wo̍ o̍ lɛ̄ŋnde̍ŋ ni᷄ŋ ndo̍.”

Sāwāla̍ŋ a̍ pāa̍le̍ ŋɔ̍mmɛ̍ūle̍ŋ, ndu̍yɛ̍ a̍ wɔ̄sī ŋɔ᷄mmɛ̍ū wo̍ o̍kɔ̄ɔ̄

10Mi̍ Mɛ̄lɛ̄ka̍ dīmī āā, “Le̍ wɔ̄sīla̍ŋ lā ŋɔ᷄mpu᷅m, lā nɔ̄ mī lā wa̍ wa̍lta̍ nyāla̍ ŋ̄chīɛ̄ɛ̄la̍ŋ tōsāa̍, mī lā chūūŋgīāā tɔ̍lɔ̄ɔ̄lā nyāla̍ŋ. 11Kɛ̍ tē wɔ̄sīlā ŋɔ᷄mpu᷅mnda̍ŋ lā hīōū pɛ̍, wɔ̄sī ŋɔ᷄mmɛ̍ū wo̍ ndu̍ ki̍nɛ̍i̍, lɛ̄ŋnde̍ŋ lē nɔ̄ mī lē pɛ̄ŋgi̍. Tɔ̄lɔ̄ɔ̍ o̍ tɔ̄lɔ̄ɔ̍ cho̍ wa̍ o̍ ho̍o̍la̍ nyāla̍ŋ ni᷄ŋ wɔ̍sī kōŋ, wānāā tāmbɛ̍i̍ya̍a̍ cho̍ nya̍ tɛ̄ɛ̄ŋ nda̍ nɔ̍ ni̍ mā dē la̍ŋ. Ō kɛ᷅ o̍ kɛ̍ nda̍ mɛ̄i̍ pɛ̍, vīsīa̍a̍ nda̍ dē ko̍ŋ. Ndu̍yɛ̍ kpe̍le̍la̍ nyāla̍ īyɔ̄mnda̍ŋ bɛ̍ɛ̍, kpe̍le̍la̍ yɔ̄mīī mākīle̍pīi̍ ni̍, kpe̍le̍la̍ yɔ̄mīī ɔ̄li̍fīi̍ ni̍, le̍nde̍ nya̍ nɔ̄ ni̍ mī lā tōsa̍ a̍ la̍ŋ.

12“Le̍ pālɛ̍i̍ ī ŋɔ᷄mpu᷅m o̍ lɔ̍ɔ̍ o̍ lɔ̍ɔ̍ ni᷄ŋ, lā nɔ̄ mī lā tōsa̍ wa̍lta̍ nyāla̍ŋ. Kɛ̍, o̍ pāa̍le̍ ŋɔ᷄mmɛ̍ūle̍ŋ chōo̍, lā to̍sā wa̍li̍ o̍ wa̍li̍ le̍, lā nɔ̄ mī lā pɛ̄ŋgi̍. Ko̍ŋ to̍sā ni̍, chɔ̄lūāā nyāa̍ wa̍lla̍ bɛ̍ɛ̍, nāūwa̍ ni̍, sōfɛ̍li̍a̍a̍ ni̍, mā pɛ̄ŋgi̍. Chīa̍a̍ a̍ wānāā lēkāa̍wa̍a̍ cho̍ nya̍ o̍ bā mā tōsāl nya̍ wa̍lta̍ŋ nda̍ bɛ̍ɛ̍ mā pɛ̄ŋgi̍.

13“Ndu̍yɛ̍, nyɛ̄ o̍ nyɛ̄ ya̍ Mɛ̄lɛ̄ka̍ Ya̍a̍wɛ̄ɛ̄ di̍mu̍l nya̍ le̍ tōsāa̍, lā pu̍ɛ̍ɛ̍nu᷄ŋ le̍ ndu̍ tōsāa̍ le̍. Ō fūla̍ o̍ ya̍ Mɛ̄lɛ̄ka̍ kɔ̄ɔ̄lī, lā so̍o̍lūū mɛ̄lɛ̄ka̍ o̍ mɛ̄lɛ̄ka̍ chēle̍ŋ te̍ mɛ̄ɛ̍ ya̍. Lā pi̍āl nda̍ bɛ̍ɛ̍ la̍di̍o̍ le̍.”

A̍ bɔ̄ŋa᷅ŋndā bɛ̄ndūlā yāa̍la̍ŋ o̍kɔ̄ɔ̄

(Ɛ̍sɔ̍dɔ̍ɔ̄ 34:18-26; Dītɔ̍nɔ̍mi̍ī 16:1-17)

14Mi̍ Mɛ̄lɛ̄ka̍ hīāū lāchī a̍ sūɛ̍i̍ mbo̍ dīmī āā, “Īwɔ̄sī o̍ īwɔ̄sī lā nɔ̄ mī lā bīī bɔ̄ŋa᷅ŋndā bɛ̄ndūla̍ŋ lā ya̍a̍ le̍ ya̍ Mɛ̄lɛ̄ka̍ bɛ̄ɛ̄le̍ŋ kīo̍o̍. 15Īwɔ̄sī o̍ īwɔ̄sī lā nɔ̄ mī lā bīī bɔ̄ŋa᷅ŋ bɛ̄ndū nda̍ dīā bēe̍dīi̍ nda̍ do̍ū yi̍i̍sīi̍ le̍ wo̍. Le̍ pālɛ̍i̍ ī ŋɔ᷄mmɛ̍ū lā di̍ā bēe̍dīi̍ o̍ bēe̍dīi̍ che᷅le̍ŋ te̍, mɛ̄ɛ̍ bēe̍dīi̍ nda̍ do̍ū yi̍i̍sīi̍ le̍ wo̍, mɛ̄ɛ̍ ya̍ I̍ di̍mu̍l nya̍ yɛ̍. Īwɔ̄sī o̍ īwɔ̄sī, o̍ pāŋgi̍i̍ A̍bīve̍ ni᷄ŋ nya̍ nɔ̄ ni̍ mī lā bīī bɔ̄ŋa᷅ŋndo̍ ho̍ō, kāni̍ fo̍ndōle̍, o̍ pāŋgi̍i̍ ke̍ŋ ni᷄ŋ ya̍ I̍ so̍li̍ nya̍ o̍ lɛ̄ŋndē I̍chi̍pīle̍ŋ ni᷄ŋ ni̍. Ndu̍yɛ̍, tē lā wa᷄ hūnɔ̄ɔ̍ ya̍ sōōlūū wo̍ pɛ̍, lā hu᷄ŋ a̍ sa̍lālā nya̍ nɔ̄ le̍ sōlīo̍o̍ nāa̍ ya̍ chu̍a̍ la̍ŋ. Lā hu᷅ŋ bālā fo̍ndō le̍.

16“Ō fūla̍ o̍ ko̍ŋ kɔ̍ɔ̍lī, īwɔ̄sī o̍ īwɔ̄sī, lā nɔ̄ mī lā bīī bɔ̄ŋa᷅ŋ kūāūwāa̍ ŋ̄chīɔ̍ɔ̍. Tɔ̄lɔ̄ɔ̄lā tāse̍la̍ nya̍ chō kēēndūū, ɔ̄ɔ̄ kōūwɔ̄ɔ̄ o̍ chīɔ̄ɔ̄ŋ nyāa̍ŋ ni᷄ŋ nda̍ŋ, a̍ tɔ̄lɔ̄ɔ̄lā lāŋ nya̍ nɔ̄ ni̍ mī lā bīī bɔ̄ŋa᷅ŋndo̍ ho̍ō. O̍ wɔ̄sīo̍o̍ mɛ̄ɛ̄lu̍la̍ŋ, tē lā chīi̍ tɔ̄lɔ̄ɔ̄lā nyāla̍ hēēlū chi̍e̍e̍ pɛ̍, lā nɔ̄ vɛ̄lɛ̄ mī lā bīī bɔ̄ŋa᷅ŋndo̍. 17Mɛ̄ɛ̍ nu̍a̍ā nya̍ nɔ̄ ni̍ mī lā bīī bɔ̄ŋa᷅ŋnda̍ŋ nda᷅ŋ. Īwɔ̄sī o̍ īwɔ̄sī pūa̍a̍ kpo̍u̍ ā nɔ̄ mā bɔ̄ɔ̄ŋi̍āŋ le̍ ya̍a̍ ya̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ lāchī le̍ ya̍ sōōlūū wo̍.

18“Ndu̍yɛ̍, tē lā dīī chɔ̄lūa̍a̍ pɛ̍, mī la̍ wa̍ kōo̍ma̍ ndāa̍ŋ sa̍lāla̍ŋ sōlīo̍o̍ nāa̍ ya̍ Mɛ̍lɛ̄kā chu̍a̍ pɛ̍, lā mɔ̍sɔ̄ŋā ma̍ŋ sa̍lāla̍ŋ sōlī a̍ bēe̍dīi̍ nda̍ dūāū yi̍i̍sīi̍ yo̍ wo̍ le̍. Chɔ̄lū nya̍ chō kōŋ sa̍lāa̍ sōlī o̍ ya̍lo̍ wo̍, chūɛ̄īmā chɔ̄lū kōŋ bɛ̍ɛ̍ lā nɔ̄ mī lā sōli̍ ma̍ŋ sa̍lāa̍ o̍ ya̍lo̍. Ndu̍yɛ̍, chūɛ̄īmā chɔ̄lū kōŋ mā nɔ̍ mī mā lɔ᷄l ku̍ya̍ le̍, lā nɔ̄ mī lā sōli̍ ma̍ŋ sa̍lāa̍ pāa̍le̍ le̍ŋ.

19“Īwɔ̄sī o̍ īwɔ̄sī, tē lā wa̍ hūnɔ̄ɔ̍ a̍ tɔ̄lɔ̄ɔ̄la̍ŋ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni᷄ŋ pɛ̍, tɔ̄lɔ̄ɔ̄lā tāse̍la̍ nya̍ kēēndūū o̍ chīɔ̄ɔ̄ŋ nyāa̍ŋ ni᷄ŋ nda̍ŋ, la̍ŋ nya̍ hu᷄ŋ ni̍.

“Lā di̍ī chūīŋ lēndōo̍ ɔ̄ɔ̄ sāā le̍ndōo̍ mī lā yāu̍ ndu̍ a̍ mɛ̄ɛ̄ma̍ kāla̍ ndɔ̄ wa̍ŋ te̍.”

Būŋgāŋ Mɛ̄lɛ̄ka̍ chūe̍l I̍sɔ̄lūɛ̍i̍ya̍ wo̍ŋ, a̍ nyɛ̄ o̍ chɔ̍m nda̍ le̍ tōsāa̍ wo̍

20“Wāŋnda̍ I̍sɔ̄lūɛ̄ī, I̍ cho̍ ki̍i̍la̍nɔ̍ nūu̍ vīōmɔ̄ɔ̄ mbō si᷄m nya̍ lāchī, mbō kūɛ̄ a̍ nya̍ o̍ lɛ̄ŋndē ya̍ I̍ bɛ̍ɛ̍ndīa̍a̍ le̍ nya̍ le̍ŋ ni᷄ŋ. Ndu̍ lo᷅ ni̍ŋ nya̍ māndāa̍ ni̍ ha̍a̍a̍ mī lā fūūlu̍u̍ o̍ lɛ̄ŋndē lēŋ ni᷄ŋ. 21Le̍la̍ŋ, lā ya᷄ŋ ki̍i̍la̍nɔ̍ɔ̍ ko̍ŋ nīla̍ŋ, mī lā tōsa̍ nyɛ̄ o̍ nyɛ̄ o̍ di̍mu̍l nya̍ le̍ tōsāa̍. Lā si̍mūl ndu̍ le̍, kāni̍ fu̍u̍le̍, I̍ cho̍ ndu̍ dīo̍o̍ kē ō pīāā cha̍, wāna̍ o̍ wānā si̍mu̍l ndu̍ pɛ̍, ō me̍l nu̍m te̍. Nyɛ̄ pālāa̍ o̍ tu̍sī nu̍m chōo̍ ni̍, kāni̍ fo̍ndōle̍, ndu̍ cho̍ hɔ̄ltē nīle̍ŋ ni̍. 22Tē lā tūēī ndu̍ dīōm pɛ̍, ndu̍yɛ̍ nyɛ̄ o̍ nyɛ̄ ya̍ I̍ di̍mu̍l nya̍ le̍ tōsāa̍, mī lā tōsa̍ ndu̍ pɛ̍, I̍ cho̍ sūŋgɔ̄ɔ̄ le̍ nya̍, mī sɔ̍ŋga̍ a̍ ya̍a̍mɔ̍ɔ̍wa̍a̍ nyāa̍ kpo̍u̍. 23I̍ chō ki̍i̍la̍nɔ̍ nu̍u̍ vīōmɔ̄ɔ̄ mbō si᷄m nya̍ lāchī, mbō kūɛ̄ a̍ nya̍ o̍ lɛ̄ŋndē ya̍ chu̍e̍l nya̍ būŋgɛ̄i̍ le̍ŋ ni᷄ŋ. Le̍ŋ le̍ yɔ̍nūŋ ni̍ māā lɛ̄ŋndē A̍mɔ̍lu̍a̍i̍tīi̍ya̍, a̍ Hi̍ta̍i̍tīi̍ya̍, a̍ Pɛ̍lu̍i̍sa̍i̍tīi̍ya̍, a̍ Ke̍na̍na̍i̍tīi̍ya̍, a̍ Hi̍va̍i̍tīi̍ya̍ a̍ Chɛ̄būsa̍i̍tīi̍ya̍. Ndu̍yɛ̍, kāa̍la̍ŋ nda᷅ŋ ki̍nɛ̍i̍, I̍ cho̍ sɔ̄ŋgā a̍ nda̍ mī ba̍su̍ nda̍ tɛ̍ɛ̍. 24Tē lā lūɛ̄ī o̍ lɛ̄ŋnde̍ŋ nde᷅ŋ ni᷄ŋ pɛ̍, lā pi̍ɛ̍ī mɛ̄lɛ̄ka̍ā wāŋnda̍ ha̍ā ā pīɛ̄īya̍ le̍. Lā tu̍ŋndu̍ŋ nda̍ o̍ lābɛ̄ŋgu̍ ni̍ŋ mī lā sōōlu̍u̍ nda̍ le̍. Ka̍ā o̍ ka̍ā wɔ̄ɔ̍ŋ wāŋnda̍ ha̍ā ā chō tōsāa̍, lā tu̍āl ndu̍ kɔ̄ɔ̄lī le̍. Nyɛ̄ o̍ nyɛ̄ nda̍ sōōlūū māā mɛ̄lɛ̄ka̍ nda̍, lā tɛ̄ɛ̄mbu̍u̍ mu̍ŋ kpo̍u̍. Ndu̍yɛ̍, pōūtā nda̍ chɔ̄ū māā māsūŋgbu̍ mā sōōlūū la̍ŋ māā mɛ̄lɛ̄ka̍ā nda̍ la̍ŋ, mī lā pēsi̍ pe̍si̍ la̍ŋ kpo̍u̍. 25Tē lā sōōlu̍u̍ ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ pɛ̍, I̍ cho̍ nya̍ sa̍lā dɔ̄wɔ̄ɔ̄, mī ke̍ nya̍ nyɛ̄ dīa̍a̍ ta̍u̍ ta̍u̍ a̍ mɛ̄ŋmā kɛ̄ndīa̍ŋ. Ndu̍yɛ̍, nāā o̍ nāā cho̍ nya̍ tɛ̄ɛ̄ŋ, mī so̍li̍ la̍ŋ nya̍ tɛ̄ɛ̄ŋ. 26I̍ cho̍ tōsā wānā la̍nɔ̍ o̍ wānā la̍nɔ̍ vi̍i̍kūū ni̍ŋ o̍ lɛ̄ŋndē nyāle̍ŋ ni᷄ŋ te̍, kɛ̄lɛ̄ŋgāā ni᷅ŋ te̍ mī wānā la̍nɔ̍ wa̍ nya̍ tɛ̄ɛ̄ŋ o̍ vi̍lū le̍. I̍ cho̍ nya̍ yōōmū vīlɛ̄īyo̍ kē.

27“I̍ cho̍ tōsa̍ ya̍a̍mɔ̍ɔ̍wa̍a̍ nyāa̍ cho̍ nya̍ lāchī ki̍nɛ̍i̍ ya̍, mī sīōōŋīī bɛ̄ndūe̍i̍ bīī nda̍, nda̍ kpo̍u̍ mī kɔ̄lta̍ŋ lā lāāsi̍a̍ŋ nda̍ ni᷄ŋ. I̍ cho̍ ya̍a̍mɔ̍ɔ̍wa̍a̍ nyāa̍ sɛ̄ɛ̄ŋgi̍āŋndo̍ mālɔ̄ɔ̄ tɛ̄ɛ̄ŋ, mī to̍sa̍ nda̍ kpo̍u̍ mā nyāānu̍ŋ nya̍. 28Hi̍va̍i̍tīi̍ya̍ a̍ cho̍ nya̍ lāchī wa̍ ni̍, Ke̍na̍na̍i̍tīi̍ya̍ ni̍, Hi̍ta̍i̍tīi̍ya̍ ni̍, tē ā tūēī nya̍ tɔ̍ɔ̍ pɛ̍, I̍ cho̍ tōsā mī sīōōŋīī bɛ̄ndūe̍i̍ bīī nda̍ le̍ nya̍ mā nyāānu̍ŋ. 29Kɛ̍ ndu̍yɛ̍, I̍ so̍lī ni̍ŋ nda̍ o̍ wɔ̄sī pīlɛ̍ bɛ̄ŋgu̍ le̍, kāni̍ fo̍ndōle̍, yɔ̄ŋi̍ lɛ̄ŋnde̍ŋ lē pīɔ̍l mī lē lo̍ pɔ̄m, mī vīsīāā bīyāa̍ ā hu᷄ŋ ku̍ī nya̍ tɛ̄ɛ̄ŋ. 30Kɛ̍, I̍ cho̍ nda̍ lō sōlīo̍o̍ ā pɔ̄mpɔ̍mbɔ̄ ha̍a̍a̍ mbō lō o̍ ko̍ŋ mī lā kūi̍ mī lā chūa̍ lɛ̄ŋnde̍ŋ kpo̍u̍. 31I̍ cho̍ tōsā mī pɛ̄ŋgu̍la̍ lɛ̄ŋndē nyāle̍ŋ lā kāndu᷄ŋ o̍ Pēē Si̍a̍ŋā Mɛ̄ŋmā Īhɛ᷄llo̍, mī lā kūɛ̄ a̍ Pēē Mɛ̄ŋmā Īhɛ᷄llo̍ Mɛ̄dītālu̍e̍e̍nīāā. O̍ ko̍ŋ kɔ̍ɔ̍lī, mī lā chɛ᷄ŋ vɛ̍lɛ̄ o̍ lɛ̄ŋndē po̍lte̍ŋ, mī lā kūɛ̄ a̍ Pēē Bɛ̍ndōo̍ Yūfi̍lu̍a̍tīī. I̍ cho̍ nya̍ kpāāyāa̍ kē mī lā wa̍ kɔ̄la̍ŋ a̍ ya̍a̍mɔ̍ɔ̍wa̍a̍ nyāa̍ cho̍ o̍ lɛ̄ŋndē lēŋ ni᷄ŋ nda̍ yōmɔ̄ɔ̍, ndu̍yɛ̍ mī I̍ to̍sa̍ mī lā sōli̍ nda̍ kpo̍u̍ o̍ lɛ̄ŋndē lēŋ ni᷄ŋ. 32Ndu̍yɛ̍, tē lā lūɛ̄ī o̍ lɛ̄ŋnde̍ŋ nde᷅ŋ ni᷄ŋ pɛ̍, lā to̍sā chɛ̄la᷅ŋ o̍ chɛ̄la᷅ŋ a̍ wānāa̍ cho̍ o̍ lɛ̄ŋndē lēŋ ni᷄ŋ nda̍ le̍, kɛ̄lɛ̄ŋgāā a̍ mɛ̄lɛ̄ka̍a̍ ndāa̍ nda̍ pīɛ̄ī ya̍ le̍. 33Lā chɛ᷅l mī wāŋnda̍ ha̍ā ā cha᷄l nya̍ tɛ̄ɛ̄ŋ o̍ lɛ̄ŋndē nyāle̍ŋ ni᷄ŋ te̍, kāni̍ fo̍ndōle̍, tē ā cha᷄l nya̍ tɛ̍ɛ̄ŋ pɛ̍, ā chō nya̍ yāŋɔ̄ɔ̄lē wɔ̄ɔ̍ŋnde̍ŋ yēŋ, mā tōsa̍ nya̍ bɛ̍ɛ̍, mī lā mūli̍ŋ mɛ̄lɛ̄ka̍a̍ ndāa̍ pīɛ̄īyo̍. O̍ ko̍ŋ, mā tōsa̍ mī lā tōsa̍ yɔ̄ŋ wɔ̄ɔ̍ŋndo̍.”

Currently Selected:

Ɛ̍sɔ̍dɔ̍ɔ̄ 23: YM

Highlight

Copy