Ɛ̍sɔ̍dɔ̍ɔ̄ 20

A̍ sāwāla̍ tɔ̍la̍ Mɛ̄lɛ̄ka̍ ke̍ I̍sɔ̄lūɛ̍i̍ya̍ la̍ŋ o̍kɔ̄ɔ̄

(Dītɔ̍nɔ̍mi̍ī 5:1-21)

1O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ sūāā nāa̍ wāŋnda̍ I̍sɔ̄lūɛ̄ī chu̍a̍, mbo̍ dīmūl nda̍ āā, 2“Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍. Ya̍ so̍li̍ nya̍ o̍ lɛ̄ŋndē I̍chi̍pīle̍ŋ ni᷄ŋ ni̍, nāa̍ nya̍ wa̍ o̍ bīyɔ̄ɔ̍ ni᷄ŋ nda̍.

3“Lā so̍o̍lūū mɛ̄lɛ̄ka̍ o̍ mɛ̄lɛ̄ka̍ chēle̍ŋ o̍ ya̍ kɔ̍ɔ̍lī le̍.

4“Lā to̍o̍sīāā vēla᷅ŋ nyɛ̄ o̍ nyɛ̄ mī lā sōōlu̍u̍ ndu̍ māā mɛ̄lɛ̄ka̍ nyā le̍, nyɛ̄m wāā chōo̍ cho̍o̍ ni̍, nyɛ̄m wāā o̍ chi̍e̍ēŋndo̍ chōo̍ ni̍, nyɛ̄m wāā o̍ mɛ̄ŋnda̍ŋ bɛ̄ŋgu̍ ni̍. 5Lā tu̍ndu᷄ŋ mɛ̍lɛ̄ka̍ o̍ mɛ̄lɛ̄ka̍ chēle̍ŋ o̍ lābɛ̄ŋgu̍ ni̍ŋ le̍ ndu̍ sōōlūūwo̍ le̍, kɛ̄lɛ̄ŋgāā ni᷅ŋ te̍, mī lā sāāŋgi̍a̍l ndu̍, kāni̍ fo̍ndōle̍, ya̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, Mɛ̄lɛ̄ka̍ pāŋa̍lɛ̍i̍yo̍ ya̍ I̍ cho̍ ni̍. Wānāa̍ tu̍l la̍ lēyɛ̄ wa̍, wānāā kāŋ chūāūwāā ndāa̍ ni̍, a̍ chūāūwāā ndāā ma̍māa̍, ndu̍yɛ̍ a̍ chūāūwāā ndāā ma̍māā kāŋ chūāūwāā ndāā ma̍māa̍, dɛ̍nɛ̍ pālāa̍ ya̍ I̍ tu̍sī nda̍ chōo̍ ni̍, le̍ yɔ̄ŋ wɔ̄ɔ̍ŋ fi̍nyāā ndāā kāŋ ā tōsa̍ ko̍ŋ ndo̍. 6Kɛ̍ wānāa̍ ka̍a̍lā ya̍, ndu̍yɛ̍ mā tōsā nyɛ᷅ ya̍ I̍ di̍mūl nda̍ wo̍ wa̍, wānāā kāŋ chūāā ndāa̍ ni̍, a̍ chūāā ndāā ma̍māa̍, mbō kūɛ̄ a̍ lāchī kɛ᷅, kāālāa̍ ya̍ I̍ hi̍a̍ū la̍chi̍ a̍ nda̍ chɔ̄mndo̍ le̍ te̍le̍ŋ o̍ te̍le̍ŋ ni̍.

7“Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍. Wānā o̍ wānā ve̍e̍lū dīōlā nīla̍ŋ o̍ fo̍ndō fu̍u̍wo̍ chōo̍ le̍. Wānā o̍ wāna̍ ve̍e̍lu̍ dīōlā nīla̍ŋ o̍ fo̍ndō fu̍u̍wo̍ chōo̍ pɛ̍, ya̍ Mɛ̍lɛ̄ka̍ Ya̍a̍wɛ̄ɛ̄, dɛ̍nɛ̍ pa̍lāa̍ ya̍ I̍ tu̍sī ndu̍ chōo̍ ni̍.

8“Lā lōōnu̍ŋ a̍ pāa̍le̍ nīle̍ pɛ̍ŋgīāāle̍ŋ mī lā kɛ̄si̍ le̍ŋ māā pāa̍le̍ kāsī. 9Lā nɔ̄ pālɛ̍i̍ ī ŋɔ᷄mpu᷅m o̍ lɔ̍ɔ̍ bɛ̄ŋgu̍ le̍ wa̍lta̍ nyāla̍ŋ tōsāa̍. 10Kɛ̍ o̍ pāa̍le̍ ŋɔ̍mmɛ̍ū le̍ŋ chōo̍, lā to̍sā wa̍li̍ o̍ wa̍li̍ le̍cho̍ō le̍, fo̍ndōle̍, ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, pāa̍le̍ nīle̍ pɛ̍ŋgīāāle̍ŋ le̍ cho̍ le̍ŋ ni̍. Pāa̍le̍ le̍ŋ, wānā o̍ wānā nɔ̍ mā to̍sa̍ wa̍li̍ o̍ wa̍li̍ le̍cho̍ō le̍, nya̍ pi̍la̍ ni̍, chūāūwāā nyāa̍ ni̍, bu̍ɛ̍i̍yāā nyāā pi̍a̍a̍ndūa̍a̍, a̍ ā lāāndūa̍a̍ ni̍, nāūvāā nyāā wa̍a̍ ni̍, wānāā lēkāa̍wa̍a̍ cho̍ nya̍ tɛ̄ɛ̄ŋ o̍ lɛ̄ŋndē nyāle̍ŋ ni᷄ŋ nda̍ ni̍, lā to̍sā wa̍li̍ o̍ wa̍li̍ pa̍a̍le̍ le̍ŋ te̍. Lā nɔ̄ mī lā pɛ̄ŋgi̍ o̍ pāa̍le̍ le̍ŋ. 11O̍ pālɛ̍i̍ ŋɔ̍mpu᷅mnde̍ bɛ̄ŋgu̍ ya̍ Mɛ̄lɛ̄ka̍ Ya̍a̍wɛ̄ɛ̄ to̍o̍si̍a̍a̍ ɛ̄chɛ̍nɛ̄, a̍ chi̍e̍ēŋndo̍, a̍ pēē mɛ̄ŋmā īhɛ᷄llo̍, a̍ nyɛ̄ o̍ nyɛ̄ cho̍ o̍ nyɔ̄ɔ̍ŋ mu᷅ŋ ni᷄ŋ ni̍. O̍ pāa̍le̍ ŋɔ᷄mmɛ̍ūle̍ŋ chōo̍ mi̍ pɛ̍ŋgī. Le̍ sa̍bū kōŋ ya̍ Mɛ̄lɛ̄ka̍ Ya̍a̍wɛ̄ɛ̄ ya̍ I̍ dɔ̍ū pāa̍le̍ŋ nde᷅ŋ sa̍lā ni̍, mi̍ si̍i̍ŋgūū le̍ŋ pāa̍le̍ nīle̍ kāsī.

12“Lā ke̍ fi̍nyāā nyāa̍ a̍ kālāa̍ nyāa̍ bɛ̄ɛ̄le̍ŋ, ko̍ŋ to̍sā ni̍ mī lā vīōū yōōmū o̍ lɛ̄ŋndē ya̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ cho̍ nya̍ kīo̍o̍ le̍ŋ ni᷄ŋ.

13“Lā di̍ī wāna̍ chi̍o̍o̍ o̍ fo̍ndō fu̍u̍wo̍ chōo̍ le̍.

14“Lā su̍u̍ndā nya̍ wāna̍ nya̍ cho̍ o̍ nɔ̄ ni̍ŋ nya̍ ndu̍ le̍ wo̍ le̍.

15“Lā yɔ᷅ŋ lēvīī le̍.

16“Lā tɛ̍ndāl chāa̍ŋ nya᷄ se̍īlē lāka̍fā le̍.

17“Lā lu̍ɛ̍ī lēhɔ̄l o̍ nyɛ̄ wānā le̍. Chīɛ̄ī ndɔ̄ ni̍, la̍a̍ ndɔ̄ ni̍, bu̍ɛ̍ī ndɔ̄ pi̍a̍a̍ndū, kɛ̄lɛ̄ŋgāā ō lāāndū ni̍, nāū ndɔ̄ ni̍, sōfɛ̍lɛ̍ ndɔ̄ ni̍, kɛ̄lɛ̄ŋgāā nyɛ̄ o̍ nyɛ̄ ndɔ̄ che᷅le̍ŋ, lā lu̍ɛ̍ī ndu̍ lēhɔ̄l te̍.”

A̍ mɛ̄ɛ̍ sīōōŋnde̍ bīī wāŋnda̍ I̍sɔ̄lūɛ̄ī a̍ Mɛ̄lɛ̄ka̍ yɛ̍ o̍kɔ̄ɔ̄

(Dītɔ̍nɔ̍mi̍ī 5:22-33)

18O̍ ko̍ŋ kɔ̍ɔ̍lī, mɛ̄ɛ̍ wāŋnda̍ I̍sɔ̄lūɛ̄ī a̍ tūe̍i̍ bu̍lu̍ bɛ̍ndōo̍ sūɛ̍i̍, ndu̍yɛ̍ mā chā īmālākā mālākɛ̄i̍ wa̍ yɔ̄nɔ᷄ŋndo̍ o̍ pēmbēi̍ chōo̍, a̍ ta᷅ŋma̍ wa̍ dēŋīo̍o̍ wa̍ŋ, ndu̍yɛ̍, a̍ kūmi̍i̍ wa̍ hēlɔ̄ɔ̍ ītūkpā tūkpɛ̄i̍ye̍, nda̍ kpo̍u̍ ma̍ mīīŋgū kɔ̄ɔ̄lī la̍nda̍ŋ. Ma̍ nyīīya̍ kpa̍ kpa̍ a̍ sīōōŋīī bɛ̄ndūi̍ wa̍ nda̍ ve̍. 19Mi̍ wāŋnda̍ dīmūl Mūu̍sē āā, “Yāndi̍i̍ Mūu̍sē, di̍mu̍l nāa̍ Mɛ̄lɛ̄ka̍ ō wa᷅ lɛ̄ sūɛ̍i̍ nāa̍ na̍a̍ chūā sa̍kpō le̍. Nūm pi̍la̍ wa̍ ni᷅ŋ sūɛ̍i̍ nāa̍ nāa̍ chūā, mī ŋ̄ yāŋ nu̍m nīla̍ŋ. Tē ō cho̍ ko̍ŋ tē, tē ō hīōū lāchī a̍ sūɛ̍i̍ nāa̍ na̍a̍ chūā pɛ̍, na̍a̍ kpo̍u̍ ŋ̄ chō wu᷄.”

20Mi̍ Mūu̍sē di̍mūl nda̍ āā, “Lā yɔ᷅ŋ īsīōōŋ te̍. Tōfāa̍ ko̍ni̍ Mɛ̄lɛ̄ka̍ hīŋ nya̍ ni̍. Ko̍ŋ to̍sa̍ ni̍ mī sīōōŋnde̍ bīī nya̍ a̍ ndu̍, lā to̍sā yɔ᷅ŋ wɔ̄ɔ̍ŋ te̍.” 21Nda̍ kpo̍u̍ ma̍ sīm kɔ̄ɔ̄lī kɔ̄ɔ̄lī la̍nda̍ŋ. Mūu̍sē ndu̍ pīlɛ̍ kpe̍ sɔ̍ɔ̍ŋgu̍u̍ o̍ ha̍la̍ īkpūŋgbāa̍ īkɛ̄i̍ ni̍ nāa̍ Mɛ̄lɛ̄ka̍ wa̍ wa̍.

Sāwāla̍ Mɛ̄lɛ̄ka̍ yɔ̄ŋgu̍ a̍ ma̍āŋndo̍ o̍kɔ̄ɔ̄ la̍ŋ

22O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl Mūu̍sē āā, “Di̍mūl wāŋnda̍ I̍sɔ̄lūɛ̄ī māā nyɛ̄ ya̍ Mɛ̄lɛ̄ka̍ Ya̍a̍wɛ̄ɛ̄ di̍mi̍ wo̍ cho̍ ho̍ō ni̍. ‘Wāŋnda̍ I̍sɔ̄lūɛ̄ī, nya̍ pīla̍ lā chē a̍ hɔ̄ltē nyāle̍ŋ pɛ̍ɛ̍ŋ mɛ̄ɛ̍ ya̍ Mɛ̄lɛ̄ka̍ lo̍ ɛ̄chɛ̍nɛ̄, mi̍ su̍a̍ā nāa̍ nya̍ chūā yɛ̍. 23Le̍la̍ŋ ō fūla̍ o̍ ya̍ Mɛ̄lɛ̄ka̍ kɔ̍ɔ̍lī, lā to̍o̍sīāā nyɛ̄ o̍ nyɛ̄ chēle̍ŋ mī lā sōōlu̍u̍ ndu̍ māā mɛ̄lɛ̄ka̍ nyā le̍. Lā to̍o̍sīāā nyɛ̄ o̍ nyɛ̄ a̍ ka̍ni᷄ŋ hu̍mbū, kɛ̄lɛ̄ŋgāā a̍ ko̍o̍līi̍yo̍ŋ mī lā sōōlu̍u̍ ndu̍ sɔ̍ŋgɔ̍ nūu̍ le̍. 24Lā tōōsi̍a̍a̍ ma̍āŋndo̍ a̍ pūūlōo̍ le̍ sa̍lāla̍ŋ sōlīo̍o̍ o̍ ya̍ lo̍. Chɔ̄lū o̍ chɔ̄lū nya̍ nɔ̄ le̍ sa̍lālā lūāmāāla̍ŋ sōlīo̍o̍ o̍ ya̍ lo̍ a̍ sa̍lālā kɔ̄l nyūlūla̍ŋ, sāā ni̍, nāū ni̍, nda̍ kpo̍u̍ o̍ ma̍āŋ kōŋ chōo̍ nya̍ nɔ̄ ni̍ mī lā sōli̍ nda̍ sa̍lālā la̍ŋ. Ndu̍yɛ̍, fo̍ndā ya̍ hɛ̍li̍ pɛ̍ le̍ ya̍ wāa̍ sōōlūūwo̍ lo̍ŋ, I̍ cho̍ hūnɔ̄ɔ̄ o̍ fo̍ndāŋ ko̍ŋ mī I̍ hu̍ŋ wa᷅ a̍ nya̍ lātūlu̍ ndu̍yɛ̍ mī dɔ̍ū nya̍ sa̍lā lo̍ŋ. 25Ndu̍yɛ̍, tē lā wa̍ pɛ̍ ma̍āŋ lāpōūwo̍ tāŋgūllo̍ le̍ sa̍lāla̍ŋ sōlīo̍o̍ o̍ ya̍ lo̍ pɛ̍, lā ta̍ŋgūl ndu̍ a̍ pōūtā sīālāā la̍ŋ te̍, kāni̍ fo̍ndōle̍, pōū o̍ pōū nda̍ sɛ̄l a̍ nyɛ̄m pīāāndo᷄ŋ pɛ̍, tē lā tāŋgu̍l ma̍āŋndo̍ a̍ ndu̍ pɛ̍, ma̍āŋ ko̍ŋ ō ve᷅ o̍ bɛ̍ndāā ya̍ Mɛ̄lɛ̄ka̍ o̍ hɔ̄l le̍ sa̍lā sōlī lēchōo̍ le̍. 26Ndu̍yɛ̍, tē lā tāŋgūl ma̍āŋndo̍ pɛ̍, lā ha̍ndū lābi᷅ŋ le̍ hēlɔ̄ɔ̄ lēchōo̍ le̍, yɔ̄ŋi̍ nya̍ lo̍ hēlɔ̄ɔ̍ lo̍ŋ mī wāŋnda̍ chē nya̍ lābɛ̄ŋgu̍ni̍ŋnda̍ŋ.’ ”

Currently Selected:

Ɛ̍sɔ̍dɔ̍ɔ̄ 20: YM

Highlight

Copy