Joshuwa 3
3
Wanthu wa Izraeli aniyambuka Jorodhani
1Mangwana yache machibese-bese Joshuwa naa Izraeli wentse, adachoka ku Shitimu, achiyenda ku Jorodhani, adakhalako pamwepo anati ayambuka. 2Pakumala kwantsiku zitatu manduna yadapita pakati pamatenti, 3yachiwuza wanthu kuti, “Mukawona Bhokisi la Chibvano la Chawuta Mulungu wanu, latakuliwa naanyantsembe wa Mulungu wachi Levi, pamwepo imwe muchoke pambuto zanu muliteyele, 4kuti imwe mudziwe njila yamun'zafamba nayo, pakuti imwe munati mwafamba nanjila imweyi. Koma pazasale mbuto pakati pa Bhokisi la Chibvano nayimwe, koma pazakhale mbuto yamphimo yamakhalo masawuzande mawili pakati payimwe nalo, lekani kufika pafupi nalo.”
5Joshuwa adati kwawanthu, “Bzicheneseni, pakuti mangwana Chawuta an'zachita bzidabwiso pakati panu.” 6Joshuwa adati kwaanyantsembe wa Mulungu, “Takulani Bhokisi la Chibvano, muyende patsogolo pawanthu. Iwo adatakula Bhokisi la Chibvano achiyenda patsogolo pawanthu.”
7Chawuta adati kwa Joshuwa, “Lelo niniyamba kukukuza pamaso paa Izraeli, adziwe kuti, ndina iwe bzandidachita kwa Mozisi.” 8“Wuza anyantsembe wa Mulungu antakula Bhokisi la Chibvano kuti akafika mphepete mwa Jorodhani ayime.” 9Joshuwa adati kwawana wa Izraeli, “Bwelani pafupi mubve mafala yakulewedwa na Chawuta Mulungu wanu.” 10Joshuwa adati, “Dziwani kuti, Mulungu wamoyo ali pakati panu, antaza lini kukuthamangisilani a Kenani naa Hiti naa Hivi naa Perezi naa Girigashi naa Amori naa Jebhusi. 11Wonani, Bhokisi la Chibvano la Mfumu wapantsi pentse, liniyamba kuyenda patsogolo panu, pamunkayambuka Jorodhani. 12Nakutenepo imwe sankhulani amuna khumi naawili kunshowo waa Izraeli, panshowo wokha-wokha sankhulani mwamuna m'bodzi. 13Anyantsembe wa Mulungu antakula Bhokisi la Chibvano la Chawuta, Mfumu wapantsi pentse, nzayo zawo pazinkaponda m'madzi mu Jorodhani, madzi yakhayelela kuchoka chakudzulu yankayima, yachigwezekana kuchita mudwi ubodzi.”
14Nakutenepo wanthu adafuluka pamatenti yawo, achiyenda kayambuka Jorodhani, achitsogolelewa naanyantsembe wa Mulungu akhadatakula Bhokisi la Chibvano. 15Anyantsembe wa Mulungu akhadatakula Bhokisi la Chibvano paadafika pa Jorodhani, paadachuza minyendo yawo mphepete mwamadzi, madzi yamu Jorodhani yadayima, (madzi yamu Jorodhani yakhafashukila nthawe yentse yakukolola), 16madzi yakhachoka nachakudzulu yadagwezekana kuchita mudwi, kutali paguta la Adhamu lili pambali pa Zaretani. Madzi yakhayelela yachiyenda kunyanja ya Arabha, nyanja yamunyu, yadagwatikilatu. Wanthu adayambuka napakhadanyanganana na Jeriko. 17Anyantsembe wa Mulungu, akhatakula Bhokisi la Chibvano la Chawuta adayima pakuwuma pakati pa Jorodhani, kufikila nshowo wentse wa Izraeli wamala kuyambuka.
Currently Selected:
Joshuwa 3: KUNDA
Highlight
Copy
Compare
Share
Want to have your highlights saved across all your devices? Sign up or sign in
Bhaibheri reChikunda © Bible Society of Zimbabwe
