Sèfanìa 3
3
Ɖo Yèruzàlɛm ŋuti
1Hèlu na èdù jè àgla,
èdù màkɔ̀ mà-kɔ kè sɛ̃na èta mèa.
2E gbe èto ɖoɖo Tɔhonɔ̀,
eye mu lɔ̃nà Tɔhonɔ̀ be ètodɔ̃ ò.
Mu dojì ɖo Tɔhonɔ̀ ŋuti ò,
eye mu dɔ̃ gogo yebe Mawu ò.
3Yebe àgbònùglawo nyi jãŋùta ɖègbèwo,
yebe kòjoɖotɔwo nyi fìɛ̃si gbète
kèwo mu gblena ènu ɖe ɖɛ na èŋùkègbè ò.
4Yebe gblɔ̃ɖɛtɔwo nyi gànu gbãgbã,
yebe hũbonɔwo dovlo kɔ̀kɔ̀ɛpea,
eye wo ɖìgbɔ èsea.
Ènuwunyà
5Tɔhonɔ̀ lè jɔ̀jɔɛ lè èdùa mè.
Mu wɔ̀nà èvuɛ̃ ò.
E ɖona kòjo ŋùdekɛ̃nyɛ̃ sia ŋùdekɛ̃nyɛ
eye mu nɔ̀nàtè, ne èŋù bu ne kè ò.
Vɔ̀a, àmè màjɔ̀ màjɔ mu jèsi ŋùkpɛ̃ ò.
6“Mù crɔ̃ dùkɔ̃wo,
eye woabe àgbògbòwo kãkã.
Mù gble woabe èmɔwo ɖo àma,
eye àmè ɖekpe mu le to woa ji ò.
Woabe èdù gãwo gbã,
àmè ɖekpe mu kpɔ̀tɔ̀ lè woa mè ò;
àmè kui ɖèka ŋutɔ cã mu kpɔ̀tɔ̀ ò.
7Mù gblɔ̃ na ɖokoe nyè be:
'Ne wo si mù, eye wo lɔ̃ ètodɔ̃a,
eŋuã, dùkɔ̃a be nɔ̀pe mu la crɔ̃ ò,
eye ènu kèwo mù ɖo ɖo e ŋutia,
ɖekpe mu la jɔ̀ ɖo e ji ò.'
Gãkea, wo gbe, gbà lè èvuɛ̃ wɔ̀wɔ ji
lè woabe wɔ̀nawo keŋu mè.”
8Tɔhonɔ̀ be: “Mì mu gbà vɔ̃ ò!
Ɖoa, gbè kè gbè mù la sitè,
la sɔ ènyà ɖo mìa ŋutia,
mù ɖo è be mù la bɔ̀ dùkɔ̃wo,
mù la yɔ èfìɔduwo bɔ̀,
ne ma sɔ àpe èjìbibi be àdã,
kɔ̀ àpe àdɔ̀mèze ɖo woa ji;
ɖoa, ŋuhuã nyè be fìɔfìɔ be èzò
la fiɔ̃ xixe kplògòdòa.
Dùkɔ̃wo be èjìmètɔtrɔ
9Ekèa yomè a,
mù la kɔ̀ dùkɔ̃wo be ènuyiwo ŋuti,
àleke be woawo keŋu,
woa teŋu yɔ Tɔhonɔ̀ be nyikɔ,
la nɔ sɛ̃ ɛ̀, àsi lè àsi mè.
10So kaka Ètiopìa be ètɔ̀sàsra godo kea,
àmè kèwo sɛ̃nà mù,
àmè kèwo nyi dùkɔ̃ nyè kè kãhlɛ̃a
be nyɔ̃nù be jìjimèviwo,
la hɛ̃ vɔsa va na mù.
Izràɛlviwo be èjìmètɔtrɔ
11Gbè ŋua gbèa,
Wo mu la ɖù ŋùkpɛ̃
ɖo èvuɛ̃ kèwo keŋu
wo wɔ̀ ɖo ŋuti nyèawo ta ò.
Ɖoa, gà ŋua mèa,
mù la ɖè àmè kèwo keŋu
jrana ku jìjɔɛawo to lè mìa dòmè,
eye wo mu la gbà yigò
lè Èto Kɔ̀kɔ̀ɛ#3.11 Kpɔ Eze 20.40 ku ŋɔ̀ŋlɔ̃ kè kplɔ̀ ɛ̀ do a. nyèa ji ò.
12Eye mù la gble àmè fàfawo
ku àmè kèwo bɔ̀bɔ̀nà woa ɖokoe,
eye wo donajì ɖo Tɔhonɔ̀ ŋutia
ɖo mìa dòmè.
13Izràɛlvi kpɔ̀tɛawo mu la gbà wɔ̀ èvuɛ̃ ò.
Wo mu la gbà nɔ ɖàjè ò.
Àmè ɖe mu la gbà sè àmè bèble lè woa nu ò.
Wo la ɖù ènu, la mlɔ̃ ànyi,
eye àmè ɖe mu la do vɔ̃vɔ̃ na wo ò.
Wo gbìgbɔ̀ likè Yèruzàlɛm
14Sò àyo, Ziɔ̀n nyɔ̃nùvi!
Izràɛl dùkɔ̃, kpà àbòbo!
Sɔ àpo èjì blibo gli ku jìjɔɛ,
Yèruzàlɛm nyɔ̃nùvi!
15Tɔhonɔ̀ ɖè ètodɔ̃a jo!
E nyà kɛ̃tɔa ɖo ègbe!
Tɔhonɔ̀, Izràɛl be èfìɔa lè ku wò.
Wò mu gbà ɖo èvuɛ̃ la vɔ̃ ò.
16Gbè ŋua gbèa,
wo la gblɔ̃ na Yèruzàlɛm be:
'Ziɔ̀n, mù gbà vɔ̃ ò!
Àlɔ̀ wò mu gbà gbɔjɔ ò!
17Tɔhonɔ̀, àpo Mawu lè ku wò.
E ɖo ŋusɛ̃ kpata kè hlùɛ̃nà àmè gãa,
e la kpɔ jìjɔɛ gã ɖe so ŋuti wò.
E la sɔ yebe lɔ̃lɔ̃ fa èjì na wò.
E la sɔ èhàjìji sò àyo ɖo ŋuti wò.
18Mù la fa àkɔ na àmè kèwo nɔ̀ boo
na àzã gãawo,
mù la bɔ̀ wo ɖo ŋuti wò,
wo mu la gbà nyi àgbã
kè la kã ŋùmè na wò ò.
19Kpɔɖa, lè hùe ŋua nua,
mù la kpãŋùkɔ̀ àmè kèwo keŋu
le tɛ wò ɖo ànyia,
mù la xɔ̀ na àlɛ̃ kèwo le tɔ̃boawo
mù la bɔ̀ ekèwo kãhlɛ̃awo,
mù la kafu wo,
eye mù la na wo gogo,
lè ànyigbã ɖekpekpe kè ji
wo do ŋùkpɛ̃ wo lèa ji.
20Lè hùe ŋua nua,
mù la cã mì bɔ̀.
Lè hùe ŋua nua,
mù la kplɔ̀ mì gbɔ̀ va àxue,
mù la kafu mì,
eye mù la na mì gogo
lè ànyigbã ji dùkɔ̃wo keŋu dòmè.
Mù la gbà trɔ mìabe nyɔnaa na mì,
lè mìa ŋutɔwo mìabe ŋùmè!'”
Tɔhonɔ̀ ye gblɔ̃ ɛ̀.
Mina Bible © Bible Society of Togo, 2014.