Sèfanìa 2
2
Gblɔ̃ɖɛtɔa be wo ne trɔ èdɛ̃
1Mì bɔ̀, ne mìa yì mìa dokoewo mè kpɔ,
dùkɔ̃, èŋù màkpɛ̃tɔwo!
2Gbɔ̀xue Tɔhonɔ̀ be ɖoɖo a ne va ɖo!
Gbɔ̀xue e mè so nu be àya ne kplɔ̀ mì yì,
lè ŋùkèkè ɖèka ji, Sìgbè èbè pupu kè nène,
gbɔ̀xue Tɔhonɔ̀ be àdɔ̀mèze gãa
ne va jè mìa ji!
Gbɔ̀xue Tɔhonɔ̀ be àdã be ŋùkèkèa
ne va jè mìa ji!
3Mì ji Tɔhonɔ̀,
mì, àmè kèwo keŋu bɔ̀bɔ̀ mìa ɖokoe
lè ànyigbã jia
mì, àmè kèwo keŋu zɔ̃nà
ɖo yebe ɖoɖo ku ègbèɖèɖe nuawo,
mì ji jɔ̀jɔɛwɔ̀wɔ, mì ji ɖokoebɔ̀bɔ,
èta mu nyɔ òa,
Tɔhonɔ̀ be àdɔ̀mèze gbèa,
wo la wla mì.
Tɔhonɔ̀ pò àdègbè ɖo èwèɖoxɔ̀petɔwo ŋuti
4Gazà-nyigbã jiviwo la ci àgba,
wo la gbã Àskalɔ̀n-dùa,
wo la nyà Asdɔ̀d-dù mèviwo,
to lè woa de, dɔ̃ŋùkusu jàse,
eye wo la hɔ̃ Ekrɔ̀n-dùa jo.
5Hèlu na mì, mì àmè kèwo lè àpù toa!
Kretà-dùkɔ̃wo, Tɔhonɔ̀ be ènyà sitè ɖo mìa ŋuti!
Kanàn-nyigbã kè ji Filistìtɔwo lèa,
Tɔhonɔ̀ gblɔ̃ be: “Mù la kãkã mì,
eye àmè ɖekpe mu la kpɔ̀tɔ̀ ò!”
6Àpù to-nyigbã kè ji Kretàtɔwo lèa
la trɔ zũ tèpe na àlɛ̃kplɔ̀tɔwo ku àlɛ̃kpawo.
7E la nyi àmè kèwo kpɔ̀tɔ̀
lè Yudà be àxuedo mèawo tɔ̀.
Funua ye wo la kpɔ èlãnyìpe lè.
Fìɛ̃si mèa, wo la mlɔ̃ ànyi ɖo Àskalɔ̀n be àxuewo mè.
Tɔhonɔ̀, woabe Mawu la lebè na wo,
eye be la trɔ woabe nyɔnaa, na wo.
Ɖo èwèzɛ̃petɔwo ŋuti
8“Mù sè Mòabtɔwo be èzũwo,
ku Amɔ̀nviwo be àlɔmèɖèɖewo.
Wo le zũ dùkɔ̃ nyè,
eye wo le pò àdègbè ɖo woabe ànyigbã ŋuti.”
9Tɔhonɔ̀, àhùadù Mawu,
Izràɛlviwo be Mawu a gblɔ̃ be:
“Ekèa ŋutia, mù tà àpe àgbè be
Mòab-nyigbã la trɔ sìgbè Sodɔ̀m nène,
eye Amɔ̀nviwo la trɔ sìgbè Gòmɔrà nène!
Wo la nyi àŋùja-nyigbã, èjè-nyigbã ku zògbè-nyigbã kòkòɖàbì!
Dùkɔ̃ nyè mèvi kpɔ̀tɛawo la hlà wo!
Woabe ànyigbã la nyi ècrɔ̃nu
na àmè kèwo kpɔ̀tɔ̀ lè dùkɔ̃ nyè mèawo.
10Ekèa la nyi woabe ègòyiyi be èfɛ̃tu,
woabe èzũwo ku àlɔmèɖèɖe
lè Tɔhonɔ̀ Ŋusɛ̃kpatatɔa be dùkɔ̃a ŋuti be àjɔ̀!
11Tɔhonɔ̀ la sɛ̃ ètamè ɖo woa ŋuti,
eye, wàlɛbɛ kè be la crɔ̃ ànyigbã ji vòduwo keŋuã,
dùkɔ̃wo kpata, lè àgowo keŋu ji,
àmè sia àmè, lè yebe ànyigbã ji,
la jè èɖɛ̀ na ɛ̀.
Ɖo àpùgotɔwo ŋuti
12“Mìa Ètiopìatɔwo cã,
èwui nyè la crɔ̃ mì!”
Ɖo àvegotɔwo ŋuti
13E la vlũ àlɔ̀ ɖoɖa àvego,
la kãkã Àsirìa,
e la gble Ninivè ɖɛ gbãgbã,
eye Ninivè la pu ɖɛ sìgbè zògbè nène.
14Funua ye èlãhawo ku ègbemèlãwo
la va nɔ cɔ̃ àkɔ ɖo.
Elã vòvòvòwo, ètɔ̀-kpàfiɔ̃wo ku hlɔ̃màdɛ̃wo
la nɔ ci yebe sɔtiawo tamè dɔ̃.
Woabe fãfãwo la nɔ ɖì to flɛsɛ̀wo nu.
Lè àgboa nu kea,
èglìkpo gbãgbãwo kpò ye la nɔ̀ ànyi,
eye sedà be èxɔ̀tùtiwo la ci àma.
15Èɖe mà sɔ lè e mè be èdù, sù ye ɖokoe si bɔ̀kɔ̀,
kè gblɔ̃nà na ye ɖokoe be: “Ènyè kpò ye!
Àmè ɖekpe mu gbà lè, sɔ̀ ku mù òa!”
Ye nyi ekèa?
Leke be va trɔ zũ èglìkpo gbãgbã ɖèɖe lekea ò?
E trɔ zũ zògbè, ègbemèlãwo be nɔ̀pe!
Àmè ɖekpekpe kè la to yebe àxàda mè va yìa,
la nɔ kò è, la nɔ hũhũ àlɔ̀.
Mina Bible © Bible Society of Togo, 2014.