Titò 3
3
Kristòtɔ̀ be àgbè nɔ̀nɔ
1Đo ŋùku e ji na èhamètɔwo be woa bɔ̀bɔ̀ èta ɖo jiɖùɖuwo ku àmè kèwo ɖo ŋusɛ̃ ɖo woa jiawo gɔ̃mè. E jè be woa ɖo èto wo, eye woa nɔ̀ ŋùzɔ̃ be yèwoa wɔ̀ èdɔ nyuɛ̃ ɖe sia ɖe. 2Wo mu gbà gblɔ̃ àmè ɖe be ènyà vuɛ̃, àlo woa nɔ wɔ̀ àjrè ò, vɔ̀a woa nyi àmè fàfawo eye woa sɔ bùbu tɔ̀xɛ na àmèwo keŋu lè ènuwɔ̀na ɖe sia ɖe mè. 3Đo, sãa, miawo ŋutɔ cã, ènu mà-nyatɔwo, ètotrìtɔwo ku èmɔtrãtɔwo mi nyi va yì. Mi nyi kluviwo na ènujroàmè ku jìjɔɛ donamènu vòvòvòwo. Mi zã miabe hùenuwo na ènuvuɛ̃ wɔ̀wɔ kudo ŋuhuã. Eye mi lena èkɛ̃ mia nɔ̀nɔwo. 4Vɔ̀a ekè Mawu, mia Hlùɛ̃tɔ ɖè yebe hòmèfà, kudo àlekè be lɔ̃ àgbètɔwo ɖoa, fiɔa, 5e hlùɛ̃ mi gã. Mu nyi èdɔ jɔ̀jɔɛ kè mi wɔ̀a ŋuti ye ò, vɔ̀a ŋuzĩzĩ ye be ku na mi. E gbìgbɔ̀ jì mi to èsì kè be lè na mia ji, eye Gbɔ̃gbɔ̃ Kɔ̀kɔ̀ɛ gbà wɔ̀ mi yeye. 6Mawu kɔ̀ yebe Gbɔ̃gbɔ̃ Kɔ̀kɔ̀ɛ a ɖo mia ji fàa, to Yesù Kristò mia hlùɛ̃tɔa ji, 7àleke be, lè yebe ŋuzĩzĩ kè be ku na mia mèa, bèa bù mi àmè jɔ̀jɔɛwo, ne mia kpɔ àgbè màvɔ, kè mi le ɖo ŋùkuvia. 8Ènyà kèa nyi nyàwo.
Mù ji be wòa tɛ ègbè ɖo ènyà kèawo ji veve ɖe, àleke be àmè kèwo va xɔ̀ Mawu ji sè a, woa ɖo susu be yèwo wɔ̀ èdɔ nyuɛ̃wo. Ekèawo nyi ènu nyuɛ̃wo, eye àlè lè woa mè na àgbètɔwo. 9Vɔ̀a, mù le ji be wòa na àsà sùkunɔ̀-nyàwo dɔ̃dɔ̃, jìjimèhɛ̃hlɛ̃-fiɔ, àmèwo dòmè màma kudo àjrè wɔ̀wɔ ɖo èsea ŋuti. Àlè ɖekpe mu lè woa mè ò. Yàkànuwo sɔ̃ŋu kpò wo nyi. 10Ne wò gbe ènyà na àmè kè hɛ̃nà màma va àmèwo dòmè, zè ɖèka àlo zè èvè, eye be gloa, ɖè àsi. 11Nya ɛ̀ be àmè ŋua be susu mè do vìvìti. E wɔ̀nà ènuvuɛ̃ fàa, sɔ gblena hùɛ do ye ɖokoe.
Pòpòfiɔ mlɛ̃awo
12Ne e nyi be mù dɔ̃ Artemà àlo Tikikò ɖoɖa gbɔ wòa, jè àgbàgba veveɖe ne wòa va gbɔ nyè lè Nikopolì, ɖo mù ɖo è be ma nɔ̀ funua lè àvìvɔ hùenu. 13Jè àgbàgba ne wòa ɖo èsenyatɔ Zenà kudo Apolòs cã kaba, eye wòa kpɔ e gbɔ be ènu ɖekpe mu gbà hùe do wo lè èmɔa ji ò. 14Na mia nɔ̀vi lè Kristò mèwo, woa kpla èdɔ nyuɛ̃ wɔ̀wɔ, àleke be woa teŋu na àlɔ̀do àmè kè lè èhiã mèa. Wo mu ɖo la zã àgbè yàkà yàkà ò.
15Àmè kèwo keŋu lè gbɔ nyè lè fikèa do ègbè ɖoɖa wò. Mi do ègbè na àmè kèwo lɔ̃ mi lè xɔ̀sè mèa nyuɛ̃ ɖe.
Mawu be màje ne nɔ̀ ku mìa kpata.
Mina Bible © Bible Society of Togo, 2014.