Titò 2
2
Ènufiɔfiɔ nyuɛ̃tɔa
1Vɔ̀ wò yaa, fiɔ ènu kè sɔ̀ ku ènufiɔfiɔ nyuɛ̃tɔa. 2Fiɔ ŋusù sĩsĩwo be woa nyi àmè kèwo la le woa ɖokoewo nyuɛ̃ ɖe, àmè kèwo nɔ̀nà ŋùsà ɖo ènu ŋuti wɔ̀nà, àmè kèwo wɔ̀nà susu ŋuti dɔ nyuɛ̃ ɖe, àmè kèwo la likè lè xɔ̀sè ku lɔ̃lɔ̃ mè, eye wo la nɔ hɛ̃ àdòdò. 3Fiɔ nyɔ̃nù sĩsĩwo cã be woa nɔ̀ àgbè kɔ̀kɔ̀ɛ. Mu lè be woa nyi àmègɔ̃mèɖùtɔwo, àlo àhàsunùtɔwo ò. E jè be woa fiɔ ènu nyuɛ̃, 4àleke be woa teŋu fiɔ tùgbɛ̀jɛwo be woa lɔ̃ woa srɔ̃wo kudo woabe èviwo. 5E jè be woa nyi àmè kèwo wɔ̀nà susu ŋuti dɔ nyuɛ̃ ɖe, àmè kèwo kɔ̀, àmè kèwo wɔ̀nà àxomè dɔ, àmè kèwo wɔ̀nà àdɔ̀mènyuɛ̃ eye wo bɔ̀bɔ̀nà èta ɖo woa srɔ̃wo gɔ̃mè, àleke be àmèwo mu gbà gblɔ̃ bùsu-nya ɖekpe so Mawu be ènyàa ŋuti ò.
6Nène a kea, pò ètoɖo na ɖèkajɛwo cã be woa ɖù woa ɖokoewo ji. 7Èwò ŋutɔ, jè àgbàgba ne wòa na kpɔwɔɛ nyuɛ̃ lè ènu sia ènu kè wò la wɔ̀a mè. Lè àpo ènufiɔfiɔ mèa, wòa nyi ànùkuame ku bùbume. 8Ènyà gbɔ̃gblɔ̃ wòwo ne nɔ̀ jɔ̀jɔɛ ɖe, àleke be àmèwo mu gbà sitè ɖo àpo ènyàwo ŋuti ò. Ekèa la na be èŋù la kpɛ̃ àmè kèwo la sitè ɖo ŋuti wòa, ne wo mu kpɔ ènyà vlo ɖekpe la gblɔ̃ so mia ŋuti òa.
9Fiɔ sumɔ̃viwo cã be woa bɔ̀bɔ̀ èta ɖo woabe àpetɔwo gɔ̃mè, eye ènu sia ènu kè wo la wɔ̀a, bèa jè woabe àpetɔwo be ŋùmè. Wo mu gbà ɖo ènyà ŋuti na wo àmèmàbui tɔ̀ ò. 10Wo mu gbà fĩ ènu ɖekpe ò, vɔ̀ bòhũa, woa ɖè è fiɔ be ànùkuame kèwo ji wo la teŋu kã ɖo bliboawo ye yèwo nyi, àleke be ènu sia ènu kè wo la wɔ̀a, bèa do bùbu Mawu, mia hlùɛ̃tɔa be ènufiɔfiɔa ŋuti.
11Đo Mawu ɖè è fiɔ blibo be yè ji be yèa ku ŋuzĩzĩ na àmè sia àmè fàa, eye yèa xɔ̀ àmè sia àmè ɖo àgbè. 12Àlekè Mawu ku ŋuzĩzĩ na mi ɖoa, le fiɔ mi be mia ɖè àsi lè ènuwɔ̀na kèwo fiɔna Mawu mà-vɔ̃a ŋuti, eye mi mu la gbà jè ènu kèwo jrona mi veve ɖe lè xixe kèa mèa yomè ò. Vɔ̀ bòhũa, mia ɖù mia ɖokoewo ji, nɔ wɔ̀ ènu jɔ̀jɔɛ, eye mia zã mawume be àgbè lè xixe kèa mè. 13Fifìa, mi le nɔ̀tè, le nɔ̀tè kpɔ ŋùkèkè veve ŋua, kè ji miabe Mawu gã kudo mia hlùɛ̃tɔ Yesù Kristò la to va lè gogo mèa. 14E ye sɔ ye ɖokoe na fàa ɖo mia ta be yèa jo mi lè ènuvuɛ̃ wɔ̀wɔ ɖe sia ɖe si, ne yèa kɔ̀ mia ŋuti na yè ɖokoe, ne mia nyi yè ɖèka tɔ̀ kpò, ne mia ji veve ɖe be mia wɔ̀ ènu kè nyɔnaa ɖèɖe kpò.
15Ènu kèawo ye wò la fiɔ wo kudo hɔ̃hlɔ̃. Jè àgbàgba ne wòa do ŋusɛ̃, àlo wòa gbe ènyà na àmè kèwo le ɖo èto wòa. Mù gbà na ne àmè ɖekpe bèa do vlo wò ò.
Mina Bible © Bible Society of Togo, 2014.