Sirasid 3
3
Ɖèviwo be èdɔ na woabe àjìitɔwo
1Ɖéviwo, mì ɖo èto mìa tɔwo be ètopòɖo,
mì zɔ̃ ɖo woa ji, ne mì a gã.
2Àpetɔ a na àcɛ̀ kpàkpa ètɔ, ɖo èvi ji,
eye ènɔ̀ ɖo jèna lè èviwo gbɔ.
3Àmè kè do bùbù ètɔa ŋuti a,
la kpɔ èvùɛ̃ be sɔsɔkè.
4Àmè kè le do bùbù ènɔ̀a ŋuti a
le bɔ̀ àdɔ̀kùnu ɖɛ.
5Àmè kè le do bùbù ètɔa ŋuti a,
èviawo la do jɔ̀jɔ̀ɛ na ɛ̀,
eye Mawu la sè yebe kùefãwo.
6Àmè kè la ɖo bùbù na etɔa,
la nɔ àgbè didi. Àmè kè le ɖoto Àpetɔ a be egbea,
la na eji jeme enɔ̃a
7esumɔ̃na yebe ajitɔwo sìgbè apetɔ̀awo nène.
8Enu kewo wò le gblɔ̃ alo wò le wɔà ɖo la do
bùbù etɔwo ŋuti, eye wò la hɔ situ so e gbɔ.
9Etɔ be situ ye nyi ŋusɛ̃ lè eviwo be axue ji,
vɔ enɔ be kpɛ̃sɛ̃ gblena dodoeawo.
10Mù gba nɔ kpɔ jijɔɛ
ɖo etɔ wò be anyi jeje ŋuti o,
yebe anyi jejea ma teŋu nɔ asi hɔhɔ o.
11Etɔ be bùbù nan amè asi hɔhɔ.
Nyɔnu ke be nyagbɔ wo
cria nyi na ŋukpɛ̃ na eviawo.
12Evi nye kpe ɖo etɔ wò ŋuti lè yebe sĩsĩ me,
mù gba do veve seese ne lè yebe
àgbè ŋuke kewo me o.
13Ne yebe aye le gbɔjɔa, woa hɛ̃ adodo kudoe;
mù gba cri yebe enyà gbɔ o,
ewò ke si ŋusɛ̃ gbà kpɔtɔ lea.
14Mawu mu la ŋlɔ̃be adɔme nyuɛ̃ kewo
kpata wò le wɔ na etɔ̀ wò o,
wo la tutu apo ènuvuɛ̃wo jo.
Lè àpo nuvuɛ̃wo tèpe a,
ekè a la nyi àxue yeye ɖo èta wò.
15Lè àpo ènuxàxa be àzã gbè a,
wo la ɖoŋù wò;
àpo nuvuɛ̃wo la srè keŋukeŋu,
sìgbè èsì-kpe, lè dɔ̀ŋùkusu gbè nène.
16Vɔ̀ a, àmè kè ɖènà èkɔ̀,
lè ètɔa ŋuti a,
àmè kè dona àdɔ̀mèze na ènɔ̀a a,
Tɔhonɔ̀ la sɛ̃kpɛ̃ na ɛ̀.
17Èvi nyè, wɔ̀ ènu ku ètù jè ànyi,
lè èdɔ ɖekpekpe kè wò le wɔ̀ a mè,
eye àmè kè jè ŋùmè na Mawu a
la ɖo lɔ̃lɔ̃ na wò.
18Leke wò ɖìnyi ɖo a,
nène a ye wò ɖo la bɔ̀bɔ̀ ɖokoe wò yeŋu,
eye wò la fɔ̀ màaje lè Tɔhonɔ̀ be ŋukɔ̀.
19Àmè ɖìnyi ku àmè kpɛ̃kpɛ̃ sùgbɔ lè,
vɔ̀ a àmè kèwo bɔ̀bɔ̀nà woa ɖokoewo a
ye Tɔhonɔ̀ ɖènà yebe ènu wawlawo fiɔna.
20Ɖo Tɔhonɔ̀ be ŋusɛ̃ lòlò,
eye àmè kèwo bɔ̀bɔ̀nà woa ɖokoewo a
dona ɛ̀ ɖo èji.
21Ènu kè sɛ̃ŋu wu wò a,
mù gbà nɔ ji èmɔ̃ lè e ŋuti ò.
Ènu kè wu gã ŋusɛ̃ wòwo a,
mù gbà kã e mè kpɔ ò.
22Nɔ bù ètamè so èse
kèwo wo sɔ na wò a ŋuti;
ènu kèwo le wawla mèawo
be ènyà ɖe mu kã wò ò.
23Mù gbà nɔ hlɔ̃
ɖo wɔ̀nà kèwo wu gã wò a ŋuti ò;
ènu kè wo fiɔ wò a
wu ènu kè àgbètɔ be èvi
be ètagomè la teŋu susu a.
24Ɖo àmè sùgbɔ trã,
to woabe susu ɖèɖèwo mè,
to woabe ètagomè fàfla nyrãku a mè,
eye be gble woabe susuwo.
25Ne ŋùkuvi mu lè àsi wò ò a,
kɛklɛ̃ la dɛ̃ wò;
ne ènunyãnyã hùe do wò a,
mù gbà gblɔ̃ be yè a fiɔ ènu àmè ò.
26Èjì kè trì a, crɔ̃na lè jɔ̀gbèvuɛ̃ mè;
àmè kè lɔ̃nà àfɔ̀ku a la ci àfɔ̀ku mè.
27Ŋusù kè be èjì trì a
la va ci ènuxàxawo mè;
èvùɛ̃wɔ̀tɔ a la nɔ̀ bɔ nuvuɛ̃ ɖo nuvuɛ̃ ji.
28Èdɔ̀danu mu lè na ègòyitɔ be ènuxàxa ò,
ɖo a èvùɛ̃jɔ̀jɔ be àti ɖo èkè ɖo e mè.
29Ŋusù kè nyãna ènu a
bùnà èlododowo ŋuti kpɔ;
èto kè lè nùvò a,
ye nyi ènu kè àɖàŋùɖotɔ jina a.
30Leke èsì cina èzò kè le bì vlàvlàvlà ɖo a,
nène a ye àsi mè kèke ɖoɖa wɔ̀amènɔ̀wo gɔ
tutuna èvùɛ̃wo jo a yeŋu.
31Àmè kè sɔna ènunana
ɖona wɔ̀nà ŋuti a,
le bù ètamè so èsɔ̀mè ŋuti.
Ne mu gbà teŋu va le tɔtè ò a,
e la kpɔ xɔ̀namètɔ. #3.31 Gbìgb 15.7-11; Èlod 19.17
Mina Bible © Bible Society of Togo, 2014.