Sirasid 2
2
Xɔ̀sètɔ lè dodokpɔ mè
1Èvi nyè, ne wò be yè a sũmɔ̃ Àpetɔ a,
jràɖo, ne wò to dodokpɔwo mè.
2Do ŋusɛ̃ ɖokoe wò,
ne wò a nɔ àgbè sɔ̀sɔ̀ɛ,
mù gbà tito lè ɖokoe wò mè ò.
3Tɛ ɖo Tɔhonɔ̀ ŋuti, mù gbà dɔ̃ jo, lè ye ŋuti o,
eye wò la wu àpo àgbè ŋùkèkèwo nu
lè ènu jè e ji na àmè mè.
4Xɔ̀ ènu kèwo kpata la jɔ̀ ɖo ji wò a,
eye, wàlɛbɛ kè wo la ɖiɖi wò ɖo ànyi a,
hɛ̃ àdòdò.
5Mù gbà ŋlɔ̃be be wo dona sìka kpɔ, ku èzò ò;
àmè kèwo jènà Àpetɔ a be ŋùmè a,
wo la sɔ àmè ɖiɖi ɖo ànyi,
do woa cã kpɔ.
6Dojì ɖo Mawu ŋuti, eye e la xɔ̀ na wò;
to èmɔ̃ jɔ̀jɔ̀ɛ, eye wò a kpɔ e sinu.
7Mì, àmè kèwo vɔ̃na Àpetɔ a,
mì kã ɖo yebe ŋuzĩzĩ kuku a ji,
eye mì mu gbà trɔ̀ le e yomè,
ne mì a jè ànyi ò.
8Mì, àmè kèwo vɔ̃na Àpetɔ a,
mi kã ɖo e ji,
eye, mìabe àjɔ̀ a mu la hòe do mì ò.
9Mì, àmè kèwo vɔ̃na Àpetɔ a,
mì kpɔ èmɔ̃ na yebe nyɔ̃na,
jìjɔ̀ɛ mà-gù gbèɖe, ku yebe ŋuzĩzĩ kuku.
10Mi kpɔ jɔ̀jɔ̀mè kèwo va yì a ɖa be:
àmè kè ye dojì ɖo Àpetɔ a ŋuti,
eye be kpɔ ŋùkpɛ̃ kpɔ ò?
Àlo, àmè kɛ ye sumɔ̃ Àpetɔ a,
eye Àpetɔ a gble è ɖɛ kpɔ ò?
Àlo, àmè kɛ ye fã yɔ Àpetɔ a,
eye Àpetɔ a do ètoku e mè kpɔ̀ ò?#2.10 Èhàw 22,5-5; 37,25; Yɔb 4,7.
11Ɖo a, Àpetɔ a kɔ̀nà àdɔ̀mè,
eye be kuna ŋusiszĩ na ye tɔ̀wo,
e sɔna woabe àgɔ̀jèjewo kèna wo,
eye be hlùɛ̃nà wo gã,
lè vevesèse be gàmè.
12Bàbà na yàkàmèwo, ɖɔ̀ɖɔ̀ɛnɔ̀wo,
ku nuvuɛ̃wɔ̀tɔ kèwo le zɔ̃ èmɔ̃ ève ji a.
13Bàbà na vɔ̃vɔ̃nɔ̀tɔ
kè mu kã ɖo Àpetɔ a ji ò a;
Àpetɔ a be èkpatɔ̃tɔ̃ mu la nɔ̀ e ji ò.
14Bàbà na mì, àmè kèwo bu veve do ènu a!
Nukɛ ye mì la wɔ̀,
wàlɛbɛ kè Àpetɔ la va biɔ àkɔ̃ŋuta ò?
15Àmè kèwo vɔ̃na Àpetɔ a,
wo mu sinatè ɖo ènyã kè Àpetɔ a gblɔ̃ a ŋuti o.
Àmè kèwo lɔ̃nà ɛ awo
nɔ̀nà àgbè, sɔ zɔ̃ ɖo ènu kè be gblɔ̃ a ji.
16Àmè kèwo vɔ̃na Àpetɔ a
jina be yèwo a jè yebe ŋùmè,
eye wo zɔ̃nà ɖo yebe èseawo ji.
17Àmè kèwo vɔ̃na Àpetɔ a
nɔ̀nà ègbè sɔ̀sɔ̀ɛ na ɛ̀;
wo jènàsi woabe àgɔ̀jèje, lè Àpetɔ a be ŋùmè.
18E nyɔ̃ be wo ne gɛ̃ jè Àpetɔ a be àsi mè,
wu be wo ne gɛ̃ jè àgbètɔwo be àsi mè,
ɖo yebe ŋuzĩzĩ kuku a sɔ̀ ku yebe gãnyinyi a.
Mina Bible © Bible Society of Togo, 2014.