Romàtɔwo 6
6
Èku, àgbè ku Yesù Kristò
1Eŋuã leke mi le gblɔ̃ koŋu ò? Mi la gbà kpɔ̀tɔ̀ nɔ̀ ènuvuɛ̃ mè, ne màje bèa sùgbɔ ɖo e jia? 2Gbèɖe! Àleke mi, àmè kèwo ku na ènuvuɛ̃a, mi la gbà kpɔ̀tɔ̀ nɔ wɔ̀ èvuɛ̃ ɖo ò? 3Àlo, mì mu nya be mi, àmè kèwo kpata wo lè mawusi na lè Yesù Kristò mèa, yebe èku mè ye wo lè mawusi na mi lè òa? 4Kè wo lè mawusi na mi to yebe èku mèa, wo ɖì mia cã kudo è, àleke be, kè Àta be gogoa fɔ̃ Kristò so àmè kukuwo dòmèa, mia cã mi la gbà nɔ̀ àgbè yeye ku ì.
5Đo, ne mi wɔ̀ ɖèka kudo è kplikplikpli, lè èku kè ye ŋutɔ kua mèa, nènea ke ye mi la gbà nɔ̀ kudo è, lè yebe fɔ̃fɔ̃ so èku cã mè. 6Mia sè e mè nyuɛ̃ ɖe be: wo ka miabe ŋutilã xoxoa ɖo àtisòga ŋuti ku ì, ne woa sɔ crɔ̃ ènuvuɛ̃ be ŋutilã kèa, àleke be mi mu gbà nyi èvuɛ̃ be àmè pèplè ke ò. 7Đo àmè kè kua, vò so èvuɛ̃ si mè. 8Vɔ̀ ne mi ku ku Kristò, mi xɔ̀sè be mi la gbà nɔ̀ àgbè ku ì. 9Nyàwo, mi nya ɛ̀ be, kè wo fɔ̃ Kristò so àmè kukuwo dòmèa, mu gbà la ku ò; èku mu gbà ɖo ŋusɛ̃ ɖekpe ɖo e ji ò. 10Đo ekè be kua, e ku ɖo ènuvuɛ̃ ta, na hùenuwo kpata. Vɔ̀a kè be lè àgbè fifìa, e lè àgbè na Mawu. 11Nène a ke, mìawo cã mì bù mìa ɖokoewo be yèwo ku na èvuɛ̃, vɔ̀a, mì gbà lè àgbè na Mawu, lè ɖèka wɔ̀wɔ mè kudo Yesù Kristò.
12Èvuɛ̃ mu gbà ɖùfìɔ ɖo mìabe ŋutilã kè la va kua ji ò, àleke be bèa nɔ na mìa nɔ wɔ̀ ɖo yebe ènulɔ̃ɛwo ji ò. 13Mì mu gbà nɔ ɖè àsi lè mìabe ŋutinuwo ŋuti ne woa nyi èvuɛ̃ be jɔ̀jɔɛ màwɔ̀ be èdɔwɔ̀nuwo ò. Vɔ̀ bòhũa, sìgbè àmè àgbè-àgbè kèwo trɔ gbɔ̀ so èku mè nènea, mì sɔ mìa ɖokoewo ku mìabe ŋutinuwo wɔ̀ jɔ̀jɔɛnyinyi be èdɔwɔ̀nuwo na Mawu. 14Đo, kè mì mu gbà lè èvuɛ̃ be *èse gɔ̃mè òa, màje mè ye mì lè. Nène a, ènuvuɛ̃ mu la gbà ɖùfìɔ ɖo mìa ji ò.
Jɔ̀jɔɛnyinyi be èdɔwɔ̀wɔ
15Nukɛ ŋutɔ gɔ̃ ye ò? Mi la kpɔ̀tɔ̀ nɔ wɔ̀ èvuɛ̃, be mi mu gbà lè èse gɔ̃mè ò, vɔ̀a, be mi lè màje mèa? Aò, gbèɖe! 16Mì mu nya be, ne mì jo mìa ɖokoewo na àmè ɖe sìgbè kluviwo nène, ne mìa nɔ wɔ̀ ɖo yebe èjro jia, mì trɔ zũ nènemea be kluviwo lè èvuɛ̃ kè kplɔ̀nà àmè yì èku mè, àlo, lè ètonu sèse kè kplɔ̀nà àmè yì jɔ̀jɔɛnyinyi mè òa? 17Mi do àkpe na Mawu be: mì nyi èvuɛ̃ be kluviwo sãa, vɔ̀a, mì sɔ mìabe èjì blibo ɖo èto ènufiɔfiɔ ɖèka kè wo na mìa kpata fàa. 18Ekè mì vò so èvuɛ̃ sia, mì trɔ zũ jɔ̀jɔɛnyinyi be sumɔ̃viwo. 19Mù le pò àgbètɔ be nupo na mì. Nupo kè sɔ̀ ku mìabe ŋutilã be gbɔ̀jɔ̀gbɔjɔa. Sìgbè lekè mì jo mìabe ŋutinuwo, sɔ wɔ̀ màkɔ̀ màkɔ kudo èsejidàda kèwo ye kplɔ̀nà àmè yìnà àglajèje ɖo Mawu ŋuti mè be sumɔ̃viwo nènea, mì gbà jo wo ɖo jɔ̀jɔɛnyinyi kè kplɔ̀nà àmè yìnà àɖèsãnyinyi mèa ŋuti fifì.
20Wàlɛbɛ kè mì nyi ènuvuɛ̃ be kluviwo sãa, mì vò lè jɔ̀jɔɛnyinyi si. 21Èkusɛ̃sɛ̃ kɛwo mì ɖo wàlɛbɛ ŋua ò? Egbèa, èkusɛ̃sɛ̃ ŋuawo le wɔ̀ ŋùkpɛ̃ na mì. Đo, woabe vɔ̀vɔnua ye le nyi èku. 22Vɔ̀a, fifì kè wo na, mì vò lè èvuɛ̃ si mè, eye mì trɔ zũ Mawu be sumɔ̃viwoa, mì le sɛ̃ àɖèsãnyinyi be èku kèwo be vɔ̀vɔnu nyi àgbè màvɔa. 23Đo, èvuɛ̃ be fɛ̃tu ye nyi èku. Vɔ̀a, Mawu be ènu nana fàa nyi àgbè màvɔ lè ɖèka wɔ̀wɔ kudo Yesù Kristò mia Tɔhonɔ̀ mè.
Mina Bible © Bible Society of Togo, 2014.