Romàtɔwo 3
3
1Fifìa, nukɛ koŋu Yudàviwo sɔ lè ŋùkɔ̀ na àmè kèwo mu nyi Yudàvi woa ò? Àlè kɛ ye lè *èvosòso mè ò? 2Àlè kèawo lè èmɔ sùgbɔ nu. Cucugbãa, Yudàviwo ye Mawu sɔ yebe ènyàa do àsi na. 3Vɔ̀a ɖe, ekè woa dòmètɔ ɖewo mu wɔ̀ ànùkua òa, ekèa la na be Mawu cã la gbe ànùkua wɔ̀wɔa? 4Aò! Ekèa mu teŋu la jɔ̀ gbèɖe ò. Ne àmè sia àmè zũ àjèɖàtɔ cã a, Mawu yaa, nyàwototɔ kpò be la nyi godo! Đo wo ŋlɔ̀ ɛ̀ ɖɛ be:
“Ne wò pò nupoa, tɔ̀ wò ne jɔ̀.
Ne wo ɖo kòjo na wòa,
wò la ɖùji godo.”
5Vɔ̀ fifìa, ne ènu màjɔ̀ màjɔ kè mi wɔ̀nàa ye ɖènà Mawu be jɔ̀jɔɛwɔ̀wɔa fiɔa, eŋuã nukɛ ye mi la teŋu gblɔ̃ so ekèa ŋuti koŋu ò? Mi la gblɔ̃ be Mawu wɔ̀ ènu màjɔ̀ màjɔ, ne e dɔ̃ èto na mia? (Mù le biɔ ènyà kèa sìgbè àlekè àgbètɔ pònà nupoa nène.) 6Gbèɖe! Ne Mawu nyi ènu màjɔ̀ màjɔ wɔ̀tɔa ɖe, leke ye e la teŋu ɖo kòjo na àgbètɔwo ɖo ò?
7Ne e nyi be àpe àjèɖàɖa mè ye Mawu be nyàwototo zena lè, na yebe gogoa, eŋuã nukɛ ŋuti wo la gbà gblehùɛ do mù sìgbè èvuɛ̃wɔ̀tɔ nène ɖo ò? 8Ne e le àlekea ɖe, nukɛ ŋuti ye mi mu la nɔ̀ wɔ̀ èvuɛ̃, ne ènu nyuɛ̃ bèa nɔ̀ to so e mè, sìgbè àlekè àmè ɖewo le dovlo mi le gblɔ̃a nène ò? E jè be woa gblehùɛ do àmè kèwo le gblɔ̃ ènyà kèawoa.
Àmè ɖekpe mu le jɔ̀jɔɛ le Mawu be ŋùmè ò
9Nukɛ ŋutɔ gɔ̃ ye ò? Mi, Yudàviwo a ɖe, ɖe ye mi wu àmè kpɔ̀tɛawo ye à? Kpao! Đo a, mi kpɔ sãa be, Yudàviwo ku Grikwo kpata lè èvuɛ̃ gɔ̃mè.
10Mawunya ɖo èkpe e ji be:
“Àmè ɖekpe mu lè, kè lè jɔ̀jɔɛ ò,
ɖèka tètè cã mu lè ò.
11Àmè ɖekpe mu lè, kè nya ènu ò,
eye ɖekpe cã mu lè,
kè jina Mawu be èmɔ ò.
12Àmè sia àmè ye trã èmɔ,
àmè sia àmè bu,
eye àmè ɖekpekpe mu lè, kè wɔ̀nà ènu nyuɛ̃ ò.
Đèka tètè cã mu lè ò.
13Woabe èhlò mè lè kèke ɖɛ
sìgbè èyɔ̀do lè nùvò nène.
Wo blènà àmè ŋɔnɔŋɔnɔɛ
kudo woabe àɖe.
Woabe ènyàwo lè sìgbè èdã be àɖi
nène.
14Kpɛ̃sɛ̃ veve kaɖikaɖi
kpò ye tona lè ènu na wo.
15Wo sɔ̀gbè la kɔ̀ èhũ ɖo ànyi.
16Wo hɛ̃nà cɔ̃crɔ̃ ku àyà vana àfi sia àfi kè wo tonaawo,
17eye wo mu nya fàfa be èmɔa ò;
18Mawu be vɔ̃vɔ̃ ɖekpe mu lè woa mè ò.”
19Fifìa, mi nya be ènu kèwo èsea gblɔ̃a, àmè kèwo lè èsea gɔ̃mèawo ye be gblɔ̃ wo na, ne ènu sia ènu ne bɔ̀, ne Mawu ne ɖo kòjo na xixea kpata. 20Wo ma bù àmè ɖekpe be e lè jɔ̀jɔɛ lè Mawu be ŋùku mè, ekè be wɔ̀ ɖo èsea ji ŋuti ò, ɖo èsea nana kpò be àgbètɔ ne nya be yè wɔ̀ èvuɛ̃.
Jɔ̀jɔɛ to xɔ̀sè ji
21Vɔ̀ fifìa, Mawu ɖè àlekè be kpɔna àmè be e lè jɔ̀jɔɛ ɖoa fiɔ, eye mu so èsea gbɔ ò. Èsea ŋutɔ, kudo Mawu be gblɔ̃ɖɛtɔwo cã ɖù ɖase so ekèa ŋuti. 22Mawu bùnà àmè sia àmè kè xɔ̀ Kristò Yesù ji sè a be, e lè jɔ̀jɔɛ. Mu do vòvòtoto ɖekpe woa dòmè ò. 23Đo àmè sia àmè wɔ̀ èvuɛ̃, àleke be wo bu Mawu be gogoa. 24Vɔ̀ Mawu ku ŋuzĩzĩ na wo fàa, bù wo be wo lè jɔ̀jɔɛ, to màje ji, ekè Kristò Yesù tu èfɛ̃ ɖo woa taa ŋuti. 25Mawu ŋutɔ ye jè ŋùkɔ̀, sɔ Kristò ɖotè be, to yebe èhũ kè kɔ̀ ɖɛ ku yebe èku jia, woa sɔ miabe èvuɛ̃wo kè mi, ne mi xɔ̀ e ji sè kpòa. Ekèa ɖè è fiɔ be Mawu wɔ̀nà ènu jɔ̀jɔɛ, ɖo e ɖè èjì blɛ̀wù, ŋɛ̃ ŋùkuvi pu èvuɛ̃ kèwo mi wɔ̀ sãawo ji. 26E wɔ̀ ekèa be, yèa ɖè e fiɔ, lè egbè be ŋùkèkè kèawo mè be yè ŋutɔa, yè lè jɔ̀jɔɛ, eye yè bùnà àmè kè xɔ̀ Yesù ji sè a cã be e lè jɔ̀jɔɛ.
27Fifìa, nukɛ koŋu mi la teŋu gbà sɔ kã àdã ò? Ènu ɖekpe mu gbà lè ò. Susu kɛ ŋuti ye ò? Ekè mi wɔ̀ ɖo èsea ji ŋuti ye à? Kpao! Vɔ̀a, ekè mi xɔ̀sèa ŋuti ye. 28Đo mi susu be, wo bùnà àmè be e lè jɔ̀jɔɛ to xɔ̀sè ji, tovò lè *èse ji wɔ̀wɔ ɖo ŋuti. 29Àlo Mawu a, Yudàviwo ɖèɖe tɔ̀ kpò be nyia? Mu nyi àmè kèwo mu nyi Yudàvi òawo cã tɔ̀ òa? Ɛ̃, e nyi àmè kèwo mu nyi Yudàvi òawo cã be Mawu kakaka! 30Nène a, Mawu ɖèka kpò ye lè. E ye la bù àmè kèwo nyi Yudàviwo a be wo lè jɔ̀jɔɛ, to woabe xɔ̀sè ji, eye e la bù àmè kèwo mu nyi Yudàvi òawo cã be wo lè jɔ̀jɔɛ, to woabe xɔ̀sè ji. 31To xɔ̀sè jia, mi sɔ èsea le wɔ̀ ènu gbaloa? Kpao! Bòhũa, mi le èsea ɖotè sɛ̃sɛ̃ ɖe.
Mina Bible © Bible Society of Togo, 2014.