Romàtɔwo 15
15
Mia jè miabe èhavi nu bòhũ
1Èdɔ do àsi ye be nyi na mi, àmè kèwo si ŋusɛ̃ lèawo be mia nɔ kpe ɖo àmè kèwo si ŋusɛ̃ mu lè òawo ŋuti. Mi mu ɖo la nɔ wɔ̀ ènu kè la jè mia ŋutɔwo mia ɖokoewo ɖèɖe nu kpò ò. 2Lè ekèa tèpea, e jè be mia dòmètɔ ɖe sia ɖe ne wɔ̀ ènu kè la jè ye havi be ŋùmè, la nyɔ na ɛ̀, eye be la tù ì ɖoa. 3Kristò cã mu ji ènu kè jènà e ji na ye ŋutɔ kpò ò. Wo ŋlɔ̀ ɛ̀ ɖɛ be: “Èzũ kè ye àmèwo zũ na wòa va lɔ mù.” 4Đo ènu sia ènu kè wo ŋlɔ̀ ɖɛ so gbè ɖe gbè kea, wo ŋlɔ̀ ɛ̀ ɖɛ, la sɔ fiɔ mi ènu, àleke be mia ɖo ŋùɖo to veve do ènu kudo àkɔfa kèwo mi kpɔ lè ŋɔ̀ŋlɔ̃awo mèa ji. 5Veve do ènu ku àkɔfa be Mawu a ne wɔ̀ ɛ̀ be mìabe ègbè ne jè ègbè ji na mìa nɔ̀nɔwo, eye mìa wɔ̀ ènu kè Yesù Kristò jro a. 6Àleke be mìa kpata mìa sɔ ègbè ɖèka na gogo Mawu, mia Tɔhonɔ̀ Yesù Kristò be Ètɔ.
Àŋɛ̀nyuɛ̃ a ne yì na àmè sia àmè
7Ye ŋutia, mì xɔ̀ mìa nɔ̀nɔwo sìgbè lekè Kristò cã xɔ̀ mìa nène, na Mawu be gogo. 8Mù le gblɔ̃ na mì be Kristò va trɔ zũ sumɔ̃vi na àmè kèwo wo sò èvo naawo. Ne bèa ɖè Mawu be ànùkua wɔ̀wɔ#15.8 Ànùkua wɔ̀wɔ: àmè kè wɔ̀nà ɖo ènyà kè ji wo ɖo èkpe va yìa ji. E teŋu gbà nyi ègbèji nɔ̀nɔ. fiɔ, ne bèa ɖo èkpe àjɔ̀gbè kè Mawu fìã na mia tɔwoa ji, 9eye àmè kèwo mu nyi Yudàvi òawo cã ne na gogo Mawu, ɖo yebe ŋuzĩzĩ ku na àmèa ta, sìgbè àlekè wo ŋlɔ̀ ɛ̀ ɖɛ nènea be:
“Ekèa ŋuti mù la na wò gogo
lè dùkɔ̃wo dòmè
eye mù la jì èhà, sɔ mlã àpo nyikɔ.”
10Wo gbà ŋlɔ̀ ɖɛ be:
“Mìa, dùkɔ̃wo,
mì jɔ̀jì ku Mawu be dùkɔ̃
kè wo cã a.”
11Ŋɔ̀ŋlɔ̃ bu be:
“Mìa dùkɔ̃wo keŋu,
mì kafu Tɔhonɔ̀,
eye mì na dùkɔ̃wo keŋu woa pò mlã ɛ̀!”
12Mawu be gblɔ̃ɖɛtɔ Ezayà cã gblɔ̃ be:
“Jèse be jìjimèvi ɖe la va,
àmè kè la sitè, eye be la ɖè ègbè na dùkɔ̃wo kpataa,
e ye ŋuti dùkɔ̃wo la ɖoŋù ɖo.”
13Ŋùɖo be Mawu a, ne ɖɔ mì ku jìjɔɛ kudo fàfa fuu, ɖo mì xɔ̀ e ji sè, àleke be Gbɔ̃gbɔ̃ Kɔ̀kɔ̀ɛ a ne do mì ŋusɛ̃, ne ŋùɖo ne nɔ̀ mìa si drì.
Paolò be sumɔ̃vi-dɔa
14Nɔ̀vi nyèwo, nyè ŋutɔ mù kã ɖo e ji be mìa cã mì ɖɔ ku àdɔ̀mènyuɛ̃ kudo ènunya blibo, eye mì teŋu nɔ ɖo àfɔ̀ àfɔ̀ ji na mìa nɔ̀nɔwo. 15Gãkea, lè xoma kèa be àkpa ɖewo mèa, mù dojì ŋlɔ̀ ènu sùgbɔ ne ma sɔ ɖo ŋùku ènu ɖewo ji na mì. Mù wɔ̀ ekèa ɖo, to yebe màje jia, Mawu do èdɔ kèa àsi na mù, be ma wɔ̀. 16Èdɔa ye nyi be ma sumɔ Yesù Kristò lè àmè kèwo mu nyi Yudàvi òawo dòmè. Nène a, mù wɔ̀ sùmɔ̀-sumɔ-dɔ kèa, le do àŋɛ̀nyuɛ̃ kè so Mawu gbɔa na wo, àleke be àmè kèwo mu nyi Yudàvi ò a woa trɔ zũ vɔsa àdodoe kè ŋuti Gbɔ̃gbɔ̃ Kɔ̀kɔ̀ɛ a kɔ̀, eye be jè ŋùmè na Mawu. 17Lè ɖèka wɔ̀wɔ ku Kristò mèa, mù teŋu go lè èdɔ kè mù le wɔ̀ na Mawu a mè. 18Nyè mu la dojì la gblɔ̃ ènyà ɖekpe so ènu ɖe ŋuti, wu ènu kè Kristò wɔ̀ to ji nyè, lè ènyà kèwo mù gblɔ̃, ku èdɔ kèwo mù wɔ̀awo mè, ne àmè kèwo mu nyi Yudàvi ò a, woa sè ètonu na Mawu ò. 19Ekèa jɔ̀, to jèsìdo ku ŋùdãnu kèwo mù wɔ̀, to Gbɔ̃gbɔ̃ Kɔ̀kɔ̀ɛ be ŋusɛ̃a ji. Nène a, mù zɔ̃ to Yèruzàlɛm, yì to kaka Ilirikò kpedo, sɔ do Kristò be àŋɛ̀nyuɛ̃ a. 20Àpe èjro vevea ye nyi be ma do àŋɛ̀nyuɛ̃ a lè fikè wo mu sè Kristò be nyikɔ lè kpɔ ò, ne nyè mu gbà yì tù èxɔ̀ ɖo dodoe kè àmè bu ɖo ɖɛ xoxoa ji ò. 21Nène a, mù le zɔ̃ ɖo ènu kè wo ŋlɔ̀ ɖɛa ji be:
“Àmè kèwo wo mu do àŋɛ̀nyuɛ̃ na kpɔ òawo
la kpɔ ɛ̀, eye àmè kèwo mu sè ènu ɖekpe so e ŋuti
kpɔ òawo la sè e gɔ̃mè.”
Paolò be ɖoɖowo
22Ènu kèa ye xe èmɔ na mù eji-eji, eye nyè mu teŋu va mìa gbɔ ò. 23Vɔ̀a fifìa, ekè mù wu èdɔ nyèa nu lè àgo kèawo ji vɔ̀a, eye èpè fuu ye nyi ekèa kè ye mù le jro veve ɖe be ma va kpɔ mìa, 24ma jro be ne mù va le yì Spanìaa, ma va kpɔ mì, ne ma xɔ̀ àlɔ̀do so mìa gbɔ, sɔ yì, wàlɛbɛ kè mù la nɔ̀ mìa gbɔ, sɔ kpɔ jìjɔɛ vi ɖe ku mìa. 25Vɔ̀a, fifì yaa, mù le yì Yèruzàlɛm, ne ma sumɔ àɖèsãwo. 26Màkedonìatɔwo ku Àkayìatɔwo ɖo è be yèwoa jɔ̀ ènu fàa ɖoɖa Yèruzàlɛm be àɖèsã kèwo nyi wɔ̀amènɔ̀woa. 27Ènu be nyi woa ŋutɔwo ɖo be yèwoa wɔ̀ ku èjì fàa. Lè nyàwototo mèa, e jè cã be woa wɔ̀ ɛ̀. Đo, ne àmè kèwo mu nyi Yudàvi òawo kpɔ mamã lè woabe gbɔ̃gbɔ̃ mè be ènuwo mèa, woa cã wo ɖo la do wo àlɔ̀ lè xixe mè be ènuwo mè. 28Ne mù wɔ̀ èdɔ kèa, sɔ ènu nana a do àsi na wo vɔ̀a, eŋuã, mù la jè èmɔ, la va to mìa gbɔ, la yì Spanìa. 29Mù nya be, ne mù va ɖo mìa gbɔa, mù la sɔ Kristò be *sìtu kè sùgbɔ fuu lè àŋɛ̀nyuɛ̃ a mèa va na mì.
30Vɔ̀, nɔ̀vi nyèwo, ɖo lekè mì xɔ̀ Tɔhonɔ̀ Yesù Kristò ji sè ɖo, ku lɔ̃lɔ̃ kè Gbɔ̃gbɔ̃ Kɔ̀kɔ̀ɛ a na mìa ŋutia, mù le blìbɔ̀ na mì, be mìa kpe ɖo ŋuti nyè, sɔ nɔ fãkue veve ɖe na Mawu ɖo èta nyè, 31ne ma gã lè màxɔ̀sètɔ kèwo lè Yudeà wo si mè, eye ne ènu nana kè mù hɛ̃ le yì Yèruzàlɛm-a, ne jè ŋùmè na àɖèsãawo. 32Lekea, ne Mawu jro a, mù la va mìa gbɔ ku jìjɔɛ, eye mù la va ɖì ɖo e mè#15.32 Đì ɖo e mè: gbɔ̃jɛ̃ vi ɖe; jɛ̃gbɔ̃gbɔ̃. lè mìa gbɔ. 33Mawu kè nana fàfaa, ne nɔ̀ ku mìa kpata! * Àmèn.
Mina Bible © Bible Society of Togo, 2014.