Romàtɔwo 14
14
Mù gbà ɖo kòjo na nɔ̀vi wò ò
1Mì xɔ̀ àmè kè be xɔ̀sè mu likè hàɖe òa ɖo mìa dòmè, eye mì mu gbà dɔ̃ ènyà kudo è, so yebe susuwo ŋuti ò. 2Àmè ɖe be xɔ̀sè wɔ̀ na ɛ̀ be, e teŋu ɖù ènu sia ènu fàa, vɔ̀a, àmè bu kè be xɔ̀sè mu likè òa, gbekui kpò ye be ɖùnà. 3Àmè kè ɖùnà ènu sia ènu fàa, mu gbà dovlo àmè kè ye mu ɖùnà ènu sia ènu ò; eye àmè kè mu ɖùnà ènu sia ènu òa cã mu gbà ɖo kòjo na àmè kè ɖùnà ènu sia ènua ò, ɖo, Mawu xɔ̀ e cã. 4Vɔ̀a ɖe, àmè kɛ ŋutɔ ye wò nyi, gbɔ̀xue be yèa ɖo kòjo na àmè bu be sumɔ̃vi ò? Àpetɔa ŋutɔ be ènyà ye be nyi, e ye nya, ne sumɔ̃via lètè loo, àlo e jè ànyia. Mu la jè ànyi cã ò, ɖo Tɔhonɔ̀ ɖo ŋusɛ̃ la le è ɖotè.
5Nène a ke ye àmè ɖe cã la susu be ŋùkèkè ɖe lè veve ɖe wu ŋùkèkè bu, wàlɛbɛ kè àmè ɖe ya kpɔ ŋùkèkè kèawo kpata be wo lè ɖèkaa. E jè be àmè sia àmè ne kã ɖo ènu kè ŋuti be susu ì nènea ɖoa ji. 6Àmè ɖekpekpe kè do àsì xɔ̀xɔ ŋùkèkè ɖe ŋutia, wɔ̀nà ɛ̀ be yèa sɔ do bùbu Tɔhonɔ̀ ŋuti. Nène a ke ye àmè kè ɖùnà ènu sia ènua cã, ɖùnà ɛ̀ be yèa sɔ do bùbu Tɔhonɔ̀ ŋuti, ɖo e le do àkpe na Mawu ɖo ènu ɖùɖua ta. Àmè ɖekpekpe kè mu ɖùnà ènu ɖe òa, wɔ̀nà ekèa be yèa sɔ do bùbu Tɔhonɔ̀ ŋuti, eye e le do àkpe na Mawu ɖo e ta. 7Mia dòmètɔ ɖekpe mu lè àgbè na ye ɖokoe ò, eye àmè ɖekpe mu kuna cã na ye ɖokoe ò. 8Đo, ne mi lè àgbè a, mi lè è na Tɔhonɔ̀. Ye ŋutia, ne mi lè àgbè, àlo mi kua, Tɔhonɔ̀ tɔ̀ ye mi nyi. 9Ekèa ŋuti cã ye Kristò ku, eye e fɔ̃, gbà lè àgbè ɖo, ne bèa nyi Tɔhonɔ̀ na àmè kukuawo kudo àmè àgbè-àgbèawo kpataa. 10Vɔ̀ èwò yaa, nukɛ ŋuti wò ɖona kòjo na nɔ̀vi wò ɖo ò? Àlo èwò cã a, nukɛ ŋuti wò kpɔna nɔ̀vi wò sìgbè àmè mà ɖì àmè nène ɖo ò? Mawu be ŋùkɔ̀ kpò mia kpata mi la va nɔ̀tè ɖo, ne bèa ɖo kòjo na mi. 11Đo wo ŋlɔ̀ ɛ̀ ɖɛ be:
“Tɔhonɔ̀ gblɔ̃ be: 'Kaka kè mù lè àgbè a,
èklò sia èklò la jè ègũ na mù,
eye àmè sia àmè la na gogo Mawu.'”
12Nène a, mia dòmètɔ ɖe sia ɖe la na àkɔ̃ŋùta Mawu so ye ŋutɔ ye ɖokoe ŋuti.
Mù gbà nyi àfɔ̀klɛ̃ na nɔ̀vi wò ò
13Ye ŋutia, mì na mia tɔtè kòjoɖoɖo na mia nɔ̀nɔwo. Mia ɖo susu bòhũ be àmè ɖekpe mu gbà wɔ̀ ènu ɖe, sɔ viɔ̃ nɔ̀via nu, àlo ènu kè la na be nɔ̀via la wɔ̀ ènuvuɛ̃ ò. 14Lè Tɔhonɔ̀ Yesù mèa, mù nya, eye mù kã ɖo e ji be ènu ɖekpe mu nyi ènu màkɔ̀ màkɔ lè ye ɖokoe si ò. Àmè kè susu ènu ɖe be e nyi ènu màkɔ̀ màkɔa, e ye be nyi ì na. 15Ne ènu kè wò ɖùnàa, le gbɔjɔ nɔ̀vi wò be xɔ̀sèa, eŋuã, e fiɔ be wò mu lè zɔ̃ lè lɔ̃lɔ̃ mè ò. Mù gbà na ènu ɖùɖu kè wò ɖùnàa, ne crɔ̃ àmè kè ta Kristò ku ɖoa ò. 16Ye ŋutia, mì mu gbà na àmè bu ne dovlo ènu kè mìawo ya mì susu be e nyi ènu nyuɛ̃a ò. 17Đo Mawu be èfìɔɖùɖua mu lè ènu ɖùɖu ku ènu nùnu mè ò; vɔ̀a, e lè jɔ̀jɔɛnyinyi ku fàfa kudo jìjɔɛ, kè Gbɔ̃gbɔ̃ Kɔ̀kɔ̀ɛ nana a mè. 18Àmè kè sumɔna Kristò lè ènu kèawo mèa, jènà Mawu be ŋùmè, eye àgbètɔwo cã dona bùbu e ŋuti.
19Eŋuã, mì na mia ɖo è veve ɖe, be mia wɔ̀ ènu kè la hɛ̃ fàfa vaa kpò, eye bèa nyi ènu kè la do àlɔ̀ àmè buwo, ne woabe xɔ̀sè ne likè. 20Mì mu gbà xà ɖo ènu ɖùɖu ŋuti, ne mìa gble Mawu be èdɔ ò. Ènuwo keŋu kɔ̀, vɔ̀a e nyrã be ènu ɖe be ɖùɖu ne nyi àfɔ̀klɛ̃. 21Ènu kè kpò nyɔa ye nyi be, mù gbà ɖù èlã, mù gbà nù vɛ̃ ò, àlo mù gbà wɔ̀ ènu ɖekpe kè la na nɔ̀vi wò la jè ànyi ò. 22Na ènu kè ji wò xɔ̀sè ɖoa, ne nɔ̀ èwò kudo Mawu ɖèka kpò dòmè. Àmè kè wɔ̀nà ènu kè be susu be e nyɔ, eye yebe èjì mu gblehùɛ do è òa, ye nyi sìtume. 23Vɔ̀a, àmè kè sàvò ɖo ènu ɖùɖu ɖe ŋuti gbɔ̀xue ɖù ìa, wo gblehùɛ do è vɔ̀, ɖo ènu kè be wɔ̀a mu so xɔ̀sè mè ò. Đo ènu sia ènu kè wo wɔ̀ eye mu so xɔ̀sè be kãkã ɖo e ji mè òa nyi èvuɛ̃.
Mina Bible © Bible Society of Togo, 2014.