Èhàwo 94
94
Mawu dɔ̃nà èto na màjɔ̀màjɔwɔ̀tɔ
1Tɔhonɔ̀, Mawu èhlɔ̃biɔtɔ;
Oò Tɔhonɔ̀ Mawu èhlɔ̃biɔtɔ, ɖè ɖokoe wò fiɔ!
2Èwò xixea be kòjoɖotɔ, sitè ne wòa ɖo e tèpe
na hɛ̀wùlɔwo ɖo woabe wɔ̀wɔwo ŋuti.
3Tɔhonɔ̀ kaka va na gà kɛ mè ye
àmè bàɖàwo la kpɔ̀tɔ̀ nɔ mlã ò?
4Wo gblɔ̃nà ènyà tovòwo gbà jrana.
Àmè drã kèawo kona ànya ŋutɔ.
5Tɔhonɔ̀, Oò! Wo le tùkù dùkɔ̃ wòa,
wo le ɖèfũ na àpo àmè cãcãwo.
6Wo wù àhòsìwo, àmèjro kudo cɔɛviwo.
7Kòɖòa, wo gblɔ̃nà be: “Tɔhonɔ̀ mu le kpɔ ɛ̀ ò.
Yakɔb be Mawu a mu le le ŋùku ɖo e ŋuti ò.”
8Mìa tamèsɛ̃tɔwo, mì bùtamè,
mìa sùkunɔ̀wo, wàlɛbɛ kɛ ye mì la va nyanu ò?
9Àmè kè ŋutɔ ɖo èto ɖo èta ŋutia, mu la sènu òa?
Àmè kè ɖo ŋùkuviwoa, mu le kpɔnu òa?
10Àmè kè gbena ènyà na dùkɔ̃woa,
mu la gbe ètodɔ̃dɔ̃ na àmè ò.
E ye ke nana ènunya àgbètɔwo.
11Tɔhonɔ̀ jèsi àmè sia àmè be ètamèsusuwo.
E nya be ènu gbalo ye wo nyi.
12Tɔhonɔ̀, sìtu be la nyi na àmè kè wò le gbe ènyà na
eye wò le kpla ɛ̀ to àpo èsea jia.
13Ne wòa na ɛ̀ tùjèanyi lè àhovì be gàmè.
Eye wò la na wo la kù èdo na àmè bàɖàwo.
14Kpao! Tɔhonɔ̀ mu la ɖèkɔ̀ lè yebe dùkɔ̃ ŋuti ò.
Mu la gble yebe àmè cãcãwo ɖɛ gbèɖe ò.
15Eye jɔ̀jɔɛsòso la gbìgbɔ̀ va nɔ̀ ànùkuawɔ̀tɔ a ji.
Funua, àmè kèwo ɖo èjìmè kɔ̀kɔ̀ɛa la nɔ̀ e yomè ɖaa.
16Àmè kɛ ye la sitè ɖo vuɛ̃wɔ̀tɔwo ŋuti na mù?
Àmè kɛ la do mù àlɔ̀ lè ènumàɣewɔ̀tɔwo be ŋùkɔ̀?
17Ne mu nyi be Tɔhonɔ̀ ye kpe ɖo ŋuti nyè òa,
èɖa kè ɖo lè èkla nyèa nu xoxo vɔ̀.
18Wàlɛbɛ kè mù le susu be àfɔ̀ nyèwo mu gbà ɖo kèlili ò a,
Oò, Tɔhonɔ̀, àpo àdɔ̀mè nyuɛ̃ gbà linakè mù.
19Eye wàlɛbɛ kè èjì nyèa ɖɔ kudo bùkpɔ vòvòvòwoa,
àpo àsi ɖo àkɔ na àmèa, dona jìjɔɛ na mù.
20Ènyà ɖe mu lè èwò kudo kòjoɖotɔ nyrãku
kèwo sɔ ènu gbegble dona èsea dòmè ò.
21Wo nɔ̀nà àjòha mè ɖo ànùkuamèwo ŋuti
eye wo gblenahùɛ do àmè mà-nyã ɖewo.
22Vɔ̀a, Tɔhonɔ̀ ye nyi àpe àgbògbò,
Mawu nyè ye nyi àpe tabèpe be àkpã.
23E la na woa ŋutɔwo be èhlɔ̃dãdãwo la trɔ va woa ji,
eye e la crɔ̃ wo kudo woa ŋutɔ be kunyànyrãwo.
Ɛ̃ɛ Tɔhonɔ̀, miabe Mawu la crɔ̃ wo godo!
Currently Selected:
Èhàwo 94: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
