Èhàwo 60
60
Mawu ɖo ènyà ŋuti na yebe dùkɔ̃ a
(Hɛ̃hlɛ̃mè 7-14: Èhàw 108.7-14)
1David be èhà, na hàsìnɔ̀ gãa. Ɖo 'Èzòɖùɖu be èsepòpo ɣe' be ègbè ɖìɖi ji sɔ na ènufiɔfiɔ. 2Wàlɛbɛ kè wo le wɔ̀ àhùa ku Aràmvi kèwo so Mèzòpòtamìa kudo kèwo so Sobàa, Yoab trɔva, eye be ɖù Edɔ̀mviwo ji. Wàlɛbɛ ŋua, e wù àgbètɔ hotu àdɛ̃ lè èjè be bàlìa mè.
3Aò, Mawu! Wò gbe mi, wò kã mi hlɛ̃!
Wò do àdɔ̀mèze ɖo mia ŋuti!
Tɔ̀ wò jɔ̀: gbà trɔ kpɔ mi jro!
4Wò hũhũ ànyigbã a, eye be fɛ̃!
Aò, bla yebe àbìwo jro!
Ɖo, e le hũhũ keɖe keɖe, la mù!
5Wò na dùkɔ̃ wòa to hùenu sɛ̃sɛ̃wo mè.
Wò na mi àhà kè ve kpàa, mi nù.
6Vɔ̀a, wò na jèsìdo àmè kèwo vɔ̃na wòa,
àleke be woa teŋu si, lè àmè kè le dà àŋùtua nu. Ènu bɔ̀ kpoo
7Xɔ̀ na mi, ne wòa kpe ɖo mia ŋuti ku àpo ɖùsi-lɔ sɛ̃sɛ̃a,
àleke be wòa hlùɛ̃ àmè kèwo wò lɔ̃a gã!
8Mawu le gblɔ̃ so yebe kɔ̀kɔ̀ɛpea be:
“Mù la sɔ jiɖùɖu ma Sikɛ̀m be èdùa,
eye mù la jije Sukɔ̀t be Bàlìa.
9Tɔ̀ nyè ye nyi Gilead be ànyigbã a,
eye tɔ̀ nyè ke nyi Manasè be ànyigbã cã.
Efràyim be ànyigbã a nyi ègà-kuku lè èta na mù.
Eye Yudà be ànyigbã nyi àpe àtikplɔ.
10Mòab be ànyigbã nyi àpe èsì lèle be àdàwa.
Mù ɖo àfɔ̀ èta ji na Edɔ̀m be dùkɔ̃a.
Eye mù do jiɖùɖu be àpa lè Filistì be ànyigbã ji.”
11Àmè kɛ ye la kplɔ̀ mù yì àgbògbò be èdùa mè?
Àmè kɛ ye la kplɔ̀ mù kaka yì Edɔ̀m be ànyigbã ji?
12Aò, Mawu! Mu nyi èwò ye òa?
Mu nyi èwò Mawu kè gbe mi,
eye wò mu gbà kplɔ̀nà miabe àhùakɔ̃wo to òa ye à?
13Va xɔ̀ na mi jro! Kpã ŋùkɔ̀ miabe kɛ̃tɔwo.
Ɖoa, àgbètɔ be àlɔ̀doa, ènu gbalo be nyi!
14Mawu ye mi la sɔ ɖùji,
eye Mawu ye la ɖo àfɔ̀ miabe kɛ̃tɔwo ji!
Currently Selected:
Èhàwo 60: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
