Èhàwo 116
116
Àkpe na Mawu, àdɔ̀mè nyuɛ̃wɔ̀tɔ
1Mù lɔ̃ Tɔhonɔ̀,
ɖo e ɖonato àpe àlenanawo be ègbè.
2E kè yebe èto ɖo gbɔ nyè
eye mù la nɔ yɔ ɛ̀ àgbèzã nyèa keŋu.
3Èku bla mù ɖo èkà mè,
eye mù jè kuwode be kɔ̀sɔ̀kɔsɔwo mè.
Mù vɔ̃ ŋutɔ eye mù ci ènuxàxa mè.
4Eye mù yɔ Tɔhonɔ̀ be nyikɔ gblɔ̃ be:
“Aò, Tɔhonɔ̀ hlùɛ̃ mù!”
5Tɔhonɔ̀ nyi àdɔ̀mè nyuɛ̃wɔ̀tɔ gbà lè jɔ̀jɔɛ.
Miabe Mawu a kuna ŋuzĩzĩ.
6Tɔhonɔ̀ xɔ̀nà ènyà ɖo àmèbɔ̀bɔɛwo ta.
Mù gbɔjɔ sã, eye e hlùɛ̃ mù gã.
7Èjì ne gbìgbɔ̀ jè e mè na wò èkla nyè,
ɖo Tɔhonɔ̀ wɔ̀ nyuɛ̃ na wò.
8Ɛ̃ɛ, wò hlùɛ̃ mù lè èku si. Wò tutu àɖàsì nyèwo
eye wò na nyè mu jè ànyi ò.
9Ekèa ŋuti ye mù la nɔ zɔ̃ lè Tɔhonɔ̀
be ŋùkɔ̀ lè àgbètɔwo dòmè lè ànyigbã ji.
*
10Mù kã ɖo e ji wàlɛbɛ kè mù le gblɔ̃ ŋutɔ cã be:
“Mù ci ènuxàxa mèa.”
11Lè tìtɔ̀ titɔ nyè mèa, mù gblɔ̃ be:
“Àmèwo kpata nyi àjèɖàtɔwo.”
12Nukɛ mù la wɔ̀ na Tɔhonɔ̀ ɖo ènyuɛ̃
kè e wɔ̀ na mù a tèpe ò?
13Mù la kɔ jiɖùɖu be kɔpòa yì ji
eye mù la yɔ Tɔhonɔ̀ be nyikɔ.
14Eye mù la tu ègbèɖoɖo nyèa be èfɛ̃
na Tɔhonɔ̀ lè yebe dùkɔ̃a be ŋùkɔ̀.
15Tɔhonɔ̀ be àmè kɔ̀kɔ̀ɛwo be èku
nyi ènu xɔ̀asì ɖe lè yebe ŋùkumè
16Tɔhonɔ̀, àpo sumɔ̃vi ye mù nyi.
Ɛ̃ɛ àpo sumɔ̃vi, àpo sumɔ̃vi nyɔ̃nù be vi ŋusù.
Wò sò àpe kɔ̀sɔ̀kɔsɔawo jo.
17Mù la sa kàfù kafu vɔsa na wò
eye mù la yɔ Tɔhonɔ̀ be nyikɔ.
18Eye mù la tu ègbèɖoɖo nyèa be èfɛ̃
na Tɔhonɔ̀ lè yebe dùkɔ̃a be ŋùkɔ̀,
19lè Tɔhonɔ̀ be àxuea be àgbàsa mè,
lè àpo dòdò mè, Yèruzàlɛm.
Mì jì kafu-ha na Tɔhonɔ̀!
Currently Selected:
Èhàwo 116: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
