Màteo 24
24
Yesù be wo la gbã mawuxɔa
(Mrk 13.1-2; Luk 21.5-6)
1Yesù to lè mawuxɔa mè, eye ekè be le yìa, yebe nukplaviwo gogo è, eye wo gblɔ̃ na ɛ̀ be, ne kpɔ àlekè wo tù mawuxɔa ɖoa ɖa. 2Yesù gblɔ̃ na wo be: “Mì kpɔ ènu kèawo keŋuã? Nyàwo mù le to na mì: èkpe ɖe mu la kpɔ̀tɔ̀ lè èɖe ji kè wo mu la mù pu ànyi ò.”
Èfũkpekpe ku yomètĩtĩwo
(Mrk 13.3-13; Luk 21.7-19)
3Kè Yesù nɔ̀ ànyi lè àmìti-toa jia, yebe nukplaviwo yì kpɔ ɛ̀ lè àsà mè. Wo biɔ ɛ̀ be: “Gblɔ̃ gà kè mè ye ènu kèa la jɔ̀, ku jèsì kè ye la ɖè wàlɛbɛ kè wò la trɔva, ku gà kè mè xixea be vɔ̀vɔnu la ɖoa na mi.” 4Vɔ̀a, Yesù ɖoeŋuti na wo be: “Mì kpɔ nyuɛ̃ ɖe ne àmè ɖe mu gbà flù mì ò. 5Đo, àmè sùgbɔ la sɔ nyikɔ nyè ɖo ènu la va. Wo la nɔ gblɔ̃ be: 'Ènyè ye nyi *Mɛ̀siaa.' Wo la flù àmè sùgbɔ. 6Eye mì la sè àhùa be nyikɔ ku àhùa be zigìdi. Kpɔɖa, mì mu gbà sò àdìka ò, ɖo ènu kèawo keŋu ɖo la jɔ̀, vɔ̀a vɔ̀vɔnua mu ɖo hàɖe ò. 7Đo dùkɔ̃ ɖe la sitè ɖo dùkɔ̃ bu ŋuti. Fìɔdu ɖe la sitè ɖo fìɔdu bu ŋuti. Àdɔ̀ la to, eye ànyigbã la hũhũ lè àfi vòvòvòwo. 8Ekèawo keŋu ye la nyi èkulelea be gɔ̃mèjèje. 9Wàlɛbɛ ŋua, wo la do mì àsi, ne woa do àyà na mì, la wù mì. Àgbàlèwo keŋu la crì mì ɖo ŋuti nyè. 10Àmè kèwo xɔ̀ ji nyè sèawo dòmètɔ sùgbɔ la trɔ lè yo nyè mè. Wo la xɔ̀ kpli na woa nɔ̀nɔwo eye wo la crì woa nɔ̀nɔwo. 11Àjè gblɔ̃ɖɛtɔwo fuu la sitè eye wo la flù àmè sùgbɔ. 12Đo ekè ènuvuɛ̃wɔ̀wɔ la dri àgboa, àmè sùgbɔ be lɔ̃lɔ̃ la fa. 13Vɔ̀a, àmè kè la do èjì kaka yì vɔ̀vɔnua, la gã. 14Wo la do àŋɛ̀nyuɛ̃ kè pò nupo so Mawu be fìɔɖùɖua ŋutia lè xixea keŋu mè, ne bèa nyi ɖase na àgbàlèwo keŋu. Ekèa yomèa vɔ̀vɔnua la va.”
Àyàdonamè gãa
(Mrk 13.14-23; Luk 21.20-24)
15“Ne mì kpɔ 'Àhlùanu jiŋɔ', àmè kè ŋuti Mawu be gblɔ̃ɖɛtɔ Dàniɛl pò nupo soa, lè kɔ̀kɔ̀ɛ be tèpea, — àmè kè hlɛ̃a ne ŋɔjè e mè! — 16Eŋuã, àmè kèwo lè Yudeà wo ne si yì ètowo ji. 17Ne àmè ɖe lè èxɔ̀taa, mu gbà ɖì be yèa sɔ ènu ɖe lè èxɔ̀ mè ò. 18Àmè kè lè àgblè mèa, mu gbà trɔ be yèa sɔ yebe àwùgãa lè àxomè ò. 19Hèlu na nyɔ̃nù kèwo si èfu la nɔ̀a, ku ekèwo la nɔ̀ na ànɔ èvi le àzã ŋuawo jia. 20Mì fãkue ne gà kè mè mì la sia, mu gbà nyi àvìvɔhùenu, àlo jɛ̃gbɔ̃zã gbè ò. 21Đo wàlɛbɛ ŋua èfũ gã ɖe la va, ekè hati mu jɔ̀ kpɔ so xixea be gɔ̃mèjèje va na gà kèa mè ò, eye mu la gbà jɔ̀ gbèɖe òa. 22Ne àzã ŋuawo mu ɖè kpɔ̀tɔ̀ òa, àmè ɖekpe mu la gã ò. Vɔ̀a, ɖo àmè cãcãwo ŋutia, àzã ŋuawo la ɖè kpɔ̀tɔ̀. 23Eŋuã, ne àmè ɖe va to na mì be: '*Mɛ̀siaa lè fikèa' àlo: 'E lè funua', mì mu gbà xɔ̀ e ji sè ò. 24Đo, àjè-kristòwo ku àjè-gblɔ̃ɖɛtɔwo la sitè, eye wo la nɔ̀ wɔ̀ jèsì gãgãwo ku ŋùdãnuwo, àleke be woa flù àmè cãcãwo ŋutɔ cã, ne wo teŋuã. 25Ye ŋutia, mù sìa mì ɖɛ vɔ̀.”
26“Ne àmè ɖe to na mì be: 'Kristò va vɔ̀, eye wo kpɔ ɛ̀ lè zògbè jia', mì mu gbà yì ò, ne àmè ɖe to na mì be: 'E wla ye ɖokoe ɖo fikèa', mì mu gbà xɔ̀ yebe ènyàa ji sè ò. 27Đo *Àgbètɔ be Èvia be vava la nɔ̀ sìgbè àlekè èjikèzò#24.27 Èjikèzò: Lè vòduwo go mè a, wo yɔna èjikèzò be bìɖà. kɔ̀nà so èwèzɛ̃pe kaka va yìnà èwèɖoxɔ̀pea nène. 28Àfi sia àfi kè ènukuku lèa, funua ye àklàsuwo bɔ̀nà ɖo.”
Àgbètɔ be Èvia be vava
(Mrk 13.24-27; Luk 21.25-28)
29“Lè èfũ zã ŋuawo yomè troloa, èwè la do vìvìti, eye wètri mu la gbà ɖì ò. Wètriviwo la gɛ̃ so jiŋùkusi eye ŋusɛ̃ kèwo lè jiŋùkusiawo la hũhũ. 30E yomèa, jèsì kè la ɖè è fiɔ be *Àgbètɔ be Èvia gbãnà a, la ze lè jiŋùkusi, eye dùkɔ̃ kèwo lè ànyigbã jiawo kpata la tɔ àkɔta pòpo eye, wo la kpɔ Àgbètɔ be Èvia la ɖì gbãnà so jiŋùkusi be lilikpowo mè ku ŋusɛ̃ kudo gogo gã ɖe. 31Eye, e la dɔ̃ yebe àtikplɔtɔwo ɖoɖa ku èkpɛ̃ gãa be ɖìɖi, eye wo la bɔ̀ yebe àmè cãcãwo so àya ènɛ̀awo mè, so jiŋùkusi be nukpòpe ɖe va èbu.”
Mì kpla ènu so èvòti ŋuti
(Mrk 13.28-31; Luk 21.29-33)
32“Mì kpla ènu so èvòti ŋuti. Ne yebe àlɔ̀zɛ̃wo tɔ àmàkpa totoa, mì nyana be èzòmè#24.32 Èzòmè: zòzo hùenu; wàlɛbɛ kè wo dona ènua. gogo. 33Nènea ke ye ne mì kpɔ ènu kèawo keŋu le jɔ̀ a, mìa nya be, Àgbètɔ be Èvia be vava gogo, eye e lè mìabe àgbowo ji vɔ̀. 34Nyàwo ye mù le to na mì. Jìjimè kèa mu la va yì, gbɔ̀xue ènu kèawo keŋu la jɔ̀ ò. 35Jiŋùkusi ku ànyigbã la klo va yì; vɔ̀a, ènyà nyèwo mu la va yì ò.”
Àmè ɖe mu nya hùenua ò
(Mrk 13.32-37; Luk 17.26-30, 34-36)
36“Vɔ̀a, àzã ŋua ku gàpòpo ŋua, àmè ɖekpe mu nya ɛ̀ ò. *Àtikplɔtɔ kèwo lè jiŋùkusia cã mu nya ɛ̀ ò. Èvia ŋutɔ cã mu nya ɛ̀ ò. Àta ɖèka kpò ye nya ɛ̀. 37Eye, sìgbè àlekè Nɔa be àzãa nyia, nènea ke ye Àgbètɔ be Èvia be vavaa la nyia yeŋu. 38Đo lè àzã kèwo jè ŋùkɔ̀ na gà kè mè Mawu sɔ èsì crɔ̃ xixea, àgbètɔwo le ɖù, le nù; wo le ɖè èsrɔ̃, wo le na àsu woabe èvi-nyɔ̃nùwo kaka va na gà kè mè Nɔa ɖo àɖakàhũ gãa mè, 39eye, kaka na gà kè mè èsì crɔ̃ woa kpataa, wo mu nya be ènu ɖe lè jɔ̀ ò. Gà kè mè Àgbètɔ be Èvia la trɔvaa, nènea ke ye be la nyia yeŋu. 40Wàlɛbɛ ŋua, ŋusù èvè la nɔ̀ àgblè mè; eye wo la sɔ àmè ɖèka jo, la gble èvègɔ̃a ɖɛ. 41Nyɔ̃nù èvè la nɔ̀ tù ènu lè ète ji; eye wo la sɔ àmè ɖèka jo, la gble èvègɔ̃a ɖɛ. 42Ye ŋutia, mì nɔ̀ ŋùzɔ̃; ɖo, mì mu nya àzã kè gbè mìabe àpetɔa la va ò. 43Vɔ̀a, mì nya nyuɛ̃ ɖe be, ne àxuetɔ ɖe nya gà kè mè fĩãfì la va yebe àxomèa, e la nɔ̀ ŋùzɔ̃, eye mu la lɔ̃ be, fĩãfìa bèa ŋɔ èglìa, la ɖo àxomè na yè ò. 44Ye ŋutia, mìa cã mì nɔ̀ ŋùzɔ̃, ɖo gà kè mè mì mu la ɖo ŋùkuvi òa, ye Àgbètɔ be Èvia la va.”
Dèvi ànùkuamea
(Luk 12.41-48)
45“Àmè kɛ ye nyi sumɔ̃vi ànùkuame, ènunyatɔ kè àpetɔa sɔ ɖo yebe sumɔ̃viwo nu, ne bèa nɔ̀ na wo ènu ɖùɖu ɖo gàmè ji ò? 46Sìtu ɖèɖe ye e nyi na sumɔ̃vi ŋua, ne àpetɔa gbɔ̀ va, kpɔ be e le wɔ̀ èdɔ kè be sɔ do àsi na ɛ̀a. 47Nyàwo mù le to na mì, àpetɔa la sɔ ɛ̀ ɖo yebe ènuwo kpata nu. 48Vɔ̀a, ne sumɔ̃vi vuɛ̃ ye be nyia, e la gblɔ̃ lè ye ɖokoe mè be: 'Àpetɔ nyèa ci ŋùgbe.' 49Ne e tɔ yebe èhaviwo pòpo, tɔ ènu ɖùɖu, àhà nùnu ku èxlɔ̃a àhànùmunɔ̀woa, 50sumɔ̃vi ŋua be àpetɔa la va, lè àzã kè ji mu ɖoŋù ɖo òa, lè gàpòpo kè mu la nya òa mè. 51E la dɔ̃ èto na sumɔ̃vi ŋua sɛ̃sɛ̃ ɖe, sìgbè àlekè wo dɔ̃nà èto na àyèmènuwɔ̀tɔwoa nène. Funua ye àvi fãfã ku àɖuklui ɖùɖu la nɔ̀.”
Mina Bible © Bible Society of Togo, 2014.