Màteo 14
14
Yòhanɛ̀s Mawusilènamètɔa ku
(Mrk 6.14-29; Luk 9.7-9)
1Wàlɛbɛ ŋuaa, ekè Herod le ɖùfìɔ lè Galileaa, e sè ènu kèwo Yesù le wɔ̀a, 2eye e to na yebe sumɔ̃viwo be: “Ŋusù kèa ye nyi Yòhanɛ̀s Mawusilènamètɔa. E ye fɔ̃ so èku, ènu kèa ŋuti be ɖo ŋusɛ̃ le wɔ̀ ŋùdãdɔ kèawo.”
3Jè ŋùkɔ̀a, Herod le Yòhanɛ̀s, bla ɛ̀, sɔ ɛ̀ do ègàkpa mè, ɖo Herodia, nɔ̀via Filipò be èsrɔ̃ ŋuti. 4Đo a, Yòhanɛ̀s gblɔ̃ na Herod be: “Mu sɔ̀gbè be wòa xɔ̀ nɔ̀vi wò be èsrɔ̃ ɖè ò.” 5Herod le ji la wù Yòhanɛ̀s vɔ̀a, e le vɔ̃, ɖo dùkɔ̃a sɔ ɛ̀ sìgbè Mawu be gblɔ̃ɖɛtɔ nène. 6Vɔ̀a, e va va e mè be Herod le ɖù yebe jìgbèzã, gbè ɖèka, eye Herodia be èvi nyɔ̃nù va ɖu èwè lè àmèkpekpeawo be ŋùkɔ̀. Yebe èwèɖuɖua nya kpɔkpɔ na Herod ŋutɔ, 7eye, be fìã àjɔ̀gbè na nyɔ̃nùvia, kã àtãŋu na ɛ̀ be, ènu ɖekpekpe kè be la biɔ yèa, yè la na ɛ̀. 8Nènea ye, nyɔ̃nùvia be ènɔ̀ pò ètoɖo na nyɔ̃nùvia, eye nyɔ̃nùvia gblɔ̃ na Herod be: “Na mù Yòhanɛ̀s Mawusilènamètɔa be èta ɖo àgbã gbɛjɛ mè, lè fikèa fifì jɛ̃.” 9Àkpɔ̃ ɖɔ èfìɔa, vɔ̀a, ɖo àtãŋu kè be kãa ku àjɔ̀gbè kè be fìã lè àmè kèwo be kpeawo be ŋùmè ŋutia, e na ègbè 10be, woa yì ègàkpaa mè, ne woa sò Yòhanɛ̀s be èta. 11Wo sò Yòhanɛ̀s be èta ɖo àgbã gbɛjɛ mè va na nyɔ̃nùvia, eye, be sɔ ètaa yì na ènɔaa. 12* Yòhanɛ̀s be nukplaviwo va sɔ Yòhanɛ̀s be àmèkpòtia yì ɖì. E yomèa, wo yì gblɔ̃ ènu kè jɔ̀ a na Yesù.
Yesù na ènu ɖùɖu àgbètɔ hotu èvè èkà èwì vɔ àtɔ̃
(Mrk 6.30-44; Luk 9.10-17; Yòh 6.1-14)
13Kè Yesù sè ènyà kèa, e ɖo ètɔ̀jihũ, yì tèpe ɖe kè àmè mu lè òa, lè àsà mè. Vɔ̀a, àmèwo sè, eye wo nya àfi kè be le yìa, eye wo zɔ̃ àfɔ̀ so woabe èdùwo mè, jè e yomè. 14Kè Yesù to lè ètɔ̀jihũa mèa, e kpɔ àmèha gãɖe, eye woabe ènu wɔ̀ ŋuzĩzĩ na ɛ̀. E dà èdɔ̀ na dɔ̀nɔ̀kplibɔ kèwo lè woa dòmèa. 15Kè wètrɔ ɖoa, Yesù be nukplaviwo va e gbɔ. Wo to na ɛ̀ be: “Àfi kè mi lèa, mu sɔ̀ lè èdù ɖe gbɔ ò. Èzã cã lè do. Đo àmèawo ɖoɖa kɔpewo mè, ne woa yì ji ènu ɖe ɖù.” 16Vɔ̀a, Yesù ɖoeŋuti na wo be: “Mu lè veve ɖe be woa jo ò. Mìa ŋutɔwo mì na wo ènu ne woa ɖù.” 17Vɔ̀a, wo gblɔ̃ na ɛ̀ be: “Kpɔ̃nɔ àtɔ̃ ku tɔ̀mèlã èvè kpò ye lè mia si lè fikèa.” 18Yesù gblɔ̃ na wo be: “Mì sɔ wo va na mù.” 19E ɖè ègbè na àmèawo be woa nɔ̀ ànyi ɖo ègbeawo ji. E sɔ kpɔ̃nɔ àtɔ̃awo ku tɔ̀mèlã èvèawo; eye e kɔ ŋùmè yì ji, pòɖɛ̀ ɖo woa ji. E yomèa, e kã kpɔ̃nɔawo, sɔ wo na yebe nukplaviwo ne woa ma na wo. 20Àmè sia àmè ɖù ènu ɖɔpò; eye ènu ɖùɖua gbà kpɔ̀tɔ̀. Wo cã ènu ɖùɖu kè kpɔ̀tɔ̀a, eye e ɖɔ àjàfi woèvè. 21Àmè kèwo ɖù ènuawo la nɔ̀ sìgbè ŋusù hotu èvè èkà èwì vɔ àtɔ̃ nène; gãke wo mu hlɛ̃ nyɔ̃nùwo ku ɖèviwo ɖo e mè ò.
Yesù zɔ̃ èsì ji
(Mrk 6.45-52; Yòh 6.15-21)
22Ekèa yomè troloa, Yesù zĩ yebe nukplaviwo ji be wo ne ɖo ètɔ̀jihũa mè, jè ŋùkɔ̀ na yè, yì àgo ɖèa ji, wàlɛbɛ kè yè la nɔ̀ ɖo àmèhaa. 23Kè be ɖo àmèawo vɔ̀a, e yì èto ɖe ji, lè àsàmè, ne bèa fãkue. Èzã do, eye ye ɖèka pɛɛ ci funua. 24Ètɔ̀jihũa ɖo ètɔ̀a be dòdòmè vɔ̀, eye àsrɔ̀kewo lè nyàmà ɛ̀, ɖo wo le kpe àya. 25Lè fɔ̃fɔ̃ mèa, Yesù zɔ̃ to ètɔ̀a ji, tùtà yebe nukplaviwo gbɔ. 26Kè yebe nukplaviwo kpɔ be e le zɔ̃ lè ètɔ̀a jia, vɔ̃vɔ̃ ɖo wo, eye wo tɔ àpa dodo be: “Ŋùãlì ye.” 27Vɔ̀a, Yesù gblɔ̃ na wo be: “Àgbɔ̃ ne jèpò na mì. Mì mu gbà vɔ̃ ò, ènyè ye.” 28Petrò ɖoeŋuti na ɛ̀ be: “Àpetɔ, ne èwò ye à, na ne ma zɔ̃ ètɔ̀a ji va gbɔ wò.” 29Yesù gblɔ̃ na ɛ̀ be: “Va!”
Petrò to lè ètɔ̀jihũa mè, tɔ zɔ̃zɔ̃ lè ètɔ̀a ji, le yì Yesù gbɔ. 30Vɔ̀a, kè be kpɔ be àya gbà le pò sɛ̃sɛ̃ɖe kpe èa, vɔ̃vɔ̃ ɖo è, eye be tɔ nyɔ̀nyrɔ̃. E do àpa be: “Àpetɔ, hlùɛ̃ mù gã!” 31Troloa, Yesù vlũ àlɔ̀ ɖoɖa Petrò, le è, gblɔ̃ na ɛ̀ be: “Èwò xɔ̀sèvitɔ, nukɛ ŋuti ye wò do àɖìkà ɖo ò?” 32Kè Yesù ku Petrò ɖo èhũa mèa, àyaa tɔtè. 33Àmè kèwo lè ètɔ̀jihũa mèa, wo va jè èklò blìbɔ̀ na Yesù, wo gblɔ̃ na ɛ̀ be: “Mawu be Èvi ye wò nyi nyàwo.”
Yesù dà èdɔ̀ lè Genezarɛtè
(Mrk 6.53-56)
34Kè wo jè àgo ɖèa jia, wo va Genezarɛtè be ànyigbã ji. 35Kè àmè kèwo lè funua kpɔ ɛ̀ jèsia, wo do àŋɛ̀ ɖoɖa àmè kèwo keŋu lè àgo ŋua jia, eye wo kplɔ̀ dɔ̀nɔ̀wo kpata va na ɛ̀. 36Wo ɖè kuku na ɛ̀ be, bèa na dɔ̀nɔ̀wo, woa tɔ àsi yebe àwù be ètomè kpò; eye, àmè nène kèwo tɔ ɛ̀ àsiawo gã.
Mina Bible © Bible Society of Togo, 2014.