Levìwo 4
4
Kukuɖèɖe be vɔsa
1Tɔhonɔ̀ gbà pò nupo na Mosè, eye be gblɔ̃ na ɛ̀ be: 2“Pònupo na Izràɛlviwo, ne wòa gblɔ̃ na wo be: Ne àmè ɖe mu nya ò, eye be wɔ̀ èvuɛ̃, sɔ dà Tɔhonɔ̀ be èse kèawo kpata dòmètɔ ɖe jia, ne mu wɔ̀ ɖo woa dòmètɔ ɖèka pɛ ji ò a;
3ne e nyi be hũbonɔ kè wo do àmì èta na a ye wɔ̀ èvuɛ̃ a, eye, to ekè a ji a, e na dùkɔ̃ a jè àgɔ̀, ɖo èvuɛ̃ kè be wɔ̀ a ta a, e la sɔ ènyìsu ɖèka kè ŋuti èvuɛ̃ ɖekpe mu lè ò a va Tɔhonɔ̀ be ŋùmè, la sɔ savɔ ɖo èvuɛ̃ a ta. 4E la sɔ ènyìsua va Tɔhonɔ̀ be ŋùkɔ̀, lè Ègòdodo be gòxɔa mɔnu; e la ɖo àlɔ̀ èta ji na ènyìsua, eye be la sò èhlò na ènyìsua, lè Tɔhonɔ̀ be ŋùkɔ̀. 5Hũbonɔ kè wo do àmì èta na a la sɔ ènyìsua be èhũ, sɔ yì Ègòdodo be gòxɔa mè. 6Hũbonɔa la sɔ àlɔ̀vi tɔ èhũa mè, eye be la sɔ èhũa wu ɖo kɔ̀kɔ̀ɛpea be èxɔ̀mèsɔ̀vɔ be àkpa kè le ze a ŋuti, zè adrɛ̃, lè Tɔhonɔ̀ be ŋùmè. 7E yomè a, hũbonɔa la sɔ èhũa ɖo ègbe hɔ̃hɔ̃ɛ be vɔsakpe kè lè Ègòdodo be gòxɔa mèa be àzòwo ji, lè Tɔhonɔ̀ be ŋùkɔ̀, eye be la sɔ ènyìsu be èhũ kpɔ̀tɛa keŋu kɔ̀ ɖo ènumème be vɔsakpe kè lè Ègòdodo be gɔ̀xɔa mɔnua be gɔ̃mè. 8Hũbonɔ a la ɖè àfi kèwo keŋu do àmì lè ènyìsu kè be sɔ le savɔ ɖo èvuɛ̃ taa ŋuti: àmì kè trɔ do àdɔ̀gboawo ku ekè kpata lè woa jia, 9kpe ɖo àyìku èvèawo ku àmì kè lè woa ŋutia kudo ekè lè àlìmèa ŋuti, e la ɖè àgòa, kpe ɖo àyìkuawo ŋuti, 10sìgbè lekè wo ɖènà èlãa be tèpe kèawo ke na ènyìsu kè wo wùnà na ɖèkawɔ̀wɔ be vɔsaa nènea, nènea ke be la ɖè wo, la sɔ ɖo èzò nu, lè vɔsakpea ji, na ènumème vɔsa. 11Ènyìsua be àgbàzea, yebe èlãa keŋu, kpe ɖo èta ku àfɔ̀awo ŋuti, yebe àdɔ̀gbowo ku èmia, 12ne mi la gblɔ̃ kpòa, ènyìsua be èlã kè kpɔ̀tɔ̀a, hũbonɔa la na, wo la kɔ ɛ̀ to lè àsàɖaa mè, yì tèpe ɖe kè ŋuti kɔ̀a, àfi kè wo kɔ̀nà àmì be àfiwo ɖoa, wo la fɔ̀ wo ɖo ànakè ji, eye hũbonɔa la tɔ wo èzò. Àfikè wo kɔ̀nà àmì be àfiwo ɖoa ye wo la tɔ wo èzò lè.”
Vɔsa ɖo àmèha bliboa be èvuɛ̃wo ta
13“Ne Izràɛlviwo be àmèha kpata ye mu nya ò, vɔ̀a, wɔ̀ èvuɛ̃, eye dùkɔ̃a mu sè è ò a, ne èse ɖèka pɛ ji wo dà a, eye wo jè àgɔ̀a, 14ne àmèwo va nya èvuɛ̃a, àmèha a la sɔ ènyìsu ɖèka savɔ ɖo èvuɛ̃a ta, lè Ègòdodo be gòxɔa mɔnu; 15Àmèhaa be àmèsĩsĩwo la ɖo àlɔ̀ èta ji na ènyìsua, lè Tɔhonɔ̀ be ŋùkɔ̀. 16Hũbonɔ kè wo do àmì èta na a, la sɔ ènyìsua be èhũa be èɖe yì Ègòdodo be gòxɔa mè; 17hũbonɔa la sɔ àlɔ̀vi tɔ èhũ kè be kùa mè, eye, lè Tɔhonɔ̀ be ŋùmè a, e la wu ì ɖo àkpa kè le ze na èxɔ̀mèsɔ̀vɔa ŋuti, zè adrɛ̃; 18e yomè a, e la sɔ èhũ kèa ɖo vɔsakpe kè lè Tɔhonɔ̀ be ŋùkɔ̀, lè Ègòdodo be gòxɔa mèa be àzòawo ji, eye be la sɔ èhũ kpɔ̀tɛa kɔ̀ ɖo ènumème be vɔsakpe kè lè Ègòdodo be gòxɔa mɔnua be gɔ̃mè. 19E la ɖè àfi kèwo keŋu do àmì na ènyìsua, eye be la sɔ wo ɖo èzò nu, lè vɔsakpea ji. 20Lekè ye be wɔ̀ ènyìsu kè wo sɔ savɔ ɖo èvuɛ̃ taa, ke ye be la wɔ̀ ènyìsu kèa cã. Nène a ke ye be la gbà wɔ̀. Ne hũbonɔa wɔ̀ èvuɛ̃ sɔsɔkè be èkɔ̀nua ɖo àmèha jia, Tɔhonɔ̀ la sɔ èvuɛ̃a sɔ kè è. 21Hũbonɔa la na, wo la kɔ ènyìsua to lè àsàɖaa mè, eye be la tɔ ɛ̀ èzò, sìgbè lekè be tɔ èzò ènyìsu ɖetɔa nène.”
Vosa ɖo àgbònùgla be èvuɛ̃ ta
22“Ne dùkɔ̃a be àgbònùgla ɖe ye wɔ̀ èvuɛ̃a, ne mu nya gbɔ̀xue dà Tɔhonɔ̀, yebe Mawu be èseawo dòmètɔ ɖèka pɛ ji ò, eye be jè àgɔ̀a, 23ne wo ɖè èvuɛ̃ kè be wɔ̀a fiɔ ɛ̀a, e la hɛ̃ ègbɔsu va, àsu kè ŋuti èdɔ̀lele ɖekpe mu lè ò a; 24e la ɖo àlɔ̀ èta ji na ègbɔsua, eye be la sò èhlò na ɛ̀, lè àfi kè wo sònà èhlò na ènumème vɔsa be èlãwo lèa, lè Tɔhonɔ̀ be ŋùkɔ̀. Ekèa nyi vɔsa ɖo èvuɛ̃ ta, na sɔsɔkè. 25Hũbonɔa la sɔ àlɔ̀vi tɔ èvuɛ̃ sɔsɔkè be vɔsa be èhũa mè, la sɔ ɖo vɔsakpe be àzòawo ji; e yomè a, e la sɔ èhũ kpɔ̀tɛa kɔ̀ ɖo vɔsakpea be gɔ̃mè. 26Hũbonɔa la sɔ èlãa be àfi kèwo keŋu do àmìawo tɔzò, lè vɔsakpea ji, sìgbè lekè be wɔ̀nà ɛ̀ na ŋuti fàfa be vɔsaa nène. Ne hũbonɔa wɔ̀ èvuɛ̃ sɔsɔkè be èkɔ̀nua na àgbònùglaa, eŋuã, Mawu la sɔ èvuɛ̃a kè àgbònùgblaa.”
Vɔsa ɖo èdùmèvi be èvuɛ̃ ta
27“Ne èdùmèvi ɖe ye mu nya ò, vɔ̀a wɔ̀ ènu ɖe kè be èse Tɔhonɔ̀ do a, eŋuã, e jè àgɔ̀. 28Ne wo gbe ɖè èvuɛ̃ kè be wɔ̀a fiɔ ɛ̀ kpòa, e ɖo la na ègbɔ ɖèka, ègbɔnɔ kè ŋuti èdɔ̀lele ɖe mu lè ò a ɖo èvuɛ̃ kè be wɔ̀a ta. 29E la ɖo àlɔ̀ èta ji na èlã ke be sɔ le savɔ ɖo èvuɛ̃ taa, eye be la sò èhlò na ɛ̀, lè àfi kè wo sònà èhlò na ènumème vɔsa be èlãwo lèa. 30Hũbonɔa la sɔ àlɔ̀vi tɔ èvuɛ̃ sɔsɔkè be vɔsa be èhũa mè, la sɔ ɖo vɔsakpe be àzòawo ji; e yomè a, e la sɔ èhũ kpɔ̀tɛa kɔ̀ ɖo vɔsakpea be gɔ̃mè. 31Hũbonɔa la ɖè èlãa be àfi kèwo keŋu do àmìa, sìgbè lekè be wɔ̀nà ɛ̀ na ŋuti fàfa be vɔsaa nènea, eye be la sɔ wo tɔzò, lè vɔsakpea ji. Ne hũbonɔa wɔ̀ èvuɛ̃ sɔsɔkè be èkɔ̀nua na àmè kè jè àgɔ̀a vɔ̀a, eŋuã, Mawu la sɔ èvuɛ̃a kè àmèa#4.31 Hɛ̃h 15.27-28 .”
32“Ne àmè kè jè àgɔ̀a jro be yèa na àlɛ̃ bòhũ, na vɔsa ɖo èvuɛ̃ taa, e ɖo la hɛ̃ ènɔ kè ŋuti èdɔ̀lele ɖekpe mu lè ò a va. 33E la ɖo àlɔ̀ èta ji na èlã kè be sɔ le savɔ ɖo èvuɛ̃ taa, eye be la sò èhlò na ɛ̀, lè àfi kè wo sònà èhlò na ènumème vɔsa be èlãwo lèa. 34Hũbonɔa la sɔ àlɔ̀vi tɔ èvuɛ̃ sɔsɔkè be vɔsa be èhũa mè, la sɔ ɖo vɔsakpe be àzòawo ji; e yomè a, e la sɔ èhũ kpɔ̀tɛa kɔ̀ ɖo vɔsakpea be gɔ̃mè. 35Hũbonɔa la ɖè èlãa be àfi kèwo keŋu do àmìa, sìgbè lekè wo wɔ̀nà ɛ̀ na àlɛ̃ kè wo sɔ le wɔ̀ ŋuti fàfa be vɔsaa nène, eye be la sɔ wo tɔzò, lè vɔsakpea ji, kpe ɖo ènu ɖùɖu kèwo wo le tɔzò na Tɔhonɔ̀a ŋuti. Ne hũbonɔa wɔ̀ èvuɛ̃ sɔsɔkè be èkɔ̀nua na àmè kè jè àgɔ̀a vɔ̀a, eŋuã, Mawu la sɔ èvuɛ̃a kè àmèa.”
Mina Bible © Bible Society of Togo, 2014.