Levìwo 3
3
Ɖèkawɔ̀wɔ be vɔsa
1Ne àmè ɖe la sɔ èlã, lè yebe èlãha mè, la sɔ wɔ̀ ŋuti fàfa be vɔsaa, ne e nyi ènyìa, e ɖo la sɔ àsu, àlo, ènɔ kè ŋuti èdɔ̀lele ɖekpe mu lè ò a. 2E la sɔ àlɔ̀ ɖo èta ji na ɛ̀, eye be la sò èhlò na ɛ̀, lè Ègòdodo be gòxɔa mɔnu. E yomè a, hũbonɔ, Arɔ̀n be èviawo la sɔ yebe èhũa wu, trɔ do vɔsakpea. 3Wo la sɔ ŋuti fàfa be vɔsa kèa be àmì kè trɔ do àdɔ̀gbo a wo a ku kèwo keŋu lè àdɔ̀mènuawo jia, 4kpe ɖo àyìku èvèawo ku àmì kè lè woa ŋutia kudo kè lè àlìmèa ŋuti, wo la ɖè àgòa, 5e yomè a, Arɔ̀n be èviwo la sɔ wo ɖo èzò nu ku ènumème vɔsa kè lè èzòtiawo ji, lè èzòa nu xoxoa. Tɔhonɔ̀ be ènu ɖùɖu kè la fiɔ̃ keŋu-keŋu, la hɔ̃ɛ gbligbli, ne bèa jè ŋùmè na Tɔhonɔ̀a ye be nyi.
6Ne àlɛ̃, àlo, ègbɔ ye e hɛ̃ va Tɔhonɔ̀ be ŋùkɔ̀, la sɔ wɔ̀ ŋuti fàfa be vɔsaa, e la sɔ èlãa, àsu, àlo, ènɔ kè ŋuti èdɔ̀lele ɖe mu lè ò a va. 7Ne àlɛ̃ ye e hɛ̃ vaa, e la sɔ ɖo Tɔhonɔ̀ be ŋùmè; Tɔhonɔ̀ be ènu ɖùɖu kè la fiɔ̃ keŋu-keŋu, la hɔ̃ɛ gbligbli, ne bèa jè ŋùmè na Tɔhonɔ̀a ye be nyi. 8E la sɔ àlɔ̀ ɖo èta ji na ɛ̀, eye be la sò èhlò na ɛ̀, lè Ègòdodo be gòxɔa mɔnu. E yomè a, hũbonɔ, Arɔ̀n be èviawo la sɔ yebe èhũa wu, trɔ do vɔsakpea. 9Wo la ɖè àfi kèwo do àmìa: àsikea kpata, wo la ɖè è lè èjìmè-pua nu, àmì kè trɔ do àdɔ̀mènuawoa ku kè lè àdɔ̀mènuawo jia#3.9 Kpɔ Tot 29.22, ne woa sɔ ɖo Tɔhonɔ̀ be ŋùmè, la sɔ wɔ̀ ŋuti fàfa vɔsa, la tɔ ɛ̀ èzò, be la fiɔ̃, na Tɔhonɔ̀. 10Wo la ɖè àyìku èvèawo ku àmì kè lè woa ŋutia, kpe ɖo àmì kè lè àlìmèa ŋuti. Wo la ɖè àgòa cã ku àyìkuawo ɖodu. 11Ekèa yomè a, mawunɔa la sɔ woa kpata ɖo èzòa nu, lè vɔsakpea ji. Tɔhonɔ̀ be ènu ɖùɖu kè la fiɔ̃ keŋu-keŋu, la hɔ̃ɛ gbligbli, ne bèa jè ŋùmè na Tɔhonɔ̀a ye be nyi.
12Ne ègbɔ ye wo hɛ̃ vaa, wo la sɔ è ɖo Tɔhonɔ̀ be ŋùmè; 13àmèa la sɔ àlɔ̀ ɖo èta ji na ɛ̀, eye e la sò èhlò na ɛ̀, lè Ègòdodo be gòxɔa mɔnu. E yomè a, hũbonɔ, Arɔ̀n be èviawo la sɔ yebe èhũa wu, trɔ do vɔsakpea. 14Wo la ɖè àmì kè trɔ do àdɔ̀mènuawoa, ekè kpata lè àdɔ̀mènuawo jia, e la nyi ènu ɖùɖu kè wo la mè, be la fiɔ̃a va na Tɔhonɔ̀. 15Wo la ɖè àyìku èvèawo ku àmì kè lè woa ŋutia kpe ɖo àmì kè lè àlìmèa ŋuti. Wo la ɖè àgòa cã ku àyìkuawo; 16ekèa yomè a, hũbonɔa la sɔ woa kpata ɖo èzòa nu, lè vɔsakpea ji. Tɔhonɔ̀ be ènu ɖùɖu kè la fiɔ̃ keŋu-keŋu, la hɔ̃ɛ gbligbli, ne bèa jè ŋùmè na Tɔhonɔ̀a ye be nyi.
Àmìawo kpata nyi Tɔhonɔ̀ tɔ̀. 17Èse màdà be nyi na mì, so jìjimè yì jìjimè, lè àfi ɖekpekpe kè mì lèa: ènu kè gbe nyi àmì, àlo, èhũ kpòa, mì mu la ɖù ì ò.”
Mina Bible © Bible Society of Togo, 2014.