Levìwo 11
11
Ènu kè lè kɔ̀kɔ̀ɛa
1Tɔhonɔ̀ pò nupo na Mosè ku Arɔ̀n, eye be gblɔ̃ na wo be: 2“Mì to na Izràɛlviwo be#11.2 Èlã kèwo be ènyà wo gblɔ̃ lè fikèawo gbà lè Gbì 14.3-20 mè. Èɖewo mu lè miabe ànyigbã ji ò; ekèa ŋuti mi zã kèwo sɔ̀ ku wo, lè mia gbɔawo be nyikɔwo:
“Lè ànyigbã ji be èlãwo keŋu dòmèa, ekèwo mì la teŋu ɖùawo ye nyi ekèa: 3Èlã kèwo be fèsu mè fɛ̃, eye wo gbìgbɔ̀ ɖùnà ènu kè wo mìa, mì teŋu ɖù wo. 4Gãkea, lè èlã kèwo gbìgbɔ̀ ɖùnà ènu kè wo mìa, eye wo ɖo fèsua dòmèa, mì mu ɖo la ɖù ekèwo be nyikɔwo gbãnàa ò:
èkpovè-sɔ, ɖoa, e gbìgbɔ̀ ɖùnà ènu kè be mìa, vɔ̀a, mu ɖo fèsu ò. Mì kpɔ ɛ̀ be e lè màkɔ̀ màkɔ.
5Èkpetomè be èxɔ̀#11.5 Èkpetomè be èxɔ̀ nyi èlã ɖe kè nɔ̀nà sìgbè èxɔ̀ nène, e gbìgbɔ̀ ɖùnà ènu kè be mìa, vɔ̀a, mu ɖo fèsu lè àfɔ̀ nu, sìgbè ègbɔ, àlo, àvũgbɛ nène ò, vɔ̀a fèsu ètɔ̃ lè yebe ŋùgbedòmè be àfɔ̀ èvèawo nu, sìgbè kpakpa tɔ̀ nène, eye ŋùkɔ̀ be àfɔ̀ èvèawo ɖo àfɔ̀vi ènè-ènè, ɖoa, e gbìgbɔ̀ ɖùnà ènu kè be mìa, vɔ̀a, mu ɖo fèsu ò. Mì kpɔ ɛ̀ be e lè màkɔ̀ màkɔ.
6Àzũi, ɖoa, e gbìgbɔ̀ ɖùnà ènu kè be mìa, vɔ̀a, mu ɖo fèsu ò. Mì kpɔ ɛ̀ be e lè màkɔ̀ màkɔ.
7Èhã, ɖoa, e ɖo fèsu kè mè fɛ̃ ɖo èvèa, vɔ̀a, mu gbìgbɔ̀ ɖùnà ènu kè be mìa ò. Mì kpɔ ɛ̀ be e lè màkɔ̀ màkɔ.
8Mì mu la ɖù woabe èlã ò, eye mì mu la tɔ àsi woabe kuku ŋutɔ cã ŋuti ò. Mì kpɔ wo be wo lè màkɔ̀ màkɔ.
9Lè èlã kèwo ye lè ètɔ̀ mèawo dòmèa, ekèwo mì teŋu ɖùawo ye nyi ekèa: èlã ɖekpekpe kè so àpù mè, àlo, ètɔ̀ mè, kè ɖo àwà ku ècroa, mì teŋu ɖù wo. 10Vɔ̀a, mì mu la ɖù ekèwo kpata mu ɖo àwà, àlo, ècro, ku ètɔ̀mè be èlãklìviwo ku èlã, àlo, ènu àgbè àgbè kèwo keŋu lè èsì mè, lè ètɔ̀ mè, àlo, lè àpù mèawo ò. Wo nyi èkɔ̀ na mì. 11Eye, e nyi èse na mì be mì mu la ɖù wo ò; mì mu la ɖù woabe èlã ò, eye mì mu la tɔ àsi woabe kuku ò: 12ètɔ̀mèlã ɖekpekpe kè mu ɖo àwà, àlo, ècro ò a nyi èkɔ̀ na mì.
13Lè xèviwo dòmèa, ekèwo nyi èkɔ̀ na mìawo ye nyi ekèwo be nyikɔwo gbãnàa: mì mu la ɖù wo ò: èhɔ̃, àklàsu, àpùmè-hɔ̃, 14àvàkò be hati vòvòvòwo, 15àkpàfiɔ̃ ku yebe hati vòvòvòwo, 16tatabòli, fãvihũto, àpùmè-hɔ̃ne, àmlãkoe be hati vòvòvòwo, 17àzexe, àpù-kpakpa, fãvihũto-vi, 18àxomè-zexe, èzã-mlãkoe, àklàsu, 19èglò ku èglò be hati vòvòvòwo, àgùtɔ, àwàwàvi.
20Èlãklìvi ɖekpekpe kè to àwàda, vɔ̀a le zɔ̃ lè àfɔ̀ ènè jia, nyi èkɔ̀ na mì. 21Gãkea, lè èlãklìvi kèwo to àwàda, vɔ̀a, zɔ̃nà lè ànyigbãawo dòmèa, ekèwo mì teŋu ɖùawo ye nyi ekèa: woawo ye nyi ekèwo gbà ɖo àta, kpe ɖo àfɔ̀awo ŋuti, ne woa sɔ nɔ tìkpo, lè ànyigbã pupui jia. 22Ekèwo mì gbà teŋu ɖùawo ye nyi: èbɔ̀ be hati vòvòvòwo, tìkpotìkpowo ku woa hatiwo, kpe ɖo hùesuviwo ŋuti. 23Vɔ̀a, èlãklìvi ɖekpekpe kè ɖo àwàda, sɔ zrònà, eye àfɔ̀ ènè kpò ye lè e sia, nyi èkɔ̀ na mì.”
24Sɔ kpe èa, èlã ŋuawo keŋu nana be mìa ŋuti mu kɔ̀nà ò. Àmè ɖekpekpe kè tɔ àsi woabe kukua la nɔ̀ màkɔ̀ màkɔ, kaka na fìɛ̃si mè. 25Àmè ɖekpekpe kè kɔkɔ woabe kukua la nɔ̀ màkɔ̀ màkɔ, kaka na fìɛ̃si. 26Èlã kèwo keŋu be fèsu mè mu fɛ̃ ò, àlo, kèwo mu gbìgbɔ̀ ɖùnà ènu kè wo mìa ò a, mìa kpɔ wo be wo lè màkɔ̀ màkɔ. Àmè ɖekpekpe kè tɔ àsi woa ŋutia la nɔ̀ màkɔ̀ màkɔ. 27Nène a kea, èlã kèwo kpata ɖo àfɔ̀ ènè, eye wo zɔ̃nà lè àfɔ̀xòmè jiawo keŋu ŋuti mu kɔ̀ na mì ò. Àmè ɖekpekpe kè tɔ àsi woabe kuku ŋutia, la nɔ̀ màkɔ̀ màkɔ, kaka na fìɛ̃si mè, 28eye àmè ɖekpekpe kè kɔkɔ woabe kukua ɖo la nyà yebe àwùwo, eye be la nɔ̀ màkɔ̀ màkɔ, kaka na fìɛ̃si mè, ɖo wo lè màkɔ̀ màkɔ na mì.
29Lè èlã wliwli kèwo ye le ta lè ànyigbã jiawo dòmèa, ekèwo lè màkɔ̀ màkɔ na mìawo ye nyi: àdɔ̀, àfĩ, àdòŋùglo gã vòvòvòwo, 30hɔ̃miyàtre, àdòŋùglo, àdibòlò, ève ku àgàmà. 31Ekèawo ye nyi èlã wliwli kèwo tana lè ànyigbã jiawo dòmètɔ kèwo lè màkɔ̀ màkɔ na mìawo. Àmè ɖekpekpe kè tɔ àsi woabe kukua la nɔ̀ màkɔ̀ màkɔ kaka na fìɛ̃si mè. 32Ne èlã vi kèawo dòmètɔ ɖe ku, eye be gɛ̃ jè ènu ɖe jia, ènu kèa la nɔ̀ màkɔ̀ màkɔ; ne e nyi ènu ɖùɖu be ènuzãzã kè wo sɔ àti wɔ̀, àlo, àwù, àgbàze, àlo, kpɛtɛa, ne e gbe nyi ènu ɖùɖu wɔ̀nu kè wo zãna na ènu ɖekpe kpòa, wo la sɔ èsì klɔ ɛ̀, vɔ̀a, e la nɔ̀ màkɔ̀ màkɔ kaka na fìɛ̃si mè. 33Ne èlã vi kèa gɛ̃ jè àgbã ɖekpekpe kè nyi èkɔgbãa mèa, ènu kè kpata lè àgbãa mèa trɔ màkɔ̀ màkɔ, eye mì la gbã àgbã ŋua. 34Ne èsì kèa kɔ̀ ɖo ènu ɖùɖu jia, ènu ɖùɖua la trɔ màkɔ̀ màkɔ, eye ne èsì bu, àlo ènunùnu mè be kɔ̀ ɖoa, ènu ɖekpekpe kè mè be lèa mèa, e la trɔ màkɔ̀ màkɔ. 35Ne èlã vi kèawo dòmètɔ ɖe be kuku gɛ̃ jè ènu ɖe jia, ènua la trɔ màkɔ̀ màkɔ, ne ènua nyi àɖàdòkpo, àlo, ègà-dòkpoa, mì la kãkã wo, ɖoa wo trɔ màkɔ̀ màkɔ, eye mì la kpɔ wo ɖo màkɔ̀ màkɔ nu. 36Vɔ̀a, ne vudo, àlo, èsìdo mè ye èlã via jè a, èsì kè lè e mèa kpata la nɔ̀ kɔ̀kɔ̀ɛ, gãkea, àmè kè tɔ àlɔ̀ èlã kukua ŋutia la nɔ̀ màkɔ̀ màkɔ. 37Ne èlãviawo dòmètɔ ɖe be kuku gɛ̃ jè èlù, àlo, èbli kè wo la yì do jia, èbli, àlo, èlùa la nɔ̀ màkɔ̀ màkɔ. 38Eye, ne wo kɔ̀ èsì ɖo èbli àlo, èlù ji, ne woa ɖù, gbɔ̀xue èlãviawo dòmètɔ ɖe be kuku gɛ̃ jè e mèa, èbli, àlo, èlùa la nɔ̀ màkɔ̀ màkɔ.
39Ne mìabe èlã ɖe kè mì ɖùnàa kua, ne àmè ɖe tɔ àsi yebe kukua, àmèa la nɔ̀ màkɔ̀ màkɔ kaka na fìɛ̃si mè. 40Ne àmè ɖe ɖù èlã ŋua, àmèa la nɔ̀ màkɔ̀ màkɔ, kaka na fìɛ̃si mè. 41Èlãvi kèwo kpata tana lè ànyigbãa nyi èkɔ̀ na mì. Wo mu la ɖù wo ò. 42Èlãvi kèwo kpata tana lè ànyigbãa, ne wo tana lè pòdo ji, àlo, zɔ̃nà lè àfɔ̀ ènè ji, àlo, zɔ̃nà ɖo èbua, mì mu la ɖù wo ò, ɖoa, wo nyi èkɔ̀ na mì. 43Mì mu gbà tɔ àsi woa ŋuti, àlo, la ɖù wo, àlo, la na, ne woa tɔ mìa ŋuti, ne mìa va nɔ̀ màkɔ̀ màkɔ ò. 44Ènyè ye nyi Tɔhonɔ̀, mìabe Mawu. Mì la kɔ̀ mìa ɖokoewo ŋuti, ne mìa nɔ̀ kɔ̀kɔ̀ɛ, ɖoa, nyè ŋutɔ mù lè kɔ̀kɔ̀ɛ. Mì mu gbà gble mìa ɖokoe ku èlãvi kèwo tana lè ànyigbã kèa ji, ne mì mu gbà nɔ̀ kɔ̀kɔ̀ɛ ò. 45Ènyè Tɔhonɔ̀ ye kplɔ̀ mì to jo lè Ejiptè-nyigbã ji, ne ma nyi mìabe Mawu. Ekèa ŋuti, mì ɖo la nɔ̀ kɔ̀kɔ̀ɛ, ɖoa, nyè ŋutɔ, mù lè kɔ̀kɔ̀ɛ#11.45 1Pet 1.16.”
46Ekèawo ye nyi èse kèwo kù ɖo èlã, xèvi ku ènu àgbè àgbè kèwo keŋu hùãnà lè èsì mè, zɔ̃nà lè ànyigbã jia ŋuti. 47Èse kèawo la na be mìa jèsi èlã kèwo ŋuti kɔ̀a, lè kèwo ŋuti mu kɔ̀ ò a gbɔ, ne mìa nya ekèwo mì la ɖùa, lè ekèwo mì mu la ɖù ò a gbɔ.
Mina Bible © Bible Society of Togo, 2014.