Levìwo 10
10
Èse so ècɔwɔ̀wɔ ŋuti
1Arɔ̀n be ŋusùvi èvè, Nadàb ku Abihù sɔ woabe lififiɔ̃nuwo, ɖè èzò ɖo woa mè, eye wo kɔ̀ lifi ɖo èzòa mè, eye wo sɔ èzò màkɔ̀ màkɔ ɖo Tɔhonɔ̀ be ŋùkɔ̀, èzò màkɔ̀ màkɔ kè be ègbè wo mu ɖè na wo ò a. 2Ekèa na be èzò to so Tɔhonɔ̀ be ŋùkɔ̀, fiɔ̃ wo, eye wo ku lè Tɔhonɔ̀ be ŋùkɔ̀. 3Mosè gblɔ̃ na Arɔ̀n be: “Ènyà kè Tɔhonɔ̀ gblɔ̃a ye nyi ekèa be:
Àmè kèwo ye le gogo mùa,
mù jro be wo ne kɔ̀ nyikɔ nyè ŋuti,
eye lè dùkɔ̃ bliboa be ŋùmè a,
woa na mù gogo.'”
Arɔ̀n ci kpoo#10.3 Lè gɔ̃mèɖèɖe buwo mèa, wo ŋlɔ̀ ɛ̀ be: “Arɔ̀n nɔ̀ kpoo”, àlo, “Arɔ̀n bɔ̀nu kpoo”, àlo, “Arɔ̀n do àvi-ha ɖoɖa”..
4Vɔ̀a, Mosè yɔ Misaɛ̀l ku Ɛlsafàn, Uzìɛl kè nyi Arɔ̀n be àtàvia be ŋusùviawo, eye be gblɔ̃ na wo be: “Mì dɔ̃ va kɔkɔ mìa nɔ̀viawo jo lè kɔ̀kɔ̀ɛpea mɔnu, to lè àsàɖaa mè.” 5Kè wo dɔ̃ vaa, wo kɔkɔ àmè kukuawo, to lè àsàɖaa mè, woabe àwùawo lè woa ŋuti nènea, sìgbè lekè Mɔsè ɖè ègbè na woa nène. 6Eye Mosè gblɔ̃ na Arɔ̀n ku yebe ŋusùviwo, Eleazàr ku Itamàr be: “Mì mu gbà kã èɖà ɖo èta ò, eye mì mu gbà zɛ̃ mìabe àwùwo, sɔ wɔ̀ ècɔ na mìa nɔ̀viawo ò; ne mu nyi nène ò a, mì la ku, eye mì la dɔ̃ Tɔhonɔ̀ be àdɔ̀mèze va àmèha a kpata ji. Mìa nɔ̀vi Izràɛlviwo keŋu ne fã àmè kèwo Tɔhonɔ̀ sɔ èzò crɔ̃a. 7Mìawo ya, mì mu la ɖè àfɔ̀ lè Ègòdodo be gòxɔa mɔnu ò, ɖoa, Tɔhonɔ̀ be àmìsìsi lè mìa ŋuti.” Wo zɔ̃ ɖo Mosè be ègbèa ji.
8Tɔhonɔ̀ gblɔ̃ na Arɔ̀n be: 9“Èwò ku ŋusùvi wòwo, mì mu la nù vɛ̃, àlo, àhà sɛ̃sɛ̃, ne mì la ɖo Ègòdodo be gòxɔa mè ò; ne mu nyi nène ò a, mì la ku. Èse kòkòɖàbì be nyi na mì, so jìjimè, yì jìjimè. 10Ne mìa teŋu ɖo sijèje kè la na, mìa nya ènu kè nyi àmlìmànua, lè ekè mu nyi àmìmànu ò a gbɔ, ènu kè ŋuti kɔ̀a lè ekè ŋuti mu kɔ̀ ò a gbɔ, 11àleke be, so ekèa jia, mìa teŋu fiɔ Izràɛlviwo èse kèwo keŋu Tɔhonɔ̀ do na wo, to Mosè jia.”
Èse so vɔsa be èlãwo ŋuti
12Mosè pò nupo na Arɔ̀n, ku Eleazàr ku Itamàr, Arɔ̀n be ŋusùvi kèwo ye kpɔ̀tɔ̀ na ɛ̀awo; e gblɔ̃ na wo be: “Ne mì wɔ̀ ènumème vɔsaa na Tɔhonɔ̀ vɔ̀a, mì la sɔ ènu ɖùɖu vɔsa kè kpɔ̀tɔ̀a, la ɖù ì, kè mawɛhuãnu mu la nɔ̀ e mè ò a, lè vɔsakpea be àxàda mè, ɖoa, ènu ɖùɖu kɔ̀kɔ̀ɛ ŋutɔ be nyi. 13Tèpe kɔ̀kɔ̀ɛ ye mì la ɖù ì lè, ɖoa, àjɔ̀ kè nyi èwò ku ŋusùvi wòwo tɔ̀, lè ènu ɖùɖu kè wo tɔzò na Tɔhonɔ̀a ye be nyi. Ègbèɖèɖe kè mù xɔ̀a ye nyi ekèa. 14Èlã kèwo mì sɔ ɖo Tɔhonɔ̀ be ŋùmèawo be àkɔta ku kèwo ŋuti mì ɖè lèawo be àtaa, mì la ɖù wo lè tèpe kè ŋuti kɔ̀a, wò ŋutɔ, ŋusùvi wòwo ku nyɔ̃nùvi wòwo, ɖoa, àjɔ̀ be nyi na èwò ku èvi wòwo, lè Izràɛlviwo be ŋuti fàfa vɔsa mè. 15Ènu ɖè lè vɔsa ŋuti be èkɔ̀nu be àtaa ku vɔsa sɔ ɖo Tɔhonɔ̀ be ŋùkɔ̀ be èkɔ̀nu be àkɔtaa, àmè kèwo ye le savɔawo la sɔ woa ku àfi kèwo do àmì, eye wo la sɔ wɔ̀ ènumème vɔsaa, wo la sɔ wo ɖo Tɔhonɔ̀ be nùkɔ̀, e yomè a, wò la xɔ̀ wo, eye wo la nyi wò ku èvi wòwo tɔ̀; wo la nyi àjɔ̀ kòkòɖàbì, so jìjimè, yì jìjimè, sìgbè lekè Tɔhonɔ̀ sɔ do èsea nène.
16Ekè Mosè biɔ èvuɛ̃ sɔsɔkè be vɔsaa be ègbɔsua taa, wo gblɔ̃ na ɛ̀ be wo tɔ ɛ̀ èzò. E do àdɔ̀mèze do Eleazàr ku Itamàr, ŋusùvi kèwo ye kpɔ̀tɔ̀ lè Arɔ̀n be èviawo dòmè, eye be biɔ wo be: 17“Ekè vɔsa-lãa nyi èlã kè lè kɔ̀kɔ̀ɛ ŋutɔa, nukɛ ŋuti ye mì mu ɖù ì lè kɔ̀kɔ̀ɛpea ò? Tɔhonɔ̀ sɔ ɛ̀ na mì, ne woa sɔ ɖè àmèha a be èvuɛ̃ jo, àleke be woa sɔ wɔ̀ èvuɛ̃ sɔsɔkè be èkɔ̀nua ɖo àmèha a ta, lè Tɔhonɔ̀ be ŋùkɔ̀ ye. 18Ekè wo mu sɔ yebe èhũ ɖo kɔ̀kɔ̀ɛpea ò a, mì ɖo la ɖù ì, lè àfi kè ŋuti kɔ̀, sìgbè lekè mù gblɔ̃ ɛ̀a nène ye.” 19Arɔ̀n ɖo e ŋuti na Mosè be: “Kpɔɖa, egbèa, wo sɔ woabe vɔsa ɖo èvuɛ̃ ta ku woabe ènumème vɔsa ɖo Tɔhonɔ̀ be ŋùkɔ̀, gãkea, kpɔ ènu kè jɔ̀ ɖo ji nyèa ɖa! Ɖe ye Tɔhonɔ̀ la dà àsi ɖo e ji be ma ɖù èvuɛ̃ sɔsɔkè be vɔsa-lã lè egbè be ŋùkèkè kèa jia?” 20Kè Mosè sè ènyà kèa, e jè ŋùmè na ɛ̀.
Mina Bible © Bible Society of Togo, 2014.