Yosùa 14

Kanàn-nyigbã be mamã

1Ekèa ye nyi ècrɔ̃-nyigbã kè Izràɛlviwo xɔ̀ lè Kanàn-nyigbã jia, ècrɔ̃nu kè ye hũbonɔ Eleazàr ku Nun be èvi ŋusù Yosùa kudo xòmègawo mã na Izràɛl be kɔ̀ta mèviwo a: 2Sìgbè àlekè Tɔhonɔ̀ do è àsi na Mosè ne kɔ̀ta àsiɖèkɛ ku èfã nènea, wo wɔ̀ cãcã, sɔ mãa ànyigbã na àmè sia àmè. 3Ɖo Mosè na ècrɔ̃-nyigbã kɔ̀ta àmè èvè ku kɔ̀ta ɖèka be mamã mè lè Yɔrdàn be àgo ɖèa ji, vɔ̀ mu na Levìwo crɔ̃-nyigbã lè kɔ̀ta kpɔ̀tɛawo mè ò. 4Nyàwo, Yosɛ̀f be viwo mã ɖo kɔ̀ta èvè mè, Manasè ku Efràyim, eye wo mu na tèpe ɖekpe Levìwo lè ànyigbã ji ò, sɔ wu be woa zɛ̃ èdùwo mè, ne woabe èlãhawo woa kpɔ ègbeɖùpe, be woa gbà ɖo tèpe na woabe àdɔ̀kùnuwo. 5Nène a ye Izràɛlviwo mã ànyigbã, sɔ zɔ̃ ɖo ègbè kè Tɔhonɔ̀ do àsi na Mosè a ji. 6Yudà be kɔ̀ta be viwo va yì kpɔ Yosùa lè Gilgàl eye Kàlɛb nyi Yefunè be vi ŋusù so Kenàz be hɛ̃nua, gblɔ̃ na ɛ̀ be: “Wò nya ènyà kè Tɔhonɔ̀ gblɔ̃ na Mosè kè nyi Mawu be àmèa so è nyè gbàkudo èwò ŋuti lè Kàdɛs-Bàrneà nyuɛ̃ ɖe. 7Mù le ɖo èpè èkà wàlɛbɛ kè Tɔhonɔ̀ be sumɔ̃vi Mosè dɔ̃ mù so Kàdɛs-Bàrneà ne ma yì sã ŋùku lè ànyigbã kèa ji eye mù va ɖo ègbèa na ɛ̀ sɔ zɔ̃ ɖo jìjigbè nyèa ji pɛpɛpɛ. 8Ekè nɔ̀vi nyè kèwo kplɔ̀ mù yìa, wo le do àdìkasoe na dùkɔ̃a, nyè ya mù sègbè na Tɔhonɔ̀ Mawu nyè. 9Gbè ŋua gbèa, Mosè kã àtãŋu kèa be: “Ɛ̃ɛ, ànyigbã kè ji àfɔ̀ wò toa la nyi èwò ku jìjimèvi wòwo tɔ̀ ɖo wò nɔ̀ ègbè ji na Tɔhonɔ̀, Mawu nyè.” 10Eye, kpɔɖa èpè èkà ci àtɔ̃ ye va yì fifì kè Tɔhonɔ̀ na mù nɔ̀ àgbè sɔ zɔ̃ ɖo yebe ènyà kè be gblɔ̃ na Mosè wàlɛbɛ kè ye Izràɛlviwo gbà le zɔ̃ lè zògbèa jia; fifìa mù sĩ xɔ̀ èpè èkà èvè ci àtɔ̃. 11Egbèa mù gbà ɖo ŋusɛ̃ sìgbè àlekè be nɔ̀ àsi nyè wàlɛbɛ kè Mosè dɔ̃ mù sã nène. Ŋusɛ̃ kè lè àsi nyè fifìa, gbà lè sìgbè ŋusùti wɔ̀ àhùa tɔ̀ nène. Mù gbà sɔ̀gbè la wɔ̀ èdɔ ɖekpekpe. 12Yeŋutia, so èto nyigbã kè ŋuti Tɔhonɔ̀ pò nupo so gbè ŋua gbèa na mù, ɖo wò sè gbè ŋua gbè ke be àgbògbò be èdù gãwo lè funu eye Anàk be viwo lè woa mè. Tamunyɔ òa, Tɔhonɔ̀ la kpe ɖo ŋuti nyè eye mù la xɔ̀ èdù kèawo sìgbè àlekè Tɔhonɔ̀ ŋutɔ gblɔ̃a nène.” 13Yosùa tu sì na Kàlɛb, Yefunè be vi ŋusùa eye be sɔ Hebrɔ̀n sɔ ɖù ècrɔ̃ na ɛ̀. 14Ènu kè ŋuti ye Hebrɔ̀n nyi ècrɔ̃ na Yefunè be vi ŋusù, Kàlɛb kè so Kenàz be hɛ̃nu kaka va na egbè ɖo e nɔ̀ ègbè ji na Tɔhonɔ̀, Izràɛl be Mawu a. 15Wo yɔna Hebrɔ̀n be èdùa sã be Kirìat-Arbà: Arbà kè nyi ŋusù kè jɔ̀ àsu lè Anàk be viwo kpata dòmèa. Eye ànyigbã kpɔ ŋuti fàfa, ɖo àhùa wɔ̀wɔ tɔtè.

Currently Selected:

Yosùa 14: GEN

Highlight

Copy

Compare