Yoɛ̀l 4
4
Tɔhonɔ̀ la ɖokòjo na dùkɔ̃wo
1Tɔhonɔ̀ gblɔ̃ be:
“Wàlɛbɛ ŋua, mù la na Yudà kudo Yèruzàlɛm
la trɔ nɔ̀ woabe bònu sìgbè sãa nène.
2Mù la bɔ̀ dùkɔ̃wo kpata ɖodu
la kplɔ̀ wo yì Yòsafat be bàlìa mè,
eye mù la gblehùɛ do wo ɖo ènu kè wo wɔ̀ ku Izràɛl,
dùkɔ̃ nyèa ŋuti, ɖo wo kãkã wo ɖo kɔ̀ta
buwo dòmè eye wo ma ànyigbã nyèa.
Mù la ɖokòjo na wo ɖo dùkɔ̃ nyè kè wo maa ŋuti.
3Wo dà àkɔ̀ sɔ ma dùkɔ̃ nyè
eye wo sà ɖèkajɛviwo sɔ plè gbòlòmewo,
eye wo sà tùgbɛ̀jɛviwo sɔ plè vɛ̃ kè wo nùa.
4Mì, Tiròtɔwo, Sidɔ̀ntɔwo
kudo mì àmè kèwo lè Filistì be àgowo jia,
nukɛ ŋutɔ ye mì le ji so gbɔ nyè ò?
Ne mì le ji la biɔhlɔ̃a, ne nyi nènea
mù la trɔ hlɔ̃biɔbiɔa ɖo mìa ŋutɔ ji.
5Mì sɔ klòsalò kudo sìka nyè
àdɔ̀kùnu xɔ̀ àsì nyèwo kpata
ye mì lɔ yì mìabe vòduxɔwo mè.
6Mì sà Yudàtɔwo kudo Yèruzàlɛmtɔwo na Griktɔwo
ne woa nɔ̀ àzɔ̀ge na woabe èdùa.
7Mì ɖoto! Mù la gbìgbɔ̀ kplɔ̀ wo gbɔ̀
so àfi kè mì yì sà wo lèa
eye mù la trɔ kɔ̀ yebe àdɔ̀mèzea ɖo mìa ji.
8Mù la sà mìabe ŋusùviwo kudo
nyɔ̃nùviwo do Yudàtɔwo eye woa cã
la gbìgbɔ̀ sà wo na Sabàtɔwo lè èdù dìdì ɖe mè.”
Tɔhonɔ̀ ye gblɔ̃ ɛ̀!
Àhùa ŋùgbesitɔ̀a kudo Tɔhonɔ̀ be kòjoɖoɖo
9Mì do àpa, gblɔ̃ ènyà kèa na dùkɔ̃wo be:
“Mì sɔ àhùawɔ̀nu, mì yɔ àhùawɔ̀tɔ sɛ̃ŋuwo bɔ̀.
Gbãdãgbãwo kpata ne to va eye mìa sɔ àhùa ɖo kɛ̃tɔa ji.
10Mì sɔ mìabe àgblèkèke be kòjoewo wɔ̀ èwiwo.
Mì sɔ mìabe àgɔ̃wo wɔ̀ èhuãwo.
Eye vɔ̃vɔ̃nɔ̀tɔwo ŋutɔ cã ne gblɔ̃ na woa
ɖokoe be: 'àhùasukawo ye mi nyi'.
11Mì ɖèbla va, mìa dùkɔ̃ kèwo pòxla do mia
mì bɔ̀ ɖodu lè bàlì ɖèkaa mè.”
Tɔhonɔ̀, ɖo àhùawɔ̀tɔ sɛ̃ŋuwo ɖoɖa, yì kpe àhùa kudo wo.
12Tɔhonɔ̀ gblɔ̃ be:
“Dùkɔ̃wo mì sitè ne mìa va Yòsafat be bàlìa mè;
ɖo funua ye mù la nɔ̀ ànyi ɖo
sɔ ɖokòjo na dùkɔ̃ kèwo trɔ do a kpata.
13Mì dà àgɔ̃ a ɖoɖa ɖo nukuyàya ɖì keŋu.
Mì va tùkù wo ɖo vɛ̃kusɛ̃sɛ̃ ɖɔ vɛ̃fiɔ̃nua
eye kplikpãwo ɖɔ le kɔ̀ŋùgbe.
Woabe ènu drã wɔ̀wɔwo jiŋɔ.”
14Eŋuã, àmèha gã ɖe va bàlìa mè
fikè Tɔhonɔ̀ la ɖokòjo lèa.
Ɖo Tɔhonɔ̀ be ŋùkèkèa lili
fikè E la ɖè yebe àdɔ̀mèzea fiɔ lèa.
15Dɔ̃ŋùkusu ku wètri la do vìvìti
eye wètriviwo mu gbà la klɛ̃ ke ò.
16Tɔhonɔ̀ ɖè ègbè so Ziɔ̀n be ètoa ji,
eye àmèwo sè yebe àdɔ̀mèzea so Yèruzàlɛm.
Jiŋùkusi ku ànyigbã a hũhũ!
Vɔ̀a, Tɔhonɔ̀ sɔ àlɔ̀ cɔ̃ yebe dùkɔ̃a ji.
E nyi bèbèpe na Izràɛlviwo.
17E gblɔ̃ na wo be:
“Nène a, mì la nya ɛ̀ be ènyè ye nyi Tɔhonɔ̀, mìabe Mawu
eye mù nɔ̀nà Ziɔ̀n, èto kɔ̀kɔ̀ɛ nyèa ji.
Yèruzàlɛm la gbà trɔ zũ kɔ̀kɔ̀ɛpe ɖe
eye àmèjrowo mu la ɖo emè gbèɖe ò.”
Ènu la gbà nyɔ na Tɔhonɔ̀ be dùkɔ̃a
18“Ŋùkèkè ŋua gbèa,
vɛ̃ yeye la nɔ kɔ̀ŋùgbe so ètokɔ̃ɛwo ji;
èlãha kè lè ètowo jia, la na ànɔsi la kɔ̀ gbɛ̀lu.
Èsì la srà lè Yudà be ètɔ̀wo keŋu mè.
Èsì ɖe la ji so Tɔhonɔ̀ be gòxɔa mè
eye e la wusì Citìm be bàlìa mè.
19Ejiptè la bu yebe àmèwo
eye Edɔ̀m be èdùa la trɔ zũ zògbè,
ɖo wo wɔ̀ èhlɔ̃dãnu ku Yudàviwo
fikè wo wù àmè mà-nyã ɖewo lèa.
20Vɔ̀a, àmèwo la kpɔ̀tɔ̀ nɔ̀ Yudà
kudo Yèruzàlɛm so jìjimè yì jìjimè.
21Woabe èhũ kè kɔ̀ ɖo ànyi a
nyi àmè mà-nyã ɖewo be èhũ,
ènyè Tɔhonɔ̀, mù la kpɔ̀tɔ̀ nɔ̀ Ziɔ̀n.”
Mina Bible © Bible Society of Togo, 2014.