Yoɛ̀l 2
2
Tɔhonɔ̀ be ŋùkèkèa lili
1Mì ku èkpɛ̃ lè Ziɔ̀n.
Mì do àpa lele lè èto kɔ̀kɔ̀ɛ nyèa ji!
Mì àmè kèwo lè ànyigbã a jia, mì hũhũ
ɖo Tɔhonɔ̀ be ŋùkèkèa gbãnà, e lili.
2Vìvìti cicri be ŋùkèkè ɖe ye,
lilikpo yìbɔ kudo àhũjàja be ŋùkèkè.
Èlãklìviwo be àhùakɔ̃ ɖe gbãnà.
Eye wo sùgbɔ gbà ɖo ŋusɛ̃.
Wo gbãnà hòo, sìgbè èzã ye le do ɖo ètowo ji nène.
Àmè ɖe mu kpɔ ɛ̀ nènea kpɔ gbèɖe ò.
Eye àmè ɖe mu la gbà kpɔ ɛ̀
nène lè ŋùkèkè kèwo gbãnàa mè ò.
3Sìgbè èzò bì ènu nènea,
wo crɔ̃ ènu sia ènu lè woabe èmɔ̃wo ji.
Wo mu gble ènu ɖe ɖɛ ò.
Sãa, ànyigbã ji lè sìgbè Edɛ̀n-bɔ mè nène.
Vɔ̀ fifìa, e trɔ zũ zògbè pupui ɖèɖe.
Àmè ɖekpe mu ci àgbè, lè woa si ò.
4Wo lè kpò sìgbè èsɔ yì àhùawo nène,
le sidù sìgbè èsɔdotɔwo nène.
5Sìgbè àhùakèkeviwo be ègbè nènea,
wo le tìkpo jè ètowo tamè;
eye wo le ɖì sìgbè èzò bì àmàkpa pupu nène.
Wo gbãnà lè àgbà nu sìgbè àhùakɔ̃ sɛ̃ŋu ɖe nène.
6Dùkɔ̃wo vɔ̃na lè ŋùkɔ̀ na wo
eye àmèwo be ŋùmè cina kpɔ̃.
7Èlãkliviawo puna èdù lè àmèwo yomè
sìgbè gbãdãgbãwo nène.
Wo liana èglì sìgbè àhùawɔ̀tɔwo nène.
Woa dòmètɔ ɖe sia ɖe lena yebe èmɔ,
mà zɛ̃ yì ɖùsi àlo èmìɔ̃ mè.
8Èlãklìvi ɖe mu dona nupo na nɔ̀viawo ò,
ɖo ɖe sia ɖe nɔ̀nà yebe èmɔ̃ ji tututu.
Wo zrònà tona ènu sia ènu kè wo dà woa, dòmè.
Ɖekpe mu xena èmɔ̃ na wo ò.
9Wo kãkã ɖo èdù gãa mè.
Wo puna èdù to èglìwo ji,
wo liana èkpa ɖo àxuewo mè.
Wo tona flɛsɛ̀ nu ɖona èxɔ̀wo mè, sìgbè fĩãfìwo nène.
10Ànyigbã hũhũna lè ŋùkɔ̀ na wo
eye jiŋùkusi cã jina la gɛ̃.
Dɔ̃ŋùkusu kudo wètri mè ci vĩi,
eye wètriviwo mu gbà le kɔ̀ ò.
11Tɔhonɔ̀ ɖè ègbè lè yebe àhùakɔ̃a be ŋùkɔ̀.
Ɖo yebe àhùakɔ̃ kèwo sènà ègbè na ɛ̀a
sùgbɔ ŋutɔ eye wo gbà ɖo ŋusɛ̃.
Ɛ̃ɛ, Tɔhonɔ̀ be ŋùkèkèa jiŋɔ.
Àmè kɛ ye la tɛŋu nɔ̀tè lè àzã kèa gbè ò?
Wo la trɔ gbɔ̀ va Tɔhonɔ̀ gbɔ
12Tɔhonɔ̀ gblɔ̃ be: “Mì trɔ va gbɔ nyè ku èjì blibo,
lè kuefã, blìbɔ̀-blìbɔ̀ ku èmɔ̃ɛ̃làla mè.
13Mì trɛ̃ mìabe èjì, mu nyi mìabe àvɔwo ò.”
Ɛ̃ɛ mì trɔ va Tɔhonɔ̀ mìabe Mawu a gbɔ:
àdɔ̀mè fàfatɔ ku ŋuzĩzĩku na àmè blibo lè e gbɔ.
Mu dona àdɔ̀mèze kaba ò, gbà ɖɔ ku àdɔ̀mè nyuɛ̃.
E lè ègbè sɔ̀sɔɛ la sɔ nuvuɛ̃ kè àmè.
14Ta mu nyɔ òa, e la teŋu trɔ va yebe ɖoɖowo ji.
Funua, e la gbà kɔ̀ àdɔ̀mè ɖo mìa ŋuti.
Eye mì la hɛ̃ ènunanawo ku vɛ̃ va na Tɔhonɔ̀, mìabe Mawu.
Nubabla ku blìbɔ̀-blìbɔ̀ na Mawu be hùenu
15Mi ku èkpɛ̃ lè Ziɔ̀n,
mì ɖo nubabla ànyi,
mì bɔ̀ àmèhaa nu.
16Mì bɔ̀ dùkɔ̃ bliboa keŋu ɖodu
ne bèa nyi bɔ̀bɔ gãaɖe.
Mì bɔ̀ àmèsĩsĩwo
ɖèviwo kudo èvi lè ànɔ nuwo cã.
Ŋusù kè ɖè èsrɔ̃ yeyea ne to va
nyɔ̃nù kè yì àsuxue yeyea ne to so xɔ̀mè!
17Hũbonɔ kèwo le sumɔ Tɔhonɔ̀a,
wo ne nɔ fã àvi lè mawuxɔa mè
lè vɔsakpea kudo èxɔ̀ mɔnua be dòdòmè.
Wo ne gblɔ̃ na Mawu be:
“Tɔhonɔ̀ ku ŋuzĩzĩ na dùkɔ̃ wòa.
Mù gbà lɔ̃ be kɔ̀ta buwo ne kò mi ò.
Ne woa nɔ gblɔ̃ be:
“fikɛ ye woabe Mawu a lè ò?”
Tɔhonɔ̀ pò nupo na yebe dùkɔ̃a
18Tɔhonɔ̀ ɖo lɔ̃lɔ̃ tɔ̀xɛ na yebe èdùa.
Yebe dùkɔ̃a be nu wɔ̀ ŋuzĩzĩ na ɛ̀.
19Eye Tɔhonɔ̀ ɖo yebe dùkɔ̃a be kuefã ŋuti, gblɔ̃ na ɛ̀ be:
“kpɔɖa mù la trɔ na mì èbli, vɛ̃ yeye kudo àmì
ne mìa ɖù la ɖɔpò sùsuiɖe.
Nyè mu la gbà na ne dùkɔ̃ kpɔ̀tɛawo ne do mì ŋùkpɛ̃ gbèɖe ò.
20Mù la nyà mìabe kɛ̃tɔ kèwo so èvègoa,
ɖo àzɔ̀ge boo na mì.
Mù la nyà wo ɖoɖa ànyigbã pupui kudo zògbè ji.
Mù la tùtù ŋùkɔ̀jètɔwo ɖo èjè be àpùa mè.
Eye ŋùgbesiawo ya ɖo Mèditɛranèa be àpùa mè.
Woabe gbãdãgbã kèwo kua
be hɔ̃hũɛ jiŋɔ̃a, la gble àyaa pòxla.
Ɛ̃ɛ, Tɔhonɔ̀a, ènu jiŋɔ̃wo ye be wɔ̀nà.
21Èwò, ànyigbã, mù gbà vɔ̃ ò!
Kpɔ jìjɔɛ ne wòa ɖu èwè
ɖo Tɔhonɔ̀ le wɔ̀ ènu jɔ̀ àsuwo.
22Mì, ègbemèlãwo, mì mu gbà vɔ̃ ò!
Zògbè ji be ègbewo la trɔ do àmà,
àtiwo la na kusɛ̃sɛ̃wo
eye vòti ku vɛ̃-gblewo la na woabe àdɔ̀kùnuwo.
23Mì Ziɔ̀n be ànyigbã ji nɔ̀tɔwo mì kpɔ jìjɔɛ
eye mìa sò àyo ɖo Tɔhonɔ̀ mìabe Mawu a ŋuti.
Ne èkuɖìɖi be hùenu va yìa,
e la ɖo èji ɖoɖa mì sìgbè nyɔna nène
eye e la na èji la jà sìgbè àlekè be wɔ̀ na ɛ̀ ɖo sãa nène.
24Èlùwo la ɖɔ àvàa ji,
kplikpãwo la ɖɔ ku vɛ̃ kudo àmìwo cã.
25Tɔhonɔ̀ gblɔ̃ be:
“Mìabe àgblèmènuku kèwo ŋɔviwo,
hùesuviwo, àtrãwo kudo lãklìviwo
va gble keŋu-keŋuã, mù la tu yebe èfɛ̃ na mì.
26Mì la ɖùnu, la ɖɔpò.
Eye mì la nɔ kafu Tɔhonɔ̀ mìabe Mawu a ku gogo.
Ènu jiŋɔwo ɖèɖe ye mù le wɔ̀ na mì.
Dùkɔ̃ nyèa, mu la gbà ɖù ŋùkpɛ̃ ke ò;
27nènea, mì la ŋɔjè e mè be mù lè Izràɛlviwo dòmè,
be ènyè ye nyi Tɔhonɔ̀, mìabe Mawu a
ɖekpe mu lè, sɔ̀ ku mù ò.
Eye èŋù mu la gbà kpɛ̃ dùkɔ̃ nyè kpɔ gbèɖe ò.”
Mina Bible © Bible Society of Togo, 2014.